AbdulRahman Ayyash
 

AbdelRahman Ayyash's Facebook profile

Monday, 5 July 2010
يوسف والي ده راجل محترم
يوم الاتنين اللي فات كنت رايح الدقي، ركبت تاكسي ، و اتجهت الى الدقي
سواق التاكسي كان راجل بذيء حبتين، قاعد يشتم في الناس اللي ماشيين، و في التاكسي اللي سايقه، و في العداد و في التوكيل بتاع الصيانة ..
اتكلم معايا شوية في السياسة، لحد لما وصلنا لمكان ، اظن انه في الدقي، انا مش بركز كتير في الاماكن في القاهرة، في الغالب هو في الدقي، و شاورلي على بيت ، الطريق بيلف حواليه ، قاللي تعرف مين ساكن هنا؟
قلتله لا معرفش
قاللي يوسف والي ... و على فكرة بقى .. يوسف والي ده راجل محترم
انا طبعا افتكرته بيهزر ، قلتله اه طبعا محترم .. نص الشعب عنده فشل كلوي لأن يوسف والي راجل محترم
قاللي لا انا بتكلم بجد .. يوسف والي راجل محترم .. انا رديت .. و قلتله انا مش فاهم فعلا .. ازاي يبقى عمل كل المصايب اللي عملها و تقول عليه راجل محترم ؟
قاللي انا هحكيلك
" من كذا سنة كنت راكب التاكسي، و وانا في المكان ده بالظبط ، ، لقيت العجلة نامت، انا حاولت اركن العربية، و نزلت عشان اركب الاستبن ..
فضلت اركب فيه خمس دقايق، و قبل ما اخلص، ببص على باب البيت ، لقيت يوسف والي واقف، .. انا طبعا اتلبشت .. مقدرتش اتحرك .. رفعت ايدي بالسلام و شاورت له .. سيادة الريس ..
لقيته ابتسم لي و شاورلي .. و بعدها بدقيقة .. لقيت عربية و موتوسكلين جايين عشان ياخدوه ، و اول لما اللي في العربية شافني واقف قدام البيت .. لقيته نزل من العربية و جاي عليا و شكله هياكلني ..
انا لقيت يوسف والي بيناديله .. و بيقوله سيبه .. الراجل شغال ...
البودي جارد رجع مكانه ، و يوسف والي ركب عربيته ، و مشى .. بذمتك مش راجل محترم؟؟
مش كان ممكن يبص الناحية التانية و الحارس بتاعه بيـ***ـني؟ "
أنا اتناقشت مع السواق كتير ..
لكن نفهم من القصة دي اننا شعب ساذج و غلبان و بصة توديه و كلمه تجيبه
كمان نستفيد من القصة دي .. ان يوسف والي حقيقي .. حقيقي .. راجل محترم

Labels: , , , ,

posted by AbdElRaHmaN Ayyash @ 04:36  
16 Comments:
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats