|
الفيلم الأكثر تحقيقا للإيرادات في التاريخ الفيلم الأول من نوعه أتحدث بالطبع عن أفاتار ، فيلم أفاتار فيلم غير عادي لأسباب ، و عادي لأسباب أخرى فالقصة ربما تبدو للبعض مكررة لكن متى كان الابداع البشري في الخطوط العريضة؟ دوما لدينا خطوط عريضة مشتركة ، يحوم الكل حولها لينسج قصصا و حكايات ، و يبهرنا قليلا بالتصوير ، كما يبهرنا أيضا بالمؤثرات . سينما هوليود كما يقول صديقي محمود سعيد ، هي سينما إبهار ، على عكس السينما الأوروبية التي تستشعر فيها الإمتاع في الفن . و أفاتار يستحق عن جدارة أن يأخذ لقب الإبهار الأول . لكن هل الفيلم بهذه الروعة؟ وجهة نظري ... لا و لدي أسبابي: أتمنى من الجميع أن يشاهدوا الفيلم أولا قبل أن يقرأوا السطور التالية :) سأفترض من الآن أن الجميع شاهد فيلم جيمس كاميرون الأخير .. أفاتار ، الذي رشح للعديد من جوائر الاوسكار ، 10 ؟ محتمل للغاية أن يبدو الكلام غير مترابط او متوازن ، لكنه مجرد خواطر احاول ان اجمعها في مقال -------------------------- بداية الفيلم غريبة بعض الشيء ، فالشاب العاجز ، الذي أصيب في الحرب ، يهبط على كوكب آخر ، في رحلة استمرت سنوات ، ليختار قرينا له ، هذا القرين يستطيع تحقيق الكثير مما لا يستطيع تحقيقه الشخص الحقيقي ، و هذه لها نظريتان . الأولى : أن البشري عاجز في شكله ، و في طبيعته ، لكنه يستطيع بروحه أن يحقق المستحيل ، فالشاب جايك الذي حرر شعب النافي هو البشري العاجز ، لكنه قوي في جسد الأفاتار، لأن روحه قوية ، مفارقة عجيبة إلى حد ما ، لكنها معبرة . النظرية الثانية: أن الشاب العاجز لا يستطيع أن يدير حياته على الارض لعجزه ، لكنه يستطيع أن يحرر العالم من سيطرة الاحتلال ، و هو أمر يوحي بالسخرية ، و ربما قصدها كاميرون أن يقول أن الإنسان (بيتشطر على اللي يقدر عليه) لكنه لا يستطيع أن يحل أموره . النظرية الأولى هي الأكثر قبولا بالنسبة لي . الغريب في الفيلم أيضا ، و هو ما قالته علا عنان ، أن النافي ، عندما انتصر ، لم ينتصر بجهوده هو ، لكنه انتصر بمساعدة جايك ، البشري العاجز ، و لذلك يبدو أن هذا المفهوم الذي يتم ترسيخه ، هو قبول المساعدة الخارجية ، لمحاربة عدو قوي ، هو الاحتلال ، أستطيع أن أشبهها بمناداة هتلر كي ينقذنا من الانجليز . أو بدخول بغداد على ظهور الدبابات الأمريكية . بإمكاني أن أتصور أيضا أن الغربي يجب أن ينتشي حين يعلم أنه مصدر الخير ، أيضا هو مصدر الشر ، لكن يكفي أنه مصدر الخير ، على الاقل هو الذي أنقذ الكوكب . عاوز انقل على نقطة شعب النافي نفسه ، و يهمني اني اقول ان شعب النافي بيمثل اليوتوبيا اللي البشر كلهم بيحلموا بيها ، فهم بيكونوا شبكة لا نهائية من العلاقات ، الشبكة دي مرتبطة بالتاريخ ، فهم لا يمكنهم فهم الحاضر بدون النظر للتاريخ ، و دي نقطة في صالحنا ، او لازم نستفيد منها ، اننا مش هنقدر نحل مشاكلنا من غير ما نشوف الاجداد بيقولوا ايه .. برده معنى جميل اوي في ان الوحدة بين شعب النافي كله ، على مستوى الكوكب ، هي اللي انقذتهم ، أيوا جايك طبعا له دور محوري ، لكن مكانش هيقدر يعمل ده لو محققش الوحدة بين شعب النافي . البدائية اللي ظهر فيها شعب النافي ، فكرتني بالهنود الحمر ، إفريقيا (ملاحظة مهمة ان معظم ممثلي النافي أفارقة بالأساس ) ، أو ممكن تفكرني بالعرب و المسلمين ، مش لأنهم بدائيين ، لكن لأنهم بيفكروا كتير في المقدس ، الشجرة المقدسة ، هي الارض ، ايوا في ارض تانية ، لكن دي أرضنا ، المقدسة . برده رغم البدائية دي لكن في قيم كتيرة ، من الاهتمام بالارض ، و الزعل على اي حاجة بتتضرر او بتموت لأنها حياة ، و الاهتمام ببعضهم ، كل دي قيم غايبة عن الارض الحقيقية ، فرغم البدائية الشكلية ، لكن القيم الانسانية موجودة و بشدة في كلمة مهمة اوي قالها جايك و هو بيعرف الامريكان ان النافي مش هيستسلموا ، و هو إنهم مش عاوزين اللي الامريكان هيقدموه ، هيقدموا ايه؟ الجينز و البيرة؟؟ النافي مش عاوزين الجينز و البيرة ، و دي من وجهة نظري الحضارة الغربية ، و صراعها مع اي حضارة تانية ، هي هتمحق الحضارة التانية ، عشان تفرض سيطرتها الحضارية ، و تسيطر كمان على مقدرات اهل الحضارة التانية ، العراق مثالا . و في كذا رسالة للمسلمين و العرب ، انه الحضارة بتاعتهم لازم يعتزوا بيها ، حتى لو النموذج الغربي مسيطر ، لكن تفرد حضارتنا ، مش ممكن انه يقارن بأي حضارة تانية ، و هم كمان مش ممكن نقارن حضارتهم بحضارتنا ، مش شرط عشان اكون "متحضر" اني اكون "غربي" و دي نقطة لازم كلنا نفهمها . الوحدة اللي عبر بها النافي عن نفسهم كانت من شقين : الشق الأول : و هي الوحدة بين القبائل قبل حرب المحتلين الامريكان و الشق التاني : متعلق بالوحدة اللي بين الاشخاص ، في كذا مشهد ، مشهد الجواز ، مشهد التحويل لنافي ، و ده من اجمل المشاهد ، و مشهد كمان هو محاولة شفاء غريس. انه الجميع متحد روحيا و جسديا و فكريا عشان هدف واحد ، كان معنى جميل فعلا في فكرة بفكر فيها و هي ان الفيلم ممكن يكون موجه للبشر كلهم ، و ده احتمال كبير جدا ، انه الفيلم بيقول ان الاحتباس الحراري ، و تلوث الكوكب ، و غيره ، ده كله بيسبب انهيار للكوكب ، و اننا هنحتاج مكان تاني ، و مش هنلاقيه . ------ معنى جه في بالي و انا بشوف الفيلم ، و هو ان الغربي لازم يفهم الاله على شكل مجسد، مش هيقدر يفهمه انه اله في السما زي المسلمين ، مش مجسد ، أو ملوش أيقونة، فعشان كده فيه شجرة مقدسة ، و مكان مقدس يدعوا فيه ، و حاجات مشابهة كتير . و ده دليل ان العقلية الغربية مسيطرة بقوة على الفيلم ، ده مش عيب طبعا ، لكن العيب اننا نتصور اننا ننقل النموذج الحضاري بالكامل من عندهم . ممكن الشجرة المحرمة (إيوا) عند النافي نعتبرها ايقونة للمسيح ، او المسيح نفسه ، او اي مقدس تاني في اي دين بيُعتبر وسيط بين الاله والبشر ، و ممكن كمان نعتبرها كنيسة ، بياخدو منها الماضي ، و الصلة بالاله . ------- المجتمع النافي من وجهة نظري ، شبهه كاميرون انه نقيض المجتمع الغربي ، او يمكن يكون نقيض المجتمع البشري ككل ، فالفردانية اللي موجودة عند البشر ، بنلاقي ضدها في الوعي الجمعي عند النافي ، التفكك الاسري بنلاقي عكسه ، و ممكن عكسه بتطرف ، زي الشبكة اللامحدودة بين كل افراد القبيلة و الكوكب ككل. برده فكرة امتلاك الطبيعة بنلاقي عكسها تماما ، و افكار كتير من النوعية دي ، بنلاقي النموذج السلبي عندنا ، و النموذج اليوتوبي هناك ، عند النافي جيمس كاميرون كمان بيقول نظرية صادمة ، لكن مفهومة في الغرب ، و هي ان الغربي لما بيحب ياخد حاجة من حد ، بيعمل منه عدو، عشان يبرر انه ياخدها منه في النهاية . و كمان نظرية انه الغربي بيفكر بنفس الشكل الملعون ، فكرة الحرب الاستباقية ، و انه يحارب الارهاب بالارهاب ، من غير اخلاق او قيم ، ده موجود ، و كلنا شايفينه برده نقدر نقول ان الفيلم بيلخص الصراعات بشكل مبسط جدا ، و هو ان المستعمر مش بيقدر قيمة اللي بيستعمره ، ولا قدسية الاشياء عند اللي بيستعمره . في كلمة قالتها العرافة في الربع الاول من الفيلم ، و هي انها مش هتقدر تعلم جايك تقاليدهم و عاداتهم و كل حاجة ، لأنه صعب انك تملا كاس مليانة بالفعل ، و ده معنى جميل ، ان الغربي مش هيفهم اي حضارة تانية ، لأنه بيبص من منظوره اللي مليان فعلا ----- التقنية اللي الفيلم استخدمها جميلة اوي تصميم الطيارات متصورها انها متوافقة تماما مع الآيروديناميكس ، و متصور انها ممكن تنفع في وقت قريب جدا انها تتطبق كنماذج تنفيذية ، الهيليوكوبترز على وجه الخصوص . انا حبيت فيلم افاتار بشكل عام ، ممكن ادخله في السينما تاني ، لكن اظن انه هيتسجل في التاريخ فيلم افاتار لأكتر من سبب ، و انا حبيت اني اكون من اللي بيكتبوا التاريخ ده .. بس بالعربي .
Labels: أفلام |