AbdulRahman Ayyash
 

AbdelRahman Ayyash's Facebook profile

Friday, 15 January 2010
لا عزاء للمدونين

يعني انا نفسي افهم ، النظام المصري بيعمل ايه الايام دي ؟؟
خبر صحيت عليه النهاردة هو اعتقال حوالي 20 ناشط و مدون اثناء زيارتهم لنجع حمادي لتعزية المسيحيين بعد الجريمة اللي حصلت
يعني انا ممكن ابرر للنظام المصري انه يعتقلهم و هم رايحين قافلة لغزة ، ماشيين في مظاهرة لكفاية ، بيرسموا عالارض و يكتبوا على الحيطة
لكن انهم يعتقلوا المدونين و النشطاء ، عشان رايحين يعزوا في الكنيسة !! دي مصيبة !! و مش مفهومة
المشكلة الحقيقية ان النظام المصري بالشكل ده يؤكد انه لا يستطيع حل اي مشكلة ، و أي مشكلة تعني اي مشكلة ، بدون استخدام اداة القمع الامني
أي مشكلة بداية من غزة ، و مرورا بالمعارضة السياسية ، و انتهاء بالمشاكل الاجتماعية المزمنة زي الطائفية و غيرها ، لا يستطيع النظام المصري التعامل معها من غير استخدام اداة القمع الامني
لا أظن أن هذا دليلا على شيء إلا الضعف الكامل في كل مؤسسات النظام ..
طبعا مش محتاج اني اقول ان كل المعتقلين دول ناس بيحبوا البلد دي
اتعاملت مع معظم الوشوش اللي في الصورة بصورة شخصية و بشكل شبكي ، و لو اختلفت مع ناس منهم ، فمقدرش اختلف ان دول ناس بيحبوا البلد دي ، و ان اللي عمله النظام باعتقالهم نوع من انواع ترسيخ الطائفية ، او تعميق الوحدة الوطنية باعتقال المسيحيين جنب المسلمين في عربية ترحيلات واحدة !!
---------
------
عالهامش
مصطفى النجار ، قلبي الكبير ، ده قدرك يا سيدي ، رحت غزة هتتبهدل ، لو اخوان هتتبهدل ، هتعزي في المسيحيين برده هتتبهدل ، بس العيب مش فيك ، العيب في اللي بيحكمونا . بس انت اللي علمتني .. اننا نقدر !!
إسماعيل الاسكندراني: مقابلتكش غير مرات قليلة اوي .. بس لما شفتك وسط ناس كتير عرفت انه انت اسماعيل الاسكندراني ، مثال لشاب محترم و جدع بجد .
باسم فتحي : الثورجي اللي هيموت عالرصيف متغطي بجرنان .. يمكن يكون هو اللي كاتب العمود الرئيسي فيه ، هتطلع و هتكمل .. بس انت بجد بتحب البلد دي
شريف عبدالعزيز: ده قدر اللي بيفكروا في البلد دي
إسراء عبدالفتاح : كان نفسي يكون "عندنا" واحدة زيك .. او كتير
شاهيناز عبدالسلام: واحدة بتقف جنب كل الناس ، اعتقد انه لازم كل الناس يقفوا جنبها .. و برده كان نفسي يكون "عندنا" واحدة زيك .
وائل عباس: من رأيي تبطل تركب مواصلات و تكتفي بالناقة ، في المطار يعتقلوك ، في محطة القطر يعتقلوك ، لو رحت محطة الفضاء الدولية هيجيبوك برده .
ملحوظة: تويتاية وائل عباس قبل الأخيرة اللي كتبها على تويتر كانت "هاقضي الليلة في وابور الساعة إتناشر المجبل عالصعيد"

Labels: , , ,

posted by AbdElRaHmaN Ayyash @ 11:16  
2 Comments:
  • At 24 January 2010 at 15:39:00 GMT, Anonymous Anonymous said…

    في حاجه مشتركه دايما موجوده .... "احنا رايحين نعمل الصح" .. مش .. "ألي احنا فاكرينه صح".... علشان قليلين إلي بيشتغلوا فاللي بيشتغل دايما صح .. ولا علشان غاب القياس بالنسبه ليهم ..دخ اذا كان في معيار للقياس ده اصلا

     
  • At 24 January 2010 at 15:48:00 GMT, Anonymous Anonymous said…

    وبعدين ده انت كاتب "الاسلام هو الحل".. ما متبتش ازاي ليه ؟؟ اصل الكلمه موجوده من زمان قوي ومش شايفين حل لدلوقتي .. وقت .. عايزين وقت .. اكيد دي اول حاجه جت في بالك حالا مش كده .. صورتك حلوه

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats