AbdulRahman Ayyash
 

AbdelRahman Ayyash's Facebook profile

Wednesday, 12 August 2009
القاهرة اسطنبول .. و بالعكس
سلامو عليكم
ازيكم يا اخواننا :)
الحمد لله رجعت من تركيا ، و من اسبوع استضافتني فيه الحكومة ، كان أسبوع مفيد جدا بالنسبة لي ، هنتكلم عنه ان شاء الله
بس قبل ما أتكلم عنه أحب إني أشكر كل الناس اللي تضامنوا معايا ، فعلا انا عاوز اقولهم اسم اسم ، بداية من بلال علاء و حسام يحيي و حبيبي الدكتور مصطفى النجار ، و طبعا الصحفي المجتهد جدا جدا عبدالمنعم محمود ، و إسراء الطويل اللي عملت كل التصاميم و المدونة اللي اتعملت عشاني و عشان استاذ مجدي ، و محمد عادل و محمد عاطف و عبدالرحمن فارس و اسلام العدل .. الناس بتوع ستة ابريل اللي قدرت اوي تضامنهم ده .
الصحفيين من اليوم السابع و الدستور و اللي كتبوا في الشروق و المصري اليوم ، انا حقيقي بشكرهم ، الصحفيين الأجانب و و الباحثين زي جوزيف مايتون الصحفي الواعد ، و البروفيسير مارك لينش ، و الحقوقيين زي الاستاذ جمال عيد ، المدونين زي حسام الحملاوي و عبدالمنعم محمود تاني و تالت و رابع و آية الفقي طبعا و علا عنان و اللي حقيقي بشكرها على اهتمامها ، و نوارة نجم و نهى عاطف و شاهيناز عبدالسلام ، الناس اللي بعتولي و اتصلوا بيا ، فعلا أنا مش عارف اشكرهم ازاي ، حقيقي شكرا ليكم كلكم ، جزاكم الله خيرا :)
و هبدأ الحكاية على حلقات ، من أول ما نزلنا في مطار القاهرة يوم التلات بالليل ، و هحكي ان شاء الله عن تركيا بعد اما احكي عن تجربة الاعتقال الصغيرة اللي مريت بيها .

------------------------------------------
------------------------------------------

الساعة الواحدة و عشرون دقيقة صباح يوم الاربعاء الثاني و العشرين من يوليو 2009
طائرة الخطوط التركية القادمة من اسطنبول تهبط على ارض القاهرة بسلام
الركاب يتزاحمون خارج الطائرة كأنهم خارجين من باص شرق الدلتا ، و هواء القاهرة الساخن يذكرنا جيدا أننا عدنا من تركيا .
----------
أملأ استمارات الرعاية الصحية على عجل و انا اخرج من الطائرة .. أبتسم لمضيفات الطائرة و أقول الكلمة التركية الأشهر التي عرفتها ، تشكر إيديريم ، و أخرج من الطائرة مستقبلا هواء القاهرة المختلف و بشدة عن آخر نسمة هواء باردة في اسطنبول .
ألحق بآخر الطابور الذي يقف أمام ضابط الجوازات في انتظار الفحص ، و خاتم الوصول ، و العبور إلى أرض الوطن ، أمامي فتاة لندنية ، تبدو كذلك من لكنتها الانجليزية السلسة ، إلى أن نصل إلى ضابط الجوازات ، الذي يقول للفتاة اللندنية أن تذهب إلى طابور آخر لأن هذا ليس الطابور المفترض بها أن تقف فيه ، فتنظر إلي متضرعة بما ترجمته ( يا إلهي ) ، و أبتسم لها و أقول كلمة لم أدرك معناها جيدا ، لأنني كنت مشغولا بالاستاذ مجدي سعد الذي أوقفه ضابط الجوازات في طابور ثان ، ليتفحص جواز سفره ، قلت لها with you .. لم أقل God be with you أو أي شيء مشابه ، فقط الكلمة "معك" ، على كل حال ، عادت هي إلى طابورها الجديد ، و قدمت باسبوري و أوراقي لضابط الجوازات .
لم تكن هناك مشكلة بالنسبة لي في السفر ، لم يوقفني أحد الضباط ، و لم أتوقع أن يوقفني أحدهم ، فلست أنا المفترض بهم أن يوقفوه ، ده ممدوح اسماعيل سافر و محدش وقفه !! أنا هيوقفوني ؟؟ ليه يعني !!
لكن ضابط الجوازات ختم على جواز سفري ببساطة ، و أعطاه لضابط آخر يجلس وراءه ، أمام شاشة جهاز كمبيوتر ، و ما إن كتب اسمي حتى نظر إلى شذرا و قال اتفضل استنى معانا خمس دقايق !
----------
لم أتصور حقيقة أن يطول انتظاري عن الخمس دقائق ، كانت عندي تصورات و معلومات سابقة عن أشخاص أوقفوا في المطار ، و تم رفض سفرهم ، أو تم التحقيق معهم في ساعة أو ساعتين ثم السماح لهم بالمرور ، لكنني لم أسمع بأحد من "الشباب" أو "المدونين" أو نشطاء الانترنت ، تم اعتقاله بعد ان احتجز في المطار .
على كل حال ، أجريت اتصالاتي ، و لم تكن هناك مشكلة عند أهلي لأنهم تصوروا مثلي تماما أن الأمر لا يعدو كونه إما تشابها في الاسماء او تحقيق روتيني لا يعني أي شيء .
لكن ما حدث بعد ذلك أثبت أن الأمر مختلف تماما !!
----------
انتظرت حوالي الساعة أمام مكتب الجوازات ، قبل أن اسمع المخبر ينادي إسمي ، ذهبت إليه و أنا على استعداد لأستلم جواز سفري ، إلا أنني وجدته يقول لي ، اتفضل عشان الظابط عاوز يقابلك ، سألته ظابط مين ، قاللي ظابط أمن الدولة .
قشطة أوي
أنا داخل عند ظابط أمن دولة أعمل ايه ؟؟ الاجابة مبهمة
دخلت عند ظابط أمن الدولة ، و أول لما دخلت طلبت أشرب ، و سألته اذا كان احتجازي بسبب تشابه في الاسماء زي ما ظباط الجوازات قالوا !
قاللي مين قاللك انه تشابه أسماء ؟ لا طبعا ، احنا عاوزينك انت .
و بدأ يسألني أسئلة من نوعية كنت بتعمل ايه في تركيا ؟ سافرت ازاي ؟ حضرت ندوات دينية هناك ؟ كنت مسافر مع مين ؟ و جميع تلك الاسئلة لم يكن عندي أي مشكلة في الحديث عنها ، لأن رحلة تركيا لم تكن رحلة سرية أو رحلة لقلب نظام الحكم التركي وللا الاستقواء بالخارج ، دي رحلة سياحية و ثقافية في المقام الأول .
و أنا قرأت كلام اني كنت رايح تركيا لحضور مؤتمر ، الكلام ده مش صح إطلاقا ، إحنا مشاركناش كمجموعة أو كأفراد في أي نشاط خارج إطار الرحلة اللي احنا رايحين عشانه ، ومحضرناش أي نوع من أنواع المؤتمرات ، أو الندوات أو حتى الحفلات .
بعد شوية أسئلة شخصية ، و عن رحلة تركيا ، الظابط قاللي طيب اتفضل عشان شنطك تتفتش ، طبعا مكانش في أزمة بالنسبة لي ان الشنط تتفتش ، رحت مع المخبر اللي نادى اسمى في الاول ، و رحت جبت الشنط ، و اديتها لظابط واقف عشان يفتشها ، طبعا كالعادة مكانش فيها اي شيء ملفت .
رجعت تاني بعد اما اتفتشت الشنط لظابط أمن الدولة ، و لقيته بيسألني عن إذا كنت بصلي أو لا ، و عن اذا كنت بحضر دروس لشيوخ او لا ، و عن اذا كنت مرتبط بالاخوان او لا ، و عن اذا كنت اعرف الاخوان اصلا او لا ، و كلام عام ساذج للغاية ، مش لاقيله أي مبرر أو معنى ، عموما أنهيت إجابة أسئلته ، و قبل ما أمشي لقيته بيقولي كلم الأهل و قول لهم انك معانا للصبح ، وقتها انا راجع من تركيا و مش معايا رصيد مطلقا ، حاولت أتصل ، لكن بمجرد دخولي للاستراحة زي ما بيسموها ، لقيتهم بيطلبوا مني الموبايل و أي فلوس معايا ، انا مرضيتش اديهم الفلوس اللي معايا ، و استحضرت كل الكلام اللي بيتقال عن سرقة الفلوس من قبل العساكر و ظباط الامن وقت الاعتقالات و غيرها ، فاعطيت لعسكري الاستراحة الموبايلين اللي معايا ، بعد شوية كلام عن ان ده مينفعش ، و ان من حقي يكون معايا موبايل و كلام من النوعية دي .
----------
دخلت الاستراحة ، و لقيت ناس كتير موجودين ، ولقيت كمان أستاذ مجدي سعد موجود في الاستراحة ، دخلت الاستراحة حوالي الساعة 4 فجرا .
وقتها كنت فعلا محتاج أطمن أهلي ، كتبت أرقامهم على ورق صغير ، و اديته لعسكري كان موجود وقتها ، طبعا مش ببلاش ، و هو خرج و عرفت انه اتصل بأهلي طمنهم عليا بعد كده .
طبعا فترة الوجود في استراحة المطار زي ما بيسموها فترة غريبة جدا ، شفت فيها وشوش أول مرة أشوفها أو أتعامل معاها ، طبعا في الفترة اللي بعد كده شفت ناس اكتر و اتعاملت مع ناس مختلفين تماما عن كل الي اتعاملت معاهم طول حياتي ، و هحكي ان شاء الله عن كل ده .
في البداية استراحة المطار غرفة مستطيلة ، بها كراسي في ثلاثة جوانب ، و في الجانب الأخير مكتب العسكري او الصول او الظابط المناوب .
في استراحة المطار يتم احضار الأشخاص المتهمين في فضايا أو عليهم قضايا ، أو الاشخاص اللي عندهم مشاكل في أوراقهم الشخصية ، أو الناس المترحلين من دول تانية ، أو اللي هيترحلوا لدول تانية ، و دول كلهم انا شفتهم في استراحة المطار .
انا دخلت الاستراحة الساعة اربعة فجر يوم الاربع 22 ، خرجت من الاستراحة الساعة 12 ظهر يوم الخميس 23 ، يعني فضلت في المطار من الساعة الواحدة و الثلت صباح الاربعاء ، لحد الثانية عشرة و النصف من ظهر الخميس ، حوالي خمسة و تلاتين ساعة بالظبط محتجز في المطار .
أول لما دخلت الاستراحة ، و بعد اما سلمت الموبايلات ، و احتفظت بالفلوس في اكتر من مكان ، أخدت هدوم كنت جايبها من تركيا ، و قلت ما دمنا قاعدين قاعدين ، يبقى نعد بشكل كويس ، خصوصا اني كنت متصور ان لو في اي اخلاء سبيل او ترحيل فهيكون بعدها بساعات قليلة ، يعني في الغالب صباح الاربعاء .
عموما اول حاجة عملناها هي اننا صلينا الفجر ، و حصل موقف استغربت له شخصيا ، و هي ان العسكري قدم الاستاذ مجدي انه يصلي إمام ، و بعد اما عرف انه اخوان ، قالله يعني انا مغلطتش لما قدمتك تصلي إمام !
كان اول لما دخلنا في مجموعة ناس ، كان في اربعة راجعين من الكويت ، و واحد راجع من ايطاليا ، و انا و الاستاذ مجدي ، خلال اليومين دول ، كان في الاستراحة ناس تانيين ، زي فتاة ايريترية اسمها هيلين ، و شاب مصري مقيم في قطر ، و واحد جاي من اليونان .
لكن اللي عاوز اقوله ، ان رغم عدم السماح ليا شخصيا و للأستاذ مجدي ، بالمكالمات التليفونية ، على الاطلاق ، لكن تم السماح ( على مضض ) لأحد المحتجزين اللي راجعين من الكويت ، و لهيلين ، انهم يتكلموا في التليفونات ، و لفترات قد تكون طويلة نسبيا ، في حين انه كان الرفض قاطع تماما لما كنا بنطلب اننا نتكلم في التليفون او ان اي ظابط او عسكري يتكلم في التليفون نيابة عننا .
حصل كذا موقف في الاستراحة اعتقد انه صعب أنساهم ، منهم موقف ربنا يكرمه الاستاذ مجدي ، سأل عسكري من اللي موجودين اذا كان يعرف الدكتور أشرف عبدالغفار ، و الدكتور أشرف للي ميعرفوش ، واحد من قليلين أحيوا قضية البوسنة عربيا ، و حصل على الجنسية البوسنية ، هو و العائلة ، من رئيس الوزراء البوسني المرحوم على عزت بيجوفيتش ، و تم اعتقاله و هو مسافر تركيا لحضور حفل زفاف نجله عبدالرحمن في تركيا ، و انضم لقضية الدكتور عبدالمنعم أبو الفتوح ، و لما الاستاذ مجدي سأل العسكري عنه ، العسكري أكد انه يعرفه ، و قعد يشكر في الدكتور أشرف و في عقليته ، و أكد لنا انه يعرفه بإنه قال ، انه معاه جواز سفر بوسني ، و سأل هيلين عنه ( و هيلين كانت موجودة في المطار من حوالي شهر ) ، فهيلين أكدت انها عرفته و شكرت فيه .
الحاجة التانية كنت بكلم واحد جاي من ايطاليا ، فلما عرف اننا محتجزين من غير تهمه ، او بتهمة سياسية غير موجهه لينا ، قال لي ، انا هقولك على حاجة ، انت لازم اول لما تتخرج تقدم على لجوء سياسي في أي دولة في اوروبا ، أنا بصراحة مناقشتوش في كلامه ، لكن انا عاوز اقول ان لما الناس تكون مقتنعة تماما ببراءتنا او بتفاهة و سذاجة مبررات اعتقالنا ، و يكونوا عارفين ان البلد دي هتظلمنا ، فلما يقولوا كده مش هنستغرب ، و صعب يفهموا أي حاجة نوصلهالهم عن الإصلاح أو مشربتش من نيلها و حب الاوطان من الايمان و الكلام ده كله ، لأنه عاوز يعيش ، و في البلد اللي توفر له المعيشة ، مش في البلد اللي تدفنه بالحياة .
تالت موقف كنت مستغرب له ، و ده مش في المطار بس ، ممكن في كل تعاملاتي في القسم في المنصورة او في أمن الدولة أو في المطار طبعا ، و هو مدى احترام الناس ليا ، لما يعرفوا اني مش جنائي ، و اني سياسي ، أو إن الاتهام الموجه ليا ان ليا علاقة ما بالاخوان او الصحافة ، فعلا اتأكدت تماما ان قد يكون من أسباب اعتقالنا اننا نفهم الشعب المصري بيفكر ازاي ، و اد ايه هم بيتعاطفوا مع المظلوم بغض النظر عن عمقه الفكري أو مدى قوة تنظيره لأفكاره أو لمواقفه .
آخر حاجة بالنسبة للاستراحة ، لما الرائد اللي هيستلمني عشان يرحلني من المطار للمنصورة وصل للاستراحة ، لقيته بيسأل عني ، و بيسألني ، انت عبدالرحمن ؟ قلتله اه ، قاللي انت عندك 19 سنة ؟ قلتله ايوا ، قاللي انت تعرف ايه اللي مستنيك بره ؟ ( انا توقعت انه تهديد ) قلتله ايه يعني ؟ قاللي في عربية ترحيلات و عربية شرطة فيها أربعة مسلحين و واحد برشاش آلي و عربية نجدة ، انت عملت ايه يابني ؟ قلتله حضرتك اللي تقولي انا عملت ايه لأني مش عارف انا عملت ايه .
و تم ترحيلي للمنصورة ، و ان شاء الله في التدوينة الجاية هكتب اترحلت ازاي للمنصورة ، او الترحيل كان ازاي ، و عن أول يوم في القسم ، و في أمن الدولة .
دمتم بخير

Labels: , , , , ,

posted by AbdElRaHmaN Ayyash @ 03:20  
23 Comments:
  • At 12 August 2009 at 04:50:00 GMT, Blogger همسة قلم said…

    على رأي الاخت المغتربة أروى الطويل .. هي دي مصر ياعبلة :)

    حمدا لله على السلامة ياعبد الرحمن ... ربنا يجعلها في ميزان حسناتك

     
  • At 12 August 2009 at 05:46:00 GMT, Blogger hosam said…

    هييييييييييييه

    حمدً لله على سلامه عودتك

    ياعبد الرحمن محمود سياسى

    :D

     
  • At 12 August 2009 at 06:19:00 GMT, Anonymous Anonymous said…

    طيب اشكر منتدي شباب الإخوان اللي عملك موضوع وصل لـ 11 صفحة

    ولا ده كوخة دلوقتي !!!

     
  • At 12 August 2009 at 06:33:00 GMT, Blogger خالد فوده - Khaled fouda said…

    وانا وانا وانا مش تضامنت معاك
    D:D:D:

    اكتر جمله أثرت فيا
    وانت بتقول بعفويه
    ده ممدوح اسماعيل سافر و محدش وقفه !! أنا هيوقفوني ؟؟ ليه يعني !!

    دمت سالما يا عبد الرحمن وحمد لله ع السلامه

     
  • At 12 August 2009 at 08:38:00 GMT, Blogger hosam said…

    :D
    :D
    هييييييييه

    مبروووووووووك
    عبد الرحمن محمود سياسى
    :D

     
  • At 12 August 2009 at 08:50:00 GMT, Blogger Hosam Yahia حسام يحيى said…

    This comment has been removed by the author.

     
  • At 12 August 2009 at 08:55:00 GMT, Blogger Hosam Yahia حسام يحيى said…

    هييييييييييييه

    حمدً لله على سلامه عودتك

    ياعبد الرحمن محمود سياسى

    :D

     
  • At 12 August 2009 at 11:50:00 GMT, Blogger مواطن مصرى نايم said…

    حمدلله بالسلامة يا عم عياش
    انا معرفكش شخصيا
    بس انا صاحب فكرة المدونة اللى اتعملت
    مجهود مشترك بينى و بين اسراء يعنى
    و المهم انك بخير الحمدلله يا ريس
    الف حمدلله بالسلامة

    تحياتى
    احمد عبدالله

     
  • At 12 August 2009 at 12:54:00 GMT, Blogger عـلا - من غـزة said…

    انا اسمي مكتوب :d
    طاااايب

    ذكرتني بتجربة الترحيل الي مريت فيها في مطار القاهرة

    طب بذمتك ما خفتش وهو الضابط بشرحلك الكتيبة الي واقفة تستناك برة :s

    بس انا كنت بسأل نفسي .. يعني اذا كنت حضرتك من المسجلين خطر .. كيف سمحولك تسافر اساسا ؟ يعني استنوك تروح وترجع عشان يمسكوك.. طب افرض انت ما كنتش رجعت !! من وجهة نظر امنية يعني مش فاهمة

     
  • At 12 August 2009 at 17:19:00 GMT, Blogger عاشقه الاقصى said…

    رد فعلى على اعتقالك يا بشمهندس

    ان التجربه حقا مؤكد أثقلتك حتى اون كانت قصيره

    وحمد لله على السلامه

    وجعلها الله فى ميزان حسناتك

     
  • At 13 August 2009 at 09:10:00 GMT, Blogger shab masry said…

    امبارح كنت في المطار رايح اجيب والدي كان راجع من مؤتمر.. فعديت على حبايبنا هناك طبعاً

    المهم فعلاً والله زي ما بتقول.. اسئلة في غاية الغباء.. انا مفيش مرة رحت تحقيق امن دولة في حياتي واحترمت الظابط الي ادامي.. فعلاً ناس عقليات في الحضيض لا فاهمة ولا بتفكر ولا اى بطيخ...

    الطريف في الامر ايه باة :)) انى لما اتاخدت وانا واقف كلمت ابويا وهو نازل من الطيارة قلتله انا رايح مكتب امن الدولة وبتاع.. فهو بيخلص ورقه كان معاه لواء من بتوع المطار...
    لواء.. خلي بالك من الرتبة
    فهو والدي معاه جواز سفر خاص "حاجة كده تقارب جواز السفر الدبلوماسي في الاهمية بس بيعطي لغير الدبلوماسين..."
    فوالدي بعد ما خلصوا الورق بيساله هو فين مكتب امن الدولة؟..فوالدي بيقلي لقيت الراجل قلق كده وبتاع وقاله يعني هو ابن حضرتك ملتحي ولا حاجة يا دكتور؟؟
    المهم بيقلي اللواء جاب ورا اول لما سمع حكاية امن الدولة دي واول لما خلصوا لوالدي الورق اتعذر بحاجات كده وخلع بعد ما قعد يسب ويلعن في الدولة وامن الدولة والنظام ووووووو

    فتخيل لواء بيخاف حتى يتكلم مع حتة ضابط معداش ملازم ولا رائد... في حين يكن لهم كراهية رهيبة من قلبه..!

     
  • At 13 August 2009 at 11:19:00 GMT, Anonymous faddy said…

    ولو أني خارج عن الموضوع كليا

    أنا تسحرني تركيا يا اخي

     
  • At 13 August 2009 at 19:17:00 GMT, Anonymous عمرو صيام said…

    طيب لما ابتسمت للمضيفات التركيات
    هما ابتسمولك برضه ولا لأ ؟؟؟
    دى نقطه مهمه جداً عاوزين نعرفها من واحد إصلاحى زى حضرتك

     
  • At 13 August 2009 at 20:53:00 GMT, Anonymous أحمد السيد said…

    حمدا لله علي سلامتك ياعبده بيه
    لو سمحت انا بقالي 3اسابيع عاوز اوصلك ياريت تديني رقم تليفون السكرتير بتاعك علشان آخد معاد من سيادتك.............
    وعلي العموم نورت المدونه بتاعتك ووحشتني ياجمييييييييييل والف مبروك علي النتيجه
    ياريت ترد عليا

     
  • At 13 August 2009 at 21:45:00 GMT, Blogger فلسطينية الهوى said…

    كفارة يا عياش

    اديك جربت سجني خلوة هنيالك

    لازم تضحي عشان تثبت على قضيتك

    وامن الدولة بيساعدنا دايما عالتضحية

    ربنا يخليهولنا :D

    _____________

    انا عندي تعليق جانبي للي بيقول منتدى شباب الاخوان

    باعتباري عضوة فيه ؟؟

    هو عمل حملة وانا ناسية ؟؟

    الناس اللي عارفة عياش فتحوا موضوع عنه

    واعضاء المنتدى تابعوا معنا اخباره

    ايه بقى لازمته فين الشكر ومش عارف ايه

    يعني بجد عيب

    الناس بتقف على حاجات هايفة جدا

    حضرتك لم تستفيد بأي شيء في التدوينة اللهم فين شكر المنتدى ؟؟

    ربنا يتم عليك نعمة العقل ويهديك يارب

    وتعقل وتكبر

     
  • At 13 August 2009 at 21:50:00 GMT, Blogger فلسطينية الهوى said…

    صحيح ياعياش

    حرام تبتسم في وش حد

    انت ناسي ان فرض عليك تكشر في وشوش الناس

    وخصوصا اللي قاموا بخدمتك في رحلتك

    دول تضربهم قبل ماتنزل

     
  • At 14 August 2009 at 10:53:00 GMT, Blogger اصرار أمل said…

    كفااارة !
    بالله ماكنتش متوقع يمسكوك في المطار ؟ لا وكمان بتقارن بينك وبين ممدوح إسماعيل ؟
    ممدوح إسماعيل قتل 2000 واحد بس لكنك متهم بإثارة الرأي العام ( كله ) ! فووق شوية واعرف ازاي تقارن !
    المهم الحمد لله على سلامتك ..
    ربي يجعل هذا الأمر كله في موازين حسناتك ولا يحرمك الأجر ..

     
  • At 14 August 2009 at 13:09:00 GMT, Blogger AbdElRaHmaN Ayyash said…

    :D
    الله يسلمك يا استاذة اسماء
    و خدي بالك و انتي سايقة :D
    -----
    حسام يا يحيي :D
    مش هقول اسمك ثلاثي عشان متروحش في داهية
    بس سياسي .. لايقة عليا :D
    ------
    مجهول:
    طيب
    -----
    خالد :D
    بجد و الله انتو كلكو عملتو اللي انا مش قادر اشكركم عليه
    بجد جزاكم الله خيرا
    و بالنسبة لممدوح اسماعيل .. تخيل لو كنت رايح انا لندن .. كانو هيوقفوني ؟
    ------
    حسام
    تعليقاتك كترت :D
    ------
    أحمد عبدالله
    حقيقي مش عارف اشكرك ازاي ؟
    انت عندي على الفيس بوك ؟
    ------
    علا
    :D انا ماخفتش في الوقت ده
    انا حتى بعدها كلمت والدتي .. فبتقولي انت ازاي بتضحك .. انت مش عارف انت مستنيك ايه ؟ :D
    أمي كانت بتهددني :D
    قلتلها انا هتضايق لما اشوف اللي مستنيني .. مش هتضايق مقدما يعني
    بس فعلا انا سألت نفس السؤال .. ليه اسافر من غير اي عوائق .. لو كان من اسمي مكتوب او عليه مشاكل امنية من البداية !!
    --------
    دكتورة ولاء
    ربنا يسلمك يارب
    فعلا مهمة جدا التجربة

     
  • At 14 August 2009 at 13:15:00 GMT, Blogger AbdElRaHmaN Ayyash said…

    براء باشا
    يا عمي انت طبيعي يوقفوك
    انت راجل خطر
    انا معملتش حاجة يا عم
    حليق و كنت بتفسح في تركيا
    :D
    ---
    لا بجد الاسئلة انا كنت مستغربلها
    وهو يقولي انت اخوان
    اقوله لا مش اخوان
    يقولي بس انا عارف انك اخوان
    قلتله الحكومة عارفه كل حاجة اه
    و يسأل و هكذا
    -----
    بس موضوع اللواءات اللي بيخافو من امن الدولة .. تعرف .. انا اكتشفت بعد اما خرجت ان ممكن يكون ليا واسطة في اكتر من مكان .. لكن مجرد اني انا اقول ان ليا واسطة .. انا و الواسطة هنروح في حديد :D
    بلد أمن الدولة و الله
    ---------
    فادي
    حقيقي تركيا مذهلة
    أنصحك بزيارتها
    --------
    عمرو صيام :
    هو فعلا الناس بيبانو من تركيزهم على النقط المهمة
    عموما اه هم كانوا مبتسمين و انا اللي رديت الابتسامه لو ده يهمك تعرفه من واحد اصلاحي زيي
    و انصحك تقرأ رد فلسطينية الهوى
    ---------
    أحمد باشا
    :D
    الله يبارك فيك ياباشا و يسلمك
    يا عم مفيش سكرتير ولا حاجة
    بس انا و الله معاك و الموبايل شغال و كل حاجة
    هنتكلم ان شاء الله
    --------

     
  • At 14 August 2009 at 13:20:00 GMT, Blogger AbdElRaHmaN Ayyash said…

    أ آية
    :D أيوا بالظبط .. كنت لسه كاتب على الفيس بوك ان من أجمل لحظات الهدوء النفسي اللي عشتها و انا في الزنزانة لوحدي
    مع انها فترة قليلة بس مؤثرة فعلا
    :D خللي أمن الدولة يمشي بس و احنا هنعيشها براحتنا في المكان اللي نحبه
    مش شرط زنزانة يعني
    -------
    و شكرا على ردودك
    بس في افكار مينفعش يترد عليها و الله
    بجد
    ------------------------
    أ أمل
    :D ربنا يخلليكي يا فندم
    انا متهمونيش بأي حاجة ، لا رأي عام ولا ألف واحد ، سألوني على المدونة و اللي بكتبه .. لكن مش اتهامات
    ده اسمه اعتقال تعسفي بدون أي تهمة
    و كله بالطوارئ

     
  • At 17 August 2009 at 16:37:00 GMT, Blogger عبد الله بتاع منتدى شباب الإخوان said…

    السلام عليكم ورحمة الله وبركاته

    بالنسبة للأخ صاحب التعليق التاني على التدوينة اللي بيتكلم على منتدى شباب الإخوان

    أولا : المنتدى معملش حاجة فعلا عشان يشكرعليها .

    ثانيا : حتى لو افترضنا إن الموضوع اللي اتعمل والتوقيعات اللي وضعت دي تعتبر حاجة فدا أصلا حاجة طبيعية مش فضل مننا ، وزي ما قالت الأخت آية الفقي كل اللي حصل إنه موضوع اتفتح بالخبر والباقي فيه كان نقل لما يستجد من أخبار في القضية وطبعا عشان الموضوع أخد وقت كان لازم الموضوع يوصل لعدد كبير من الصفحات .

    ثالثا : للمرة التانية بأكد إن احنا حتى لو عملنا حاجة فاحنا مش بنعملها عشان نستنى منها شكر -وإن كان عياش جي من الأول شكر أعضاء المنتدى في المنتدى نفسه لو حضرتك مش متابع- فملهوش لازمة أسلوب المن دا وحوار احنا اللي كبرناك وأكلناك والحبشتكنات دي .


    جزاكم الله خيرا

    التعليق دا للتوضيح مني فقط بصفتي كاتب الموضوع اللي في المنتدى وعشان اللي يشوف كلام زي المكتوب فوق دا أول واحد هيخطر على باله هو العبد لله
    فحبيت أدفع الظنون عن نفسي فقط
    وأنا أصلا لسة شايف البوست دا واللي بعده والتعليقات دي من شوية بس
    ويا ريت بعد كدا لو حد حب يتكلم بصفته عضو في المنتدى يبقى يكتب اسمه أو يقول اسمه الرمزي بتاع المنتدى
    بلاش صيغة المجهول دي

    والسلام عليكم ورحمة الله وبركاته

     
  • At 17 August 2009 at 21:48:00 GMT, Blogger عبد الله بتاع منتدى شباب الإخوان said…

    This comment has been removed by the author.

     
  • At 17 August 2009 at 21:49:00 GMT, Blogger عبد الله بتاع منتدى شباب الإخوان said…

    معذرة كنت أقصد صاحب التعليق التالت المجهول

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats