AbdulRahman Ayyash
 

AbdelRahman Ayyash's Facebook profile

Wednesday, 28 May 2008
من يخسر .. من يفوز ؟
سلاام عليكم
ازيكم يا اخواننا
يارب تكونو كويسين :)
انا بمتحن الايام دي طبعا زي ما انتو ملاحظين
و كل فتحي للنت كان عن طريق الموبايل ( أكيد مش موبايلي ) كنت بفتح الياهو و الجي ميل و الهوت ميل و الفيس بوك ، و جربت الebuddy الماسنجر الجميل على الموبايل ، اما نشوف الفاتورة هتيجي كام !
المهم
:) الحمد لله الامتحانات لحد دلوقتي كانت جميلة جدا ، و لازم اقول اني انا و الله ماشي الترم ده كله بالدعاء :) .. و شكلي ان شاء الله هعدي .
ان شاء الله هخلص امتحانات يوم الاربع الجاي ، باقي مادتين حلوين نوعا ما .
خطتي في الاجازة دي تتلخص في حاجتين ، الاولى اني ابدأ أدرس انجليزي بشكل احترافي شوية ، في مكان كويس ، و التاني اني اشوف شغل ، غير التدريب بتاع الكلية ، اعتقد ان الاجازة السنة دي ان شاء الله هتبقى مليئة بالحاجات الكويسة ، الا النتيجة ! اللي هتظهر ، ربنا يستر .
و ان شاء الله هبدأ اتعلم فرنساوي .. برده بشكل احترافي ، و ربنا يسهل .
اللي حصل و بيحصل الايام دي هو اني انا بذاكر و بضيع وقت و بقرأ ، يعني انا في فترة الامتحانات دي قريت كتير جدا
كانت روايات كلها ، مقريتش كتب فكرية يعني .و قريت شوية شعر ، الكونت دي مونت كريستو ، الكرنك ، دكتور جيكل و مستر هايد ، و قريت ديوان الرائع طلال فيصل ، و ديوان المبدع تميم البرغوثي "قالولي بتحب مصر " و طبعا ذاكرت شوية :):).
على كل حال ، ربنا يستر في اللي جاي ، و كلمة للي عندهم امتحانات .. خللو أهلكم يدعولكم :)
-----
هم يفوزون .. نحن نخسر

بعد نتائج الانتخابات الكويتية ، و قبلها نتائج الانتخابات المغربية ، و الاردنية كذلك ، تأكد للكثيرين أن الإخوان المسلمون إما انهم قد بدأوا يفقدون أرضيتهم الشعبية ، أو جزءا منها ، أو أنهم لم يعودوا يقدمون البديل المقنع للمنافسين السياسيين الموجودين على الساحة أمام القواعد الشعبية في البلدان العربية .
و بنظرة أشمل ، بإمكاننا القول أن تيار الإخوان "المحافظ " قد فقد الكثير من كاريزميته السياسية في تركيا ، عقب فوز حزب العدالة و التنمية " الاسلامي البراجماتي " و هزيمة حزب السعادة بحصوله على نسبة تقترب من 2% من الاصوات في الانتخابات الاخيرة في تركيا ، و من المعروف أن السعادة يعبر عن تيار الإسلاميين المحافظين بقيادة مهندس الحركة الاسلامية التركية " نجم الدين أربكان " و الذي أُبعد عن رئاسة الوزراء فيما عرف بانقلاب 97 ، حين تنازل قسريا عن الوزارة للضغوط الشديدة التي تمت من قبل الجيش التركي .
بالطبع مايجري في كل بلد من هذه البلدان هو حالة خاصة ، فقد تراجع نفوذ العدالة و التنمية ( المغربي ) و الذي يبدو أنه حالة آنية ، أمام حزب الاستقلال التاريخي ، الذي بالتأكيد يقع على يسار الخارطة السياسية ، و في حالة الكويت ، فقد تراجعت الحركة الدستورية ( الاخوان) أمام سلفيي الكويت ، و هم أقصى يمين الخارطة السياسية الكويتية ، و من الواضح أن غياب التخطيط عند الحركة ، هو الذي أدى إلى حصولها على ثلاثة مقاعد فقط ، و هو ما قاله أحد الفائزين من الحركة ، في حوار مع اسلام اونلاين .
أما في الحالة التركية ، فقد كان الطرح الواقعي الذي قدمه حزب العدالة و التنمية ، قاطعا للخوف المتملك من الأتراك ،بأن تسقط حكومتهم المنتخبة مرة أخرى ، فقد قدم الحزب أطروحات اقتصادية و سياسية ، و وضع أجندة لم تغيب الاسلام ، بصفته يمثل جزءا ضخما من الهوية التركية .
بالطبع لا يمكن أن نجمع مشكلات الكويت و تركيا و المغرب في سلة واحدة ، لكننا بإمكاننا أن نقول ، أن غياب التخطيط و العمق الاستراتيجي لدى قادة الحركة الاسلامية ( المحافظون ) قد أثر سلبا في كثير من الحالات مثل الحالة التركية ، و غياب التخطيط على حساب الاعتماد على القاعدة الشعبية ، قد أثر سلبا في حالات أخرى مثل الحالة الكويتية .
ففي الاولى نجد أربكان يتجه بشكل واضح و مباشر نحو " أسلمة" تركيا ، ما أثار الجيش التركي ، و هو ما كان متوقعا من "حامي حما العلمانية "، و في حالة الكويت ، نجد الحركة تقدم أغلب مرشحيها في دائرتين ليس للحركة ثقل فيها ، في مقابل السلفيين .
من الواضح إذا أن المشكلة الرئيسية عند الإخوان ، بفروعهم ، هي غياب الفكر الاستراتيجي ، و هو ما يدفعنا للحديث عن ما يمكن تسميته ، ضخ دماء جديدة في الحركة الاسلامية ، و في صفها الأول على وجه الخصوص .
ما يعلو الآن صوت الحديث عنه ، هو انتخاب أعضاء جدد لمكتب الارشاد ، و حسب الأسماء المنشورة حتى الآن ، فهي تعتبر بأكملها من الجيل "الوسيط" ان صح التعبير .
لم تؤكد الجماعة أو تنفي بشكل قاطع حدوث الانتخابات ، رغم أن جميع الدلائل تشير إلى حدوثها بالفعل .
السؤال هنا :
هل ستختلف طريقة تعامل الجماعة مع العديد من القضايا العالقة ، مع وصول عدد مؤثر من قادة الجماعة من جيل الوسط إلى أعلى هيئة تنظيمية داخل الحركة ؟ و هل سنرى اختلافا في تعاطي الجماعة مع الأطروحات التنظيرية المنادية للفصل بين الاتجاه الدعوي و الاتجاه السياسي داخل الجماعة ؟ أو على الاقل ، هل سنشهد احتلافا في ردود الفعل على الاستفزازات الأمنية المتلاحقة ؟
ما أريد قوله أنه على الجماعة أن تدرس التجارب الأخرى ، ليس بتلك النظرة الاستعلائية التي نراها بالقرب منا " من أن تجربة تركيا ليست إسلامية بالمرة ولا تعبر عنا " " و أن إخواننا يدرسون التجارب الأخرى ، و في انتظار رؤيتهم لها" .
على كل حال ، و في النهاية ، يجب علينا أن ندرك أننا في مرحلة تحول تاريخي ، لن يسامحنا التاريخ إن لم نستغلها ، و لن ينتظرنا التاريخ ، و أخشى أننا لو لم نطور منا ، فالتبديل قادم .
----
هامش:
أعتقد أن الأستاذ المرشد لم يوفق تماما في أسلوب حديثه في الحلقة الأخيرة في مراجعات ، على الحوار .

Labels: , ,

posted by AbdElRaHmaN Ayyash @ 20:45   8 comments
Thursday, 15 May 2008
1948 - 1968 - 2008 Soyez réalistes, demandez l'impossible
إذا .. ستون عاما مرت
ذكرى النكبة
هل عشناها نكبة واحدة ؟
أعتقد أننا نعيشها كل يوم نكبات
بعيدا عن نظريات المؤامرة و صفقات الاسلحة الفاسدة و مجاهدي 48
بعيدا عن دير ياسين و خان يونس و الحرم الإبراهيمي
بعيدا للغاية عن كل هذا
هل نستحق النصر ؟
أم ما زالت لدينا تلك القابلية للاستعمار
القابلية التي اختفت من العالم أجمع ، الصمت الشعبي و عدم التأثير النخبوي ، هذه بلادنا
في الشرق .. ذكرى نكبة .. صاروخ هناك .. و شهداء هنا ، و قليل من الدعارة السياسية في الكنيست أو على أبوابه( عن خطاب جورج ووكر بوش اتحدث )
في ذكرى النكبة لم أجد أفضل من الشعار الذي وضعته الجزيرة في حملتها لتغطية الذكرى .. حق يأبى النسيان .
و في الغرب ذكرى ثورة .. طلاب .. لم يختلفوا عن غيرهم كثيرا ، إلا أنهم أرادوا أن يكونوا .. و كانوا صناع فرنسا
لم أرتب أفكارا لتكتب
فقط أريد ان أقول
أن فرنسا بعد 1968 .. تحولت إلى فرنسا التي نعرفها ، لا نقول أنها لم تكن دولة عالم ثالث و صارت دولة عالم أول ، لكنني أقول أن أخطاءها الحضارية ، التي كانت لتؤخر الدولة الفرنسية سنينا طويلة ، عولجت بالثورة ، انتفاضة الطلاب ، البداية كانت في مارس ، و الثورة تنسب لمايو ، و الاستمرارية شهدها يونيو
عندما نرى شعارات الثورة الفرنسية
إنها لم تُكتب لباريس أو ليون ، إنها كتبت للقاهرة و للمحلة ، لغزة و رام الله
كن واقعيا .. و اطلب المستحيل .. أحد الشعارات
إنهم يبيعون سعادتنا .. لنسرقها !
أسفل حجارة الرصيف .... الشاطئ !
اقرأ أقل .. و عش أكثر
الرئيس يحتاجك .. أنت لا
شعارات و شعارات ، حركت الطلاب في فرنسا ، أنزلتهم من أبراجهم لأرض الواقع ، خلعوا حجارة الرصيف ليروا البحر من خلفها .. الحرية المفقودة
هل نستطيع نحن ؟
و أعتقد أن مصر و طلابها و عمالها عليهم ان يعرفوا أن التغيير ليس سهلا ، و أن إضرابا لو فشل .. فسيمكن إتمامه
أقول أن تجربة فرنسا في ستينات القرن الماضي ليست تجربة عابرة ، لقد ثار الطلاب لسبب رئيسي ، و هو تدخل الشرطة في الجامعة ، انتو متخيلين ان فرنسا أضربت ، فرنسا وقفت اقتصاديا ، لأن بقى في حاجة زي حرس الجامعة عندنا ؟؟؟؟ .. مع انها اقل بكتير من حرس الجامعة ، اقل بكتير جدا كمان
انتو متخيلين احنا متأخرين اد ايه ؟؟؟؟
الفوضى التي نخاف منها ، ستأتي ، و المحلة ستتكرر رغما عنا جميعا ، و أي مسكنات يأخذها الشعب في هذه المرحلة هي معجلات للثورة ، فالضغط يولد الانفجار ، تلك حقيقة كونية ، و شعبنا يُضغط منذ ثلاثين سنة وأكثر .. و الانفجار اقترب
مشكلة الفوضى أننا نتصورها تكسيرا و تخريبا و تدميرا و وبالا على الأمة و المجتمع
إنها ستكون وبالا فعلا .. لكنها لن تكون إلا وبالا على النظام ، فتغيير النظام ، بعزله عن مصادر قوته ، و مصادر قوته في هذه الحالة هي الاقتصاد ، و نحن نستطيع !!
ما أريد قوله أخيرا ، أنه بعد ستون عاما من النكبة .. لم نتقدم شبرا ، بل تأخرنا ، و بعد النكبة كانت نكسة ، تأخرنا أكثر فأكثر ، و أخشى ما أخشى ، أن يكون التحرك الشعبي الذي تم إجهاضه في إبريل و مايو هو نهاية تحركاتنا ، نحن بحاجة لثورة ، ثورة طلاب ، ثورة عمال ، و ثورة أكاديميين ، ستكون هناك خسائر بالفعل ، لكنها لن تقارن بالمكاسب التي سنحصل عليها ، و أقل هذه المكاسب لو فشلت تحركات المجتمع ، هي أن يعلم رؤوس النظام أن الشعب المصري حي ، لم يعد ميتا كما كان ، أو على الأقل .. يستطيع التحرك عندما يريد .
إنهم يقتلوننا ، و نحن لا نريد الرد ..
إنهم يبيعون سعادتنا .. لنسرقها مجددا !
و آخر ما أريد قوله من شعارات طلاب فرنسا 68 .... تحذير لنا
Those who make revolutions by halves do but dig themselves a grave.
هؤلاء الذين يصنعون أنصاف الثورات ، لا يفعلون شيئا إلا حفر قبورهم

Labels: , ,

posted by AbdElRaHmaN Ayyash @ 12:17   10 comments
Tuesday, 6 May 2008
مش عارف ليه فرحان فينا !!
سلامو عليكم
بجد انا فرحان في الشعب المصري الطيب اللي على نياته
سيادتو بعد اما زود العلاوة
و العلاوة طبعا من صافي المرتب
يعني زود المرتب من 30 جنيه ، عند اصغر موظف ، لغاية 180 جنيه عند موظف الدرجة الاولى
المهم
بعد اما زود الفلوس ، طبعا هو زودها على الورق
قررت الحكومة انها تاخد من الشعب العلاوة اللي هتديهالة
و مش هتاخدها بس
ده الحكومة ليها (سبوبتها ) في الموضوع
الوقود غلى
البنزين و السولار
اللي عاوز اقوله
ان سيادتو قرر يوم 1/5 انه يزود المرتبات
(( اضراب 4 مايو ))
و سيادتو قرر يوم 5/5 انه يغلى الاسعار
ربنا ينتقم من سيادتو
و من اللي بيكتب يأيد سيادتو
و من اللي في يوم من الايام هيأيد سيادتو في عملته السوده دي
اللي عاوز اقوله
ان الاخوان مش هيفضلوا اوصياء على الشعب المصري ، و لا شوية ( عيال الفيس بوك ) مع احترامي ليهم هيبقوا ضحايا صمت الشعب المصري
الشعب ساكت
و لو فضل ساكت هيفضل ياكل (( بيفوتس )) من أخمص قدميه إلى قمة رأسه
علاوة ايه اللي متجيبش وجبة من كوك دور ؟؟؟
و شعب ايه اللي يغلا اهم شيء عنده بنسبة 50 % عشان يعوض التلاتين جنيه اللي ميجيبوش وجبة من كوك دور !!!
على فكرة يا شعب مصر الساكت
الغاز بيوصل تل ابيب من القاهرة دايركت ، و بتراب الفلوس
و احنا هنا مش لاقيينه !!!
و لسه
و الله انا مستبعدش ان هم ياكلوا القمح اللي بنزرعه و احنا هنا نموت على طوابير العيش
يا شعب مصر
الاخوان مش قاعدين لكم ، الاخوان بيموتوا في السجون عشانكم ، و للأسف انتو مش عاوزين تفوقوا
و لسه هتاخدو كمان و كمان و كمان
و مش عارف هتفوقوا امتى !!!
اتمنى يكون بسرعة
حكومتنا دلوقتي بتتبع خطى حماس .. و رفعت اسعار الدخان و السجاير
و حكومتنا في نفس الوقت بتتبع خطى اسرائيل .. و بتجوع الشعب و بتحاصره
و عجبي

Labels: ,

posted by AbdElRaHmaN Ayyash @ 16:30   14 comments
Friday, 2 May 2008
4 مايو يوم غير عادي

السلام عليكم

:) في الاول لازم نشكر اساتذتنا في الاخوان اللي فرحوا كتير مننا و قرروا المشاركة ( بشكل جيد ) في إضراب 4 مايو

فعلا قرار ان شاء الله يكون صائب ، و إن غدا لناظره قريب :)

دي كانت النقطة الاولى

النقطة التانية ،قد لا يعلمها الكثيرون

لكن في يوم 4 مايو ، سيكمل المهندس خيرت الشاطر الثامنة و الخمسين

و شتان .. شتان بين الشاطر ، و مبارك

مبارك الذي أكمل الثمانين من عمره على أنقاض هذا الشعب

و الشاطر الذي ظل طوال حياته من عوامل بناءه

تهنئة للمهندس خيرت الشاطر ببلوغه الثامنة و الخمسين ، و نسأل الله أن يمد في عمره كي يرى النور و يقودنا جميعا ضمن من سيقود طريق الإصلاح في هذا البلد

و تذكرة لمبارك ... معادش كتير سيادتك .. مهما طولت .. هتموت

اكيد انت مش هتقرا الكلام ده سيادتك ، لكن ممكن ناس من اللي بيمسحوا ورا سيادتك يقرأوه ، و اكيد محدش هيقولهولك

لكن لازم يعرفوا اننا هنا .. كلنا .. بنكره سيادتك ، و مش لشخصك يا فندم ، ده لأعمالك يا ريس


كلمة سريعة حبيت اقولها

و كلنا هنكون في بيوتنا .. او على الاقل .. مشاركين في اربعة مايو

في اليوم اللي هيشهد الريس و هو بيكمل تمانين سنة نجح فيهم انه ينقل الشعب المصري من سكني البيوت لسكنى المقابر

و في اليوم اللي هيقدم دليل جديد على غياب حريتنا كلنا ، اليوم اللي هيكمل فيه المهندس خيرت الشاطر تمانية و خمسين سنة ، و ما يقرب من سنة و نصف في سجنه ، بتهمة باطلة .

أتمنى ان اليوم ده مصر كلها تتحرك .. او على الاقل ... مصر كلها توصل رسالة للي فوق .. اننا خلاص .. زهقنا .. و ان الانفجار الاقرب مش هيكون بس انفجار غزة .. لا .. ده هيكون انفجار القاهرة و الجيزة و دمنهور و المنصورة و الزقازيق و الفيوم وبني سويف و بورسعيد و دمياط و طنطا و اسيوط و اسوان

اخر حاجة كنت عاوز اقولها

وصلتني دعوة على الفيس بوك بعنوان .. بعد التلاتين في المية اللي الريس هيديها للموظفين ، مش هنشارك في اضراب اربعة مايو !!!!!

مرة تانية يثبت بعض الناس من الشعب المصري انهم لا يحملون من المبادئ إلا ما يكفي ليقولوا نعم !! و أن ولاءهم الأول و الأخير لمرتبهم الذي لا يشتري العيش حاف ، و لبطونهم الخاوية مثل عقولهم تماما !!!

Labels: , , ,

posted by AbdElRaHmaN Ayyash @ 17:31   11 comments
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats