AbdulRahman Ayyash
 

AbdelRahman Ayyash's Facebook profile

Tuesday, 1 July 2008
عن نفسي .. تاجات متأخرة
سلامو عليكم
ازيكم يا شباب :)
و يا بنات :)
يارب تكونو بخير
في الفترة السابقة المفصلية في تاريخ الحركة الشعبوية المصرية :D
بحب الكلام الكبير انا
المهم وصلتني تاجات من تلات اشخاص غاية في الاحترام و التميز و كل حاجة :D
التاجات المعلقة لدي هي ثلاث تاجات .. اتنين زي بعض ، و هما من أروى الطويل و شهيدة ، و التاج الاقدم و هو مختلف قليلا و لكنه على نفس الخط التدويني ، و هو من الاخ الفاضل المميز و المتميز بهاء باشا فرح باشا :D
التاج الاول .. تاج الحاج بهاء .. يطلب أن أكتب عشر أشياء عن نفسي
و سنبدأ بسم الله :D
-------------------
1
أنا عبدالرحمن محمود .. اسم عياش اسم مستعار ، أخذته لتعلقي الشديد بالمهندس يحيي عياش
أدرس هندسة الاتصالات ، بأكثر من جامعة (A)
جامعة القاهرة واحدة من تلك الجامعات !!!
و الزقازيق كانت جامعة قال منعم أنني أنتمي لها :D
و المنصورة من الممكن أن تبحثوا عني هناك .. لكني لا أعتقد أنكم ستجدوني !
على كل حال ، ادرس هندسة الاتصالات في أماكن معينة ، و أحاول أن أطور نفسي في المجال ذاته


2
أنا أنتمي فكريا للإخوان المسلمين ، أحيانا أستشعر اني من المغضوب عليهم داخل الجماعة ، خاصة بربطي المزمن بعبدالمنعم محمود و محمد عادل !
لكنني أمام آخرين ، أعتبر تقليديا ، (A)


3
أنا بحب القراءة جدا ، أعشقها ان صح التعبير ، بدات التدوين بخلفية ثقافية مستقاة أساسا من نبيل فاروق و أحمد خالد توفيق و ابراهيم الفقي و خالد الصفتي ، و لم أقرأ جديا إلا بعد فترة من التزامي الخط التدويني :D


4
في تالته اعدادي.. و في مثل هذا الوقت .. كنا في مصيف ، و في جلسة عائلية رائعة و هادئة ، تحدثت أن هناك فيلما ( لا أتذكره ) في السينما ، من الواضح انه جيد جدا ، و هو ما عرفته من قراءتي للأسماء على أفيش الفيلم في تلك المدينة الساحلية ، و رد أبي ب(هزار و ضحك يعني ) اني اكيد شاهدت الفيلم عندما خرجت من المدرسة أو زوغت (هربت يعني ) .
وقتها لمعت عيناي دمعا ، و نهضت واقفا و نحن على البحر ، و بقول " و الله انا ما دخلت سينما في حياتي ولا هدخل سينما في حياتي ، حتى لو فيلم صلاح الدين ، "كان وقتها مصطفى العقاد يقول أن فيلمه القادم عن صلاح الدين " و قلبت الجلسة غما بعد ان كدت أبكي )



5
عدت قبل قليل من فيلم hancock لويل سميث ، و هو فيلم رائع لأبعد الحدود على فكرة ، شاهدته في سيتي ستارز ، .
س : وِحِش أنا ؟؟

6
للأسف أعتبر نفسي مكشوفا أمام الاخرين بشكل غريب ، يعرفون ما أفكر فيه ، أعتقد أني أبرز ما بداخلي لأني أحب اللعب باوراق مكشوفة ، خاصة عند مواجهة المشاكل .


7
مرتبك دائما ، أستشعر أن عندي مهام الدنيا لإنجازها ، أحيانا كثيرة أقلل من أهمية تلك المهام ، لكنني أفعلها دوما ، او غالبا ، لا ألتزم كثيرا بمواعيد الانجاز ، في هذه المرحلة ، مرتبك أنا بسبب عملي كإداري في أحد فروع معهد اللغات الذي تمتلكه عائلتنا المبجلة ، و كمحاولة العمل في مجال الصحافة من جديد ، و كدراسة صيفية في جامعة القاهرة ، و كدراسة لغة ، و كتعلم إدارة و (soft skills ) زي البريزنتيشن و التسويق .
لدي مواعيد مع الاخوان في الجامعة ، و التزامات تجاه آخرين في القاهرة ، و هذا يزيدني ارتباكا .


8
هادئ أنا لدرجة البرود ، هكذا يقولون عني ، لا أُستفز إطلاقا بحمد الله ، برغم بوادر مرض الضغط التي بدأت تظهر علي ، و هي ربما بسبب الوزن ، فأنا تخين و بنظاره كما يعرف البعض .
هادئ أحب الهدوء في كل شيء ، لا أحب التطورات المتسارعة في العلاقات ، الحالات ، الأحداث ، الدراسة ، الموسيقى العالية ، الأفلام الصاخبة ، الرتم السريع للحياة يصيبني بـــــــ



9
أحادية التركيز ان صح التعبير ، رغم ارتباكي ، إلا أنني أحب أن أنجز المهام على التوالي ، أحب أن أنهي العمل الأول لأبدا في الثاني ، مؤمن أنا بأني أستطيع العمل تحت ضغط ، لكن كمهام متتالية و ليست متزامنة ، العمل في وقت مبكر أورثني بعض الصفات التي اعتبرها مبكرة ، لكنها مهمة للغاية ، أحاول في هذه الفترة أن أرى كيفية التعامل مع الناس ، في المكان الذي أعمل به ، أرى جميع الأطياف و الاشكال ، غرقان في المشاكل ، كلمة معبرة عن حالتي ، و أيضا أحاول الحل ، و التوفيق بين المشاكل :D



10
أحب كثيرا ، أحلم كثيرا كذلك ، أحلم بمستقبل أفضل على مستواي الشخصي ، أحلم بمصر أفضل ، أحلم أن أسافر لدولة اوروبية للإقامة و الدراسة و العمل ، أحلم بواقع دولي مختلف ، أحلم بمن أرتبط بها (!!!) و أحلم بإخوان أرقى فكرا و أوضح استراتيجية و أكثر تحديدا للأهداف ، أحلم بمجتمع مدني قوي ، أحلم بعائلات مترابطة بلا انغلاق و أخطاء تربوية قاتلة بحجة ( ان ده هو الاسلام ) و أحلم كثيرا بأشياء أكثر ... أحلم أن ينقص وزني بين يوم و ليلة ، أحلم و أحلم .


التاج التاني و هو من عند المدونتين الفاضلتين جدا ، المهندسة شهيدة ، و الاستاذة أروى الطويل ، و هو واجب :

قوانين الواجب :1 - أذكر اسم من طلب منك حل هذا الواجب.
2 - أذكر القوانين المتعلقة بهذا الواجب.
3 - تحدث عن ستة أسرار قد لا يكتشفها من يقابلك للمرة الأولى.
4 - حول هذا الواجب إلى ستة مدونين، وأذكر أسماءهم مع روابط مدوناتهم في موضوعك
5 - اترك تعليق في مدونة من حولت الواجب عليهم، ليعلموا عن هذا الواجب
--------


1
اولا انا مش عارف ازاي حد ممكن ميكتشفنيش كلي على بعضي ، لكن نقول ..
انا ممكن بحب المايكروفون ، لكن بخاف منه جدا ، و لا أفضل اني اكون في الصدارة !
2
أتكلم كثيرا للأسف ، أخطئ كثيرا أيضا ، لكنني أعتقد أني استطيع الاعتراف و التراجع عن الخطا متى اقتنعت داخليا بأنه خطأ
3
أحب العمل العام ، و أعشق العمل في فريق ، التخطيط و المتابعة على وجه التحديد ، أخشى كثيرا من أخطاء التنفيذ ، في حين لا أخشى من أخطاء التخطيط ، أحب العمل بجهد كبير للغاية في مثل هذه المواقف ، لكن في ذات الوقت لا أستطيع الاستمرار في عمل لا أرى منه رد فعل سريع ، و لو كان قليلا للغاية .
4
أكيد اللي هيشوفني لأول مرة مش هيلاحظ اني مواليد سنة 90
5
أكره الحركة !!!!
التحرك كثيرا ، أحب العمل في الأماكن المغلقة مكيفة الهواء :d ، كذلك الكتابة ، و المخاطبة من وراء الشاشات ، و أكره التحرك ، أفضل أن يكون كل شيء بجانبي ، سجادة الصلاة ، كاتل الشاي ، و الكتاب ، البرينتر ، و الكمبيوتر ، و النت ، و الثلاجة ، و السرير أيضا !
أكره العمل الميداني بمعنى آخر ، أحب الرحلات التي لا أكون مسؤولا فيها عن أي شيء .
6
أحب أن أتعامل مع الجيل الأصغر مني بشكل خاص ، جيل سعد و عبدالرحمن ، التوأمين ، جيل محمد خالد ، اللي جاب آخره ، و جيل بلال (هههههههه) ، أكره التعامل مع الكبار جدا ، أقصد من يتعامل بتفكير الكبار ، و أعشق من يتعامل بتفكير الشباب ، المهندس خالد حمزة، مثال للأب الذي يتعامل معك بعقلية شابة للغاية ، و أحدهم من مواليد 89 او 88 يتعامل بتفكير جيل السبعينات ، و أن الأخ لو التزم في نفسه فسترتدي المتبرجة في ضواحي القاهرة حجابها الشرعي !!!!
أوجه التاج لكل من :
1 بلال علاء
2 زهراء بسام
3 سعد و عبدالرحمن (و كل واحد يرد لوحده )
4 محمد خالد حمزة
5 حسام يحيي
6 أنس علاء
بس :d
هم بقى يتابعو و يدوروا و يعلقوا و يحلوا التاج
هخالف الشرط اللي بيقول اني ابعت لهم و احط لينكاتهم
بصراحة مش فاضي خالص
:d الساعة بتلاته جنيه في السيبر ده و انا داخل على تلات ساعات
ادعولي بقى عشان مخنوق في الشغل اللي انا فيه
و ادعولي كمان عشان ربنا ييسر لي في الكورس بتاع جامعة القاهرة
و ادعولي كمان عشان اقدر اتابع شغلي في الصحافة !
و سلامو

Labels: , , ,

posted by AbdElRaHmaN Ayyash @ 22:37  
24 Comments:
  • At 2 July 2008 at 02:42:00 GMT, Blogger belal said…

    ناقص تقول إنك بتدرس الإتصالات في جامعة الدول العربية
    .
    ماله جيل السبعينات ؟؟!!؟
    قلتلك قبل كده
    إن نظرة مالك بن نبي دي..نظرة مادية غير إسلامية
    .
    ثم يا أخي مفيش أي كلمتين حلوين في حقي

    كله ضرب ..ضرب كده

    مفيش كلمتين ..نبقى نحطهم في السي في وللا حاجة

    .
    أقابلك إن شاء الله على خير
    ..

     
  • At 2 July 2008 at 07:14:00 GMT, Anonymous Anonymous said…

    قال رسول الله : { كل أمتي معافى إلا المجاهرين } [رواه البخاري ومسلم

    احياناً كثير منا يرتكب اخطاء.. لكنه بيكون عارف انها خطا في نفسه...لكن حين يتجاوز ذلك الى ما بعده ويفخر بفعلته فاخشى ان ينطبق عليه حديث رسول الله صلى الله عليه وسلم..

    كل عمل هو لك او عليك...
    فياترى البيبي دول وامثاله هيكون في ميزان حسناتك ولا سيئاتك؟؟

    اسال الله لنا جميعاً الهداية

     
  • At 2 July 2008 at 07:58:00 GMT, Blogger Ahmed Nasr said…

    ههههههههههههه
    أبوك راجل طيب ربنا بلاه بفيلسوف..أظن اني كدة اختصرت الموضوع ههههههه

    صحيح فيلم إيه ياخويا؟..بيبي دول؟
    ده فيلم ده ولا لانجيري؟!
    هههههههههههههه لموآغذة يا جماعة انا اصلي مش في مصر ومش عارف وصلت لفين الحركة الفنية..
    إيه الفلم الأندروير ده يا عبدو بيتكلم عن إيه؟ ههههههههه

     
  • At 2 July 2008 at 07:59:00 GMT, Blogger Hosam Yahia حسام يحى said…

    هههههههههههههه

    بلال مستلمك كمالمعتاد

    ان نمكلانش على الشات يبقى جوه التعليقات تمام يامان

    انا حليت الواجب ياباشا

    :d

    توارد خواطر بقا

    اه صحيح كده ينفع بتتفرج على افلام مش كفايه اوقات فراغ

    يخص

    :d

    :))

    http://anao5ra.blogspot.com/

     
  • At 2 July 2008 at 11:03:00 GMT, Blogger فزلوكة said…

    طيب هوا أنا المفروض أعمل إيه دلوقتى؟؟

    أولا: أنا لسه مجاوبة تاجين
    ثانيا :حضرتك ليك تاج عندى

    يعنى مكنش ينفع حضرتك تهديه بدرى شوية
    بحيث الواحد يجاوب كله مرة واحدة
    D:

    وعلى فكرة التاج بتاعى هيتجاوب يعنى هيتجاوب لامجال لخيار آخر
    D:

    عموما
    شكرا جزيلا على الإهداء
    وربنا ييسر وأشوف هجاوبه إزاى
    أنا اتشردت بما يكفى
    مش ناقصة
    D:

     
  • At 2 July 2008 at 13:04:00 GMT, Anonymous أبو زهرة said…

    السلام عليكم ورحمة الله وبركاته
    هذه أول مرة أدخل علي مدونتك وبصراحة وجدت شيئ في نفسي بع قراءة البوست فأنت تورد كثيرا من التناقادات بين من أنك من الإخوان وأناك تشاهد السنما وانك من المغضوب عليهم إخوانيا وغيرها من الأشياء
    ولكن ما شعرت به عند تصفح كثيرا من المدونات ومنها مدونة حضرتك أنهم يستخدمون إنتمائهم للإخوان كما يزعمون للتسويق الإعلامي وجذب الإنتباه وليس أكثر

    وأرجو أن تصحح لي إن كنت مخطئا

     
  • At 2 July 2008 at 22:01:00 GMT, Blogger آية مش هنا said…

    الصدمة التي أخذتها منك من مدة ....او عرفتها قدرا يعني
    انك من مواليد 90 ....
    مع اني لما بشوف تعلياقتك او تدويناك ..كلامك ...بحس انه عشريناتي يعني ...
    ده شئ طيب جدا على فكرة و لو انه صادم لأمثالي :)

    ربنا ييسر لك الخير كله و يعينك في أمرك كله و يهدك لما يحبه و يرضاه ابدا

    تحياتي :)

     
  • At 2 July 2008 at 22:50:00 GMT, Blogger بــــهــاء said…

    كان لازم أول شي تشكرني
    عشان أعطيتك الفرصة تتكلم عن نفسك
    كأنك كنت مكبوت وحد مانعك من الكلام
    عموما
    انت محتاج عصر واعادة تكوين من جديد في بعض الاشياء

     
  • At 3 July 2008 at 03:57:00 GMT, Blogger شهيدة said…

    مع ان حكايه الجامعات دي مش عارفه افهمها حاسه انك بتدرس في السنغال مش في مصر

    لكن ربنا يوفقك ..

    نصيحه اخيره .. جانب القراءه الفكريه قوي عندك .. لذلك حاول الاهتمام أكثر بالقراءه الدينيه الشرعيه عشان الصورة تكمل صح وتكون الاراء اكثر رصانة وقوة خصوصا اذا كنت تعد ذاتك لتكون عياش اخر :) .. سنوات الجامعه افضل مرحله تقرأ فيها بعد كدا المشاغل اكبر بكتير مما تتخيل والذهن لن يكون بهذا الصفاء الحالي


    رتب اولوياتك وامورك بالورقه والقلم كل يوم بيومه .. هيخف ارتباكك كتير .. لان تضارب المواعيد والاشغال فعلا بسبب ارتفاع الضغط مش بس الارتباك
    بعدين خد بالك مش كل اللي بقرأوا مدونتك عارفينك او بيقرأوا لك من زمان فيممكن بعضا مما كتب يتفهم غلط كما حدث في احد التعليقات هنا :)


    بالتوفيق

     
  • At 3 July 2008 at 23:27:00 GMT, Blogger العسكري عتريس said…

    دعوة لحضور المناقشة المفتوحة للمدونين عبر غرفة شرقاوي اون لاين علي البالتوك ، سيدير حلقة النقاش الاستاذ الدكتور إيهاب إبراهيم استاذ المسالك بكلية الطب وصاحب مدونة فليعد للدين مجده ، وذلك في تمام العاشرة مساء اليوم الجمعة 4 يوليو والدعوة لمناقشة موضوعات المدونين المختلفة .
    اقرأ المزيد علي شرقاوي أون لاين موقع طلاب جامعة الزقازيق
    http://www.sharkawyonline.com/Articalshow.asp?NewsID=2223&Categories_ID=17

     
  • At 4 July 2008 at 00:54:00 GMT, Blogger فزلوكة said…

    عديت تانى
    وبالتالى قرأت البوست تانى
    والمرة دى بالتعليقات

    لفت نظرى المرة دى سؤال حضرتك "هوأنا صح?? "
    بص
    بغض النظر عن فكرة الإنفتاح والإنغلاق
    والحلال والحرام

    ليا سؤال
    هل الطفل البرىء إللى عينيه دمعت وأقسم إنو مش هيدخل سينما أبداااااااا

    هوا نفسه باشمهندس عبدالرحمن إللى شاف فليمين فى السينما
    بمعنى
    هل فى الفترة ما بين إعدادى وجامعةحضرتك وصلت لمرحلة أعلى
    بحيث تببررلك دخول السينما ,
    ولا نزلت لمرحلة أقل سمحتلك بدا؟؟

    السؤال مش معناه موافقة أو رفض
    هى الفكرة الأساسية إن حضرتك تحدد

    وكمان حاجة
    جايز أكون قولت حاجة مش من حقى
    بس حضرتك إللى سألت
    ماليش دعوة
    D:
    أتمنى ألا أكون قد ضايقتك
    بس أنا حسيت بمسؤلية إنى لازم أسأل

    عجبتى جدااا "أحادية التركيز "
    كنت لسه أنا وبابا بنتكلم فيها
    لإنى والله أعلم أعانى من نفس المرض
    D:

     
  • At 4 July 2008 at 16:17:00 GMT, Blogger anas3laa said…

    ازيك يا عياش
    خد الكلام ده مني و عد معايا
    * ليلة البيي دول يا عياش حرام عليك خليك زي المهندس عياش ماعتقدش انه كان هيدخل الفيلم ده خالص يعني و نفترض انك دخلته لازم تعمل نفسك المهندس الروش يعني
    *اقرأ الفاتحة كتير عشان تبقى من " غير المغضوب عليهم ولا الضالين" آميييييييييييين
    * عايز أشوفك و أبهدلك :D

     
  • At 5 July 2008 at 01:29:00 GMT, Blogger AbdElRaHmaN Ayyash said…

    بيلو :D
    يا عم الحاج المشكلة مش في جيل السبعينات ياباشا
    المشكلة دلوقتي اننا في 2008
    اللي بيفكر بتفكير 1973 مينفعش هنا ؟
    مش وقته بجد
    ده اللي اقصده
    اراك في القريب العاجل يا صديقي
    سلام

     
  • At 5 July 2008 at 01:33:00 GMT, Blogger AbdElRaHmaN Ayyash said…

    أخي غير المعرف
    بداية جزاكم الله خيرا على نصيحتك التي لا اشك في اخلاصها
    :) هي المشكلة في ايه في الافلام بشكل عام ؟
    او في التليفزيون برده ؟
    هل هي غض البصر ؟
    أم هل هي المكان نفسه ؟
    أم ...
    حقيقة لا أعرف ، لكن على كل حال ، أتمنى أن تكون هناك أطر و حدود لأفعالنا أيا كانت
    و خلالها نقوم بما نفعل !
    سينما كانت او غير ذلك

     
  • At 5 July 2008 at 01:35:00 GMT, Blogger AbdElRaHmaN Ayyash said…

    :D
    الله يخلليك ياباشمهندس
    :D
    هههههههههههههههههههههههه
    هو اسمه غريب جدا الفيلم بصراحة
    و انا مش عارف ليه كده
    :D لكن و الله فيه فكرة جميلة جدا
    ههههههههههههههه
    بس انزل انت مصر و انت تشوف كل حاجة :D
    ربنا يكرمك يا فندم
    نورتنا

     
  • At 5 July 2008 at 01:37:00 GMT, Blogger AbdElRaHmaN Ayyash said…

    حسام :D
    بلاال ده الحتة اللي هنا
    :D
    ربنا يكرمك ياباشا
    اما نشوف
    :D

     
  • At 5 July 2008 at 01:38:00 GMT, Blogger AbdElRaHmaN Ayyash said…

    فذلوكة :D
    هتجاوبي التاج اكيد يا فندم ان شاء الله
    ان شاء الله ابقى اجاوب التاج التاني حين ميسرة :D
    :D
    التشريد لبعضنا ... أسمى هدف من اهداف التاجات

     
  • At 5 July 2008 at 01:40:00 GMT, Blogger AbdElRaHmaN Ayyash said…

    الأخ أبو زهرة
    :)
    أولا شرفت مدونتي بزيارتك الاولى
    حضرتك شككت في نوايانا جميعا ، بأننا نستغل الانتماء (المزعوم ) في الترويج و جذب الانتباه !
    هل من يشاهد سينما خرج من الاخوان ؟.
    و أنا أريد أن أعرف ما هي التناقضات في كلامي من وجهة نظرك

     
  • At 5 July 2008 at 01:41:00 GMT, Blogger AbdElRaHmaN Ayyash said…

    :D
    يااه
    الاخت اية شخصيا
    اهلا وسهلا يا فندم
    :)
    :D
    الواحد فخور انه مواليد تسعين
    :D

    ربنا يكرمك يا فندم
    جزاكم الله خيرا بجد
    على التعليق
    سلام

     
  • At 5 July 2008 at 01:42:00 GMT, Blogger AbdElRaHmaN Ayyash said…

    عم بهاء
    :D

    ههههههههههههههه
    و الله كان نفسي من زمان اتكلم عن نفسي
    فعلا يعني
    :D
    تعمل ايه بقى
    هم دول العظماء
    :P

    ربنا يكرمك ياباشا
    و الف شكر :D

     
  • At 5 July 2008 at 01:44:00 GMT, Blogger AbdElRaHmaN Ayyash said…

    الاخت شهيدة :D
    الموضوع بسيط
    الموضوع بس دورات صيفية و هكذا
    :D
    المهم
    انا متفق معك جدا جدا جدا في موضوع القراءة الشرعية
    ان شاءالله أحاول أن أضع خطة للقراءة ، لم أقرأ كثيرا في هذا الجانب ، ربما لم أقرأ ما يُذكر ، و هو عيب لا أنكره ، سأحاول إصلاحه ان شاءالله
    جزاكنم الله خيرا بجد
    و كلامك صحيح جدا بخصوص الارتباك :D

     
  • At 5 July 2008 at 03:13:00 GMT, Blogger AbdElRaHmaN Ayyash said…

    فذلوكة
    :D
    تاني؟
    نورتي يا فندم :D
    مشكلة الصح و الغلط
    أو الحلال و الحرام
    هو ايه اللي بيخددها
    انا اقصد هو حرام اني ادخل سينما؟
    وللا حرام اني اشوف ((حاجات معينة)) داخل المكان ده
    و في نفس الوقت الحاجات دي هي نفسها اللي حرام اشوفها في التليفزيون او اشوفها في الشارع !
    اتمنى اكون فكرتي وصلت
    لو انا طبقت فكرة عبدالرحمن بتاع تالته اعدادي
    على عبدالرحمن بتاع تانية كلية ( التصحيح تانية مش تالتة :D )
    فانا هكون بظلم الاتنين ، الفكرة من زمان كانت حرام اشرب من الكوب اللي بيتشرب فيه بيرة !
    حتى لو هشرب فيه ماء
    لكن الفكرة دلوقتي اني اشيل السيء و اتعامل مع الجيد بس
    لأني لو رفضت اني اتعامل مع الجيد منه
    فانا هفوت خير كتير جدا
    على كل حال
    :D جزاكمم الله خيرا

     
  • At 5 July 2008 at 03:14:00 GMT, Blogger AbdElRaHmaN Ayyash said…

    ايوا
    بالنسبة لأحادية التركيز
    الموضوع له علاقة بالمهام الكثيرة ، و القلب الواحد !

     
  • At 5 July 2008 at 03:15:00 GMT, Blogger AbdElRaHmaN Ayyash said…

    الباشمهندس أنس باشا علاء
    :D
    و انا نفسي اشوفك و اتبهدل والله
    :D
    هش هتناقش في الكلام اللي انت قلته
    لكن بجد رسالتك أثرت جدا و الله
    الSMS مش هنا

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats