AbdulRahman Ayyash
 

AbdelRahman Ayyash's Facebook profile

Friday, 2 May 2008
4 مايو يوم غير عادي

السلام عليكم

:) في الاول لازم نشكر اساتذتنا في الاخوان اللي فرحوا كتير مننا و قرروا المشاركة ( بشكل جيد ) في إضراب 4 مايو

فعلا قرار ان شاء الله يكون صائب ، و إن غدا لناظره قريب :)

دي كانت النقطة الاولى

النقطة التانية ،قد لا يعلمها الكثيرون

لكن في يوم 4 مايو ، سيكمل المهندس خيرت الشاطر الثامنة و الخمسين

و شتان .. شتان بين الشاطر ، و مبارك

مبارك الذي أكمل الثمانين من عمره على أنقاض هذا الشعب

و الشاطر الذي ظل طوال حياته من عوامل بناءه

تهنئة للمهندس خيرت الشاطر ببلوغه الثامنة و الخمسين ، و نسأل الله أن يمد في عمره كي يرى النور و يقودنا جميعا ضمن من سيقود طريق الإصلاح في هذا البلد

و تذكرة لمبارك ... معادش كتير سيادتك .. مهما طولت .. هتموت

اكيد انت مش هتقرا الكلام ده سيادتك ، لكن ممكن ناس من اللي بيمسحوا ورا سيادتك يقرأوه ، و اكيد محدش هيقولهولك

لكن لازم يعرفوا اننا هنا .. كلنا .. بنكره سيادتك ، و مش لشخصك يا فندم ، ده لأعمالك يا ريس


كلمة سريعة حبيت اقولها

و كلنا هنكون في بيوتنا .. او على الاقل .. مشاركين في اربعة مايو

في اليوم اللي هيشهد الريس و هو بيكمل تمانين سنة نجح فيهم انه ينقل الشعب المصري من سكني البيوت لسكنى المقابر

و في اليوم اللي هيقدم دليل جديد على غياب حريتنا كلنا ، اليوم اللي هيكمل فيه المهندس خيرت الشاطر تمانية و خمسين سنة ، و ما يقرب من سنة و نصف في سجنه ، بتهمة باطلة .

أتمنى ان اليوم ده مصر كلها تتحرك .. او على الاقل ... مصر كلها توصل رسالة للي فوق .. اننا خلاص .. زهقنا .. و ان الانفجار الاقرب مش هيكون بس انفجار غزة .. لا .. ده هيكون انفجار القاهرة و الجيزة و دمنهور و المنصورة و الزقازيق و الفيوم وبني سويف و بورسعيد و دمياط و طنطا و اسيوط و اسوان

اخر حاجة كنت عاوز اقولها

وصلتني دعوة على الفيس بوك بعنوان .. بعد التلاتين في المية اللي الريس هيديها للموظفين ، مش هنشارك في اضراب اربعة مايو !!!!!

مرة تانية يثبت بعض الناس من الشعب المصري انهم لا يحملون من المبادئ إلا ما يكفي ليقولوا نعم !! و أن ولاءهم الأول و الأخير لمرتبهم الذي لا يشتري العيش حاف ، و لبطونهم الخاوية مثل عقولهم تماما !!!

Labels: , , ,

posted by AbdElRaHmaN Ayyash @ 17:31  
11 Comments:
  • At 2 May 2008 at 19:48:00 GMT, Blogger فزلوكة said…

    وأخيييييييييراااااا
    فتحت البلوج
    بقالى تقريبا أكتر من تلات أسابيع
    كل ما آجى أدخل
    يجيى اليوزر بروفيل
    اضغط على اللينك يروح قافلى صفحة النت كلها عندى

    جربت من عند البنى آدمين كلهم من التعليقات ..نفس الحكاية

    وأخيرا
    فتحت من عند باشمهندس بلال

    والله فرحانة

    أما عن البوست
    قرار حكيم حكيم لغاية 4\5
    بجد وزى ما قولت فرحونا
    ربنا يديم علينا الفرحة

     
  • At 2 May 2008 at 20:40:00 GMT, Blogger الـفجـريـــة said…

    دول مش فرحونا بس
    لكن فرحونا جدا

    صحيح انا فرحانة بالمشاركة فى 4 مايو
    لكن سبب فرحتى الاكبر هوا اننا فكرنا بشكل تانى
    مش الفكرة فى نتيجته
    حتى وان كان فى اللى بيقول انه قرار خاطئ
    لكنه اثبت ان كيان الاخوان غير قابل لتجميد المواقف ولكنه يرى ويتفاعل

    ويارب تكمل على خير
    مش بس فى موضوع المشاركة لكن فى سياسة الايام القادمة عموما التى ربما تاخرنا فى التفكير فيها لكن ملحوووقة

    ----

    اما موضوع يوم ميلاد المهندس خيرت المتوافق مع اليوم التانى اللى ملوش اسم ده

    فللمهندس خيرت كل عام وهو واسرته جميعا الى اللى اقرب
    اعانكم الله..ايدكم الله..ثبتكم الله

    كلماتك التى علمتها لناطول الفترة اللى فاتت فى اذاننا وعقولنا و قلوبنا

    ----
    اما عن المناسبة التانية

    فكل سنة وهوه مش طيب
    ومش ريس
    ومش موجود

    مش لشخصه زى مقلت
    لكن لاعماله

     
  • At 2 May 2008 at 22:56:00 GMT, Blogger other_things said…

    This comment has been removed by the author.

     
  • At 2 May 2008 at 22:56:00 GMT, Blogger other_things said…

    احنا هنهزر
    يا حسني انت يا بتاع
    بنكرهك كرئيس
    وكإنسان
    وكبطيخة
    وكأي شئ
    ربنا ياخدك
    ..

     
  • At 2 May 2008 at 23:08:00 GMT, Blogger other_things said…

    This comment has been removed by the author.

     
  • At 2 May 2008 at 23:08:00 GMT, Blogger other_things said…

    ثم يا أخت أسماء أعمال ايه
    اسمها عمايل ..مش أعمال
    ..

     
  • At 2 May 2008 at 23:49:00 GMT, Blogger شــــمـس الديـن said…

    سبحان الله فعلا علي عيد الميلاد

    يوم غير عادي فعلا

    المهم اساسا اللي عايزة اقولهولك

    اللي مش هيشارك في الاضراب علشان الزيادة دي اكيد يبقي عبيط
    لسبب

    لان الزيادة دي هيشربوهالنا

    كل شئ هيغلي بعدهااضعاف مضاعفة و هتنضاف للدين العام
    دا انا قرأت خبير بيحذر انهم مش يطبعوا فلوس علشان يسدوا العجز اللي هتعملةالعلاوة دي

    شوفتوا الهنا اللي احنا فيه

     
  • At 3 May 2008 at 04:23:00 GMT, Blogger hinger said…

    حملة رفع البنطلونات . 2008
    الحملة العربيه لرفع بناطيل الشباب

     
  • At 4 May 2008 at 06:11:00 GMT, Blogger أبو أسامة said…

    السلام عليكم ورحمة الله وبركاته
    أولا : إن كان قرار الإخوان بالمشاركة في إضراب اليوم 4 مايو قرارا صائبا فإنني لا أشك أن قرار الإخوان بعدم المشاركة في إضراب 6 أبريل كان أيضا قرارا صائبا وإلا كنا نحن الإخوان من يتحمل مسئولية ما حدث في المحلة .

    ثانيا :
    يكمل المهندس خيرت الثامنة والخمسين وربنا يديله الصحة وطول العمر
    ويكمل اللواء محمد حسني مبارك الثمانين وربنا ياخده ويريحنا منه .

    ثالثا : دعوة عدم المشاركة في الإضراب بسبب العلاوة الاجتماعية 30% أنا أشك أن مصدر هذه الدعوة هو أمن الدولة .
    وأيضا لمن يفهم الفرق
    أن تعطي علاوة 30 في المية غير أن تزيد المرتب بنسبة 30 في المية

    يعني الموظف اللى بيقبض 500 جنيه مثلا بيكون أساسي مرتبه 200 والعلاوات والحوافز كلها نسبتها 150 في المية
    فلما ياخد العلاوة الجديدة هيكون مرتبه الأساسي 200 جنيه وهيقبض 560 جنيه والعلاوات كلها نسبتها هتكون 180 في المية .
    يعني بيضحكوا عليكو
    أما لو كان عايز يرفع المرتبات فعلا كان رفع الأساسي بنسبة 30 في المية
    يعني بدل ما يكون مرتبه 200 يبقى 260
    وهياخد علاوات وحوافز 150 في المية يبقى هيقبض 650 جنيه بدل 560 جنيه

    بيتهيألي كده بقى نصب السيد المحترم واضح وإنه بيضحك على الشعب

    جزاكم الله خيرا

     
  • At 4 May 2008 at 17:20:00 GMT, Anonymous ابن الإسلام said…

    والله منا عارف يا باشمهندس .. هل فعلا هيبقى يوم مش عادى ولا هيبقى يوم عادى جدا ...

     
  • At 6 May 2008 at 11:03:00 GMT, Blogger فاروتا المصرى said…

    السلام هليكم
    حبيبى ازيك يا عبده
    واحشتنى يا هندسة
    كل عام ومصر كلها بخير بمناسبه عيد ميلاد الرمز الشعبى الشاطر خيرت

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats