AbdulRahman Ayyash
 

AbdelRahman Ayyash's Facebook profile

Thursday, 10 April 2008
المهندس خالد


وحشتني بجد ياباشمهندس
مش عارف اعمل ايه
كل يوم بتخيل اليوم اللي هشوفك فيه
و لما انام و احلم بيك - بحلم بحضرتك كتير اوي على فكره ياباشمهندس - و اصحى ، بحاول انام تاني عشان اشوفك تاني
بقالي كتير اوي بحلم ياباشمهندس
انت بتقولي انك صبرت كتير ياباشمهندس
قبل ما تعتقل و بعد الاعتقال
و انا سألتك انت ايه اللي كان مضايقك مننا هنا
و انت قلتلي اني مقلقش عشان الفلوس هتيجي كتير اوي .. اكتر مما نتصور
و قلتلي تاني اسافر
كل مرة محمد بيكلمني .. ببقى خايف اوي
محمد بيكلمني الصبح و بيبقى عاوز رقم سولو
انا بخاف جدا و انا برد
ليه يعني عاوز رقمه دلوقتي؟
و اعرف انك كنت تعبان ياباشمهندس
كان نفسي اكون جنبك ياباشمهندس
انا عمري ما اتمنيت الاعتقال
لكن اتمنيته عشان اكون معاك
انا مش عاوز اربط فكرة الاصلاح بشخصك ياباشمهندس
لأنك علمتني ان ده بيقضي على الشخص و بيقضي على الفكرة
لكن عاوز اقوللك ياباشمهندس اننا كلنا هنمشي في طريقك
و ان شاء الله انت هتخرج بسرعة و هتقودنا في الطريق ده
طريق الاصلاح
كل اما تقع عينيا على كتب مالك بن نبي بفتكرك ياباشمهندس
انا خلصت مشكلة الافكار في العالم الاسلامي
و استاذي اللي انا ادين لك بانك عرفتني عليه .. اداني كتاب تأملات
و انا بقرأ دلوقتي في الفقه السياسي الاسلامي
انا اعتقد انك هتفرح بيا ياباشمهندس لما تعرف اني بدأت أفكر بشكل مختلف
و بدأت أكون اكثر عقلانية
باستثناء التدوينة دي ياباشمهندس :D
عاوزها تكون عاطفية من الالف للياء
انا و الله بدعيلك كتير اوي
بكتب ليك ورق و بقطعه
ورقتك اللي بعتهالي ياباشمهندس حفظتها في قلبي قبل ما احفظها في محفظتي
بحس اني منفعش اكتب ليك ياباشمهندس
بفكر في كل كلمة قلتهالي في العربية و احنا مع بعض ياباشمهندس
بفكر في عالم الاشخاص و الافكار و الاشياء
بفكر في عاطفيتي اللي بإجرام زي ما بتقول
بفكر في عبدالمنعم محمود و ابراهيم الهضيبي و عبدالرحمن منصور و عمرو مجدي و كل الناس اللي سألتني عليهم و اتكلمنا عنهم
اد ايه انت كنت صح ياباشمهندس
اد ايه انت كنت صح لما اديتني الاجازة .. كان لازم اخدها
درجاتي مش كويسة .. اعتقد اني كنت بفكر بشكل مش متوازن
لكن ان شاء الله هكون احسن في الترم الجاي
على فكره محمد ما شاء الله طلع راجل
بيذاكر كويس جدا
بس هو يبطل عصبية من اقرب الناس ليه .. و يعتقد ان اللي بيحصل ده قدر ربنا .. و ميعممش احكامه على كل الاخوان :)
ان شاء الله املك مش هيخيب فيه ابدا ، و اكيد مش هيخيب في اخواته ان شاء الله ، لانهم اقوى من الظروف دي
اه صحيح ياباشمهندس
انا معدتش بعمم خالص في احكامي
و بقيت بحاول اكون قناعات ثابته
و اخيرا حسيت - بعد درجاتي - ان السبب في كتير من مشاكلنا الفردية بيكون مرجعها لكلمتك .. انه مش متسق مع ذاته
في الكلية شفت دكتور برمجة حسسني معنى " متوالية القمع" اللي قلتلي عليها
لو سألتني تاني عن الفرق بين حسنين هيكل و حسين هيكل .. هعرف ارد باجابة احسن من المرة اللي فاتت ياباشمهندس
هقول ان حسين هيكل .. غير انه كان رئيس وزراء زي ما جاوبت انا في وقت الملك ، الا انه درس في فرنسا و كتب رواية زينب
و حسنين هيكل بتاع تجربة حياة ، و خريف الغضب ، و حرب الساعات الست
مؤتمر القاهرة السادس انا مشاركتش فيه ياباشمهندس ، لكن انا متأكد انه كان ناقصك ياباشمهندس
على فكره ياباشمهندس .. انا كنت مش بعرف ادور كويس
لقيت الدايت اللي انت كنت عاوزه .. قدامي في السوبر ماركت ، انا اتضايقت اوي اوي لما لقيته .. كان نفسي اجيب لك البسكويت اللي انت بتحبه ياباشمهندس و الدايت اللي انت بتكون عاوزه ، بس قالولي مش هينفع اني ازورك ياباشمهندس
باشمهندس .. انا عملت حاجة فرحان بيها اوي لواحد بحبه اوي و انت بتحبه كمان
هو انا معملتش حاجة كبيرة
لكن انا اديت له طرف الخيط و هو مشى في طريقه
هو فرحان ، و انا فرحان :) ..
ان شاء الله انا هسافر ياباشمهندس
و هرجع تاني
اكيد انت هتكون معانا ياباشمهندس و احنا بنسافر ، نتعلم .. نشوف الناس بتفكر ازاي
انا لسه بدور على منح
و هفضل ادور على منح
اهلي مصرين اني انا اللي بهدلني في الدرجات هو تفكيري في السفر
لكن انا متأكد ان اللي بهدلني هو اني مش عارف اوازن في تفكيري
مش عارف ياباشمهندس اقول ايه .. بس انا لقيت ان الاصدقاء بيقلوا .. و الاعداء مش بيزيدو
في المحن اللي زي دي ... حسيت ان في حاجات المفروض تتصلح فينا
انت ان شاء الله هتخرج ياباشمهندس
اكيد مش هتطول عندهم
قضيتك هي قضية مصر كلها
المحليات قضية
العسكرية قضية
هتخلص القضايا
و هتفضلوا انتم .. و هتخرجوا لنا بالسلامة بأسرع مما نتخيل اكيد
باشمهندس
انا بحلم انك تعبان اوي
أنا متضايق اوي عشان انت مشفتش إياد لحد دلوقتي
و الله ياباشمهندس لو كان بإيدي كان زماني في كل زيارة عندك
و لو كان بايدي كنت هخللي محمد ياخده ، لأني عارف ان إياد مش هيتأثر ، و انه يشوفك ، هيكون احسن عنده كتير من تأثير وقتي
ان شاء الله انا حاسس انك هتخرج قريب اوي ياباشمهندس
حاسس ان مصر بتتغير
الاستاذ خليل العناني بيتصور ان التغيير لما ييجي هيكون مفاجأة
مش هيتوقعه حد
و انه هيحصل لما المشكلة الاقتصادية هتتحول لمشكلة سياسية ..
انا بعد الاضراب تأكدت من كلام الاستاذ خليل
باشمهندس
اكتر حاجة انا حاسس اني اتعلمتها منك ياباشمهندس
اننا لوحدنا مش هنعمل زخم
الاستمرارية مش بتيجي بفرد
الاستمرارية تيجي اننا نصنع رأي .. نصنع أشخاص ، نشبعهم بفكرة عامة ، و نترك لهم حرية الافكار الخاصة ، مش وضعهم في قوالب جامدة
انا بحاول ياباشمهندس اتعامل مع اكبر عدد ، بقيت ببعت كتبي بعد اما اقراها لكل حد عاوز يقرا ، لأني لوحدي مش هعمل حاجة
و كلنا هنعمل ياباشمهندس
انا عارف ياباشمهندس انك ممكن متقراش كلامي ده قبل ما تخرج بالسلامة
لكن انا عاوز كل الناس تعرف ان المهندس خالد عمره ما هيغيب عننا و لو مؤقتا
لأنه سايب فينا حاجات كتير اوي ، نفسي اكون اهل اني اشيلها ، و يكونوا اللي حضرتك سلمتهالهم اهل لإنهم يشيلوها معاك ياباشمهندس
أنا هروح اذاكر ياباشمهندس :)
انا متأكد انك بتدعيلنا ، ربنا يفرج عنك ياباشمهندس و يشفيك و يرزقك الصبر في كل مكان
انا خايف ياباشمهندس حاجة من اللي انا كتبتها هنا تزعلك مني
لكن انا عارف انك هتسامحني زي كل مرة لو انا غلطت
هتقوللي يا عياش .... و تقوللي ايه الغلط و انا اصلحه
اد ايه افتقدتك في عمل معين ياباشمهندس ، حسيت فعلا بقيمتك ، مع ان المهندس اللي كان معايا هو كمان كان معاك
لكن حسيت بفرق بين المهندس خالد ، و اي حد تاني
في النهاية ياباشمهندس انا عاوز حضرتك تعرف اننا في الوقت اللي انت غبت فيه عننا .. احنا كنا بنكمل في طريقك
على الاقل منصور .. و عمرو .. و انا
انا بقرأ و بحاول اكتب و بحاول افكر و اكون افكار ابني عليها
و منصور بيكتب و بيتعب و بيُعتقل
و عمرو بيذاكر و بيسافر و بيصنع من نفسه نموذج مفكر
مع السلاامة ياباشمهندس
مع السلامة
ابنك ... عياش

Labels: , , ,

posted by AbdElRaHmaN Ayyash @ 15:24  
12 Comments:
  • At 10 April 2008 at 16:52:00 GMT, Anonymous Anonymous said…

    تحدثت عن كثير مما أود أن أقوله
    شكراً يا عياش

    كثيراً:)
    وفك الله أسر والدنا خالد حمزه عما قريب إن شاء الله

    عبدالرحمن منصور

     
  • At 10 April 2008 at 21:37:00 GMT, Blogger المستكشف/احمد محسن said…

    كلماتك مؤثرة جدا
    و أنا أتمنى بالفعل أن تصل هذه الكلمات إليه بأى طريقه
    فأنت لا تعلم مثل هذه الكلمات ماذا تصنع لمن هم خلف القضبان .
    أخيرا ....
    نحن لا نعرف قيمه من نحبهم إلا عندما نفتقدهم .

     
  • At 10 April 2008 at 22:35:00 GMT, Blogger فزلوكة said…

    مع إن أمر الإعتقالات ليس بغريب عليا
    لكن لاأعرف لماذا تأثرت جدا بهذه التدوينة
    لدرجة أنها أبكتنى

    ربما لم أتقابل مع الباشمهندس خالد ولا مرة
    ولكنى سمعت عنه كثيرا وبالأخص عن دوره معنا
    أحيانا أشعر تجاهه بالذنب
    فنحن كما يقولون السبب

    على كل الأحوال
    كلماتك كانت طفولية يا باشمهندس صادقة ومعبرة
    ويكفينى
    المحليات قضية
    العسكرية قضية
    هتخلص القضايا
    و هتفضلوا انتم .
    بس

     
  • At 11 April 2008 at 03:12:00 GMT, Blogger الـفجـريـــة said…

    تدوينة جميلة جدا

    مع انى متعاملتش مع باشمهندس خالد مباشرة قبل كده الا انه واضح بالوصف اللى بتوصفه وكذا حد تانى بيوصفه وبيحكيلى عليه انه انسان صاحب فكرة وبيسعى عشانها وبيدفع اللى حواليه والتلات حاجات دول لما حد بيجيدهم مع بعض باخلاص بيبقى نموذج راائع

    ربنا يعيده سالما ان شاء الله وقريبا كمان

    لكن اكتر حاجة عجبتنى غير الكلام عن باشمهندس خالد نفسه حاجة كنت بحسها واكتشفت انها اظاهر كده حالة عامة..

    اننا كتير بنحاول نزرع حاجات فى اللى حوالينا ونحاول معاهم يشوفوا طريقهم بجد..احيانا نعمل كده باخلاص وحب..ونلاقى التغيير بطييئ وخطواته متباااعدةده اذا كان بدأ خطوات اصلا..احيانا فى الحالات دى ممكن احس بيأس شوية..من نفسى او من حد..مع ان الانسان دوره الاساسى ان يخلص ويحب ويساعد وبعد كده البذرة دى هتثمر هتثمر حتى لو مش ادامه..

    يعنى بعد الكلام الكتير ده أصدى انك دلوقتى بتكتب للباشمهندس انا بقيت بعمل كذا وكذا واتغير فيه كذا وهحاول اعمل...نفس الحكاية كتير بيعملوها عند غياب من طالما احتواهم وساعدهم..اجد نفسى فى خطابات لابى اخبره انه اخيرا قريت الكتاب ده وده اللى قلتلى عليهم ونسيتهم ..بايت بفكر بشكل جديد..وافكره فاكر لما كنت مدايقة وقلتلى كذا ..انا بايت بعمل الكذا ده كويس عن الاول اوى و كلام كتيير على نفس الشاكلة كتيير اوى

    لو كان بابا يأس منى ومن تغييرى وبطئه او كان الباشمهندس مل وياس او كان كل واحد صاحب فكرة حس ان جهده ملوش تاثير وبطل شغل ودعاء وتفكير وبذل

    مكنش حاجة هتتغير
    ولا اى حاجة

    اصعب حاجة تغيير البنى ادمين
    اصعب حاجة..وأرقى حاجة..وأبقى حاجة

     
  • At 11 April 2008 at 03:33:00 GMT, Blogger شهيدة said…

    الرساله مؤثره للغايه كدت ادمع :(
    ..

    فك الله اسره وكثر من امثاله ممن يفتقدون اذا غابوا .. وبارك فيك ..

     
  • At 11 April 2008 at 21:20:00 GMT, Blogger Hosam Yahia حسام يحى said…

    مع انى ما اتعرفتش على المهندس خالد بطريق مباشر


    الا انك بكلامك عنه شوقتنى الى مقابلته
    والتحدث معه



    كلماتك مؤثره بجد ياعبدو

     
  • At 12 April 2008 at 21:13:00 GMT, Blogger عبدو بن خلدون said…

    ويبقى الأمل

    وتبقى من الليل ساعات معدودات

    بكرة جاي

    ولو ما جاش

    إحنا نجيبه بنفسنا

    - - -

    لا تعليق

    !

     
  • At 13 April 2008 at 01:41:00 GMT, Blogger همسة قلم said…

    اسأل الله أن يفك أسره قريبا وكل من معه ومن سبقوه الى هناك

    كلماتك مؤثرة ياعياش بصورة كبيرة

    بالفعل لم اعرف المهندس خالد كما عرفته انت ولم اتعامل معه كما تعاملت انت ولكن تبقى كلماته التي كان يشجعني حلقة في أذني سأعمل يوما على تحقيقها كي يفخر هو بها ويفخر بها والدي رحمه الله

    شكرا جزيلا لكلماتك التي عرفتني أكثر على شخصية جديرة بالاحترام

     
  • At 13 April 2008 at 11:26:00 GMT, Blogger عاليا حليم said…

    الباحثين عن الحرية كتروا كده ليه ؟
    ربنا بفك أسرهم

     
  • At 14 April 2008 at 00:20:00 GMT, Blogger التوأمان said…

    كلنا زعلنين اوي

    انا مقبلتش البشمهندس غير مرة واحدة
    بس بجد اثر فيا أوي

    ربنا يفك اسرو ان شاء الله هو وبقية المصلحين الي زيو

    جزاكم الله خيرا علي هذه التدوينة الرائعة

     
  • At 14 April 2008 at 21:02:00 GMT, Anonymous Anonymous said…

    أخي الحبيب عياش
    أريد أن أقول أننا يجب علينا أن نرتبط أكثر بالأفكار و المبادئ التي ينادي بها خالد حمزة و لننحي خالد حمزة الشخص جانبا ، لم يقصد حمزة أبدا من وراء احتكاكه بمن حوله أن يرتبطوا بشخصه هو "انا مش عاوز اربط فكرة الاصلاح بشخصك ياباشمهندس لأنك علمتني ان ده بيقضي على الشخص و بيقضي على الفكرة" أحب أن أضيف هنا و لا بأي شخص يا عياش لا خالد حمزة و لا خيرت الشاطر و إخوانه و لا عاكف و لاحبيب و لا أي فرد فدعوتنا التي هي دعوة خالد حمزة هي فكر يسري في هذه الأمة ، و هذا يا عياش إنما هو للحفاظ علي هذه الدعوه لأن الأشخاص زائلون أما الذي يبقي فهو الفكرة و المبدأ ، أقول أيضا ان الأفكار و المبادئ تبقي و تنتشر علي قدر إيمان حامليها بها إذن في النهاية أقول أنه علينا أن نهتف للأفكار و لا نهتف للأشخاص
    ملحوظة : خالد حمزة أستاذي الأول و قدوتي في كثير من جوانب حياتي فك الله أسره وكل المعتقلين إن شاء الله
    أخوك محمد mo7amed1983@ yahoo.com

     
  • At 21 May 2008 at 01:39:00 GMT, Blogger عاشقه الاقصى said…

    عايز اقولك انى اول مره ادخل المدونه الجميله دى

    وكلماتى جعلت الدموع تترقرق من عينى

    وكم تمنيت ان القى المهندس خالد من كلماتك

    فك الله كربه
    وكل اخوانه المعتقلين

    التدوينه رااائعه جدا

    عاشقه الاقصى

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats