AbdulRahman Ayyash
 

AbdelRahman Ayyash's Facebook profile

Wednesday, 28 February 2007
كثرت نقاطك السوداء يا ثوب القضاء



بسم الله الرحمن الرحيم ..

والصلاة والسلام على أشرف المرسلين سيدنا محمد وعلى آله وصحبه أجمعين
لقد كان أملنا في وقت ما معقودا على القضاء المصري
وكنا نقول إن حصن مصر هو القضاء
ولكن يبرز لنا بين الحين والحين ما يثبت لنا أن القضاء المصري ليس كما كنا نتصوره
أو أن من يقوم عليه ليس كما كنا نظنه
كنا نظن أن كل القضاة
كل قضاة مصر
على قدر من العدل والمسؤولية أمام الله والتاريخ .. تلك المسؤولية التي تجعلهم يؤمنون أن الحق ليس في جوار كرسي إمام جائر
وليس الأمن بأمن معقود بناصية عرش سلطان ظالم
ولكن بعضهم
حفنة من بين قضاة مصر الشرفاء
جعلها علينا الظالم .. و أمنها على رقاب الإخوان المسلمين
تلك الرقاب التي كم خضعت لله
تلك الرقاب التي لم ولن تنحن لظالم ولا جائر ولا فاسق
-------------
مهما يطول الليل يا بلادي
شمس الحق هتيجي تنادي
يرجع نور الفجر النادي
ويداوي جراحك وفؤادي
-------------
هذا المقطع من النشيد الذي أسمعه وأنا أكتب تلك الكلمات
نعم والله
قلبي مجروح
عيني دامعة
وكلي أمل بنصر الله
أوقن أن ذلك القاضي الذي حكم بسرقة أموال الإخوان
ليس إلا لعبة في يد ظالم وجائر
أوقن أن تلك الكلمات التي أخطها بدمعي ومدادي هي كلمات حق في وجه سلطان جائر
فليقولوا اهانة للرئيس
أو يقولوا إهانة للوريث
أو يقولوا إهانة لمصري قالوا عنه يوما شريف
أو يقولوا
أو ينادوا
أو ينعقوا
أو يرغوا ويزبدوا
فليقولوا وليقولوا
عني أنا الشعب الضعيف
فليقولوا أهانه رغم حرصه على اشباعه بمسمار فوق الرغيف
أنا مش عارف اقول ايه
أقول لمبارك اتق الله ؟؟
أقول للقاضي والله هقتص منك يوم القيامة
أقول للإخوان اصبروا ولعل ما حدث رسالة من الله أن التمكين لعباده صار قريبا
أم أقول للشعب المصري استيقظ فلم يعد هناك متسع للموات
أم أصرخ في العالم .. يا من تدعون حقوقا للإنسان .. إنسانكم في مصرنا يهان
أم ألعن وأسب
أم أخرج بسلاح وأكفر هذا وذاك
لا أدري
لكني أسأل الله الطريق الوسط
أسأل الله ذلك الطريق الذي رسمه رسول الله


لكني لا أدري .. هل سيتركونني اسير فيه

أم سيغلقوه علي كما أغلقوه على الآخرين

يارب سلم

--------------------------------------

دخلت اليوم حقل التدوين .. أخت جديدة فاضلة

ان شاء الله نجد أثرها في المدونات المصرية جليا

الأخت الأستاذة أسماء

ومدونتها همسة قلم

أنا حتى الان لم أكتب عن دخول مدون جديد لعالم التدوين .. لكن هنا نقف ونقدم التحية والإكبار

ان شاء الله نجدكم هناك ..

و

سلام

Labels: , , ,

posted by AbdElRaHmaN Ayyash @ 17:06   9 comments
Sunday, 25 February 2007
تكتب وتبكي ... أنا نموذجا


أحاول أن أكتب



أحاول أن أصرخ



لكنني سأرسل رسائل



لا أدري هل ستصل أم لا




ولكني سأرسلها




إلى الأسد الهصور خلف القضبان




إلى المهندس البطل











خيرت الشاطر




السلام عليك يا أبي




من بلدك أتحدث إليك




من وطنك الذي لفظك




سيدي خيرت




لا أدري لماذا أتذكر محمود الزهار عندما أراك




هل لأن الله مكن له بعد أن نتف الجلادون لحيته ؟




أم هل لصبره وصمته




لا أعرف كيف يمكن لنا أن أن نصل لتلك المرحلة من السلبية




لكنني أعدك يا مهندس الإخوان .. ليس وعدا وليس حديثا .. إنما هو قسم




أقسم لك أنهم سيدفعون الثمن




أقسم لك أن مبارك .. سيدفع الثمن




أقسم لك أن أولاده وأهله وحاشيته وحكومته ستدفع الثمن




لا أدعو لعنف




ولن أنتهج ذلك الطريق




ولكنني أعلم أن الله يمهل للظالم حتى إذا أخذه لم يفلته




سيدي الشاطر




أبلغ ضياء فرحات مني السلام




أبلغ حسن مالك




أيمن عبدالغني




أبلغهم جميعا مني السلام




ثم بشرهم .. أن نصر الله آت ..




وأن بعد العسر يسرا




وأن ما أخذ منهم سيأتي لهم رغما عن جلادينا وعن حاشيتهم




وأخبرهم عني




أن شركاتهم لعلها تعود




وأن أموالهم لعلها تعود





ولكن أوطانهم .. يوما .. ستعود





-----------------------





إلى أجمل بنوته شفتها في حياتي




عائشة حسن مالك




أقوللك ايه بس يا قمر ؟؟




بجد أقوللك ايه ؟؟




مش عارف




بس انتي عارفه ان بابا هيرجع




وعارفه ان بابا أكرم ألف مره من أي حقير على كرسي




وعارفه ان بابا وعمو وعمو وعمو كلهم معملوش غير الصح




كنت كتبت مره تحت صورتك رساله لماما تقوللك ان بابا مسافر غصب عنه ..




بس لا




بابا مش مسافر يا عيوشة




بابا عمل زي الرسول عليه الصلاة والسلام .. فبدل ما يتضرب .. لا اتسجن




بابا عمل زي الصحابة .. و اتعمل فيه زي ما اتعمل فيهم




اتحبسوا




اخدوا فلوسهم




سرقوا شقا عمرهم




لكن كان دينهم عندهم أغلى من أي حاجه تانية




وكان ربنا أعلى عندهم من أي جبار في الارض هيموت




أنا والله بكتب لك وانا بعيط يا عيوشة




مش عشان زعلان




لا .. والله ما زعلان




أنا مقهور




حاسس بالظلم




بابا ميستحقش كده




عمو ضياء ميستحقش كده




عمو خيرت وعمو ايمن ميستحقوش كده




عمو ياسر والله ما يستحق كده




بس انا عارف ومتأكد




ان كل فجر قبله ليل




واحنا دلوقتي في اخر الليل




صدقيني يا عيوشة




بكره هنعرف كلنا .. لما يكون بابا حسن زي محمود الزهار




وعمو خيرت زي اسماعيل هنية




هنعرف انهم كان لازم يتعمل فيهم كده




مش لأنهم وحشين




لأ .. لأن دي سنة ربنا لما بيمكن لحد من عباده في الارض




عموما يا عيوشة ..




سلمي على ماما واخواتك




ولما تشوفي بابا ..




سلمي عليه كتييييير اوي




-----------------------

تحديث
----
كانت هنا رسالة لحسني مبارك والنظام المصري
حذفتها بناء على رغبة الأهل !!!
ولا عزاء لأي حاجه عند المدونين
اقتنعت ببعض الكلمات
ولم أستطع الرد على الباقي
ولكن ان شاء الله سنجد حلا لتلك المشكلة
وفي القادم بقية الرسالة .. بلا تجريحا ولا شتم




أقسم لكم أنكم ستندمون على كل قرش سلبتموه بغير حق




أقسم لكم أن حياتكم يومها ستكون جحيما




لن نؤذي أحدا




سنترككم لله




هو مولانا




وسيعلم الذين ظلموا أي منقلب ينقلبون


-----------------------





أما أنت أيها الشعب الصامت


إليك كلمة ورسالة


لقد أقسم شرفاء هذا البلد أن يحموك


وأقسموا أن يرفعوا راية دينك ووطنك عالية بين الأمم


ولكنهم وجدوا الظلم من أقرب الناس


ووجدوا القيد ممن كانوا يعدونهم شركاءهم في الوطن


سلبوا أموالهم


سرقوا شقا عمرهم


حرموهم من عيالهم و زوجاتهم


حرموهم من اهلهم وناسهم


حرموهم - او تصوروا - انهم حرموهم من متع الدنيا


لكن معرفوش ان دي مجرد بداية


بداية لقصة هنحكيها ونقول في اخرها


هي دي قصة خلافتنا


بدأت بعذاب ناس عارفين ربنا


واستمرت في دولة ورا دولة


لحد لما خرجت لنا من رحم المحنة شباب وبنات قادرين يشيلوا هم الامة دي


وفي النهاية قدرنا نعمل وحدة


وبعدها لقينا دول الاسلام كلها عاوزه تيجي معانا


واللي كانوا في السجون خرجوا وزراء ورؤساء


وفي النهاية قدرنا نوصل


أرضينا ربنا


مشينا على نهج نبينا


وسدنا العالم بأستاذية الاسلام الجميلة


واتحاكم الظالم


وانتصر المظلوم


وخلصت الحدوتة


حدوتة الزمن


Labels: , ,

posted by AbdElRaHmaN Ayyash @ 00:55   24 comments
لم أستطع أن أمنع نفسي من وضعه .. سلطان القانون

Labels: , , , ,

posted by AbdElRaHmaN Ayyash @ 00:55   0 comments
عائشة حسن مالك

Labels: , , , ,

posted by AbdElRaHmaN Ayyash @ 00:35   4 comments
Thursday, 22 February 2007
مدونوا الإخوان .. اقتراحات
مدونو الإخوان
--------
الاقتراحات وتصميم موقع المدونة من عمل أخينا الدكتور اسامة
والاقتراحات بناء على مجموعة عمل محدده تقاطعت فيها الافكار بما خرج لنا بهذا الشكل
--------

مدونة جماعية .. هدفها عرض الفكرة الاسلامية من خلال أقلام الشباب المدونين .. بالاضافة الي مناصرة قضايا الوطن و الأخوان .. و القيام بالحملات الدعائية لقضايانا و توعية الناس بها .

الأقسام المقترحة حتي الآن :
1- تدوينات :
a. خواطر
b. تعليق علي الأحداث
c. شعر و قصة
d. تصميمات فنية
2- أخبار :
a. أخبار عامة
b. أخبار مجتمع التدوين
3- خدمات :
a. خدمات للمدونين

بالاضافة الي دليل المواقع و تم تقسيم أبوابة الي :
1- مدونات الإخوان
2- مدونات صديقة
3- مواقع الاخوان
4- مواقع أخري

وسائل الجذب التي ستستخدم لجذب الجمهور :
1- الخدمات التي نقدمها للمدونات .. تعليم و صور و اضافات .
2- اعتماد كتابتنا علي روح الشباب و البعد عن الرسمية
3- تنوع الموضوعات
4- و طبعا الاعلان في مدوناتنا .
كما تم الاتفاق علي أنه لن يكون هناك شئ منقول و لكن ستكون كل الكتابات علي قدر الامكان خاصة بالمدونة .

بانتظار اقتراحتكم
ikhwanblogs@gmail.com
------------------------------------
بسم الله
حياكم الله اخواني الكرام
بعد أن رأيت نتيجة الاستفتاء الذي أجريته بين المدونين وهنا على مدونتي
كان السؤال هو ما رأيك في مدونة للإخوان
وجاءت الردود كالتالي
----
31 مدون
بنسبة 79 %
وافقوا على انشاء المدونة
----
3مدونين
بنسبة 8 %
رأوا أن المدونة ستكون مفيدة على مستوى الاخوان وليس على المستوى العام
أي لن تكون ذات تأثير على المستوى العام
----
مدونين اثنين
بنسبة 5 %
رأوا أن المدونة لن تكون مفيدة على اي مستوى .. لكنهم لم يرفضوا الفكرة من الاساس
----
مدونين اثنين
بنسبة 5%
رأوا يهزروا :P وقالوا لي امشي ياض
----
مدون واحد
بنسبة 3 %
رفض فكرة الاقتراح من أساسها
----
بالتالي .. أعتقد أن لدينا مجموعة بأغلبية شورية تعتقد في أهمية انشاء المدونة
وفي هذا الموضوع نقترح بعض البدايات التي ستكون اساس عمل المدونة
وننتظر جميع الاقتراحات من جميع الاخوة المدونين
إخوانا كانوا أو غير إخوان
----
وأضيف تساؤلا :
هل تفضلون أن تكون المدونة موقعا على مساحة مجانية
أم مدونة على البلوج سبوت
مع العلم أنه لو كان على مساحة مجانية .. فسيسهل التعامل معه وستتخلص من عيوب البلوج سبوت
وجزاكم الله خيرا
أخوكم
عبدالرحمن
--------

Labels:

posted by AbdElRaHmaN Ayyash @ 04:33   29 comments
Sunday, 18 February 2007
غدا الاثنين .. مؤتمر نقابة الأطباء بالمنصورة
السلام عليكم
غدا ان شاء الله بعد صلاة المغرب سيكون هناك مؤتمر بنقابة الاطباء بالدقهلية
وعلمت مدونة غريب أن من بين الضيوف سيكون هناك الاستاذ ضياء رشوان وبعض أعضاء مجلس الشعب
وستكون المناقشات حول التعديلات الدستورية والهجمة الشرسة الحالية على الاخواننتمنى من كل القريبين من موقع الحدث التواجد لكي يتم تفعيل العمل
بوركتم
والسلام

Labels: ,

posted by AbdElRaHmaN Ayyash @ 17:24   6 comments
Saturday, 17 February 2007
خطوبة بنت عمتي .. والله ما ينفع



هي : ايه يا باشمهندس .. ايه اللي جابك بدري ؟
أنا : والل لقيت نفسي مخنوق في الفرح مقدرتش أكمله
هي : ربنا يسعدك يا استاذ وعقبالك



---
كان هذا الحوار هو ما استقبلتني به أم محمد بوابة العمارة بعد عودتي في حوالي الساعة التاسعة والنصف
بعدما كان متوقعا أن أعود في الثانية عشرة أو الواحدة بعد منتصف الليل
ولأن السبب الظاهري كان أنني " اتخنقت " من جو الفرح ..
باختصار شديد .. أشرح لكم انا كان تصوري عن فرح بنت عمتي
اللي انا متربي معها
اللي هي أختي أو أكتر من أختي
كان تصوري انه هيكون جلسة عائلية بموسيقى هادئة ( طبعا أنا أفضل الاناشيد الاسلامية على اختلاف أنواعها ) لكن معرفتي بعائلتي فقد توقعت ألا يكون الفرح اسلاميا .. ولكن بتلك المعرفة أيضا توقعت ألا يكون المستوى منحدرا بمستواه الفني إلى هذه الدرجة
وتوقعت أيضا أن يكون العريس والعروس جالسين في وسط الحفل كالقمرين
كما تصورت لأول وهلة أن حفل الخطوبة لا يلزمه التصوير في الاستوديو
ولا يلزمه الزفة بالعربيات
فكل تلك الشكليات تكون في الزفاف أو ليلة البناء
عموما .. فقد هالني ما رأيت في ذلك الفرح
لدرجة أنني قد خرجت في فرح أختي قبل أن يتم نصف ساعة
للتعارف أولا
فالعريس .. أحمد
اليوم .. الجمعة 16 فبراير
بصفتي شخص مثقف ( مغرور من يومي ) فقد كان لابد أن أشاهد حلقة يسري فودة .. سري للغاية .. المعروض على الجزيرة قبل أن أذهب للفرح
وبالتالي فقد اعتبرت نفسي متأخرا عندما وصلت هناك في الثامنة والنصف
ولكني علمت أنهم لن يأتوا إلا بعد التاسعة
ووصل العريس والعروس في الساعة التاسعة الا ربع
بمجرد أن وقعت عيني على العروس حتى أحسست أن قدمي لا تستطع حملي
لا أدري كيف أقولها .. لكن هذه ليست أختي ..
مينفعش
مش صح اللي بيحصل
المكياج !!!
الفستان !!!
مش ينفع كده والله
عموما .. ده اللي انا شفته في العروسة
العريس زي اي عريس
عادي . أحمد كان كويس
طبعا كانت الموسيقى المصاحبة صاخبة لدرجة انني قطعت منديلا كان في يدي لأضع منه في اذني كما أفعل دوما في الأماكن الصاخبة
وبالتالي فقد كانت البداية بالنسبة لي غريبة جدا
ليست البداية التي تصورتها
انا جلست ..
وبدأت ككل الافراح العادية والكثير من الاسلامية اسماء الله الحسنى بتاعة هشام عباس
وبعدها كان النشيد الذي اخترته .. اغنية الدعاء ..
supplications
لسامي يوسف
ثم بدأت ال ... مش عارف بصراحة اسميها ايه
موسيقى سلو هادئة
انا مفهمتش في الاول
لكن لما لقيت العريس بياخد العروسة وبينزلوا يرقصوا سلو في نص القاعة
قلت ان دي بداية غير مبشرة على الاطلاق
وبالتالي رأيت أنه من واجبي أن أخرج خارج القاعة قليلا حالما تنتهي تلك ال... فعلا
وخرجت أنتظر نهاية الرقص
وما ان انتهى الرقص حتى جلسا مرة أخرى
وعادت الأغاني العادية تصدح في القاعة بذلك النعيق الذي لا يعني الا شيئا واحدا .. جهل مطبق في كيفية الاحتفال
ثم وجدت شيئا اخر لم أكن أتصوره
فالأخ شقيق العروس .. الأخ الملتحي صاحب الشيخ حسان ورفيق الدكتور حازم شومان وووو
لا أعرف كيف تقبل ذلك
لكنه حدث
ثم كان شيء آخر غريب قليلا
فقد نزلت قريباتي .. ومن أعرفهن من البنات .. لكي يرقصوا مع العروس
وخالي ازاي يقبل على بنته كده ..
هي آه ما عملتش زيهم .. بس مجرد انها تقف معاهم دي في حد ذاتها مشكلة
وتصفق وتمشي حوالين العروسة وهي بترقص !!!!
خالي اللي كل العيله بتقول انه وانه بيغير على بناته وبيخاف عليهم وووو والمواقف كتيرة
لم أتخيل أن أجد ذلك في فرح لأحد من أقاربي
وعندما وجدت شباب المنطقة التي نقطن فيها بدأوا يرقصون على أنغام " النهاردة فرحي يا جدعان " قررت ألا أبقى ثانية واحدة
وذهبت لآخذ المفتاح من أمي .. فقد نسيت نسختي في المنزل
رفضت في البداية ولم تجد أمام إلحاحي إلا الموافقة
ولكن والدي أخبرني أنه من الأفضل أن أفعل مثله وأظل خارج القاعة حتى ينتهي ذلك الهلس
وخرجت اتلمس أحدا من معارفي
فوجدت ابن عمتي اسلام يتناقش مع أحد أقارب العروس ..
وعندما بدأ ذلك القريب الذي لا أعرف اسمه يسب في الاخوان ..
وجدت أنه من الأسلم لي وله أن أرحل بسرعة كي لا أخطئ في حقه أولا يخطئ في حقي
وذهبت منزلي
وفتحت الماسنجر مسرعا كعادتي
وكلمت أول ما كلمت .. فداء الوطن .. فأخبرني أنني قد فعلت الصواب
وكلمت أمي على الشبكة :) .. فأخبرتني أنه برافو عليا

وكلمت الثالثة .. قالت لي هداهم الله .. وأكدت على صوابي
وفي حوالي الثانية عشرة والنصف
وجدتهم يطرقون باب المنزل عائدين
وبعدها علمت أنهم عملوا لأختي الصغيرة يمنى عيد ميلاد .. احتفلوا فيه جميعا
ورقص الشباب ايضا
يمنى أختي تتم السادسة بالأمس
كل سنة وانتي طيبة يا يمنى وعقبال ميت سنة
وألف مبروك يا عروسة.... وربنا يتمم بخير
وليا كلام تاني معاكم كلكم ياللي في بالي
عموما .. انا منتظر التعليقات يا اخواننا
بس بدون تجريح الله يكرمكم
كفاية اللي لقيته من العائلة
جزاكم الله خيرا
والسلام
عبدالرحمن

Labels: ,

posted by AbdElRaHmaN Ayyash @ 12:24   33 comments
تصميم سريع



يارب فكرتها توصل
اضغط لتكون بحجمها الطبيعي
او هنا

Labels:

posted by AbdElRaHmaN Ayyash @ 03:17   6 comments
صيدلة وطب جامعة الاسكندرية








حملتين لكلتي الصيدلة والطب بجامعة الاسكندرية
تصميم الشعارات بالفوتوشوب

Labels:

posted by AbdElRaHmaN Ayyash @ 01:22   5 comments
Friday, 16 February 2007
من الروائع .. كل ظلم وله نهاية

رأيت تلك التدوينة عند أسماء ياسر مدونة الفجرية ..

فعلا ... غير عادية

أعجبتني كثيييييييييييرا

التدوينة عبارة عن شعر عامي في شكل قصيدة حرة

أترككم معها

كل ظلم وله نهاية

كل فجر وله بداية

بس علشان فجر يطلع

كل نور الشمس دوت مش كفاية

مش كفاية نقول كلام

مش كفاية عيوننا تحلم إننا

وفى لحظة واحدة فى الأمام

مش كفاية ماتش كورة

يخص بلدى

وجون يخدر جوه فى الإنسان ألام

مش كفاية دعوة حلوة

طالعة من القلب الحزين

قلب طيب

بس دايماً مستكين

مش كفاية ارفض الكذب فى مكانى

بس لو كدب اللي فوقى

أقول تمام

مش كفاية

كل دوت مش كفاية

الكفاية واللى نضربله صحيح تعظيم سلام

هما ناس قالوا فى حياتنا القيود ملهاش مكان

ليه رب خلقنى حى

خلقنى انسان

ليه حرية ومقام

قرروا يواجهوا اللى فاكر

إنه قادر

مش عشان كره وخلاف

لكن عشان احنا لينا

رب واحد

منه بس صحيح نخاف

أما لو غيره أراد

اننا نكون له عبيد

ردنا واحد اكيد

نعيش كرام...نموت كرام



ناس غايتها ربها

واللى غايته ربه ده بتهون عليه كل الألام

حتى لو كان جوه سجنه

حلمه طاير فى الجناين

ويا أسراب الحمام

عارف الناس دى يا صاحبى

عايشة فينا

حتى لو سكت الكلام

عايشة بمبادئ جمعتهم

باختلاف جو الزمان أو فى المكان

أما غيرهم راح يموت

حتى لو سمٌعنا صوت

أصدى ع الموتة القوية

موت فى القلوب

مش فى الدفاتر

يعنى عايش وسطنا

ولا حد فاكر



وحياتنا مليانة اختيار

الكل ممكن تقدمله استمارة انضمام

كل الفرق سهل الموصول ليها بسرعة

وفى دقايق

كل ده غير المزايا

والهدايا

وشوف تبيع نفسك بكام ؟؟

أما اذا اخترت الكرامة

يبقى لازم تدفع انته

مش فلوس لكن مواقف

اسمح لصوتك ينتفض من وسط صمتك

يعلا..يثور

اصبر على شوك الطريق

هيخرج الورد الحبيس من أرض عطشانة وبور

وتيقى دى نهاية وبداية

نهاية الظالم وظلمه

وبداية الفجر الجديد

اللى راح ينشر ضياه

ويوصل الاذان لودن

كل من وحشه نداه

وهيه دى حكاية الحياة

تعيش وتختار الطريق

علشان كده دقق وشوف

قبل متبدأ حكايتك

بيوم ميلادك

بالسلام يا ناس عليكم

وتنتهى يوم الممات

بعليكم السلام
...

Labels: , ,

posted by AbdElRaHmaN Ayyash @ 15:32   0 comments
Thursday, 15 February 2007
عندما
عندما أرى تلك القلوب الحمراء تملأ شوارعنا
عندما أتنسم عبير تلك الزهور .. - الحمراء أيضا - تملأ - أيضا شوارعنا -
عندما أسمع تلك الهمسات ..
وأرى تلك الوجنات المحمرة خجلا ..
وتلك العيون الملتمعة شوقا .
.أدرك أن يوم النصر بعيد ..
بل أبعد مما كنا نتصور .
.جميعا
والسلام
----
14/2

Labels: , ,

posted by AbdElRaHmaN Ayyash @ 03:12   13 comments
عندما قال لي .. فالن ايه يا روح ماما ؟؟؟


سلامو عليكم
ازيكم يا اخواننا
امبارح كان يوم 14/2
عارف يعني ايه اربعتاشر اتنين ؟
أكيد عارف
لا مش يوم اغتيال الحريري يا فصيح
قبلها بزمااااان
كان هناك فالنتاين راهب مسيحي كان بيحب واحده واتعدم في الاخر هو وهي
اللي يهمني في الموضوع هنا حاجتين
أصل الموضوع
ونتايج الموضوع
-------
من الواضح اننا نملك كالتشر جاب أي هوة ثقافية كبيرة جدا بين التواصل مع شباب الجيل اللي هم احنا واللي انا مفترض شخص منهم
وبين الموروثات الثقافية التي تربينا عليها من جهة أخرى
تلك الموروثات التي فيها العيد الصغير والعيد الكبير
وبعدها عرفنا عيد الام
وفرحنا بأجازة عيد العمال
ووقفنا على كده
كبرنا شوية وقالوا علينا مراهقين وعيب ومينفعش
وقتها بحكم السن انجذبنا للآخر بكافة أنواعه وأشكاله
وبالتالي عرفنا معنى كلمة الحب
مش حب بابا ولا ماما ولا اخواتي
مش الحب في الله اللي بنعرفه وبنفرح به بصدق لحد دلوقتي
لكن حب من نوع اخر
حب كان غريب علينا لدرجة انه كان له .. عيد
آي والله عيد
عيد على اسمه
بتغلى فيه الحاجات الحمرا بكافة اشكالها
حتى انا اتساءل فعلا اذا كانت الطماطم او القوطة او البنادورا ( لازم التنويع في الاسماء لتعدد الثقافات اللي عندي .. مغرور بقى ) اتساءل اذا كانت بتغلى هي كمان وللا لا
لكن على كل حال
في تلك الفترة عرفنا ماذا يعني عيد الحب
وكيف يحتفل به الحبيبة او العشاق او ايا كانت مسمياتهم
وبعيدا عن رأيي الشخصي الذي طبعا سأوضحه .. الا أنني أريد أن أحاول الاقتراب من تلك القلوب الهفتانه
أحاول أن ألتمس من تفكيرهم بعض ما قد يعينني على فهمهم
عموما .. لنلق الان نظرة اقرب
----
شاب وفتاة يجلسان تحت شجرة ويتهامسان .. تلمح في وجنتيها حمرة الخجل وفي عينية بريق الانتصار
في يديها وردة حمراء .. بالتأكيد أخذتها منه
وبين يديه .. تضع يديها
يحبها حقا ؟؟
أكاد أجزم أن نعم
ما الهدف ؟
بالنسبة له انه يحبها لأنه يحبها ولا سبب ولا هدف ولا مؤاخذة
بالنسبة لفرويد هو يحبها حب .. قلة ادب
بالنسبة لاعلامنا .. بيحبوا بعض وعاوزين في الخلفية اي اغنية رومانسية وفي الكادر حواليهم ورد ودباديب
بالنسبة لراسبوتين .. الواد ده حقير والبنت دي لعوب
بالنسبة لي أنا ... الاتنين مش فاهمين حاجه
واحد بيحب ومش عارف ازاي .. لقى بنت عجبته وهو عجبها عملوا نفسهم بيموتوا على بعض وكانت الصورة اللي وصفتها
وواحده ينقصها الكثيييييير من مشاعر الحب فأرادت أن تحصل عليها من هذا الفانكي بنظرة او بابتسامة او حتى .. بشيء اخر
لكنها تريد أن تلتمس عنده القوة
أن تجد عنده الحنان
وأولا وأخيرا ... أن يشعرها بالحب
الاتنين دول نشأوا في مجتمع محافظ نوعا ما
اما ان الغلط عندهم" حرام" .. ودي غالبية الشعب المصري
أو الغلط عندهم "عيب" .. ودي في طبقة معينة من الشعب .. لا تتجاوز الواحد في المائة
وبالتالي ففي قرارة نفسهم .. او على الاقل في تلافيف عقلهم الباطن هم عارفين انهم غلطانين بشكل او باخر
بعد فترة ما تجاوزوا مرحلة الشعور بالذنب
وبعدها بدأوا بالاحساس بالاستقلالية وان حقهم انهم يحبوا ويكملوا حياتهم لوحدهم ..
وبناء على ذلك وجدناهم يريدون يوما يكونون فيه وحدهم
يوما يعبر فيه كل منهما للآخر عن حبه
يوما واحدا في السنة .. يجاريان فيه العالم كله
ويظهران فيه لنفسيهما مدى التواصل البيني بينهما وكذلك التواصل مع العالم الخارجي
وكان هذا اليوم .. هو يوم القديس .. فالنتين
valentine لمن أراد الفذلكة

أقرأ خبرا في شريط الاخبار في قناة المحور .. مفاده أن العالم ينفق سنويا في يوم الفالنتين ما يقارب 13 مليار دولار
فعلا .. نفسي اقول كلمة وحشه
بس أخلاقي متسمحليش



يا جماعه حرام

في فلسطين ميزاينة الدولة كاملة حكومة ورئاسة تساوي مليار دولار

يعني ما ينفق يوم الحب كما يسمونه في عام واحد .. يوازي انفاق الحكومة الفلسطينية في ثلاثة عشر عاما

بعيدا عن التأصيل الشرعي لليوم ده اذا كان حلال او حرام

الا ان انا هسألك
لو انت جعان وبردان ولقيت واحد جارك بيشتري للأنتيماية بتاعته بجنيه .. مش هقولله بمتين وخمسين جنيه .. بقوللك بجنيه .. لقيته بيشتريلها ورده حمرا ..
انت مقدر قيمة الجنية وانت في بيتك
لكن جارك مش هتفرق معاه

سؤالي .. انت هتستشعر الظلم وللا لا ؟
سؤال تاني .. تتوقع ان الاسلام يقبل من جارك حاجه زي كده وللا لا ؟
سؤال أخير .. لو انت مكان جارك .. كنت هتعمل زيه وللا هتفتكره وممكن تحن عليه وتديله الجنيه ده ؟
انا فعلا مش عارف اقول ايه
بس فعلا تمانين في المائة من شعب مصر يعيش تحت خط دولارين لليوم
يعني احنا بنتكلم على اللحمه كأنها حلم لتمانين في المائة من شعبنا المطحون
فتخيل احساس الاغلبية الساحقة وهي بتشوف ان في يوم واحد .. الفلوس دي بتتصرف من غير حساب

دي كانت نقطة مهمه .. اني اعرف ليه بيحتفلوا بالفالنتين .. وازاي بيحتفلوا به
النقطة التانية اللي عاوز اركز عليها
هي نقطة اننا مثلا في مصر
نعيش في ظل نظام قمعي فاشل لا يرى الا نفسه ولا يعرف عن شعبه الا انه اذا لم يجد الخبز فسيأكل الجاتوه

نعيش في ظل ذلك النظام الذي يسعى لتغييب شبابنا واعادة غسيل عقولهم بما يتوافق مع المرحلة القادمة .. مرحلة الاستسلام الشامل
ذلك النظام الذي يعمل جاهدا على تبديل الاولويات واخفاء المسميات الدنيئة خلف الاسماء البراقة ..
واظهار اسماء بشعة لمسميات كانت يوما رمز عزتنا
ومن البديهي أن ندرك أن شيئا مثل عيد الحب قد يفيد النظام كثيرا أن يعلنه عيدا قوميا .. لما يعلم من نتائجة التدميرية .. وأعني بها التدميرية فعلا
لثوابت
وعقول
وأفكار
الشباب المفترض كونه مسلم
وبالتالي .. أمامنا الان .. معركة ضارية .. يستخدم فيها النظام سلاح التغريب
ويستخدم فيها الغرب سلاح الاغراء
وعلى رأس ذلك السلاح .. يكمن الجنس .. والقلب
هذه كانت بعض الكلمات التي ينبغي أن أقولها
ومحاولة مني أن أتخيل مروري في الشارع المصري متحدثا عن عيد الحب وأنا أقول هابي فالنتاين
فقد وجدت تلك الردود
واحد مؤدب قاللي : يعني ايه فالنتاين ؟
واحد تكفيري كفرني وانا واقف قبل ما امشي من قدامه
شاب من اياهم رد عليا وقاللي هابي فالنتاين تو يو تو
وأخيرا موظف من عمال كفر الدوار .. جرى ورايا بمفتاح عشره وهو بيشتم ويلعن بعد اما قاللي مندهشا : فالن ايه يا روح امك ؟؟؟
وسلام ..

Labels: ,

posted by AbdElRaHmaN Ayyash @ 01:46   2 comments
Wednesday, 14 February 2007
من علا عنان .. من غزة












على كل حال ,, يمكن ملاحظين البانر الي فوق على جنب لدعم الأقصى الشريف ! حبيت
اعرفكم على طريقة وضع هذا البانر على المدونات والمواقع ,, على الأقل للدعم
المعنوي و لكي يبقى الأقصى في البال



اولا قمت بإزالة البار بتاع البلوجر نفسه













المهم ,, كود اخفاء بانر بلوجر



أولا بالنسبة للمدونات على بلوجر النظام القديم



يمكن اضافة الكود التالي في اي مكان في



style tag







أما اذا قمت بالتحويل الى بلوجر الجديد ,, فالكود بيختلف شوية









أما بالنسبة لكود البانر فهو كالتالي:














وجزاكم الله خيرا



تحديث : عدلت كود البانر الي
كان غلط ,, وكمان قام الاستاذ الديب بإضافة المعلومة التالية , انك ممكن تضيف
الجملة التالية على كود بانر الاقصى وفي هذه الحالة ممكن نخلي بانر البلوجر موجود







ليصبح كالتالي







ورجاء أخير ان تدعو لهذه الحملة في مدوناتكم ,, حتى يتسع الاطار ان شاء الله



Labels: ,

posted by AbdElRaHmaN Ayyash @ 08:15   1 comments
Tuesday, 13 February 2007
مش عارف
محبط اوي
تعبان اوي
مش عارف فعلا اكتب ايه
لكن اللي عاوز اقوله هي كلمة واحده
طبعا هكتب بعدها
لكن اللي جوايا كله في كلمة واحده
اني لوحدي
وحدي
!!!
مش عارف هقدر اتجاوز الموضوع ده وللا لأ
لكن أكيد الي هقدر اعمله اني هنسى زي ما نسيت قبل كده
انا لسه بفكر فيها
كنت فاكر نفسي نسيت
لكن مش قادر
بحاول انسى
بس من نسياني بفتكرها
هي مين ؟
انت مالك انت وهو ؟
بس الحاجه اللي اقدر اقولها .. انها لسه في قلبي
بس
وربنا يستر منكم
posted by AbdElRaHmaN Ayyash @ 13:49   9 comments
Friday, 9 February 2007
تلات تصاميم جداد جدا :)


أول تصميم وده لأسرة على خطى الحبيب في صيدلة عين شمس اعتقد


هو في عين شمس وخلاص


واللي طلبه مني مروان في صيدلة اسكندرية


وانا اللي من المنصورة عملته


يا سلام يا جماعه .. لو عطس اللي في الاسكندرية يشمته من في اسوان


الحمد لله


--------------------------


التصميم التاني بنفس الستايل ..


لكن التصميم اللي فات هو اللي مقتبس منه


التصميم لكتيبة الصحوة في الملتقى


شعار برضه


واللي بعده شعار لمجلة كتيبة الصحوة





اضغطوا على الصور للتكبير
دعواتكم يا اخواننا
سلامو
عبدالرحمن

Labels:

posted by AbdElRaHmaN Ayyash @ 05:21   6 comments
ياااااه يا بلد
بقى هي دي مصر؟
يا علي .. صدقني لو كانت البلد كده
يبقى الهجرة منها حرام قبل ما نخلص على الناس دول
اللي حصل يا اخواننا
ان واحد داس على رجل اخو علي الصغير ( أسامة) بالموتوسيكل
كسرله رجليه الاتنين !!!!
الناس راحوا يعملوا محضر في القسم
ووالد علي ساب القسم ورجع على المستشفى لابنه
اول لما مشى .. الظابط اللي في القسم مشى الراجل ابو الولد اللي كان سايق الموتوسيكل
ليه يا حلاوة ؟؟؟
عشان الراجل ظابط
وتحفظ على صاحب الموتوسيكل
اللي واضح انه كان متأجر يعني
بعدها مش بس كده
الراجل بدأ يهزأ في علي اللي كان في القسم على ما والده يروح ويرجع
انا سؤالي بس
لو بلد ماشية بالنظام ده ؟
مستنيين منها فعلا اصلاح ؟
وللا مستنيين من نظامها اصلاح
وللا حتى مستنيين من رئيسها الله يخرب بيته اصلاح
ربنا ياخدهم بدري ويريحنا منهم ومن أشكالهم
وسلامة أسامه يا علي :) ..
ان شاء الله نبقى نيجي نشوفه
سلامو عليكم

Labels: ,

posted by AbdElRaHmaN Ayyash @ 03:51   8 comments
لها هي .. سأرحل رغما عني










غريب أن تكون الفروسية في شيئين ..




في الحب , وفي الحرب




ومن الصعب أن نحقق كلاهما ..




لكننا نختار دوما الأيسر ..




الأسهل ..




الأمل الاقرب




وعندها نصرخ ونستصرخ ..




هل كنا فرسانا عندها ؟




هل كنا عشاقا وقتها ؟




أو حتى أحبابا آن ذاك ؟




لا ندري ..




نحاول ألا نتذكر .. فتنجدنا الذاكرة في وقت نحن أبعد ما نكون عن طلب نجدتها




نحاول أن نبعد شواغلنا .. عقولنا .. قلوبنا ...




لكنها جميعا تظل مشرعة ..




عند أول كلمة ..




تجدها مسرعة ...




تستمع بلهفة




تعقل بهدوء




تعشق بجنون




ولكننا نرفضها




ونثنيها




ونبعدها




! وفي النهاية ..نحن الفرسان



Labels: ,

posted by AbdElRaHmaN Ayyash @ 03:22   0 comments
Wednesday, 7 February 2007
من أروع ما قرأت في حب .. الوطن


كلما أحسست بالخوف من شيء ما، وكلما فقدت الأمن، وأحسست يا وطني أنك أضعف من أن تحميني، وبأنني أضعف من أن أحميك، تمنيت لو لم أولد في ربوعك، ربما في حينها لن أتمزق إن رأيتك تغتصب، إن رأيت الأمن يضيع فيك دون أن أتحرك، لما كنت أخرج من باب بيتي خائفا وعدت إليه كذلك، ربما كنت سأحبك من بعدي كباقي البشر، وربما شعر أحدنا بالأمان، فهل ترى هذا حب يا وطني، أم هو خوف على نفسي؟.
كلما حاولت أن أغازلك وفشلت، لأن هناك من حبه في قلبي أكبر، هو جزء من ترابك، هو صورة من وجهك المضيء كالبدر، هو لمسة من حنانك، هو دفء من حضنك، هو شعاع من نورك الوضاء يملأ الدنيا، لكنه يا وطني حلمي الكبير، لكنه أملي الذي أرجوه، هو حبي وعشقي وروحي، هو قلبي الصغير العنيد، هو سر فرحي وحزني، كما أنت يا وطني لكنني عشقته، أعلل نفسي بأنني أحبه لأنه جزء منك، هو شيء من رائحتك، هو بعض من كلمات الحب فيك، أظن أني حين أغازله تأخذ أنت كل المعاني ويأخذ هو الكلمات، تأخذ أنت دفء نيران قلبي، ويتلذذ هو بعذابها، فهل أنا أحبك يا وطني أم أنني أخدع نفسي بظن حبك؟.

بقلم فداء الوطن

Labels: , , ,

posted by AbdElRaHmaN Ayyash @ 06:21   2 comments
ماذا تنتظرون للأقصى ؟


بسم الله الرحمن
الرحيم

"سبحان الذي اسرى بعبده ليلا من المسجد الحرام الى المسجد الاقصى الذي باركنا
حوله لنريه من اياتنا انه هو السميع البصير "

لسنا هنا بصدد كتابة موضوع أدبي للنشر ..

ولسنا الآن بصدد كتابة بيان شجب واستنكار ..

فلو استطعنا أن نخط الاستنفار العام للدفاع عن الأقصى , لسكبنا من دمائنا الأنهار
مدادا !!



إخواني الكرام :

لم يعد الأمر يحتاج تبيانا وتوضيحا , لقد أصبح أمر الصهاينة الملاعين ونيتهم التي
يبيتونها لقدس من أقدس بقاع المسلمين واضحا لكل ذي عينين , وصار تدبيرهم بهدف هدم
المسجد الأقصى المبارك عيانا أمام كل من يملك عقلا في رأسه .



إخواني الكرام :

لم يعد خافيا علينا أن ما نقارع به اليهود ليس إلا صراع عقيدة ووجود , ومن يظن
غير ذلك فهو مخطئ أشد الخطأ .

إن ما يعانيه إخواننا في فلسطين الأبية ليس إلا سلسلة ممنهجة , وما يفعلونه
بالأقصى الآن ليس إلا " قياس نبض " لردود أفعال المسلمين جميعا !!

أندرك ما معنى الأقصى ؟!

أنعلم ماذا يعني هدم المسجد الأقصى المبارك بالنسبة لنا ؟



المسجد الأقصى :

أولى القبلتين , ثاني المسجدين , مسرى رسول الله محمدا , مهوى قلب عيسى , ومجتلى
عين موسى .

وقد روى البخاري في صحيحه عن أبي هريرة رضي الله عنه عن النبي صلى الله عليه وسلم
قال(( لا تشد الرحال إلا إلى ثلاثة مساجد المسجد الحرام ومسجد الرسول ومسجد
الأقصى ))



وللمسجد الأقصى أربعة عشر باباً منها ما تم إغلاقه بعد أن حرر صلاح الدين الأيوبي
القدس وقد قيل عددها اربع وقيل خمسة ابواب منها: باب الرحمة من الشرق، وباب
المنفرد والمزدوج والثلاثي الواقعة في الجنوب. وأما الأبواب التي مازالت مفتوحة
فهي عشرة أبواب هي: باب المغاربة (باب النبي)، باب السلسلة (باب داوود)، باب
المتوظأ (باب المطهرة)، باب القطانين، باب الحديد، باب الناظر، باب الغوانمة (باب
الخليل) وكلها في الجهة الغربية. ومنها أيضاً باب العتم (باب شرف الانبياء)، باب
حطة، وباب الأسباط في الجهة الشمالية.



وقد كان المسجد الأقصى يعرف ببيت المقدس قبل نزول التسمية القرآنية له، وقد ورد
ذلك في أحاديث النبي حيث قول في الحديث الذي رواه الإمام أحمد بن حنبل في حديث
الإسراء



عن أنس بن مالك أن رسول الله صلى الله عليه وسلم قال:



" أُتِيتُ بِالْبُرَاقِ وَهُوَ دَابَّةٌ أَبْيَضُ فَوْقَ الْحِمَارِ وَدُونَ
الْبَغْلِ يَضَعُ حَافِرَهُ عِنْدَ مُنْتَهَى طَرْفِهِ، فَرَكِبْتُهُ فَسَارَ بِي
حَتَّى أَتَيْتُ بَيْتَ الْمَقْدِسِ فَرَبَطْتُ الدَّابَّةَ بِالْحَلْقَةِ
الَّتِي يَرْبِطُ فِيهَا الْأَنْبِيَاءُ، ثُمَّ دَخَلْتُ فَصَلَّيْتُ فِيهِ
رَكْعَتَيْنِ ثُمَّ خَرَجْتُ فَجَاءَنِي جِبْرِيلُ عَلَيْهِ السَّلَام بِإِنَاءٍ
مِنْ خَمْرٍ وَإِنَاءٍ مِنْ لَبَنٍ فَاخْتَرْتُ اللَّبَنَ قَالَ جِبْرِيلُ:
أَصَبْتَ الْفِطْرَةَ ثُمَّ عُرِجَ بِنَا إِلَى السَّمَاءِ الدُّنْيَا
فَاسْتَفْتَحَ جِبْرِيلُ .." الحديث.





ما الذي يحدث الآن على أبواب الأقصى ؟!



إن اليهود الصهاينة - في إطار محاولاتهم الدنيئة للنيل من مقدسات المسلمين ومنها
محاولتهم حرق المسجد الأقصى (تعرض عام 1969 لحريق على يد يهودي متطرف اسمه مايكل
دينس روهن حيث تم حرق الجامع القبلي الذي سقط سقف قسمه الشرقي بالكامل، كما احترق
منبر نور الدين زنكي الذي أمر ببنائه قبل تحرير المسجد الأقصى المبارك من
الصليبيين و قام صلاح الدين الأيوبي بوضعه داخل المسجد بعد التحرير) - يحاولون
هذه المرة أن يهدموا باب المغاربة , وغرفتين ملحقتين بالمسجد الأقصى المبارك ,
وباب المغاربة هو أحد بوابات القدس.

سمي بباب المغاربة نظرا لأن القادمين من المغرب كانوا يعبرون منه لزيارة المسجد
الأقصى. وقد عرف هذا الباب أيضاً باسم باب حارة المغاربة، وباب البراق، وباب
النبي .



ما نحن أمامه الآن محاولة ليست بالجديدة , ولكن ردود فعل المسلمين الصامتة هي
الجديدة كليا !!

فلم نجد إعلانا لقطع العلاقات مع كيان العدو !

ولم نجدإعلان حرب من جانب قادتنا الأشاوس !!

بل ولم نسمع بيانات استنكار واستهجان شديدة اللهجة أو على عكس ذلك !

فهل سنعتمد على حكامنا الذين لم يعد يشغلهم عن دنياهم إلا دنياهم !! , ولم يعد
يهمهم في الأرض إلا كرسي وحاشية !








إننا الآن لسنا في حاجة إلى عملاء العدو القابعين فوق كراسي الحكم في بلادنا , بل
نحتاج لكل جهد , جهدك أنت أخي , جهدِك أنتِ أختي .

نعم .. نحتاج لكل جهد وكل قطرة عرق ودمع ودم .

فهل نستطيع نصرة المسجد الأقصى وعلى رؤوس سلطتنا من عليها , ونحن المغلوبون على
أمرنا ؟!

نعم نستطيع , ولكن كيف ؟! هذا هو السؤال

نصرة الأقصى :

لقد تقطعت عنا السبل ولم يبق لنا إلا الله , مغيث الملهوف , مجيب الدعاء , غافر
الذنب وقابل التوب .

فابدأ بنفسك أخي , قاتل شهواتك , فلو أدرك كل منا أنه لبنة في جدار أمة الأقصى
وأن انهيار تلك اللبنة هو انهيار في صرح الأمة , لو أدرك كل منا ذلك لما كان
حالنا ذلك الحال .

قاطع عدوك , هل تعلم أنك بدفعك جنيه أو ريال أو دينار لأعدائك الصهاينة فإنك تعين
على أخيك المسلم , ولعلك تكون قد ساهمت في ثمن جرافة تهدم في الأقصى أو تقتل
إخوانك .

تبرع لإخوانك , إن المسجد الأقصى ينتظر منك نصرة , فلتنصره بنفسك , فلتنصره بأهلك
, فلتنصره بمالك .

فإن حبسنا عن الجهاد بالنفس , فلا عذر لنا عند الله إن لم نجاهد بأموالنا نصرة
لإخواننا وللأقصى , فجاهد بمالك تغنم في الدنيا والآخرة .



وقبل كل ذلك وبعده , الدعاء , فإن الله تعالى يقول " وقال ربكم ادعوني استجب لكم
" .

فلعل دعاء من قلب مخلص ينقذ الأمة مما هي فيه .

وكم من قلب دعا ففرج الله عن المسلمين به .



إخواني , لم يعد الأمر في حاجة للتسويف والتأجيل , وقد تكون أنت بمعصيتك لربك ,
وبمنعك المال عن إخوانك , وبشرائك منتجات عدوك , قد تكون أنت بكل هذا أو بعضه
سببا من أسباب هدم الأقصى , وعندها .. لا عذر لك .

فإما أن نعقل الآن , وإما أن نندم بقية أعمارنا , إن كان فيها بقية

والسلام



Labels: , , ,

posted by AbdElRaHmaN Ayyash @ 03:32   0 comments
Tuesday, 6 February 2007
الأقصى .... نامو كمان يا مسلمين
السلام عليكم ورحمة الله
أهلا بالساكتين في بلادنا وفي غير بلادنا
أهلا بالخانعين في أرضنا وفي كل العالم
استمعوا إلى هذا الخبر من الجزيرة نت ..
وبعدها .. فلتبكوا .. فلسطين ..
ولتصرخوا جميعا
أكلت يوم أكل الثور الأسود
لا تقاطعوا يا اخواننا السلفيين .. مصانع المصريين هتوقف .. ازاي تقاطعوا
ده العمال بياكلوا عيش من اليهود
ولا تقفوا قدام اليهود وهم بيهدموا الاقصى
ازاي ؟؟
ننتظر القائد وصاحب الراية والخليفة الرشيد
ولا تستحثوا حاكمكم على مقارعة اليهود
فكيف تخرجون عليه وتعلون على أمثاله صوتكم
خسئت تلك الأفكار وخسئ من عمل بها
ورحم الله قوما كان قائدهم رسول الله
وأنتم يا حكام العرب
صادقوا اليهود ووالوهم
فهم أهل لصداقتكم .. فأنتم وهم سواء
أما الأقصى ..
فلن ينصره الإخوان وحدهم
فللإقصى رب يحميه
ثم له شعب يذود عنه
وفي النهاية ..
شتان بين الثرا والثريا
الخبر
واصلت الجرافات الإسرائيلية عملها في هدم سور خشبي وغرفتين قرب حائط البراق بالمسجد الأقصى, فيما توالت ردود الفعل المنددة بسياسات الاحتلال الرامية إلى تهويد القدس.ودعا رئيس الوزراء الفلسطيني إسماعيل هنية الشعب الفلسطيني إلى أن يهب لحماية المسجد الأقصى "الذي يتعرض للتهويد". وقال لدى مغادرته غزة إلى مكة المكرمة اليوم "إن نداءنا إلى كل أبناء شعبنا الفلسطيني أن يتوحدوا ويهبوا هبة رجل واحد لحماية المسجد الأقصى والمقدسات على الأرض الفلسطينية المباركة".وقد وجه المفتي العام للقدس والديار الفلسطينية الشيخ محمد حسين نداء استغاثة دعا فيه الفلسطينيين إلى الدفاع عن الأقصى, كما دعا الدول العربية والإسلامية إلى تحمل مسؤولياتها.كما دعت الجبهة الشعبية القيادة العامة إلى عقد مؤتمر استثنائي للقمتين العربية والإسلامية لاتخاذ إجراءات عملية تضع حدا للأخطار التي يتعرض لها المسجد الأقصى.ودعا البيان المجتمعين في مكة المكرمة إلى سماع نداء الأقصى والعمل على تمتين الوحدة الوطنية.كما دعا شيخ الأزهر محمد سيد طنطاوي الفلسطينيين المجاورين للمسجد الأقصى إلى التحرك والتصدي للجرافات الإسرائيلية بأجسادهم. وقال في تصريح للجزيرة "عندما يهدم بيتي يجب أن أتحرك"، مؤكدا أن "الفلسطينيين إذا تحركوا على هذا النحو فإن العالم سيتجاوب ويتعاطف معهم".من جهتها دعت كتلة الإخوان المسلمين في البرلمان المصري إلى تحرك عاجل لإنقاذ الحرم القدسي.وفي الأردن دعا سعود أبو محفوظ رئيس لجنة القدس بجماعة الإخوان المسلمين في تصريح للجزيرة نت إلى "تسونامي إسلامي" في مواجهة محاولات إسرائيل تغيير جغرافيا القدس.وطالبت جماعة الإخوان المسلمين في الأردن بعقد جلسة طارئة لوزراء خارجية الدول العربية ودول منظمة المؤتمر الإسلامي. من جهته قال النائب بالكنيست محمد بركة "إننا اليوم أمام جريمة جديدة ضد المسجد الأقصى والحرم القدسي".

وقد وجه قاضي قضاة فلسطين الشيخ تيسير التميمي نداء إلى الشعب الفلسطيني للتوجه فورا إلى المسجد الأقصى لحمايته من جرافات الاحتلال الإسرائيلي.كما ناشد التميمي العالم الإسلامي سرعة التحرك لإنقاذ الأقصى, وقال في تصريحات للجزيرة إن الإجراءات الإسرائيلية تهدد بانهيار المسجد، وتجعله عرضة لاعتداءات من جيش الاحتلال والمستوطنين اليهود.
استمرار حفر الأنفاق يهدد المسجد الأقصى (الجزيرة نت)

استمرار الهدمفي هذه الأثناء تواصل الجرافات الإسرائيلية هدم سور خشبي وغرفتين قرب حائط البراق, وذلك بعد أيام من الكشف عن نفق جديد يجري حفره أسفل الحرم القدسي.وقال مدير مكتب الجزيرة في فلسطين إن جرافة أخرى أرسلت إلى موقع الحفر لتسريع عمليات الهدم.حصار أمني وقال مراسل الجزيرة إن الشرطة الإسرائيلية انتشرت بكثافة في القدس وحشدت نحو 2000 جندي لتفادي حصول أي اضطرابات.كما أشار إلى أن السلطات الإسرائيلية تقول إن الأشغال تهدف إلى تدعيم مدرج يصل إلى باب المغاربة كان قد تضرر من عاصفة ثلجية قبل عامين.وكانت قوات الاحتلال قد منعت كل فلسطيني يقل عمره عن 45 سنة من دخول الحرم القدسي الشريف والبلدة القديمة في القدس المحتلة لمنع أي مواجهات قد تحصل عقب الدعوة التي وجهها قاضي قضاة فلسطين إلى الاعتصام بالأقصى احتجاجا على المخطط الإسرائيلي.وحسب إدارة الوقف الإسلامي فإن قاعتين تحت الأرض تابعتين للمسجد تقعان تحت التل الذي تهدد إزالته أساسات الأقصى.من جهة أخرى قالت وكالة الأنباء الفلسطينية إن مجلس الإفتاء الأعلى أعرب عن خشيته من أن تقوم سلطات الاحتلال بتنفيذ مخططها بهدم جزء من باب المغاربة مستغلة أجواء الاحتقان في الساحة الفلسطينية واتجاه الأنظار إلى لقاء مكة بين حركتي فتح وحماس.وأشارت الوكالة إلى أن "قوات الاحتلال أرجأت هدم هذا الجزء من باب المغاربة أمس الأول بسبب سوء الأحوال الجوية".في المقابل زعم مدير قسم الحفريات في سلطة الآثار الإسرائيلية جدعون أفني في تصريح للجزيرة أن عمليات الحفر بعيدة عن المسجد الأقصى, ووصفها بأنها عمليات ترميم بسيطة وضرورية.

Labels: ,

posted by AbdElRaHmaN Ayyash @ 18:22   0 comments
Monday, 5 February 2007
يوميات دارس (3)الاخيرة عن الكلية




السلام عليكم ورحمة الله وبركاته
كيفكم يا شباب

نعود بعد غياب تدوينة كاملة ضاعت في مذكرات معرض الكتاب
وللأسف لم يكن فيها فلاش باك
اذا في هذه التدوينة نضع كل ما نقدر عليه من فلاش باك
---
عندما أعود بالذاكرة إلى الوراء ..
أتذكر وجوها مشوشة
أسماء مطموسة ..
أعرفها ولا أتبينها
رأيتها .. ولكني لا أدركها
ولكني سأرمز هنا لكل الوجوه .. بذلك الاسم " مؤمن "
وسأحاول أن أتذكر ما كان يقال لي في بعض المراحل ..
ولنبدأ بالفلاش ..
منذ سنوات في عدد شهور حمل المرأة ..
وأنا في السابعة من عمري ..
مؤمن : بودي .. انت عاوز تطلع ايه ؟
أنا : أنا عاوز أطلع عالم !!
مؤمن ( بخبث ) : عالم يعني ايه يعني .. قلة أدب ؟
أنا ( ببراءة ) : لا .. عالم زي أينشتين ومصطفى محمود ( بتاع العلم والايمان )
مؤمن يضحك !!!
---
وأنا في الثامنة من عمري ..
مؤمن : ازيك يا سعادة العالم .. انت لسه عاوز تطلع عالم ..
أنا : اه طبعا
مؤمن : يعني عاوز تدخل كلية علوم ؟!
أنا : ؟؟!!!
هو العالم بيدخل كلية علوم ؟
مؤمن : آه طبعا
أنا : لا لا .. انا مش عاوز ادخل كلية علوم
مؤمن : امال عاوز تدخل ايه ؟!!
أنا : ... !!!
---
في التاسعة من عمري
مؤمن : بودي .. ايه اخبارك يا دكتور ؟
أنا : دكتور !! .. انا مش عاوز ادخل كلية طب
مؤمن : انت خلاص .. العالم بتاعنا
أنا : أنا فكرت في الموضوع .. وقرأت كتير اوي .. ( فعلا كنت وقتها اقرأ كتير .. ممكن أكثر من هذه المرحلة .. أو لعلي أتخيل أني كنت أقرأ كثيرا .. لصغر سني ) .. عن المهندسين ..
فأنا عاوز اكون مهندس
مؤمن : طيب انت عاوز تكون مهندس ليه ؟!
أنا : ... !!
---
في العاشرة من عمري
مؤمن : ازيك ياباشمهندس .. مقلتليش عاوز تبقى مهندس ليه .. وللا مش عارف ؟
أنا : طبعا عارف .. أنا هكون مهندس زي خالو مصطفى !
مؤمن : ... !!!
---
في الحادية عشرة
مؤمن : بيكهام .. عامل ايه يا باشمهندس
أنا : الحمد لله .. ولو ان بيكهام دي مش لاقيه كتير عليا
مؤمن : المهم .. أخبار خالو مصطفى ايه ؟
أنا : صحييييح .. انا عرفت سبب تاني عشان اكون مهندس
مؤمن ( باستخفاف ) : ايه ؟
أنا : أنا هكون مهندس زي يحيي عياش .. المهندس بتاع فلسطين
مؤمن ( بدهشة ) : معرفوش !!
أنا : .. !!!
---
في الثانية عشرة
مؤمن : ازيك يا عياش ( من هنا كانت التسمية .. وعشقت الاسم وقتها ) .. قوللي يا باشمهندس .. انت تعرف المهندسين بيشتغلوا ايه ؟
أنا : ... !!
مؤمن : بص يا سيدي .. دول اما بيبنوا البيوت .. وبيرسموا البيوت بالمسطرة الكبيرة اللي انت بتشوف كريم أخويا ماسكها .. أو بيشتغلوا على الكمبيوتر على طول .. أو بيكونوا زي خالك مصطفى .. في المفاعل ..
أنا : .. يعني هم المهندسين دول هم اللي بيمسكوا المساطر اللي على شكل T .. أنا والله كنت عاوز أكون زيهم بس مكنتش عارف هم ايه .. أنا كده لازم أكون مهندس
---
الثالثة عشرة .. الثالث الاعدادي
مؤمن : ازيك يا بودي .. يللا يا سيدي الثانوية قدامك .. وعاوزين نشوف شغلك .. الرياضة اللي انت هتاخدها كلها .. زي اللي انت هتاخدها في هندسة
أنا : ان شاء الله ناوي اطحن الدنيا .. وفيها ايه يعني الواحد يطلع الاول .. يعني لو ذاكرت كل حاجه .. والدرس بوقته .. وحلليت على كل درس .. لازم هطلع من الاوائل
مؤمن ( بغلاسه ) : كنا بنقول كده يا حبيبي .
أنا : أنا غيركم يا بابا .
مؤمن : هنشوف !!!
---
الرابعة عشرة
والخامسة عشرة ..
والسادسة عشرة .....
---
مما سبق إخواني الكرام .. تدركون أنني - فضلا عن رغبتي في اطالة التدوينة بأي وسيلة - أنني كنت أود من صغري أن ألتحق بالهندسة ..
ومما ثبت في ذهني وقتها
أن المهندس إما .. بكمبيوتر محمول
أو بمسطرة كبيرة T
أو بخوذة برتقالية ليبني الأبراج
أو ....
مطاردا في الجبال .. يفجر العدو .. ويصنع من التراب القنابل
وبالتالي فقد وقر في ذهني أن المهندس لابد أن يتمكن من الكمبيوتر .. والرسم ( لم أعرف وقتها أن الرسم غير الرسم الهندسي ) .. ولا يخشى الارتفاعات .. ولا العدو
ومن هنا فقد كان استعدادي جيدا لهندسة
رغم ما لم تحمله شهاداتي في الثانوية بما يسر الأهل بتلك الطريقة
لكنها كانت مقبولة بالنسبة لي
وكنت أحمد الله .. فلولا توفيقه لما وصلت لربع هذه الدرجة
وبعد أن دخلت الكلية
وفي أول يوم ثلاثاء في الاسبوع الاول
كانت هناك محاضرة ..
دكتور أشيب الرأس
خفيض الصوت رقيقه
لم يرض بالبروجيكتور (projector ) وبعروض الباور بوينت
ولكنه كان يأتي بورق شفاف
مرسوم عليه ما يود شرحه
ويبدأ بعرضه على البروجكتور الضوئي ..
غير المتصل بالحاسوب ..







هذا كان الدكتور ( بهلول )

الدكتور " أحمد البهلول "

عبقري قسم الرسم الهندسي ..

والثالث في الرسم الميكانيكي على الشرق الأوسط

وسابع سبعة هم أبرع مهندسيه على الأرض

تقليدي إلى حد مخيف

رغم عبقريته التي لا يختلف عليها اثنان

إلا أنني لم ألحظ ذلك إلا متأخرا

لسبب بسيط اكتشفته متأخرا كذلك ..

أنني لم أدرس إلا مع الدكتور بهلول ..

ولم ألحظ اختلافا بينه وبين غيره .. لأني من الأساس لم أر غيره

والدكتور بهلول يا سادة ليس بخيلا رغم أنه يحمل 3310

وأيضا الدكتور بهلول ليس بخيلا رغم انه يحتفظ بمسطرته وحتى المنقلة منذ عام 1966


أي ما قبل النكسة

من الجيد أن ندرك الان أن الدكتور أحمد ليس إلا صورة فلكلورية للقرن الماضي .. بكل
عبقريته .. بكل تسارعه .. وبكل تصارعه ..

كان هذا دكتور الرسم الهندسي ..

تلك المادة الممتدة

التي يستمر بها دارس الهندسة يدرسها في المراحل المختلفة في أقسام العمارة والمدني
والميكانيكا

ومشكلة الرسم الهندسي الأثيرة .. تكمن في طول مدة الرسم .. للوحة أو الاسكتش ..
وبالتالي طول مدة انحناء الظهر .. وبالتالي التقوس والحاجات التانية

ويكفي هذا على مادة الرسم ..

لأنني ما زلت أكرهها ..

ولكني أدرسها ..

وسأدرسها

أما الان

فلم يعد أمامي غير تلك المواد الغريبة ..

مواد بسيطة .. تحمل بين طياتها ألغاز الكائنات الفضائية .. وروعة الخيال العلمي ..
مغلفا باسم تلك الكلية .. الهندسة

أحب الميكانيكا .. وأكره الدكتور

أحب الفيزياء .. بشقيها .. وأحب الدكتور .. ولا أحب الثانية ولا أكرهها

لم أكن أكره الكيمياء .. لكنني كنت أرهبها .. وأحب الدكتور

أما الرياضيات .. أساس كليتي .. فلم أعد أحتمل فيها المزيد .. لكنني أعشقها ..
وسأظل

وفي نهاية الحديث عن المواد ..

لا أريد إلا أن أقول ..

الحمد لله ..

على كل شيء

على الهندسة .. الحمد لله

على الإخوان في هندسة .. الحمد لله

على نعمة البوح بسري لمن أثق بهم .. الحمد لله

فالحمد لله .. على تلك الكلمة

الحمد لله

والسلام





Labels:

posted by AbdElRaHmaN Ayyash @ 02:04   2 comments
شوية خواطر







الصمت: الشيء الوحيد المسموع في ليالي الوحدة الكاحلة

الوحدة: هي التعبير الوحيد الذي يطلق على اللاكينونة
واللاوجود


الخوف: هاجس يلاحقنا كالظل المنعكس على جدران الحياة



*********

الحزن: هو الرفيق الدائم لرحلات الأقدار المشئومة


الدموع: مرض يصيبنا عند تراكم الأحاسيس والمشاعر التى
بداخلنا


الفراق: لحظة بداية لإنفطار القلب ومن بعدها يبدأ في
أنشودة الموت الإعتيادية



*********

الصداقة: شيء ثمين صار شعارا لأشياء أخرى هده الأيام

الكره: الشيء الوحيد الذي نتمنى والشيء الوحيد الذي لا
نستطيعه


الحب: حلم دافء يصعب تحقيقه ويستحيل نيله



*********

الحذر: سلاح نتمسك به بعد الإنكسار حتى لا نكررجرائم
الماضي البشعة


الذكرى: هي مقتطف من حلم جميل راودنا قبل النهوض لكابوس
الواقع

Labels:

posted by AbdElRaHmaN Ayyash @ 01:30   1 comments
ألقوا إليها بكلمة .. وقبلة














ما أقسى الظلم ..

ما أقسى تلك الوجوه البغيضة

ما أقسى ذلك النظام الفاشل الفاشي

ما أقساكم من شعب يا شعب مصر

حرموها من أبيها !!

حرموها من قرة عينيها !!

ألم تروا مثلها ؟!

أولم تروها ؟!

طفلة .. زهرة ... كسر شوكتها من لا يستحق على هذه الأرض وجودا

وها هي الان ..

تشير لوالدها عبر طبقات ثلاث من الأسلاك !!

هل يراها !

هل تراه !

أكاد أجزم أن لا ..

لكنني متأكد من أنه يشعر بها ..

وهي تشعر به ..

بل ولعل ما أبكاها هو ذلك الشعور ..

بالظلم ..

بالعجز ..

بالقهر ...

هل تعلم هي أن " بابا " خير عند الله من ألف ألف شيء من جلاديه

هل تدرك أن بابا هو شمعة تحترق .. على طريق محفور من شموع .. مرسوم
من دماء .. مخطوط بسياط الظلم

أحاول ألا أضع نفسي مكان أمها .. فأي شيء ستقوله لها ؟!

هل ستقول إنه لأن أباها صادق طاهر لم يسرق ولم يختلس ومشى في طريق
النور .. لأجل هذا كله أو بعضه هو الان خلف القضبان ؟

وعندها أي رد سترد به الطفلة .. تلك الزهرة

يا أمها .. لا تقولي لها أن أباها من أطهر أهل الارض

لا تبوحي لها أن أباها مؤمن .. لذلك هو معتقل ..

بل أخبريها أن الله يختبركم .. وأن "سفر" أباها رغما عنكم .. هو
جزء من ذلك الاختبار

وفي النهاية ..

بلغوها مني سلام

.. بل ألف سلام









Labels: , , ,

posted by AbdElRaHmaN Ayyash @ 01:06   3 comments
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats