AbdulRahman Ayyash
 

AbdelRahman Ayyash's Facebook profile

Thursday, 6 December 2007
أخ فاضل
هذه القصة القصيرة مقتبسة عن واقعة حقيقية حكاها لي سعد خيرت الشاطر ...
قصة سعد بلا أسماء و بلا أماكن و لا أزمنة ، الذي أكتبه الآن لا يمت للواقع بصلة قريبة أو بعيده ، فقط خيال .. خيال واسع شوية
فقط هو يتحدث عن فكرة عامة ، حاولت أن أضعها هنا في قالب آخر
----
الزمان .. مش مهم
المكان .. القاهره ..مدينة نصر .. مقر أمن الدولة
الحدث .....
يدخل ظابط امن دولة ... سنرمز له بالرمز ( عاطف بيه ) و يبدأ بالسب و اللعن في أحد الجالسين ، و هو الوحيد المعصوبة عينه ، يقول له : و بعدين معاك يا عمر .. مش هتعترف و تخلصنا ؟
- يا بيه انا مش عارف حاجه
- طيب يا --- ... --- احنا هنعرفك
بدأ الكابتن عشماوي ، و هو يمثل حائط بشري له قطر و ارتفاع و مساحة ، في ضرب عمر على وجهه ، و بدأ يخوفه و يضربه على قدمه و في أماكن حساسة ، و يهدده بأنه إذا لم يعترف للباشا بكل ما يريده الباشا فسوف تكون نهايته هنا ، أو على الأقل نهاية التفكير في أن يكون له أولاد .
عمر مش بيتكلم و ساكت ، لأنه معملش حاجه ، عاطف بيه عاوزه يقول انه من الاخوان ، عمر طبعا من الإخوان ، لكن هو عارف ان التعذيب مهما طال فهينتهي .
عاطف بيه يقرر استخدام بعض الوسائل العلمية في التعذيب
يترك عمر لمدة سبع ساعات في وسط غرفة فارغة تماما مساحتها تقترب من العشرة أمتار ، إذا حاول النوم ، يصحو على ضربة أقل ما توصف به أنها مؤلمة للغاية على قفاه .
لم يأكل عمر منذ ما يقرب من الثلاثين ساعة ، بالطبع لم ينم منذ وقتها ، بدأت أعصاب عمر تنهار ، اعتقاله كان منذ عشرة أيام ، و هو الذي لم يترك منزله لمدة تجاوزت الاسبوع ، إلا مرة عندما ذهب مع أهله جميعا للأراضي المقدسة ليؤدي مناسك العمرة .
عمر كذلك ضعيف البنية ، لم يكن يتصور أنه يحتمل البقاء حيا طوال هذه المدة بلا طعام ، الماء كان يعطونه له كل اربع ساعات ، عمر اكتشف أنه أصبح رجلا منذ أن اعتقلوه ، هو في العشرين من عمره الآن ، لكنه لم يعتد بنفسه إلا عندما طرق رواد الليل بابه طالبينه معهم لربع ساعة فقط .
عمر بدأت أعصابه تنهار جديا ، لقد تحمل عذابهم طويلا ، لكنه لن يصمد أمام عدم النوم و الملل القاتل ، أيضا كان جسده قد بدأ ينهار عضويا ، بفعل القسوة في التحقيق كذلك المنع من الطعام ، عمر قرر أن يصمد طويلا هذه المرة ، التعذيب لابد و أن ينتهي ، و هو أخيرا استطاع أن يشعر بكونه رجلا يعتمد عليه .
عاطف بيه وجد عمر يحارب نفسه في زنزانته الواسعة الفارغة ، يتمتم ببعض آيات القرآن أو الأدعية التي يحفظها ، عاطف بيه مشغول و ليس مستعدا لتمضية بقية عامه مع عمر بلا فائدة ، يقرر أن يستخدم الأشياء المرعبة و التي لا تترك أثرا ..
---
عمر يستدعيه عاطف بيه ، يجلس عمر على كرسي مختلف هذه المرة ، الكرسي معدني كليا ، هو معصوب العينين ، إلا أنه أحس بنبرة غريبة لم يعتدها في صوت عشماوي ، عشماوي كأنه لا يهدده هذه المرة ، كأنه يستعطفه ، عشماوي مغلوب على أمره هو الآخر ، هو إنسان ، فقد مدلول إنسانيته و لم يعد يبحث عنها بين الناس ولا حتى في أروقة أمن الدولة .
عشماوي يحاول أن يطلب من عمر الاعتراف ،
- هتعترف يا عمر ، انت لسه شاب و محدش عارف المستقبل .
- عمر .. يا بيه انا مش عارف انا هنا ليه اصلا .
عاطف بيه : طيب يا عشماوي .. سيبنا انا و ابن الــ... لوحدنا و اطلع انت انتظر بره .
و يلتفت لعمر .. أيوا يا سي عمر ، كنت بتقول انك مش عارف حاجه .. صح ؟
- ايوا يا باشا معرفش حاجه .
فجأة ينتفض جسد عمر ، يشعر و كأن أعمدة حديدية تخترق مخه و تسري عبر جسده كله فتبعث فيه ألما لا يطاق
يستمر انتفاض عمر ما يقرب من العشر ثواني ..
عاطف بيه .:. ايه يا عمور .. تحب أزود الفولت شوية ؟؟
- يا بييه ما عملتش حااااجااااااااه
الانتفاض يتكرر و الألم يكاد يعصف بعمر ، عمر فجأة يحس بصفاء ذهن فائق ، لم يعد يشعر بعاطف بيه ، كان يرى والدته التي استمرت طوال الشهر الماضي تطلب منه أن يسرع بالخطبة ، حتى عندما يخرج من الجيش ، فيجد عروسه في انتظاره ، و هو ابن أمه الوحيد ، تريد أن تفرج بعياله سريعا !!
فجأه يستيقظ عمر على ارتطام اناء من الماء البارد بوجهه و جسده العاري ، عمر يشعر أن جسده لم يعد ملكه ، يقترب من حافة السقوط النهائي ، عاطف بيه يتحدث : مش هتعترف يا ابن الـ ... بقى ؟ المرة الجاية لما أزود الفولت مش هيغمى عليك .. لا .. ده انت هتنور يا روح أمك .
لم ينتظر عاطف من عمر الرد ، وجد عمر بقية ملابسه تتطاير بعيدا ، و عشماوي يظهر أمامه فجأة بعد أن أزال عصابة عينيه ، التي آلمه كثيرا إزالتها ، عشماوي فعلا مرعب ، الشرر يتطاير من عينيه ، عمر يخاف فعليا عندما يجد عصا ( مقشة ) في يد عشماوي .. عمر يصرخ .. خلااااص يا باشا .. هعترف هعترف .
---------
أيوا يا عمووووور .. انا كنت عارف انك عاقل و هتتكلم ، قول بقى يا حبيب قلبي .. ازاي أصبحت أخ فاضل .
طيب يا باشا معلهش .. اسمحلي بس ألبس هدومي ، و آكل أي لقمة لأني مش قادر ، و الكلام طويل اوي اللي عاوز اقوله .
- انت تؤمر يا عمور .. اللي بيريحنا هنريحه على الآخر ..
عمر مرتدي ملابسه كاملة ، و يجلس أمام عاطف بيه ، بعد أن تناول وجبة رهيبة من رغيفين مسلحين و قطعة جبنة
عمر يبدأ بالحديث :
يا بيه البداية كانت من تلات شهور .. لما لقيت واحد بيقوللي و انا بصلي العصر في الجامع ، انت ايه رأيك في الإخوان .. قلتله أحسن ناس .. يا بيه انا كنت عاوز اسكته و خلاص .. قاللي ايه رأيك تبقى اخوان ، بصراحة يا بيه الموضوع عجبني اوي ، و قلت اجرب .. ايه يعني .. قاللي طيب نتقابل يوم الجمعة الجاية قدام "رابعة" ( مسجد في مدينة نصر ) الساعة سبعة الصبح ، و ياريت تكون جاي بلبس رياضي .
هنا بدأت أمارات الاهتمام على وجه عاطف بيه ، و مال على عمر الذي استمر بدوره ..
انا ما صدقت يا بيه ، و يوم الجمعة من الفجر كنت في رابعة العدوية ، لابس أديدس و نايك و بوما في طقم واحد .. رحت يا بيه لقيت لك اوتوبيسين سياحيين فاخرين .. و اتنين واقفين على بوابات الاوتوبيسات .. بينادو .. فلان الفلاني .. علان العلاني.. و اللي يقولوا اسمه .. يركبوه معاهم في الاوتوبيس .. و انا يا باشا سمعت اسمي و طلعت جري على الاوتوبيس .. لقيت الراجل اللي بينادي الاسماء بيقوللي .. انت تستنى هنا شوية .. قلت ماشي
و بعد اما نادى الاسماء و كله طلع الاوتوبيسات و انا وقف على الارض
لقيت الاوتوبيسات بتمشي .. و فضلت لوحدي في المكان يا بيه .. و من هنا بقيت أخ فاضل !!!!
-------
عمر لما كان بيحكي حكايته .. كان بيقف على النقطة دي و يسكت و يعيط شوية .. و ميقدرش يكمل .. واضح ان عاطف بيه وجب معاه على الاخر .
و دي كانت نهاية قصة أخ فاضل .
--------------------
--------------------------------
--------------------------------------
انا هكتب كذا حاجه كده
الاول و الله وحشتوني كلكم يا شباب المحاكمات العسكرية
عبدالرحمن الحسيني .. سعد و حسن الشاطر ، عبدالرحمن شوشة .. ، عمر علاء . بلال ضياء .. حبيب قلبي عاصم مرسي .. و كل الوجوه الرائعة .. وجوه آل بليغ .. و آل عصام عبدالمحسن .. و الأخ اللي بيجي مع عاصم المرسي .. و كل اخواننا هناك .. و الله وحشتوني فعلا
-----------
تاني حاجه ..
هم اللي بيدونوا بنفس الطاقة بتاعتهم .. معندهمش امتحانات ؟؟؟ .. طيب انا اللي فاشل و مش عارف حاجه في اي حاجه حسيت بالخطر المحدق بيا السنة دي و قلت هبدأ اذاكر .. لكن كل دول فاشلين ؟؟ اكيد لا .. ربنا يوفقكم .. بجد ربنا يوفقكم
----------
اكيد دخولي على النت هيقل الفترة الجاية عشان الامتحانات
دعواتكم

كنت عاوز اكتب كلام كتير اوي
ممكن لما افتكر حاجه اكتبها .. ممكن مش اكيد
على كل حال
شكرا يا اخواننا
سلاام

Labels: , ,

posted by AbdElRaHmaN Ayyash @ 21:14  
39 Comments:
  • At 6 December 2007 at 23:07:00 GMT, Blogger امام الجيل said…

    بحجز مكان بس قبل اى حد
    ونشقر ع التدوينة وهنعقب تانى
    سلامون

     
  • At 7 December 2007 at 00:39:00 GMT, Blogger خالد أبوالفضل said…

    وكأني أعرف هذا الأخ
    بل إنني أعرفه بالفعل
    يا بيه .. هما ركبوا وسابوني لوحدي فبقيت أنا الأخ اللي فاضل
    بس صياغة حلوة والله
    واحشني يا إنجنيييييييييير
    وبحبك في الله
    سلااااااااااااااااام

    آه صحيح
    أنا كتبت موضوع علي مدونتي اسمه
    أفكارنا وأحلامنا بين الواقعية والتنظير
    يشرفني إنك تقوللي ملاحظاتك عليه
    سلاااااااااااااااااام
    متقلقش .. المرة دي سلام بجد
    أخوك

     
  • At 7 December 2007 at 12:11:00 GMT, Blogger فزلوكة said…

    السلام عليكم يا أستاذ عبد الرحمن
    عاطف!!!!!بتهيألى أعرف الاسم ده
    مرة أستاذى إللى حفظنى القرآن قاللى إن السبب فى ثباته وإستحماله لجلسات الصعق الكهربى كان الشخص إللى بيعذبوه لما كان أستاذى خلاص نوى إنه يعترف من شدة التعذيب وعلى آ خر لحظة لقى الشخص ده بيقولوا (إنتوا كده يا إخوانجية مبتقروش أبدا مش عارف ليه؟)وده كان السبب إن أستاذى الفاضل يصبر
    نماذج كتيرة أوى بشوفها قصادى وأخاف من نفسى جداأنا ممكن أصبر زيهم ؟؟
    أنا دلوقتى فى بيتنا وأعتبر إخوانية , طب لو فى المعتقل هكون إيييييه؟؟؟

    التعليق طويل شوية....شويتين
    معلش لإنى إحتمال كبيير آخد فترة كبيرة على ما أعلق تانى
    لإنى من الفاشلين إللى أدركوا مؤخرا إن عليهم إمتحانات بعد العيد
    جزاكم الله خيرا يا أخ عبدالرحمن على الحبكة دى
    أنا قربت أتعقد

     
  • At 7 December 2007 at 13:10:00 GMT, Blogger وضـّاح said…

    متهيألي أعرف واحد اسمه عاطف بيييه

    بس التاني ياعيني غلبان ومنكسر .. بكسر الكاف والسين

    حمدا لله على سلامتك .. يا أخ يافاضل

    وربنا يعينك على امتحاناتك

    في أمان الله
    :)

     
  • At 7 December 2007 at 13:52:00 GMT, Blogger ارحم دماغك! said…

    ازيك يا عبدو..دانت طلعت أخ فاصل اهوه..
    أيوة فاصل هعهعهعهعهع

    لا حلوة بجد!!..انت عارف لما وصلنا لحتة الأكل فكرتني بقصة مشابهة برضو لأخ فضل يتعذب وينضرب..
    قال هاعترف هاعترف، لما جاء يتكلم برضو طلب ياكل ويشرب وعمل مفرهد عالآخر..
    لما أكل وشرب قال اضرب ياجدع هههههه

    بس مفيش نكتة من دول سمعتها بسند عدل..مفيش غير أخ واحد هو اللي حكالي انه كان بيستهبل عالضابط بطريقة ما..لكن مش بالشكل ده أبدا..يعني مش لدرجة انك تاكل وتريح وتضحك عليهم متعترفش دي يعني..واسعة :D

     
  • At 8 December 2007 at 11:35:00 GMT, Blogger Ahmed Al-Sabbagh said…

    السلام عليكم أخى وصديقى عبد الرحمن

    أنا اهو جيت المدونة وطلع فعلا زى ما قلت انت انا تقريبا اول مرة اجى هنا

    بس المفاجأه انى انبهرت اوى لما جيت عندك .. شكلا ومضمونا

    شكلا لان تصميم مدونتك متميز اوى وجميل جدا انا بس ليا ملاحظة واحدة ان الخط صغير شوية مع المقالات الطويلة بعض الناس عنيهم بتوجعهم .. مش انا طبعا :)

    مضمونا أكثر من رائعة وواضح ان عندك وجبات دسمة اوى وعايزة الواحد يقعد عليها يخلصها

    بس مبدئيا البوست جميل اوى وصياغتك جميلة ولغتك راقية

    هروح بقى أخد جولة فى المدونة

    تحياتى

     
  • At 8 December 2007 at 14:31:00 GMT, Anonymous الفجرية said…

    ضحكت مع انها مبكية تماما
    اوقن فى رحمة الله ومبحبش اقول او حتى اتخيل ان فى ناس ممكن تتحرم من الرحمة دى


    لكن اللى بيعذبوا دول
    حاجة تانية
    لا استطيع حتى ان ادعو لهم بالهداية

    مش بشر اصلا
    ---------

    اما عن الامتحانات
    فالفكرة انى بحب التدوين اوى وقت الامتحانات
    وتتدفق الافكار بردواوى وقت الامتحانات
    بس مش بلاقيلها وقت
    مع ان فى رايى الوقت موجود ويكفى
    لكن احنا اللى مبنظموش صح

     
  • At 8 December 2007 at 21:16:00 GMT, Blogger other_things said…

    خخخخخخخخ

    خفة
    ..

     
  • At 9 December 2007 at 09:44:00 GMT, Blogger عبدالرحمن ياسين said…

    ربنا يعينك في إمتحناتك

    بودييييييييي
    أنا نزلت بوست جدي أرجو ان تلقي نظرة

    سلام

     
  • At 9 December 2007 at 14:06:00 GMT, Anonymous hamza said…

    بجد الموضوع صياغته جامدة ..
    معرفش .. اضحك من الموقف ؟؟
    اعيط من الظلــــــــــــلم؟
    بجد ربنا يثبت اخواننا ..
    وربنا يوفقك فى مذاكرتك
    بجد بدعيلك
    ادعيلى يا عبده
    سلاااااام

     
  • At 9 December 2007 at 14:39:00 GMT, Anonymous عاطف الحسيني said…

    انا هخليك اخ فاضل برضه
    وهوريك يا بتاع انتا

     
  • At 9 December 2007 at 18:55:00 GMT, Blogger أبو دجانة said…

    أسلوب رائع ..
    وحشتنى والله يا عبده .. نفسى اشوفك ..
    اهم حاجة تشد حيلك فى المذاكرة ..
    انت ممكن أيام الامتحانات تكتب مقال او اتنين وانت ذهنك مشغول بالمذاكرة ..
    بس ممكن تكتب عشر مقالات بعد الامتحانات وانت ذهنك صافى .. ربنا يعينك يا باشمهندس

     
  • At 9 December 2007 at 20:55:00 GMT, Blogger امام الجيل said…

    رجال يحملون سياط كاذناب البقر
    من سواهم
    نرجو ان يتم فيهم موعود رسول الله
    الله على ذك قدير

     
  • At 10 December 2007 at 21:38:00 GMT, Blogger mohammad hamza said…

    حبيب عيياش اخيرا عملت مدونة ده تانى مرة اعلق بس مختلفة ..
    انا كتبت موضوع جديد يهمنى اوى رأيم فيه ..
    هو لسة ان شاء الله بخلص شوية تصميم للمدونة عشان احس شكلها بس .. المهم بدأت .. ادخل و ما تنسانيش

     
  • At 11 December 2007 at 14:08:00 GMT, Blogger Hosam Yahia said…

    قصه رائعه يا عبدو متنساش مدونتىwww.sotelhoria.blogspot.com

     
  • At 12 December 2007 at 14:28:00 GMT, Blogger أميرة محمد محمد محمد said…

    اسلوبك جميل يا عبد الرحمن
    بتفكرني بفيلم احنا بتوع الاتوبيس
    ربنا يكرمنا واياك في الامتحانات
    انا لم اقل اننا لما نواجه اسرائيل نقول شعارات فاضيه وهنرميهم في البحر والكلام الفاضي ده
    وانا كان قصدي ان كلما حددنا عدونا وقدرنا قوته اكثر ده اللي هيخلينا ننتصر عليه
    اسرائيل واقع موجود ومن ينكره يبقي زي النعامه اللي بتخفي راسها في الرمل عشان تهرب من الخطر
    انا ارفض الاعتراف بها مجرد لان الموضوع ده فارق معاهم ويهمهم وطبعا يهمني جدا اني اضايقهم واقرفهم في عيشتهم

    اليهود اللي رافضين الصهيونيه نادرين جدا وهتلاقيهم برضه يهمهم شعبهم وتفوقه مع اختلاف الوسائل من يحاربني سأحاربه هو وكل من يساعده

    اذا كنت تعتقد انه من الممكن تحرير فلسطين بالمفاوضات ومؤتمرات السلام الامم المتحده والمجتمع الدولي
    فلك اعتذاري سيستمر حلمك طويييييييييييييييييييييييييييييييلا

     
  • At 12 December 2007 at 23:26:00 GMT, Blogger محمود سعيد said…

    موهوب والله يا عبدو

    لازم تصقل الموهبة ديه وتستخدمها

    أسلوبك فى الوصف وفى سرد الأحداث جميل قوى

    بس بصراحة الخدعة اللى فى الآخر بتاعة
    الأخ اللى فاضل ديه عاوزة توضح

    مش عارف ازاى بس اخترع

    وإلهى يا رب تذاكر وتنجح
    (ولى بمثله :-) )

     
  • At 13 December 2007 at 10:19:00 GMT, Blogger عبدالرحمن ياسين said…

    بودي

    انا نزلت موضوع جديد بمناسبة العيد
    أرجو ان تلقي عليه نظرة صغيرة
    ومعاك العيدية طبعا
    وحشتني يا باشموهندس

    تحياتي لك

    سلام

     
  • At 13 December 2007 at 11:10:00 GMT, Blogger AbdElRaHmaN Ayyash said…

    امام الجيل
    جزاكم الله خيرا على تعليقيك ..

     
  • At 13 December 2007 at 11:11:00 GMT, Blogger AbdElRaHmaN Ayyash said…

    يا دكتور و الله انا معرفوش
    :D بس سعد قاللي عليه
    المهم و الله انت واحشني اكتر
    ان شاء الله اشوف الموضوع
    جزاكم الله خيرا
    سلاامو

     
  • At 13 December 2007 at 11:16:00 GMT, Blogger AbdElRaHmaN Ayyash said…

    اخت زهراء
    اهلا وسهلا
    عاطف انا مش عارف هو مين بقى (A)
    انتو ادرى يا شباب المحاكمات
    المهم
    :) زي الامام بن حنبل ! .. لما فكر انه يعترف بعد اما جلدوه كثيرا .. فقال له لص
    !! يا إمام .. لقد جلدوني بالسياط الف جلدة و ما رجعت و انا على باطل ، افترجع عن الحق ؟
    .. فثبت الامام .
    و هكذا الكثيرون من اخواننا
    رسول الله يقول .,. ما معناه .. لا تسألوا الله لقاء العدو ، و لكن اسألوه الثبات
    على كل حال .. كلنا هذا الرجل :):)
    ربنا يعينا
    سلامو

     
  • At 13 December 2007 at 11:26:00 GMT, Blogger AbdElRaHmaN Ayyash said…

    استاذ وضاح حبيبي
    جزاكم الله خيرات على تعليقك يا فندم
    و الله كلنا منكسرين
    بس الاخ هو اللي وقع هناك بس
    ربنا يعيننا يا فندم
    دعواتك بجد
    سلاام

     
  • At 13 December 2007 at 11:28:00 GMT, Blogger AbdElRaHmaN Ayyash said…

    :D صدقني حصلت يا حاج احمد
    هههههههههه انتو عندكو في السعودية حلوين اوي
    لما تنزل هنا هتفتكر اد ايه الظباط كانو ظراف و بيهزروا
    :D انزل انت و ان شاء الله نبعت لهم يقابلوك في المطار
    سلااام

     
  • At 13 December 2007 at 11:31:00 GMT, Blogger AbdElRaHmaN Ayyash said…

    خالو احمد :):)
    اهلا بيك لأول مرة
    و الله انا سعيد فعلا بزيارتك
    و الله يا سيدي الخط فعلا مشكلة لكن هو لو كبر اكتر من كده انا اللي هتعب اوي :D
    بس ان شاء الله احاول اوفق
    (F) اتمنى ان المدونة تكون عجبت سيادتك
    ربنا يخلليك انا سعدت فعلا بتعليقك
    سلامو

     
  • At 13 December 2007 at 11:44:00 GMT, Blogger AbdElRaHmaN Ayyash said…

    اخت اسماء
    و الله انا بيجيلي افكار فظيعه وقت الامتحانات
    و ببقى عاوز ادون لدرجة كبيرة جدا
    بس نعمل ايه بقى
    مشكلة وقت فعلا
    --------
    للأسف هم بشر على فكرة !
    بس .. نقول ايه بقى :(
    ربنا يهدهم

     
  • At 13 December 2007 at 11:47:00 GMT, Blogger AbdElRaHmaN Ayyash said…

    بلال
    مش هرد عليك
    خالص
    يا قفه !

     
  • At 13 December 2007 at 11:48:00 GMT, Blogger AbdElRaHmaN Ayyash said…

    عبدلرحمن
    ربنا يعيننا كلنا
    ان شاء الله اشوفها سلااامو

     
  • At 13 December 2007 at 11:49:00 GMT, Blogger AbdElRaHmaN Ayyash said…

    حمزة باشا الجميل
    :) نضحك وللا نعيط
    ....
    و لكنه ضحك كالبكا !
    اه و الله
    ربنا يكرمك ياااارب
    سلاامو

     
  • At 13 December 2007 at 11:50:00 GMT, Blogger AbdElRaHmaN Ayyash said…

    عاطف باشا
    :D نفسي ابقى اخ فاضل
    بس انت عارف بقى التدريج عند الاخوان
    فاضل دي في الاخر خالص
    وللا ايه

     
  • At 13 December 2007 at 11:54:00 GMT, Blogger AbdElRaHmaN Ayyash said…

    أبو دجانة
    :):)
    دعواتك بجد يا سيدي
    ربنا ييسر و يعيننا كلنا
    سلام يا فندم

     
  • At 13 December 2007 at 12:01:00 GMT, Blogger AbdElRaHmaN Ayyash said…

    اهلا اهلا عم حسام
    :)
    شكرا يا فندم
    سلام

     
  • At 13 December 2007 at 12:10:00 GMT, Blogger AbdElRaHmaN Ayyash said…

    اخت اميرة
    جزااكم الله خيرا على تعليقك
    و ربنا يعيننا كلنا
    بالنسبة لموضوع اسرائيل
    كلامك جميل جدا
    اما ان تتحرر فلسطين بالمفاوضات !!
    فلا أعتق أن هذا ممكن على الاطلاق
    لكن قد تكون المفاوضات مرحلة نهائية تماما .. بعد ان يكون هناك تكافؤ القوى بل تفوق عربي كامل ، هناك من الممكن ان نفاوض ،، على كيفية الرحيل من أرضنا !! ,, و ليس على أي أرض هي لنا
    تحياتي أخت أميرة
    سلام

     
  • At 13 December 2007 at 12:14:00 GMT, Blogger AbdElRaHmaN Ayyash said…

    محموووووووود
    :D:D
    و الله يا عم فرحت جدا بتعليقك
    بس انا عاوز اعرف هو ليه لما انت تعلق عندي مش بيتبعت لي رسالة يقوللي محمود باشا علق
    يااارب تنجح يا محمود يارب و تطلع من الاوائل كمان
    :D عشان تعرف الفرق بين الصعيد و الجامعة الجديدة
    المهم
    احاول ياخويا اخترعلك
    :D هتقف عليك يعني يا حوده .. ما انا بقالي سنة و نص بخترع للدكاترة في ورق الامتحان
    :] salaam

     
  • At 14 December 2007 at 08:23:00 GMT, Blogger elbostagy2 said…

    هو ده الهم اللي يضحك
    أسأل الله لنا ولكم وللمسلمين الثبات

     
  • At 15 December 2007 at 00:02:00 GMT, Blogger التوأمان said…

    ماشي ياعم
    انا أخر واحد معلق

    بس بجد بجد قصة هايلة
    جااااااااااااااااااااااااااااامدة
    وبتشد اوي بس مع ان القصة مش حقيقية زي ما انتا بتقول

    الا ان ده فعلا الي بيحصل في الواقع

    كل سنةوانتا طيب يا عسل

    وحشنا والله
    ابقا خلينا نشوفك

    سلام

     
  • At 15 December 2007 at 17:32:00 GMT, Blogger other_things said…

    كل عام وأنتم بخير وإلى الله أقرب ياله
    ..

     
  • At 15 December 2007 at 19:04:00 GMT, Anonymous Anonymous said…

    عبد الرحمن
    انته متاكد ان القصه دى خياليه دى بتحصل كل يوم يابشمهندس
    اول ما قرات عمر تخيلت نفسى بصراحه انا اترعبت
    اخ فاضل نهايتها مضحكه بس بديتها مولمه واظاهر اننا اخدنا على الالم
    عمر الشرقاوى

     
  • At 17 December 2007 at 00:00:00 GMT, Blogger mohammad hamza said…

    بجد انا زعلان منك ..
    والله عايزك تشوف الموضوع الاخير بتاعى ..
    وتقوللى رأيك فيه ..
    وانت ضاربها طناش ..
    اوكيشن يا عم عيياش ..
    ده تالت مرة اعلق على الموضوع الرائع ..
    سلامووز

     
  • At 18 December 2007 at 09:08:00 GMT, Blogger النجمة الصامدة said…

    والله بجد حرام

    يعني هي بجد وللا لا

    انا عيط وانا بقرا وفي الاخر تقولي هو الاخ اللي فاضل؟؟؟

    سامحكم الله

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats