AbdulRahman Ayyash
 

AbdelRahman Ayyash's Facebook profile

Sunday, 30 September 2007
تعبان اوي
سلامو عليكم
ازيكم
عاملين ايه
هو انا بصراحة مش عارف اكتب ايه بالظبط
او انا عارف بس مش قادر
او مش مرتب أفكاري
اقوللكم عاوز اكتب ايه و انتو تشوفوا المواضيع دي
الاول كنت عاوز اكتب عن حزب الاخوان و احاول انقده
و هل فعلا الفكر السلفي أثر بشكل كبير في صياغة برنامج الحزب وللا لا ؟
و هل الحزب الاخواني ممكن يقوم في الوقت ده ؟
اسئلة بحاول اجاوب عليها .. خلال يومين ان شاء الله هخلص قراءة البرنامج و ابدأ اتكلم عن الموضوع
الحاجه التانية اني كنت عاوز اتكلم عن موضوع المعونة الامريكية او علاقة امريكا بالاسلاميين
تقدروا تقولوا كده اني عاوز اقرا شوية و اتكلم عن المحافظين الجدد
و ايه نظرتهم لينا
و ايه نظرتهم لتجربة حماس الاسلامية
و ايه نظرة المحافظين الجدد في امريكا و ادارة بوش للاخوان المسلمين
و كنت عاوز اتكلم عن قضية بتشغل الرأي العام الامريكي او على الاقل شريحة كبيرة تشمل النخبة المثقفة في المجتمع الامريكي
القضية اسمها قضية مؤسسة الارض المقدسة
holy land foundation
و ايه نظرة البحثيين الامريكيين بشكل عام للاخوان المسلمين و هدفهم من التواجد في المجتمع الامريكي
و هل فعلا الجهاد الحضاري اللي بيتكلموا عنه civelized jihad موجود في فكر الاخوان ؟
و هل الاخوان المسلمين عندهم المقدرة اللي بيقول عليها الامريكيين ، و انهم مسيطرين على الاسلاميين في كل العالم بداية من حماس و انتهاء بكل الاسلاميين في كل الدول ، حتى انهم مسيطرين و ممولين للمنظمات المفسدة زي القاعدة و مسؤوليتهم عن جماعة الجهاد مثلا
الوضع صعب اوي
حاولوا تقرأوا عن الموضوع
النقطة الاخيرة اللي كنت عاوز افتح عنها موضوع هي حماس
و هل وضع حماس مرشح للاستمرار ؟
و هل فعلا احنا مش من حقنا اننا ننقد حماس على اللي بتعمله لأنهم مظلومين و لأن شريكهم في الوطن عميل وواضع ايده في ايد اليهود ؟
كلام كتير فعلا عاوز اقوله
اما انا .....
تعبان بقى
عندي شغل كتير اوي
فاتح الشغل و مش عارف اشتغل
لسه راجع من الكلية و مروحتش لأن النت في البيت بايظ
عرفت ان خالد ابن خالي هيدخل معايا الكلية حالا :)
سارة .. أخوكي ده هوريه :@
(A)
المهم بغض النظر يعني
بابا سافر السعودية
الوضع اعتيادي بالنسبة لنا
بس المرة دي انا عندي كلية
و شغل
و عاوز اشترك في سباحة
و عاوز ابدأ أروح النادي
و عاوز اعتكف
و عاوز أراجع على رياضة اعدادي
---------
بيقوللك السنة اللي فاتت راحت مع اللي راحوا
---------
بس للأسف الرياضة مراحتش لسة
الرياضة دي صعبة اوي
و عاوز ابدأ أذاكر مواد اتصالات
هو انا اللي برهق نفسي او انا اللي بشتت نفسي ؟
مش عارف بصراحة
لكن بالتأكيد في حاجه جديدة السنة دي
سين سؤال لكل الزوار المحترمين
محدش عنده معلومات عن دولة محترمه بيدرسوا فيها الهندسة بالانجليزي بتدي منح للعيال اللي عاوزين يسافروا زيي ؟
بس ابعدوا عن اسرائيل

و روسيا
أو آسيا عموما
اقصد يعني دولة محترمه اما امريكا او كندا او في اوروبا او استراليا
يعني لو حتى بيدرسوا بالالماني او الفرنساوي
انا نفسي اسافر المانيا و بحاول اهه

اللي اقصده اني انا عاوز اسافر يعني و مفيش فرصة دلوقتي
فأي معلومات عن اي منح ابعتوهالي على ايميلاتي اللي موجودة
و تاخدوا فيا ثواب
يللا عاوزين حاجه؟
ادعولي بس في الايام المفترجة دي ان ربنا يحقق لي اللي في بالي
دعواتكم كلكم بجد
سلام
===================

At 08 October 2007 14:54:00 +00:00, مقدسية said…

""""""""""""""""""""""""""""""""
اقصد يعني دولة محترمه اما امريكا او كندا او في اوروبا او استراليا
""""""""""""""""""""""""""""""""
مع اني لم أقرا جيدا هذه التدوينة -ربما لصعوبة اللغة- لكن استوقفتني هذه العبارة ... وسؤالي هل لازالت امريكا واوربا واستراليا دول محترمة في عيوننا المغرقة بعَبَراتنا المجروحة؟ !!
(محترمة) وهي غارقة في بحر دماء اخواننا في فلسطين والعراق.. ندعو عليهم ثم نقول انتم (محترمون)!!!
مدونة من ألمع المدونات في عالم التدوين لهذا كانت لي هذه الوقفة فمعذرة إن أوغلت!... وفقكم الله

====================

أختنا مقدسية

السلام عليكم

جزاكم الله خيرا على تعليقك

تعليقك مهم لدرجة أني لم أستطع ألا أعلق عليه على الفور و هنا

في البداية شرفت بتعليقك في مدونتي المتواضعة

تلك الدول التي تحدثت عنها .. لم أدرك إلا الآن أنها هي دول الاحتلال الرئيسية في العراق

هل لأن العراق غائب عنا ؟

بالتأكيد لا

لكن لأنني نظرت إليها من منظور علمي بحت

استراليا فيها أكبر جامعات الدنيا

ألمانيا في أوروبا فيها أفضل دراسات تطبيقية في العالم

معظم جامعات الولايات المتحدة مصنفة لكونها الأنجح في العالم

أنا سأحارب الجندي الأمريكي في العراق بكل ما أستطيع

لكني لن أستطيع ألا آخذ عنهم علمهم الذي يدرسونه في بلادهم

تلك الدول (المحترمه علميا)و الظالمة المحتلة سياسيا ، و شعوبها السلبية في كثير من الأحيان أو المغيبة إعلاميا في أحيان أخرى ، نستطيع أن نأخذ منها الكثير

لكننا دوما لن نستطيع تناسي الاحتلال

و بالتأكيد لن يكون ردنا على الاحتلال في بلادهم .. رد المقاومة سيكون على الجيش في بغداد و بعقوبة و الرمادي

و ليس في مانهاتن أو في اوكلاهوما

اتمنى أن تكون فكرتي وضحت

نحن لا نكره الأمريكان .. لكننا نكره احتلالهم للعراق و سنحاربهم (في العراق ) طالما كانوا هناك

المسلمون الأوائل درسوا العلم عن اليونانيين و الرومانيين و بعض الفرس و هم المخالفون لهم .. فالحكمة ضالة المؤمن

جزاكم الله خيرا مرة تانية على تعليقك

سلام

Labels:

posted by AbdElRaHmaN Ayyash @ 14:05  
10 Comments:
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats