AbdulRahman Ayyash
 

AbdelRahman Ayyash's Facebook profile

Sunday, 9 September 2007
تاج وضاح ، لما أحب
لما أحب أتابع أخبار التكنولوجيا وأخبار العالم .. بفتح الجزيرة , الجزيرة نت , البي بي سي , الواشنطون بوست و النيويورك تايمز , السي بي اس و السي ان ان و ساعات هاارتس و الجيروسالم بوست

لما أحب ألعب على الكومبيوتر... مش بلعب على الكمبيوتر الا نادرا , لكن ممكن ابقى العب لعبة عندنا في البيت واد بيعد ينط كده و بيعدي مراحل، بحبه ده , و زمان كنت بلعب ريد اليرت و ميدل اوف اونور , بس حاليا بقيت غاوي سوليتير زي زماااااان

لما أحب أقرأ مقالات إسلامية حلوة وأسلوبها ممتع بفتح اسلام اونلاين , أو ممكن عمرو خالد , اسلام واي ساعات , بدور الايام دي على مقالات دكتورة هبة رؤوف الرائعة , بحب الرافعي اوي اوي .

لما أحب أكتب ... الناحية الانسانية هي اللي انا بحاول اخلليها تغلب على اي حاجه بكتبها , أي حاجه من أي نوع , يعني حتى لو خبر بكتبه عن المحكمة العسكرية وللا عن اعتقالات جديدة , لازم أركز على الجانب الانساني , اللي يخللي الشخص يتعاطف معاك لاقتناعه بانك مظلوم , أو ممكن أكتب عن تجارب شخصية , أو تهييس فردي , و ده عشان أفرغ طاقة بتكون جوايا , و بحب أكتب عن التاريخ القريب و البعيد , عن تركيا و أوكرانيا

لما أحب أطبخ ... أنا مش بطبخ بصراحة :$ .. بس انا لو هطبخ بطبخ حاجه زي الهامبورجر او اندومي او بيتزا معمولة او سمبوسة . يعني الحاجة اللي بتتحط من غير ما انا اعمل حاجه خالص

لما أحب أقرأ أدب عالمي .. بصراحة هو انا الايام دي مش بقرا لحد , بس انا قرأت لشكسبير كذا حاجة , و قريت لديستوفسكي شوية , أجاثا كريستي كتير , و الأكتر منها آثر كونان دويل في شيرلوك هولمز, و بقرأ حاجات مترجمة مش فاكر لمين

لما أحب أختار قلم عشان أكتب بيه .. الرد بتاعي هو نفس رد وضاح , اني بختار اكتب بقلم رصاص أو قلم جاف سنه رفيع .. بس انا بحب في الرصاص اقلام زيبرا و في الجاف اقلام توب او بريما الرفيع

لما أحب أعمل أي حاجة .. بحاول اسمع حاجه و انا بعملها , ببعد عن أي حد و أي صوت , بحاول اعمل اكتر من حاجة في نفس الوقت , و بعتبره تحدي .

لما أحب أطلع من حالة غضب أو ضيق أو حزن , حاجة من تلاته , اما هفتح الجهاز و اشتغل عليه , أو لو السبب في الجهاز هقوم اقف في البلكونه او ابعد عن المكان بتاعي , اخر حاجه اني بفضل اتنفس بهدوء و افتكر العهد اللي انا واخده على نفسي طول حياتي .. لا تغضب :) .

لما أحب أدور على أي تسجيل إسلامي .. أنا بستخدم محركين بحث , جوجل و اول ذا ويب , لكن في الاناشيد بروح عند فناتق , أو بسملة , أو حبيبة , أو حبيبي الملثم , القرآن و الخطب عند اسلام واي .

لما أحب أتكلم ... انا في اغلب الوقت ساكت , و بحب اسكت كتير و اسمع اللي قدامي للاخر , , أحب أتكلم في التنمية البشرية و الاسلام و الاخوان و الحب و فلسطين و العراق و يحيي عياش و الامام البنا و الفن عموما و الكتب و التاريخ .

لما أحب أخرج .. ساعات ببقى نفسي أخرج , بس انا مش بخرج , يعني العادي بتاعي اني مش بخرج خالص , مشترك في تلات تربع النوادي اللي في بلدي و في نفس الوقت مش بروحها و لا بشوفها , ممكن اكون عاوز حد اخرج معاه , ممكن , بس انا ان شاء الله من الدراسة دي هبدأ اخرج , بس في أماكن معينة انا اللي اختارها .. و لوحدي طبعا .

لما أحب أقرأ مجلات .. بحب أقرأ ميكي و ماجد , بس العادي اني مش بقرا مجلات , الجرائد بس .

لما أحب أمرر التاج أمرره لبلال علاء , أروى الطويل , نهى محمد , بهاء يوسف, باشمهندس عصفور المدينة , سارة محمود , مي جنين , شذى عصام, أميرة محمد , محمد باشا صاحب الفضفضات , سعد الشاطر , و أخيرا علي عادل

Labels: ,

posted by AbdElRaHmaN Ayyash @ 23:16  
19 Comments:
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats