AbdulRahman Ayyash
 

AbdelRahman Ayyash's Facebook profile

Thursday, 16 August 2007
من غير عنوان


هو ليه ناس كتير لسه مش فاهمين معنى التدوين ؟


سؤال فعلا بسأله لنفسي و لغيري كتير اوي


اقوللكم ازاي مش فاهمين معنى التدوين


انا مكنتش فاهم معنى التدوين لحد وقت قريب اوي


لكن هسألكم سؤال من بعيد


هو ممكن نعمل رابطة مستخدمي ميل الياهو ؟


أو ممكن نعمل رابطة اللي عندهم موبايل نوكيا ؟


:) اذا مش ممكن نعمل رابطة اللي عندهم مدونات


اه ممكن نتجمع ضمن اطار ايديولوجي معين لكن مش في اطار رابطة


لكن لأننا شرقيين عقليتنا تحترم المجموع و تطحن الفرد , عاوزين نجمع بعضنا في اطار ضيق يكون فيه فرض و أمر


أو يكون فيه رئيس و مرؤوس


أو يكون فيه نظام ومسؤول و مكتب إداري و مسؤولين :)


هو ممكن ؟


لا مش ممكن


التدوين غير قابل لكده فعلا


و الساحة التدوينية مش مستعده لتقبل فكرة تجمعات بمختلف مسمياتها


انا اقترحت فكرة رابطة مدوني الإخوان فعلا و عملت جاهدا في وقت ما لحد وقت قريب اوي انها تتحقق بالشكل المطلوب


دلوقتي انا فعلا تأكدت ان مش هينفع نعمل رابطة بتصوري السابق


دلوقتي احنا كفاية اننا نعرف بعض :)


كفاية اننا نشاور و نقول ده اخوان


مش عارف حد منكم لاحظ وللا لا .. انا شلت شعار الإخوان من مدونتي


لأني لقيت حد بيضيف ايميلي , و بعد شوية كلام لقيته بيقول بس انا مكنتش متخيل انك كده


ده انت اخوان :)


يعني الراجل او البنت خدوا فكرة مسبقة عني لمجرد اني حاطط شعار الإخوان .. لا نشيله أحسن :)


نفس الموضوع اللي حصل من تلات او اربع ايام .. كنت جنب عبدالرحمن منصور على جهازه و لقيت مبعوت له رسالة على الفيس بوك بتقول له هو انت عبدالرحمن عياش بتاع الإخوان ؟


من شاب محترم اسمه مينا ذكري


أنا مش عارف مينا بس أعتقد انه هو صاحب مدونة مراقب مصري


او شخص غيره


عموما أنا اتضايقت و فرحت من كلمة عبدالرحمن عياش بتاع الإخوان دي


يعني عبدالرحمن عياش دلوقتي كأنه أصبح متسجل عند الجماعه , :) و انا اول واحد عارف ان ده مش صح


و عبدالرحمن عياش دلوقتي كلمته بتتحسب على الإخوان لأنه حسب تعبير مينا .. بتاع الإخوان


و فرحت اني اتحطيت في إطار أشرف اني انتمي له فكريا .. هو الإطار الإسلامي بتوجهه المعتدل اللي بنسميه الإخوان المسلمين


لكن زي ما قلت أنا شلت شعار الإخوان من عندي


هذا لا يعني تنصل من الفكرة او انسلاخ من الهوية او تساقط على طريق الدعوة


لا و الله ابدا


ده يعني مجرد نظرة قريبة لوضع ممكن يتصلح لأفضل ما يكون


فانا لن أشترك كمدون في أي تجمع تدويني من أي نوع


لأن هذا ليس الغرض من التدوين


نحن هنا .. شخصيات تتحدث .. شخصيات تتكلم بنفسها .. و سأحاول أن أكون مدونا بهذا الشكل .


- لا يمكن تعميم ذلك على دعوات التوعية او دعوات اغتنام رمضان او غيرها .. لكني أعتقد أنه من الممكن أن نضع في هذا الاطار المدون خانه مثلا أو رابطة مدوني الإخوان بشكلها الجامد القديم المقترح طبعا أو غيرها .. و أجد شيئا ما يدفعني كي أستثني منها تجمعات صغيرة مثل مدونين من أجل التغيير .. فقد أحسست أنه توجه عام من جميع المدونين , كل يكتب فيه برأيه ولا يكون ضمن اتجاه فكري أو تنظيمي معين -


هذا بخصوص تلك النقطة :)


------------------------





نقطة تانية هي موضوع الانترنت المحدود الذي صاح الجميع ضده رافعين أصواتهم و مذبهلين وووو

:) من الواضح أننا جميعا فهمنا الأمر خطأ

روحوا عند
علاء و اقروا اللي كاتبه بخصوص الموضوع ده

فعلا هتفهموا كتير اوي

و انا بناء على نصيحة سابقة من أخ عزيز لم أشارك في الحملات الوقتية التي دعت لتدمير شركات الاتصالات او مقاطعتها او حتى التوقيع ضدها

انا ارسلت رسالة بسيطة لم يتم الرد عليها كالعادة

لكن علاء اجاب عن كل التساؤلات بالفعل

على كل حال .. لا أعتقد بجدوى الحديث " بالعربية " أي أن نوجه حديثنا للداخل المصري في موضوع النت او المواضيع الاصلاحية

و أعتقد بأن اي ضغوط لابد أن تأتي على النظام من الخارج .
--------------------

دي نقطة تانية كنت عاوز اتكلم عنها
تالت حاجه وصلتني رسالة اعتقد انها وصلت لكتير مننا اسمها أريد أبي


[dad.png]

فعلا رسالة تحسسك بالعجز
انت مش قادر تعمل لأبناء المحالين لمحاكمة العسكرية حاجه
ولا عارف تعمل لأهاليهم و آباءهم حاجه
و برضه نايمين و ساكتين
بجد .. لازم نحاول نعمل اي حاجه عشان نساعدهم
أخدوا فلوسهم
و أخدوا آباءهم
مصر نايمة و شعبها سلبي
و احنا في طليعة هذا الشعب السلبي :(
عموما تحية لشعب مصر
********
في كلمة كانت مضايقاني و عاوز اقولها ان بنت جورج بوش اللي اسمها "جينا" اتخطبت و بالمناسبة السعيدة دي اقدر اقول له و لها عقبال كده لما تحصل جيشك اللي في العراق و تبقى الفرحة فرحتين
و لبنته جينا نقدر نقول في خطوبتها .. جينا جينا نهنيكي .. و نهني أبوكي بيكي
ولا عزاء ل750 ألف قتيل عراقي منهم 500 ماتوا اول امبارح
********
كنت عاوز اتكلم عن حاجات تانية
ممممم
اهااا
دول حاجتين مهمين
الحاجه الاولى بالنسبة لشخصيتي اني عاوز اتغير فعلا في حاجات كتير و ان شاء الله ده الوقت المناسب :)
و اللي يزعل يبقى يزعل :)
لكن هو انا حساس فعلا ؟
اه
طيب هو انا بزعل من حد ؟
اه
طيب هو انا ليه مش بقول اني زعلان و بشيل في نفسي ؟
لأني مش عاوز حد يزعل مني
طيب هو انا ممكن اتغير ؟
اكيد ممكن
ازاي ؟
ده اللي انا عاوز اعرفه منكم
اوكيشن؟
---------------------

مفيش مشاكل خالص
لأن التدوين تعبير عن الذات فاحنا بندون
و لأن التدوين حرية فإحنا بندون
وإن كانت الحرية في التدوين بلا قيود اسمها ليبرالية فأنا اسلامي ليبرالي :)
دي نقطة كنت عاوز اقولها لأستاذي و حبيبي الدكتور :)
لك مني سلام يا دكتور

----------------------
سأفتقدك بالفعل .. سأفتقدك
----------------------
كلمة أخيرة ياريت كل اللي يحب يعلق على التدوينة يعلق عليها و هي سؤالين
هل ترى ان مؤتمر الحزب الوطني الحاكم بداية و تمهيد لتوريث جمال مبارك ؟
إن كانت الإجابة بنعم , فما العيب في أن يتولى جمال مبارك الحكم , و نحن نرى ممالك اقتصادها أفضل منا و كل حياتهم نعيم ؟
أو ما العيب في جمال و هو اقتصادي ناجح يدير شركات ناجحة مع شركاء ناجحين ؟
وللا ايه :)

عموما طولت عليكم
و سلام

Labels: , , , ,

posted by AbdElRaHmaN Ayyash @ 17:22  
20 Comments:
  • At 17 August 2007 at 04:21:00 GMT, Blogger عصفور المدينة said…

    بالله عليك اللي عايز يعلق يعلق على إيه ولا إيه

    عموما كان في دماغي تعليقات كتير تاهت من كثرة المحاور

    ولكن الخلاصة أعانك الله على التغيير الذي تعتزمه

     
  • At 17 August 2007 at 07:02:00 GMT, Blogger sohad_ro7y said…

    هل ترى ان مؤتمر الحزب الوطني الحاكم بداية و تمهيد لتوريث جمال مبارك ؟
    إن كانت الإجابة بنعم , فما العيب في أن يتولى جمال مبارك الحكم , و نحن نرى ممالك اقتصادها أفضل منا و كل حياتهم نعيم ؟
    أو ما العيب في جمال و هو اقتصادي ناجح يدير شركات ناجحة مع شركاء ناجحين

    خلاص خلصت

    الموضوع نفسه

    التدوين مالهوش معني..عشان حد يفهمه..انا مش فاهماه ..وانت مش فاهمه

    لإنه مالوش معنى

    وأي حد يفتكر غير كده يبقى غلطان
    :D

     
  • At 17 August 2007 at 08:56:00 GMT, Blogger محمود سعيد said…

    طيب أقول إيه طيب :-)

     
  • At 17 August 2007 at 11:16:00 GMT, Blogger ارحم دماغك! said…

    هو انت يا يمين يا شمال؟
    خير الأمور الوسط يا عبد!!

    بص يا بني..مجمعات التدوين ببساطة..هي مواقع تعيد بث تدوينات المدونات أو تحوي روابط لمدونات على الأقل..سواء كانت مدونات منتقاه على أساس معين أو اساس عشوائي..ميزتها انها بتسهل لزوارها متابعة عدد من المدونات، وميزتها للمدونين زيادة انتشارهم..

    بس كدة..العملية مش طالبة كلام كتير يعني أنا شخصيا موجود في مجمعات: دون، تووت، العمرانية، إيجيبلوجز، المدونين المصريين، تدوين كوم، تدوين أورج، ومجمعات تانية مسمعتش عنها، وكل واحد براحته يعني..
    مش ضروري بقى يكون المجمع اخواني، انت رسالتك عايز توصلها للجميع!!

    اسمح لي بقى انت بتبني على أي أساس في كلامك عن جمال؟
    يعني على أي أساس قررت انه اقتصادي ناجح؟
    وعلى أي أساس قررت انه في ممالك حوالينا اقتصادها كويس؟..زي إيه يعني؟
    يعني منين الفرضيات العجيبة دي؟

     
  • At 17 August 2007 at 12:01:00 GMT, Blogger چـِنين ...عيلة و عايزة افهم said…

    طيب حاحاول أجمع النقط كلها قبل ما انسى

    بالنسبة للنقطة الأولى ... تجمع المدونين

    معاك حق إن التدوين عبارة عن تجربة فردية

    صعب نخلي الناس كلها تمشي في اتجاه واحد

    عشان كدة عجبني ميثاق المدون خانة

    الموضوع هنا مفيهوش قيود ... مفيهوش اوامر تتلقاها من مدون اخر او رئيس ... لكن هو ميثاق شرفي

    لا يجبرك على أي شيء

    أن شايفة إنه جيد بالنسبة لنقطة التواجد و حيدي مساحات أكبر لناس مش متميزة و مش ظاهرة انها تظهر

    ده بالنسبة للنقطة الاولى

    ايه تاني

    بالنسبة لنفطة الشعار

    معاك جدا جدا جدا

    و كنت باكلم واحدة صاحبتي في موضوع زي ده قريبا

    لأن فعلا انا اكره الأفكار المسبقة

    موضوع الانترنت المحدود

    مش عارفة

    لكن كان فيه جملة اتقالت علقت معايا

    كانت بتقول لو افترضنا إن الحكومة صادقة في امر نزول الاسعار للنصف
    فلا ننس أن رغيف الخبز أصبح ب 50 قرش
    و تضافت الكثير من الاسعار من 200 ل 500 %

    مش معقول الدلع ده !!!

    بخصوص الصورة
    ممكن ترفعها في موقع تاني و تجيب اللينك

    صحيح

    عرفت موضوع بنت جورج بوش ده منين ؟؟!!!

    نقطة كمان ... نقطة التغيير

    اكيد ممكن تتغير
    انا حاسة اني الاجزة دي اتغيرت في حاجات كتير

    ازاي ؟؟

    الاول تحدد انت عايز تتغير في ايه بالظبط
    و تحددهم في نقط

    لأن كل حاجة حيبقى ليها طريقتها

    لكن اللي اقدر أكد إنه حيبقى مشترك معاك في اي حاجة عايز تغيرها

    هو جاهد نفسك و التغلب عليها

    و ده محتاج إرادة ... و دعاااء

    بالنسبة للسؤالين في الاخر

    الاجابة نعم !!

    العيب بقى

    هو مش ده عيوب !!!

    حاقول اللي افتكره بسرعة

    أول حاجة اضمنلي انه حيحكم بالشرع و العدل

    تاني حاجة الاصلاح الاقتصادي ليس اهم من الاصلاح الداخلي و الاصلاح السياسي بعد ان اصبح النظام المصري تابع و لا يملك قراره

    تالت حاجة بقى اللي عايزة اعلق عليها
    مين قال انه اقتصادي ناجح ؟؟
    يعني السؤال اللي بيطرح نفسه ... هل هو كون ده بنفسه بدون اي استغلال لنقطة ان هو ابن الرئيس او اي تلاعبات اخرى ؟؟

    ده اللي جاي في بالي دلوقتي فيه في دماغي حاجات تانية بس مش اعرفها اكتبها في نقط

    الله يكرمك يا باشمهندس

    يا ريت المرات الجاية تدينا تدونات مركزة كدة ... عشان كل موضوع ياخد حقه في المناقشة

     
  • At 17 August 2007 at 15:35:00 GMT, Blogger other_things said…

    أقول رأيي بالمرة أنا كمان

    ..
    أولا أنا مش تعليق
    ..
    ثانيا

    معلشي موضوع المدونات دا انا معترض جدا على رأيك

    ايه اللي دخل موبايلات النوكيا

    هوا حضرتك موبايل النوكيا..دا بتعبر فيه عن رأيك

    هوا حضرتك موبايلات النوكيا ..شغل إعلامي مفتوح للناس

    هوا حضرتك موبايلات النوكيا ...بتعبر عن حرية الرأي


    .....
    بصراحة انتا مبسط كل القضايا بطريقة مفزعة يعني
    ..
    جمال مبارك حتى لو كان اقتصادي ناجح..مسموح دائما افتراض المستحيل

    فالأهم والمعروف والمطلق

    إنه حـــــرامي ..ناجح جداااااااااااااا

    جدا جدا جدا يعني
    ..
    فيمنفعش..على أساس إنه حرامي.

     
  • At 17 August 2007 at 15:36:00 GMT, Blogger other_things said…

    كان قصدي أقول مش أول تعليق
    ..
    يللا سلااام

     
  • At 18 August 2007 at 23:16:00 GMT, Blogger محمود سعيد said…

    بس معلش أموت وأعرف إيه اللى جابك من أقصى اليمين إلى أقصى اليسار

    لا يمين ولا يسار بجد بس إيه اللى قلب الموضوع معاك

    أموت وأعرف

     
  • At 19 August 2007 at 19:02:00 GMT, Blogger AbdElRaHmaN Ayyash said…

    سلام عليكم
    :) أخي عصفور
    يا سيدي و الله براحتك المهم تنورنا

     
  • At 19 August 2007 at 19:03:00 GMT, Blogger AbdElRaHmaN Ayyash said…

    سهاد
    شكرا على الاضافة القيمة :)
    ممكن فعلا التدوين ملوش معنى عشان كده احنا مش عارفين نستققر فيه على رأي

     
  • At 19 August 2007 at 19:04:00 GMT, Blogger AbdElRaHmaN Ayyash said…

    ولا حاجه يا حوده
    بس بالنسبة لردك الاخير
    اعتقد ان قعده واحده مع واحد بيقنع ممكن تقلب الموازين خالص
    و ممكن شوية مراجعات ذاتية
    مش حاجه مهمه يعني يا حبي
    :)
    سلام

     
  • At 19 August 2007 at 19:08:00 GMT, Blogger AbdElRaHmaN Ayyash said…

    عمي الحاج الاستاذ المهندس الكبير يحيي عياش
    لو قلت لك ان سبب تأخري في الرد على التعليقات هو تعليق حضرتك اللي قفلني مش هكون غلطان :)
    عموما انت قفلتني في موضوع التجمع و لا تعليق لدي يا حبيب قلبي :)
    أما بالنسبة لموضوع جمال مبارك
    انا كنت عاوز اعرف التعليقات
    انا بقول انه ادار شركات ناجحة اه فهو شريك في حاجات اعتقد انها ناجحة حتى لو كانت باللعب غير المشروع في البورصة
    كان هدفي اني اعمل تقرير عن رأي المدونين في التوريث مش اكتر
    لكن صرفت نظر:)
    سلام

     
  • At 19 August 2007 at 19:27:00 GMT, Blogger AbdElRaHmaN Ayyash said…

    أختنا جنين
    انا معترض على أي تجمع حاليا
    مجرد تغير أفكار بسيط مع حاجات كتير بتتغير
    بالنسبة للتميز
    ممكن المتميز يظهر بس لو عاوز
    و بالعكس يا جنين
    انا شايف ان اللي ظاهر على الساحة حاليا هم غير المتميزين على الاطلاق
    و المختفين هم المتميزون فعلا
    ربنا ييسر
    ---------
    تمام
    هذا ما أقوله بالظبط
    --------
    بخصوص الانترنت
    انا معاكي ان الحكومة مش هتعمل عشاننا حاجه مفيدة
    لكن بالنسبة للنقطة دي احنا افترضنا السيء و تعاملنا على اساس الاسوأ و ...
    ممكن يكون في اهداف , لكن ليه ميكونش اجراء زي اي اجراء
    عموما .. رأيي اختلف تماما بعد اما شفت علاء
    ---------
    الصورة اخدت لينكها من انسى
    ---------
    الاخت الفاضلة جينا بوش عرفت موضوعها من ياهو :)
    كانت في أخبار الياهو
    بس
    ----------
    جزاكم الله خيرا على النصيحة
    بجد جزاكم الله خيرا
    ---------
    و كمان فعلا تعليقك مظبوط على الاسئلة
    فعلا مظبوط اوي :)
    و لو عملت التقرير هيكون فيه ان شاء الله
    سلام

     
  • At 19 August 2007 at 19:38:00 GMT, Blogger AbdElRaHmaN Ayyash said…

    بلابيلو العظيم
    أحييك يا ولدي
    بالنسبة للمدونات و الرابطة
    انا شايف انها نفس الفكرة في التجمع
    انها تحمل المعنى الفردي
    ثم ان انت عندك نوكيا و انا عندي نوكيا
    و انت عندك مدونة و انا عندي مدونة
    :@ عاوزني اكون معاك؟
    :):):)
    ---
    عموما بالنسبة لموضوع جمال
    رأيك يحترم

     
  • At 20 August 2007 at 08:10:00 GMT, Blogger Mohamed A. Ghaffar said…

    اول ما دخلت المدونه لاحظت ان ترتيبك 38 واستغربت وقلت 38 مره واحده
    لكن الحقيقه المرتبه 38 قليلة عليك اوى

     
  • At 21 August 2007 at 18:32:00 GMT, Blogger واحـــد مـــــن الـنـــاس said…

    انا هجاوب عن حتة جمال مبارك دي
    طب بذمتك ينفع واحد حرامي يحكم البلد ؟؟
    ايوة حرامي
    ايوة جمال مبارك حرامي
    تعرف تقولي راس مال شركته 650 مليون دولار دول ((وده المنشور بس )) جابهم منين ؟؟؟
    يبقا حرامي ولا لأ

    انا حاطط في البانر عندي صورة لا لجمال مبارك
    وعشان كده لا لجمال مبارك

     
  • At 22 August 2007 at 04:56:00 GMT, Blogger AbdElRaHmaN Ayyash said…

    استاذ محمد
    ربنا يكرمك و يخلليك يارب
    و الله لو هتقارني بحضرتك فانا صفر على الشمال
    تعليقك أسعدني
    لك سلام

     
  • At 22 August 2007 at 04:57:00 GMT, Blogger AbdElRaHmaN Ayyash said…

    جميل يا علي
    موضوع جمال مبارك او غيره
    انا مقدرش اقول ان جمال حرامي لكن هو لص
    النقطة اللي عاوز اتكلم فيها ان يكون في مبرر قوي للرفض
    لكن مش نرفض لأننا سامعين الناس بترفض
    بصراحة مبرر ان رأس ماله غير معلوم مبرر قوي
    احييك ياابني
    سلام

     
  • At 22 August 2007 at 19:51:00 GMT, Blogger أميرة محمد محمد محمد said…

    اسلوبك جميل جدا. بس انا بحس انك محتار شويه. يعني انت شلت الشعار ليه اذا كانت افكارك وانتمائك اخوانى. المشكله مش في الشعار الا اذا كنت شايف انه بيحملك اكتر من طاقتك او بيلزمك بحاجات انت مش قادر تعملها واذا كنت مش عايز تبقي عبأ علي الجماعه بحاجات انت عايز تعملها قد لا يتقبلها احد لانك اخوان فلو كانت الحاجات دى غلط يبقى ربنا هو اللى هيراقبك مش الشعار فاذا كانت حاجات سليمه وصحيحه ولكن مفيش حد فاهمها فخليك ماشى باللى انت حاسس بيه وعايز تعمله مادام مش غلط ويمكن يكون ده في تطوير للجماعه ولنشر فكرها اكتر.مش حاجه سيئه ان حد يتعرف بانه بتاع الاخوان لان ده اسلوب حياه ومنهج وطريقة للمعيشه هو اختارها وهتبان حتي لو ماكتبش شعار وكل اللى هيتعامل معاه هيعرف لان دى حاجه اكبر من الشعار.واستفت قلبك في كل حاجه حتي مثلا زي موضوع رفضك للتجمع وارضي بنفسك ولو في حاجه غلط بس صلحها بس انا مش شايفه ان موضوع انك حساس ده عيب فيك وربنا يوفقك لما فيه خيرك وخير الامه وان شاء الله تبقي خليفة يحيي عياش

     
  • At 31 August 2007 at 04:24:00 GMT, Blogger mohammed alsha3r said…

    السلام عليكم

    ازيك ياعبد الرحمن

    أنا عرفت موضوعك دا من الدستور

    ويا أخى والله كم أحزننى الموضوع

    مش لأنك شلت شعار الاخوان

    أو لأنك مش عاوز يكون فى رابطه تجمع مدونى لهم فكر معين

    انا حزين على الدستور والله

    بدأت بالفعل افقد الثقه اللى كانت مهزوزة

    الدستور ينقل كلام على لسان د / محمد حبيب مقلوش ( ان الاخوان أغتالوا النظام ) والراجل مقلش كدا

    يقولوا ويكتبوا التدوين هو الحل

    ويقولوا ان المهندس عبد الرحمن فى هندسه الزقازيق

    وهو مهندس بس مش هندسه الزقازيق

    فين مصدقيه الخبر ؟؟

    ولا هى مواضيع وخلاص

    كوبى وبست

    ينقلوا بووووووووووست كام عن أختنا أسماء العريان من غير ما ياخدوا اذنها

    طيب ليه؟؟

    فين ياجدعان الصحافه ياعم عبد الرحمن ياصحفى ياكبير


    ويامهندس هبد الرحمن أقول لك

    بما أنك قبلت ان تكون من مدونى الاخوان سواءا فكرا

    أو أنك غير تنظيماً

    فبكل الاحوال انت قبلت الفكرة

    فلما التراجع وشطب شعار الاخوان من مدونتك

    أعيب فى الشعار؟؟

    سؤال يحتاج جواب

    أم انه عيب فينا

    انت يا أخى عاوز توصل لكل الناس

    جميل

    دعوتنا مش عائق انك توصل لكل الناس

    فياريت نتريث عندما نتخذ أى قرار

    مش عاوز اطول عليك

    لأنى فاصل بور وداتا وكله

    فى امان الله ياعبدو وخلينا نشوفك انا كل خميس فى المنصورة

    ياريت نتلاقى

    سلام الله عليكم ورحمته وبركاته

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats