AbdulRahman Ayyash
 

AbdelRahman Ayyash's Facebook profile

Wednesday, 8 August 2007
صدمات
الصدمة الأولى
عندما تتمرجح كطفل و تنسى أنك أنت
الخميس 2/8
أول مره أروح عند خالي في مزرعته مع العائلة
كان نفسي أروح من زمن
لكن لم تكن الفرصة مواتية
و في ظل ضغط العمل اللي كنت موجود فيه وقتها و قبلها كان لازم اريح شوية
و قررت اني انزل المنصورة عشان نروح المزرعة مع العائلة كلها
مش هتكلم عن اللي حصل هناك بالظبط
لكن كانو يومين من أجمل الايام اللي قضيتهم بجد
من فترة طويلة اوي مفرحتش كده
فعلا كانو يومين حلوين
خصوصا ان اليوم اللي قبله كان فرح عباده ثروت و سارة الشاطر
محضرتوش للأسف لكن الحمد لله كنت مركز اوي معاهم :)
ربنا يبارك لهم يارب
لكن لو اليومين دول حلوين كده ؟
ايه اللي خللاهم صدمة
ممكن الصدمة ان نضارتي اتكسرت و لسه مصلحها امبارح
ممكن الصدمة ان انا فرحت اوي بشكل غير اعتيادي
المهم انها تمثل تغيير مرحلي في حياتي
يارب تتكرر بشكل أفضل
ومن غير ما اتبهدل و اقع من المرجيحه
و النضارة تتكسر تاني
----
مش عاوز حد يعلق على المرجيحه لأنها كانت روعه و لو انتو كنتو هناك كنتو هتتمرجحوا و هتنسوا انكو كبار او حتى محترمين :D:D
يجد يومين حلوين اوي
------------------
------------------
الصدمة الثانية
عندما ترى عائلتك .. من بين الأسلاك
الأحد 5/8
يوم المحاكمة العسكرية
الإعلان عن باص متوجه للهايكستب لحضور الجلسة الرابعة للمحاكمات العسكرية للإخوان المسلمين
قبلها وصلتني على هاتفي رسالة قصيرة كما وصلت للكثيرين
تقول أفرجوا عن مصر , أريد أبي
و مذيلة بتوقيع مدونة إنسى
كانت رائعة الفكرة
بصراحة لم أعمل forward للرسالة
لكني اعتقد أن الكثيرين ممن وصلتهم الرسالة فعلوا
على كل حال , ذهبت للتحرير فلم أستطع أن أركب الباص المزعوم
و قدرا قابلت منعم و علمت أنه ذاهب للمحاكمة بطبيعة الحال و ركبت معه :):)
هناك كنت أود لو استطعت الدخول كوني من أحد أهالي المعتقلين
و قدرا أيضا علمت أن بلال ضياء فرحات لن يحضر
فأنا اتذاكيت فيها و قلت ان دكتور ضياء يبقى خالي و انا عاوز احضر
و انا من المنصورة ووووو
و رحت للراجل و اقولله ده ابنه قاللي انه مش جاي و ...
الاربعه ولاده وصلوا و دخلوا يا فندم
اوبس
طيب شكرا يا استاذ
طبعا الحمد لله بتوفيق ربنا قدرت ادخل و متسألوش ازاي
اللي جوه بقى
طبعا انا عارف معظم الشباب اللي جوه
سعد الشاطر و عبدالرحمن شوشه و عبدالرحمن الحسيني و اتعرفت على مصطفى عصام عبدالمحسن و عباده ثروت العريس و الباشمهندس عبدالله الشرقاوي
طبعا شفت تاني عاصم محمود المرسي , و ده بجد و الله ربنا يحميه
من أعسل الناس اللي شفتها في حياتي
عاصم كان شكله جميل جدا و القاضي بيهرتل لوحده و بيقول على الاحراز وعاصم بيحفظ قرآن
عاصم كان في سورة الدخان
ربنا يبارك في عاصم و في كل اخواته و في كل الاطفال اللي زيه
صدمتي لما دخلت المحاكمه كانت في اني اشوف اكتر من تلاتين اخ في القفص
يااااااه
بجد ربنا يبارك فيهم
المهندس خيرت و الاستاذ حسن و الدكتور ضياء اللي وشه كان منور و الله و دكتور محمود المرسي و أحمد النحاس و الشاب الرائع ربنا يحميه محمد مهنى
و اساتذتنا سيد معروف و جمال شعبان و أحمد شوشه
و استاذنا اللي فعلا كان نفسي اشوفه لأني مقدرتش اشوفه استاذ ياسر عبده و دكتور عصام حشيش ربنا يشفيه
و الدعاء بتاع استاذنا محمود عبدالجواد و الصلاة اللي صلى إمامنا الدكتور محمد بشر و أذان أحمد النحاس
بجد لو هم دول طليعة الإخوان .. يبقى هننتصر ان شاء الله
صدمتي اني اشوف الوجوه دي كلها وهي خلف القضبان
صدمتي و انا بشوف استاذ حسن زلط مش قادر ييجي المحكمه لأنه على سرير في مستشفى
صدمتي و انا بشوف القاضي بيضحك بسخرية لما اخ من هيئة الدفاع يقولله اتق الله
صدمتي و انا بشوف عائشة مالك بتستسمح الراجل اللي واقف على القفص انه يخلليها تسلم على والدها
صدمتي و انا بشوف استاذنا ايمن عبدالغني بيكلم زوجته و في بينهم سد
بجد ... صدمتي يوم المحاكمة العسكرية لا توازيها صدمة تانية
و ان شاء الله لو الدخول اتكرر تاني
هيكون الوضع بالنسبة لي مختلف
و يارب .. نقدر نعمل حاجه
------------------
------------------
الصدمة التالته
أن ترى موتك أمام عينيك
الاثنين 6/8
رحت عشان اقابل فيوليت داغر
اعتقد لو حد تابع المحاكمات العسكرية هيعرف ان فيوليت داغر هي فرنسية من اصل لبناني و هي رئيسة الهيئة العربية لحقوق الانسان و التي مقرها باريس و كانت في مصر للرقابة على سير المحاكمة العسكرية
بالطبع لم يسمحوا لها بالدخول لقاعة المحكمة
انا حاورتها و كل شيء تم حلو اوي
لن ألتفت لكونهم عملوا حاجات غريبة بحجة تأمين زوار
و لن ألتفت لكونهم حاولوا أن يخرجوني و ألا أحاورها في الفندق
و لن ألتفت لكوني تأكدت من أن ضيوف مصر مراقبين أمنيا من مخبر شاطر جدا
لكنني سأبتعد تماما عن ذلك الموضوع
وسأتكلم عن شخص لا أعرفه
شخص وجدته ملقى في الشارع
الدم على الأرض
الرأس مهشمة
في الأمام سيارة بي ام بليو من الفئة الخامسة و أمامها سيارة بيجو مش متذكر نوعها
اعتقد 307
ايه اللي حصل يا اخوانا
ده شاب عنده 25 سنة عربيتين ماشيين بسرعته و هو بيعدي الطريق و وقع في النص
يعني العربيتين خبطوا في بعض لكن الولد في النص
المشكلة مش في كده
المشكلة انه الاخ ده توفى بعدها
المشكلة الاكبر ان بتوع الامن الي في الفنادق و ميدان التحرير و قتها حطوه على الرصيف و سابوه ربع ساعه
ربع ساعه الأخ ده ميت على الرصيف
انا جيت و شفته طبعا بالنسبة لي أول مره أشوف بني آدم ميت , ربنا يرحمه يارب , لكن ازاي التعامل المهين من الناس كده
عربية الاسعاف مجاتش الا بعد وقوفنا بعشر دقايق
يعني نص ساعه
و في ميدان التحرير
انتو عاوزين تفهموني ان مفيش في ميدان التحرير نقط اسعاف قريبه ؟؟؟
و يتغطى بورق جرايد
بجد يا بلد
لو مش هترحموا الحي ... فبالله عليكم ارحموا الميت
صدمة .. أثرت فيا اوي
مش لأن المنظر كان صعب بس
لأ
لأن أنا كنت طول عمري بخاف من كده
و أنا عندي اربع سنين كان عندي عجله ( دراجة يعني )
كنت بحلم و ما زلت بحلم اني انا راكبها و بقع بين عربيتين و ... اصحى مفزوع
فلما اشوف الموت ده بالشكل ده قدامي
كان فعلا صعب
يارب يعافينا و يعافيكم
و يحسن ختامنا جميعا
-------
بلال حالا بعت لي لينك أخت مدونة توفت ليلة 15 رجب
ربنا يرحمها يارب و يرزقها الفردوس الأعلى من الجنة
المدونة اسمها شيكو اونلاين
http://www.shikoonline.blogspot.com/
و صاحبتها شيماء صفوت
بالله عليكو ادعولها هنا و هناك في مدونتها
------------------
------------------
الصدمة الرابعة
أن تصبح الحقيقة حلما .. و أن يغدو الأمل مستحيلا
الاثنين و الثلاثاء و الأربعاء و الخميس
6.7.8.9 / 8


welcome to my block list

كنت كاتب هنا كلام كتير اوي
لكن بلال علق كتير اتصل بيا خد الباسوورد و حط البوست درافت عشان امسح الصدمة دي
عموما الصدمة دي كانت عشان شخص واحد بس
و البوست و الله كانت مكتوبة من امبارح
لكن اتعدلت مرتين
مرة عشاني و مره عشان بلال
عموما كان نفسي اكتب كلام اكتر
لكن رأي بلال ان انا كده بظلم نفسي و بظلم ناس تانيين و ان ده حرام
و انا بحترم رأي بلال
روح موت يا بلال :@
سلام :$
------------------
------------------
الصدمة الخامسة
أن تعتقد أنك فاشل .. و قد نجحت
هي مش صدمة بالمعنى المفهوم لصدمة
لكن الحمد لله انا نجحت
و بلال نجح
و حسن نجح
و أسامه جاب امتياز
بلال جاب جيد
احمد و محمد و اسلام نجحو
محمد و خالد و محمد نجحوا
محمد عادل و حسام الهندي نجحوا
سولدجر باشا بتاع فن الحياة نجح
بلال باشا بتاع مزاجات نجح
اسلام العدل بتاع منفي نجح
اخويا نجح
كريم صاحب اخويا و احمد محفوظ نجحوا
أروى الطويل بتاعة أنا كده و أسماء ياسربتاعة الفجرية نجحوا
أحمد ابن عمتي
أحمد التاني ابن عمتي برضه
نجحوا
ألف ألف ألف مبروك لكل اللي نجحوا السنة دي
و ربنا يتمم بخير يارب
و الأناشيد دي انا رافعهم مخصوص من عشر ايام عشان لما اجي اكتب عن الموضوع ده







-----------------------
-----------------------

Labels: , , , , ,

posted by AbdElRaHmaN Ayyash @ 22:28  
33 Comments:
  • At 9 August 2007 at 14:27:00 GMT, Blogger other_things said…

    أول تعليق يحمل صدمة من صدمتك
    ..
    وسيفيق ليعلق في التاني إن شاء الله

     
  • At 9 August 2007 at 14:34:00 GMT, Blogger other_things said…

    This comment has been removed by the author.

     
  • At 9 August 2007 at 14:40:00 GMT, Blogger other_things said…

    This comment has been removed by the author.

     
  • At 9 August 2007 at 20:28:00 GMT, Blogger چـِنين ...عيلة و عايزة افهم said…

    السلام عليكم و رحمة الله و بركاته

    أول تعليق بعد الباشمهندس بلال اللي دايما دايما بياخد أول تعليق

    أولاً طبعاً مبروك على النجاح
    أنا كمان نجحت الحمد لله
    : D

    بالنسبة للصدمات

    الأولى

    عارفة الاحساس ده
    إن اليوم يبقى مختلف
    يلا يا باشمهندس تجديد برضة
    ممكن برضة نحط له نوايا كتير

    التانية
    لا تعليق
    لا تعليق بجد
    على كل حاجة

    التالتة
    ماقدرش اقول كلام حضرتك اثر فية قد ايه
    الوقف ده كله ... مش عارفة
    شوفته أكتر من مرة
    و كل مرة بتحصل في قلبي حاجة ... مختلفة
    يعني يا ترى الإنسان ده كان نازل من بيته بيفكر في ايه و رايح فين ... و هل كان متخيل إن الامر ممكن يخلص كدة ...
    بافكر كتير قوي

    و باحس بحاجات أكتر
    كل نفس ذائقة الموت

    الصدمة الرابعة
    اللي استفدته منها إن الأخوة في الله دي نعمة رائعة

    ربنا يخليلك الباشمهندس بلال

    ألف مبروك تاني مرة لكل الناجحين

     
  • At 10 August 2007 at 07:02:00 GMT, Blogger فن الحياة said…


    بسم الله الرحمن الرحيم

    ئيه ده بعتلي رابط مدونتك وبتقولي ادخل بسرعة .. وعاوزني اقراه كل ده علشان سطررررررر واحد :@

    طيب مش هاعلق بئه .. :@

    عموما جزاكم الله كل خير هناك صدمات ناخذ منها العبر .. وصدمات نذكر بها ملك الموت في رسائل ربانية .. لنتوب

    وشكرا جزيلا علشان ما نسيت اسمي المرة دي وكتبته :@ عموما انا منجحتش انا جبت جيد وكان فاضل بس 12 درجة على جيد جداا بس ياله الحمد الله كفاااااارة :)

    وعقبالك كده لما تخرج وتكون .. مهندس .. آآقصد صحفي قد الدنيا وتكون مشهور ( ابئه قابلني :P)
    زي ما قلتلك من شويه

    مش هاعلق :@

    سلام

     
  • At 10 August 2007 at 07:40:00 GMT, Blogger صوت عصفورة said…

    قبل ما اعلق عندي سؤال ... بتعد الصدمات ليه .... هي كتير ... متعدش عشان نتتقلش بركتهم ... و ان كنت اصدق تماما ان دراسة الصدمات تعلم و تترك اثرا اكبر كثيرا من معناها الحقيقي ..

    اه ... انا كمان نجحت

     
  • At 10 August 2007 at 08:28:00 GMT, Blogger عصفور المدينة said…

    قرأتها على طولها
    وأولا أبارك النجاح وثانيا خرجت بخاطرة جميلة
    أن الابتلاء الحاصل للمقبوض عليهم أفرز تربية للجيل
    فك الله أسرهم

     
  • At 10 August 2007 at 11:16:00 GMT, Blogger elfagreya said…

    الصدمة الاولى

    مثل هذه الايام لا تنسى

    الصدمة الثانية

    شعرت بها فى اول جلسة ولكن سرعان ما ذهبت ولم تعد

    بعدما تيقنت من ان
    هناك الكثيرين خلف تلك الاسلاك
    وروحهم عالية

    وهناك الكثيرين فوق المنصة
    وروحهم فى الارض من الكسوف
    لانهم تلامذة كل اللى بيعملوه
    واجب

    اما عن عاصم
    فبصدق اراه ملهم بفتح الهاء
    وكمان بالنسبة لى ملهم
    بكسر الهاء المرة دى
    ربنا يكرمه ويبارك فيه
    -----
    الثالثة
    ربنا يرحمه ويرحمنا عند الموت
    ----
    الخامسة
    مبروك النجاح للجميع

     
  • At 10 August 2007 at 19:50:00 GMT, Blogger noha said…

    ماااشى كل صدمة وحضرتك كويس

    وألف مبروك لكل اللى نجحوا بقى


    صدمات مميزة بصراحة

    استمر فى تدوينها

    :)

     
  • At 11 August 2007 at 02:02:00 GMT, Blogger AbdElRaHmaN Ayyash said…

    أهلا عم بلال
    جزاكم الله خيرا
    شكرا ياخويا :@
    سلام

     
  • At 11 August 2007 at 02:04:00 GMT, Blogger AbdElRaHmaN Ayyash said…

    أستاذة جنين
    ربنا يبارك فيكي يارب
    --------
    اليوم ده فعلا كان جميل اوي
    يارب يتكرر
    -----
    لا تعليق :(
    ----
    يارب يرحم الاخ اللي توفى
    و يصبر أهله يارب
    -----
    و ربنا يخلليني لبلال :D

     
  • At 11 August 2007 at 02:06:00 GMT, Blogger AbdElRaHmaN Ayyash said…

    حاج سولدجر
    :D كان لازم عشان تعرف اني فاكرك يا عم
    كأن جيد دي وحشه بتقول كده ليه :@
    يا عم ما احنا واكلينها سوا :D
    ربنا يخلليك يارب
    و كلمتك حلقة في وداني
    ابقى قابلني لو فلحت :D:D
    سلااااامو

     
  • At 11 August 2007 at 02:08:00 GMT, Blogger AbdElRaHmaN Ayyash said…

    أختنا آية :):)
    :D
    الصدمات مش كلها مؤلمة
    لكن ربنا يبعد الصدمات المؤلمة دي
    ياارب بس
    و ألف ألف مبروك على النجاح
    و أختنا جنييين
    ألف مبروك كمان على النجاح :)
    ربنا يبارك لكم يارب
    سلام

     
  • At 11 August 2007 at 02:09:00 GMT, Blogger AbdElRaHmaN Ayyash said…

    أستاذنا عصفور المدينة
    ربنا يكرمك يا سيدي اثقلنا عليك بطول التدوينة
    لكن و الله كان نفسي اكتب كل ده
    ربنا يبارك لك يارب
    و يارب يكون الابتلاء ده لاخواننا مأجورين عليه وفي ميزان حسناتهم
    و حسناتنا ان شاء الله
    نورت المدونة
    سلام

     
  • At 11 August 2007 at 02:14:00 GMT, Blogger AbdElRaHmaN Ayyash said…

    أستاذة أسماء
    يارب تدوم الايام دي
    بالنسبة لكم
    ربنا يصبركم يارب و يجعل التعب ده في ميزان حسناتكم
    و اللي فوق المنصة
    ياريت اللي بيعملوه واجب كنا نقول ممكن يكون عندهم عقل و يغيروا فيه
    لكن هم غير كده
    هم عبيد
    عند ناس تانية
    ملهمش اختيار
    لغوا مخهم
    لغوا حياتهم
    لغوا كل حاجه جميلة في مقابل انهم يفضلوا .. على المنصة
    عاصم ... بجد ربنا يحميه و يكتر من أمثاله
    و ألف مبروك النجاح لحضرتك و لكل الناس :)

     
  • At 11 August 2007 at 02:15:00 GMT, Blogger AbdElRaHmaN Ayyash said…

    دكتورة نور .. دكتورة نهى (A)
    ربنا يكرمك يارب
    و ان شاء الله نستمر :D
    بتشجيعكم
    سلاام

     
  • At 11 August 2007 at 05:32:00 GMT, Blogger هاني جابر said…

    السلام عليكم ورحمة الله
    اولا حمد لله علي السلامة
    وألف مبروك علي النجاح
    اما بالنسبة للصدمات
    فالحياة كلها صدمات
    ولكن فعلا الي أثر فيه صدمة الشاب
    وموته الفجأة
    وهل ادرك من حوليه ذلك
    سبحان الله
    اقتربت الساعة وانشق القمر

     
  • At 12 August 2007 at 07:08:00 GMT, Anonymous صاحب المضيفة said…

    كثيرة هي الصدمات التي نقابلها في حياتنا مرة بعد مرة

    لكن التميز هو كيفية التغلب على تلك الصدمات وتذكر دائما

    الضربة التي لاتقصم ظهرك ... تقويك

    الرجاء المشاركة معنا بحملة استقبال رمضان بين المدونين

    دمت بخير

     
  • At 12 August 2007 at 08:10:00 GMT, Blogger القلم السكندري said…

    التحليق خارج السرب

    رجاء من الأخوة الأفاضل التصدي للحملة الصليبية السافلة ضد الحجاب

    والتصدي للتدخل الصيبي السافل في شؤون ديننا وعقيدتنا

    علي الرابط التالي


    https://www.blogger.com/comment.g?blogID=8118285876871204718&postID=5983297636189102833

    شوية صليبيين جيين يعلمو بناتنا يلبسو ايه وميلبسوش ايه

    حاجة منتهي السفالة وميتسكتش عليها

    الامر محتاج لردة فعل من اكبر عدد ممكن من المدونيين لان للاسف معاهم ناس مسلمين في صفهم

    رجاء تفعيل الامل داخل المدونات الاسلامية .. وتفعيل ردة الفعل علي المستوي اللائق بمكانة الحجاب

    ونرجو أيضا عمل

    Flag Blog

    بحيث لو زاد العدد يتم حذفه من ليست جوجل

     
  • At 12 August 2007 at 14:59:00 GMT, Blogger ** white rose ** said…

    الصدمة الأولى
    إلى اللا نهائية و ما بعدها

    يا عيال سوبر مان لا دا باظ يطير

    ياهوووووووووو


    تراااااااااااك



    ماما فيه نيزك وقع في الجنينة


    دن دن دش



    النضاراااااااااة !!


    و أنا لقيتها










    مش قادرة أمسك نفسي من الضحك

    التانية ..

    حسبي الله و نعم الوكيل




    التالتة


    اه يا وطني



    الرابعة

    خلى التعليق عال المسن لما اقرأها
    بس بلاش الاحباط ده الأمل موجود طول ما انت عايش


    الخامس ...

    مش فاكرة كان عن ايه








    سلام
    و سوري عالفضايح اللي في الأول

     
  • At 12 August 2007 at 19:09:00 GMT, Blogger قلب أبيــض said…

    السلام عليكم
    اولا ربنا يكرمك ياب
    الصدمة الاولى بتحصلى كتيييييير
    وهى ان نظارتى علطول بتنكسر فانا خلاص اتعودت وبقت مش صدمة بالنسبة لى
    لدرجة انى قلت ان النظارة دى فلوسها حرام
    عموما صدماتك جميلة
    جعلها الله فى ميزان حسناتك
    قلب ابيض

     
  • At 12 August 2007 at 19:30:00 GMT, Blogger other_things said…

    أغرق في الضحك
    بق
    بق
    بق
    بق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بقبق
    بق
    بق

     
  • At 14 August 2007 at 09:36:00 GMT, Blogger AbdElRaHmaN Ayyash said…

    أخ هاني جابر
    ربنا يكرمك ويعزك
    و الله صدمة الشاب الواحد مش بياخد باله منها الا لما يشوفها بعينه
    ربنا يستر علينا
    لك سلام

     
  • At 14 August 2007 at 09:41:00 GMT, Blogger AbdElRaHmaN Ayyash said…

    صاحب المضيفة
    فكرة حملة جميلة
    أحييكم
    اما تلك الصدمات
    فبعضها يقصم الظهر و بعضها يقويه
    بوركت
    سلام

     
  • At 14 August 2007 at 09:58:00 GMT, Blogger AbdElRaHmaN Ayyash said…

    سارة :D
    و الله لولا انك مسافرة .. يللاااااااااا
    :D الامل طبعا في ربنا كبير
    متنرفزنيش بقى الله يخلليكي
    سلام

     
  • At 14 August 2007 at 09:59:00 GMT, Blogger AbdElRaHmaN Ayyash said…

    قلب أبيض
    ربنا يخلليك
    نورت المدونة والتدوين
    سلام

     
  • At 14 August 2007 at 10:11:00 GMT, Blogger AbdElRaHmaN Ayyash said…

    بلال
    :D اعتقد ان هذا من أثر الصدمات اثناء الأكل
    سلام يا عم

     
  • At 15 August 2007 at 12:44:00 GMT, Blogger FadFadA said…

    ألف ألف مبروك على النجاح
    ممكن أسألك سؤال
    ليه صدمات !؟
    ديه مرجيحة , يعني طبيعي جدا انها شوية بتكون فوق ,و يكون أجمل احساس , و شوية بتكون تحت , و ساعتها بنستنى انها تطلع تاني
    و لازم تطلع
    بتوحشني
    محمد

     
  • At 15 August 2007 at 13:09:00 GMT, Blogger ابو مفراح said…

    كل دى صدمات و لسه عايش

     
  • At 15 August 2007 at 21:43:00 GMT, Blogger AbdElRaHmaN Ayyash said…

    :):)
    محمد باشا
    و الله انت اللي واحشني
    المراجيح دي ابداع:)
    و انت مبدع كمان
    تحياتي يا سيدي
    سلام

     
  • At 15 August 2007 at 21:46:00 GMT, Blogger AbdElRaHmaN Ayyash said…

    حجي أبو مفراح :)
    تخيل ؟؟
    دعواتك بس
    سلام

     
  • At 16 August 2007 at 07:24:00 GMT, Anonymous الصارم الحاسم said…

    الصدمة الكبرى اننا عايشين في بلد تحمل كل هذه الصدمات

    :(

     
  • At 20 May 2013 at 01:36:00 GMT, Anonymous Anonymous said…

    يسم الله الرحمن الرحيم السلام عليكم ورحمة الله وبر كاته .انا فى غابة السعادة لتعرفى اليكم جزاكم الله عنا وعمن انتفع بعلمكم خيرالجزاء واتوجه بالشكر لمن كان سببا فى .التعرف عليكم وهو اخى وجبيبى اشرف طعيمه متمنيا لكم دوام الصحة والتقدم ابو عبد .الله

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats