AbdulRahman Ayyash
 

AbdelRahman Ayyash's Facebook profile

Sunday, 22 July 2007
عاوز اكتب

ازيكم يا جماعه

انا فاضي

مش عارف اكتب ايه

بس انا عاوز اكتب

الساعة سبعة الاربع صباحا

مطبق من يومين

دخلت انام من شوية مجاليش نوم

عندي شغل كتير خلصت منه حاجات معينة

عرفت حاجات كويسة في وقت قليل

مخنوق من حاجات كتيرة اوي

كل يوم بكتشف ان في عقليات كنت بحترمها المفروض تنزل الارض اوي

مش لأني مختلف معاها

بالعكس .. العقليات اللي انا مخنوق منها كلها انا متفق معاها في الفكرة

أحيانا أقول انا اللي اخترت مجتمعي على النت و لازم اتحمل نتيجة اختياراتي

لكن بسهولة زي ما اخترتهم او اخترتهن ممكن اشيلهم من عندي

لكن الواحد اكتشف ان صعب اوي بالنسبة لي اسيب الصداقات اللي كونتها

خصوصا ان معادش ليا غيرها

ناس متضايقين مني و مش من حقهم يتضايقوا

و ناس متضايق منهم و من حقي اتضايق

مصر قافله المعبرو مانعه المساعدات توصل للعالقين هناك

أحمد ماهر وزير الخارجية السابق كاتب مقال رائع عن انه صديق قيصر لكنه صديق الحق أكثر اتكلم فيه عن تمثيلية اغتيال عباس

حسني و عباس و عبدالله الاردني و عقيد ليبيا .. بكرهكم اوي و الله

كتير من المدونين كرهوني في التدوين و اللي بيدونوه

ناس بيحاولوا يظهروا الاخوان بشكل كويس و هم اسوأ ما يكونوا

أنا بحب فيصل القاسم و احمد منصور ووضاح خنفر و جومانا نمور و لونا الشبل و خديجة بن قنه و غسان بن جدو و ماهر عبدالله الله يرحمه و عمر الفرا و مصطفى الرافعي و أحمد مطر وابراهيم الفقي و يحيي عياش و محمد النجار و دكتور عثمان و بحب بلال علاء و عمرو مجدي و عبدالله الشامي و عبدالرحمن منصور و عبدالرحمن عطية و أستاذ أحمد و ميل جيبسون و توم هانكس و ميس شلش و عبدالفتاح عوينات وشوية من اغاني مروان خوري و أفلام ميج ريان وأفلام روسيل كرو و الدكتور الرنتيسي و اسماعيل هنية و الاستاذ البنا و رون هاوارد و ستيفن سبيلبيرج و ألبرت أينشتين و جون ناش
بحب أفلام انقاذ الجندي ريان و يو هاف جوت آ ميل و الضاحكون و الليون كينج و عمر المختار و محمد الفاتح و اللي بالي بالك و البيوتيفول مايند اللي منه الصورة دي و اللاست ساموراي
مرحتش سينما في حياتي و لما عزت اروح كنت عاوز انزل عمر و سلمى و داي هارد فور و مرحتهمش .. لأنه غلط و مش صح

بحب اخوان الاردن وسوريا و الجزائر و المغرب و بعشق حماس و اخواننا في فلسطين

في كلمة في فيلم 300 بتقول فيها الملكة للملك و هو رايح يحارب عد مع درعك او عليه

موضوع رابطة المدونين مش هينفع إطلاقا و أنا بعتذر اني بدأت فيه , لكن هو تجربة رائعة أوقن أنها ستفشل أيا كان مسؤولها أو منظمها

و أنا مع رأي أسماء صاحبة الفجرية المعترضة دوما على أي تجمع للمدونين

أدركت تلك الحقيقة الآن

حسن و خالد و محمد ومحمد و محمد و أحمد و محمود و إسلام و أسامة .. و حشتوني و الله

سأحاول أن أغير من الخط العام في كل شيء

أتمنى أن يكون للأفضل , لا أجزم و لكن أتمنى

الساعه بقت 7 و لسه تلات او اربع ساعات على اول معاد هنا

متخافوش .. مش هفضل اكتب كل ده

انا عاوز افضل اكتب و الله بس مش هعرف و انتو مش هتقدروا

بفكر في حاجات كتيرة

بفكر في الجواز بعد كده

مين بيقول مش وقته ؟

هو مش وقته فعلا

بس انا بفكر .. انا مقلتش هروح اخد بابا و نروح لابو العروسة اقولله انا عاوز بنتك يا مستر

كتير من الاوقات بحس اني غلطت في حق ناس , بس في اوقات اكتر بحس اني انا الضحية , ضحية ناس ملهمش في حاجه

ضحية بعض الاخوان , ضحية مجتمع مش فاهم , ضحية نفسي و ضحية غيري

ممكن اكون ضحية الهدى و النور المدرسة اللي كنت فيها

ممكن اكون ضحية مين

مش عارف

انا بحب اقرا اوي لنبيل فاروق و لمحمود درويش و نفسي اجيب رواية العطر و رواية صورة وثلاث انعكاسات للي انا مش فاكر اسمه

عاوز اقرا كتب فكرية و حركية

بفكر امسح كل البنات اللي عندي في الايميل

لأني شفت من شوية منهم حاجات مش عاوزها تتكرر

بس شايف ان في بنات و اخوات شرف ليا اني اخلليهم على الليست عندي

و شايف ان في ناس لا يستحقوا اصلا انهم يكونوا مقيدين في سجلات الصحة

تهييس اخر الليل ممكن يكون هو ده

مش عارف همسح البوست ده وللا لا

بس لو اتمسح هكون فرغت كتير من اللي عاوز اقوله

ولو متمسحش اديكو عرفتو حاجه من اللي جوايا

انا عاوز اخد دبلومة اعلام و انا بدرس هندسة

و عاوز احفظ قرآن و اخد حاجه في الشريعة

عاوز اتعامل مع مدونين كتير اوي

عاوز اقلل من تعاملي مع الاخوان اللي على النت و اشوف غيرهم
الناس التانية بتقلل تعاملها مع الاخوان على اساس انها تبعد عنهم و تشوف طريقها مع توجه فكري مختلف
انا ان شاء الله مش هغير توجهي الفكري
بس انا عاوز اقيم الغير من وجهة نظري الشخصية
مش عاوز اكون مسير
بكره حاجات كتيرة اوي في مصر بس بحب مصر
بكره حسني مبارك و بكره الحكومة و بكره امن الدولة و حبيب العادلي
بكره اتكلم مع ضيقي العقول و بالذات البنات منهم لأنهم كتير اوي
بكره أفكر في الماضي بس بحب جدا افكر في المستقبل
بحب اذاكر رياضة و مبحبش امتحن فيها
بحب اروح معمل الكمبيوتر و اتكلم مع الدكتورة و محبش اتسأل فيه
و انا عندي خمس سنين رحت اخبط على باب البيت من جوه و اعيط و اقول انا عاوز اموت شهيد
هو اللي انا بكتبه ده هيفيد حد ؟
اه
هيفيدني انا
اهه فرغت شوية من اللي عندي
و على فكره
البوست الجايه ممكن تكون المغرب او حاجه
و محتمل كبير تكون عن لجنة الاغاثة اللي هتعمل مؤتمر صحفي في اتحاد الاطباء العرب النهارده
في ناس هيقرو الكلام ده و ناس لا
انا لو عقلت و مسحته مش هكون عاوز اي حد يقراه
بس دلوقتي
نفسي الاربعين الف اللي زاروني من اول ما حطيت الكاونتر يشوفوا البوست ده
يللا عاوزين حاجه؟
سلام عليكم
دعواتكم بس

Labels: ,

posted by AbdElRaHmaN Ayyash @ 03:43  
41 Comments:
  • At 22 July 2007 at 05:35:00 GMT, Anonymous Mo3Az said…

    غريب ، ازيك يا جميل

    سبحان الله الواحد فينا يبقى رايح جاى بس برده محتاج حد يفضفض معاه بس المشكلة لو ما لاقيناش الحد دا

    وشكلك مليان حاجات عايزة تخرج ، بس ولا يهمك قول اللى انت عايزه يا ريس واحنا علينا الاستحمال :d

    وبعدين ليه حاسس انك ضحية ، ولا ضحية ولا حاجة والهدى والنور مالها مش فاهم !!


    اميلات البنات -------> "الحق احق ان يتبع"


    لو تركز الاول فى الهندسة احسن وافيد كتير وبعدين ربك يسهلها


    قران ---> فى شيخ بيحفظنا فى الجامع وهو قريب منك لو عايز تعالى معانا ،كلمنى


    عايز تشوف غير الاخوان على النت كويس بس ليه تقلل تعاملك مع الاخوان !!


    الماضى كله فوايد ----> "وذكرهم بايام الله "


    ، بس كويسه الفضفضة على الاقل بتريح كتييييييييييييير

     
  • At 22 July 2007 at 07:13:00 GMT, Anonymous ارحم دماغك! said…

    ازيك يا عُبَد؟
    شدة وتزول ياعم :)
    بالشفا ان شاء الله..

    شفت خلاصة القول؟

     
  • At 22 July 2007 at 07:32:00 GMT, Blogger alqassam said…

    عبدو باشا

    اخبارك واخبار صحتك اية

    يا عم ان شاء الله كل حاجة هاتتحل وتبقى احسن من الاول

    وليك حق تفضفض واحنا نسمعك دة اكيد

    عموما انتا خود الوالد وشد على العروسة والف مبروك مقدما

    بس متنساش الكرت

    سلام

     
  • At 22 July 2007 at 08:49:00 GMT, Blogger اليعقوبي said…

    السلام عليكم
    ازيك يااستاذنا فضفض علي فكرة يا عبدالرحمن اغلب اللي علي النت مش اخوان اساسا ممكن انت اساسا تنظيميا متكونش من الاخوان لسه والامور عادية للغاية لازم هتقابل شخص ينرفزك وشخص يريحك شخص يوجعلك دماغك وشخص يظبتلك دماغك الدنيا كده 0
    استعن بالله ومن انا اسمع انك سميت نفسك عبدالرحمن عياش عشان انت بتحب الشهيد(باذن الله)
    يحي عياش اعتقد بس حاجة كده ان من سوف يمن الله عليهم بالشهادة مبيحبوش مروان خوري وتامر حسني والكلام اللي انت قلته ده ياصاحبي مينفعش 0
    حاجة بسيطة عن احمد ماهر في مرة احمد ماهر كان بيتكلم في جامعة اسيوط في مؤتمر لحقوق الانسان فجت سيرة شارون فقال المحترم احمد ماهر :( شارون شفاه الله)فقام شاب من شباب الجامعة قام هاتف باعو القدس وباعو البصرة بكرة يبيعوا النيل والسد فامن الدوله وقتها جري ورا الشاب ده في وسط المؤتمر0
    مينفعش نقيم حد وننسي نفسنا ( ناس بيحاولوا يظهروا الاخوان بشكل كويس و هم اسوأ ما يكونوا)0
    تقييم الناس يخفي عن النفس عيوبها
    وربنا يكرمك وانا مبسوط جدا لاني دخلت مدونتك

     
  • At 22 July 2007 at 09:00:00 GMT, Blogger فن الحياة said…


    رتب افكارك واورقاك وارسم خططك في الدنيا .. ..الحياة فيها وفيها .. وانتا طول ما انتا ماشي فيها .. هاتشوف وهاتصاحب .. وهاتفارق .. شيء طبيعي .. هي دي الدنيا

    انا فاكر اول مرة جيرانا (اتراك ) ئلي تربيت معاهم 10 سنين
    حاسيت ان الدنيا وقفت بالنسبة لي .. لكن كلمة من ناس حكيمة قالت لي .. متوقفش حياتك انتا غصب عنك هاتتصاحب على ناس تاني وهاتشوف وهاتفارق .. هي دي الدنيا

    كرررت الكلام مش كده ؟

    بس هي كده اعملك ئيه ياعني :@

    وكمان انا زعلان منك اوي ... ياعني مكتبتش اسمي في كل الناس ئلي انتا ذكرتهم مع اني شبه يحي عياش المفروض تكون فاكرني على طول :P

    بس يااااااااله معلش مسامحينك .. كفاية عالينا ان احنا نعرف واحد زي حضرتك :@
    :):):)
    اخوك

    من خارج ..... احم احم :)

     
  • At 22 July 2007 at 09:02:00 GMT, Blogger فن الحياة said…

    صحيح عيب تكون جنبنا بكام محطة وما نشوفكش .. انتا جبت الحاجة بتاعتك ولا لسه .. :) وقت ما تكون فاضي .. تعالى انا فاضي دلوقتي خلاص :) ومفيش حاجه وراية الايام دي :)

    منتظرينك ;)

     
  • At 22 July 2007 at 09:39:00 GMT, Anonymous أبو البرآء said…

    السلام عليكم ورحمة الله وبركاته
    أخى الحبيب عبد الرحمن :
    هو عليك قليلاً
    أرح بالك...وأرح ذهنك .وقل يا الله
    أرم بهمومك إلى ربك ..ألجىء إلى ربك..كلنا ياأخى ضعفاء إلى اقصى الحدود..تأتى أوقات كثيرة فى هذا السن وما انا من ذلك ببعيد وينقلب فكر الشخص كثيراً بخصوص قضايا معينة ..فى هذه الأوقات فقط قم وتوضاً وأستعذ بالله من الشيطان الرجيم ..وصلى ركعتين لله وأطلعالركوعوالسجود..وقل يال الله رميت نفسى بين يديك ومرغت وجهى فى تراب محرابك ... فلا تردنى عن جنابك...إلاهى إن تركتنى إلى نفسى .فإنى ضعيف وحيد فقير غريب...سأهلك وأهلك وأهلك..اللهم إنك تشهد على حبى لك فلا تدعنى وحدى وكن معى ..وقل دائماً :....معى وتسبقى معى
    دائماً يا عبد الرحمن يكتشف المرىء فى خلانه بعض العيوب ولا يوجد أحدنا بدون عيوب ..هذه آية الله لا يوجد أحد بدون عيوب..وإلا لصرنا ملائكة ..وهذا محال..لذلك يا عبد الرحمن لا تنظر إلى عيوب إخوانك وأنظر إلى محاسنهم وقوم بوجه عام ..ولا تترك نفسك تغوص وتطير فى بحار وسماء فى عالم الهم .. أنت أقوى من ذلك وأعلى من ذلك بكثير .. أنت عبد لرحمن إن كنت قد نسيت .. أما موضوع البنات هذا فكلٌ أدرى بحاله إن شئت أحذف من ترى أنهم لا فائدة ولا أستفدة حقيقة من وجودهم على قوائمك .. هيا يا بطل قم وأغسل روحك وأرم نفسك فى محراب وقتك .. فالوقت أمامك .. ولا تنسى أن تدعوا لرفقاء دعوتك وحافظى بيعتك .. فكلنا رفقاء علىالدرب وسائرين فى الطريق

     
  • At 22 July 2007 at 11:11:00 GMT, Blogger belal said…

    إن جيت للحق بلال علاء دا يتحب
    .....
    سلامي يا حبي
    .....
    نيكول كيدمان
    تامر حسني
    عمر وسلمى
    ....
    أهلا بكم معنا..هنا تل أبيب
    ...
    شالوم

     
  • At 22 July 2007 at 12:20:00 GMT, Blogger FadFadA said…

    عبدالرحمن
    أعتذر عن هذا الانقطاع الطوييييل
    افتقدتك بجد على الرغم من أنني لم أقابلك
    أكتر حاجة بتعجبني فيك انك صريح جدا , اللي في قلبك على لسانك - عذرا- أقصد على كتاباتك
    جميل جدا انك تتعامل مع غير الاخوان , و لكن هذا لا يتعارض مع التعامل مع الاخوان , فهي ليست علاقة عكسية
    بالنسبة للحاجات اللي نفسك تعملها - استعن بالله و لا تعجز
    و لكن ضع أولويات و حاول انك ترتبها كويس و ابدأ واحدة واحدة علشان ما تزهقش و تسيب كل حاجة مرة واحدة

    عاوز أقولك حاجات كتيير بس خايف أطول عليك
    على العموم ربنا يوفقك و يحققلك كل اللي انت تتمناه

    محمد

     
  • At 22 July 2007 at 13:02:00 GMT, Blogger إخوانية مصرية said…

    هتخانق الأول
    وبعد كده نتكلم
    حاسس انك ضحية الهدي والنور ليه
    معلش بقي مع انها في عيوب
    بس انا بحبها جدا
    وبجد ياعبدالرحمن انت لو فكرت تاني هتلقيك اتعلمت حجات واتعودت عليها
    في ناس كتير لسه بيتعلموها دلوقتي
    وكلمة حق يعني الهدي والنور تنفع للبنات وبس لكن صبيان وبعد ماالحاج عوض مشي يبقي تؤتؤتؤ بالثلث كمان

    نيجي بقي لبقية البوةست
    شكلك مخنوق مخنوق مخنوق يعني
    بس المهم انك تطلع الي جواك
    ولايهمك انت اخونا الصغير وعلينا الصبر


    موضوعات الايميلات
    بص ياعبدالرحمن
    دي نصيحة مني بجد
    من اختك الكبيرة يعني
    عواز تخفف حمل شوي امسح اميلات البنات
    واعمل زي اختك
    مش بستقبل اي ايميل مهما حصل الا متاكد من صاحبته الاول
    واي ايميل بيدخل عندي مادام دا يستعبط ودا طبعا بيبان من اول ماقول مين حضرتك
    بلوك ودلييت واريح نفسي علي طول

    الهندسة بقي هوة دا المطلوب ركز في الدراسة واجتهد فيها بقدر استطاعت
    وربنا يوفقك يارب

    القران بقي
    طبعا دا حاجة اساسية
    بس دا في شيوخ كتير اوي
    واكيد انت تعرف اخوة في المنصورة يدلوك علي شيوخ ومحفظين قران تتابع معاهم
    والاهم انك تتعلم تجويد كمان


    اما بقي الي بتحبهم
    انا بس عوزة اقولك حاجة بدون زعل
    وانا عارفه انك ان شاء الله مش تزعل مني ولاحاجة عشان اي حد بيقدم نصيحة يبقي دا شيء كويس
    من احب قوما حشر معهم
    فانتقي من تحب جيدا

    والي بتكرهم
    اكيد في منهم ناس بنكرهم بردوا

    موضوع النت بقي
    والتدوين
    خد بالك ان المدونات دي حاجة جديدة
    واكيد هيكون في ناس تكرهنا فيها كتير

    موضوع بقي الاخوة
    طيب ليه تقلل تعامل معاهم
    ماتفضل تكلمهم وكون صحوبات جديدة وخلاص

    واذا كان العروسة مضايقك اوي الموضوع ده
    بس انتي بس استعد واظبط امورك وخلص دراستك والله المستعان


    وربنا يكرمك ياعبدالرحمن يارب ويحفظك
    ويبارك فيك
    ويشرحلك صدرك وييسرلك امرك

    قول آآآآمين

     
  • At 22 July 2007 at 13:03:00 GMT, Blogger ** white rose ** said…

    انا غبت عن المدونة دي 5 أيام بس و كل ده اتكتب و أنا مش هنا كل ده عشان كنا مسافرين و بجد زعلت عشان مجتش الزقازيق


    اها اكتب بأه
    أول حاجه انا مستغربة عشان انت بتحب تامر بك ده انا بكرهه موووت ممكن بحب أغانيه جدا بس هو كله على بعضه كده محتاج يتركن على أي جنب و يتكتب فوقيه على لوحه منوع الاقتراب او التصوير و مروان خوري انت بتحبه ؟
    بجد دي صدمة عمري

    بس طلع زوقك حلو بالنسبة لمروان خوري بس اظن انك نسيت تكتب ام كلثوم و عبد الحليم
    هم كمان حلوين اوي






    انت يا ابن العمه عايز تتجوز


    ؟


    طب انا هقولك كلمه انسى موقتا بس مكن كمان كام سنه تبدأ تفكر
    بس هي مين العروسه المحروسه

    - المتعوسه -


    انا فرحااااااانه موت عشان لقيت حد عنده أرق زيي

    و حربت كل حاجه عشان يروح

    و إليكم نتيجة تجاربي و خبرتي


    خليق مطبق كذا يوم لحد ما تحس انك هتحب السرير اكتر من عيلتك كلها و ساعتها هتنام نوم بس يارب مامتك متعملش زي ماما و اول ما كملت ساعه نو الاقيها بتصحيني و تقول لي الشيخ بره يلا عشان تحفظي قرآن و انا مكنتش اعرف ان فيه حد اساسا هيحفظنا حلفت بالله ما انا قايمه و خلصت الحكايه



    بقولك



    احسنلك امسح البنات بس سيب المهم بس و الباقي نفضلهن لان انا من رأيي البنات بيفهموا كل حاجه بالمشقلب مع انا بنت بس يلا اعترافات









    سلام عشان زهقاااااانه

     
  • At 22 July 2007 at 13:58:00 GMT, Blogger امام الجيل said…

    جميل ان الواحد يتكلم ويفضفض باى كلام مش مدونتك اعمل فيها اللى انت عايزه محدش ليه دعوة مدام مراعى فى كلامك ربنا
    بس استغربت من المزيج اللى موجود
    فى الحاجات اللى بتحبها
    خصوصا تامر حسنى ده
    مش عارف
    بس ده صح ولا لا
    تعرف انا بعمل حاجات كتير وبكون عارف انها غلط واكيد بخبيها
    بس انى اعلنها للناس
    ده معناه انك مقتنع بيها
    انا مش بهاجمك يا راجل بس بكلمك
    متتضيقش كده من كلامى واهدى
    اشرب بق مية وتعالى
    ومبتحبش امن الدولة ليه يا بنى
    دول امن ليك مش انت من الدولة
    ههههههههههههه
    سبحان الله يلا مش عارف اقولك ايه تانى
    ادعيلنا معاك
    وايه حكاية البنات اللى ع الميل
    واخوات كمان
    ما تعرفنى عليهم
    هههههههههههه
    ربنا يكرمك
    عارف انى ازعجتك
    ولو مش عايز ترد متردش
    ويا ريت يا جدع تنفتحوا شوية
    يا مدونى الاخوان القدام انتو
    عقدتونى والله وزعلان منكم
    مش عارف ليه منغلقين
    احنا منشبهش ولا ايه
    لا ده احنا جدعان اوى
    ادعيلى معاك تانى
    بالهداية
    السلام عليكم

     
  • At 22 July 2007 at 14:38:00 GMT, Blogger ** white rose ** said…

    انت لما كنت زعلان و زهقان كتبت في مدونتك و انا الوقتي زهقاااانه جدا و معنديش مدونة اكتب فيها ف برضه هكتب في مدونتك انا مش قلت لك اني هشاركك في المدونة ؟ شكلك كنت فاكرني بهيس بس ؟
    و عندك حق انا مش هستولى على مدونتك بس كان نفسي و بجد موافقه لو انت معندكش مانع اخدها لفه و ممكن تأجرها كمان و مستعده ادفع 3 ملاليم في الساعة و أكتر من كده هعرف انك طماع




    سوري لاني زهقانه و جيت اهيس عندك هنا بس انا مفنشه رصيد من يوم ما كنت عندكو و شحنت تاني و خلصت و انا برضه عندكو و معنديش شجاعه اقول لبابا يشحنلي تاني
    و نفسي اكلم اصحابي
    اصل اختك بس هي اللي الوقتي اون لاين و شكلها بتتبع مبدأ السلحفاه في الكتابه و القيامه هتقوم قبل ما تقول كلمتين



    الاون لاين يتزايد عندي و بكده انا هكون زهقت من مدونتك و اكلم اصحابي احسن





    سوري على التهييس تاني
    و سلاااااام

     
  • At 22 July 2007 at 15:38:00 GMT, Blogger tamooh said…

    غريب

    انت بس تلاقيك مريت الايام اللى فاتت بكذا موقف ورا بعض وكلهم كانوا فى اتجاه واحد..اتجاه ضايقك وخلاص

    مش مشكلة ايه السبب

    المشكلة لو ماعرفتش تخرج منها

    حاول تخرج منها

    اصحابك مش تسيبهم الا لو حسيت انهم ماينفعوش اصحاب..ده راى الشخصى يعنى
    لكن لو كانوا كويسين بس فيهم عيوب ممكن تتجاوز عنها عديها بقة وما تقفش عندها..حاول تصلحهم وربنا معاك

    اللى تضايق منه ماتفكرش فيه عباس وحسنى وغيره..ادعيلهم..او ادعى عليهم..بس ماتفكرش فيهم

    حب براحتك..بس اللى تحبهم تعرف كويس ان المرء يحشر مع من احب

    ..أنا كمان بحب اتفرج على افلام جيبسون وتوم هانكس
    واحيانا بروس ويلز ونيكول

    بحب برده اتفرج على انقاذ راييان بس علشان بحس انى معاهم فى الحرب
    ..كمان بجد فى حاجات تانية حبيتها فى لافيلم ده بس ده بقة مش مكانها
    بحب فعلا اتفرج كمان على فيلم المفاوض لبروس ويلز

    لكن مش بحبهم..فى فرق عندى..فرق كبير

    انى اتفرج على فيلم..غير انى احب الممثل اللى فى الفيلم

    فاهم قصدى..صح؟؟

    ليه موضوع رابطة المدونين هيفشل..
    ادعيلهم الفكرة فعلا جميلة

    اشتغل واتزوج وفيها ايه
    ركز بس فى الكلية
    اتخرج واتزوج وان شاء الله ربنا هيرزق ببنت الحلال
    ادعي ربنا فى كل صلاة ان ربنا يرزقك زوجة صالحة..خير متاع الدنيا
    ادعى ربنا وهو ان شاء الله هيسر لك الامر ده

    نيجى بقة لاحساس الضحية
    ليه ضحية
    الكلام حسسنى انك عايش فى فيلم رعب
    فيلم سو مثلا
    ليه يا اخى

    انت تقدر تكون ضحية وتقدر برده ما تحسسش نفسك الاحساس ده

    ممكن الواحد يضايق احيانا من كل اللى حواليه
    كتير بنضايق حتى من اخواتنا
    وده اللى بيدى لابيت طعم

    تخيل ان عايش فى بيت كل اللى فيه ساكتين ونعم وحاضر
    مافيش خناق مافيش زعيق مافيش هزار ومقالب فى بعض
    بالذمة ده يبقى بيت..مدرسة ممكن

    مش غلط انى ازعل من الاخوان
    بس اشوف ايه اللى مزعلنى منهم بالظبط
    ولا كذا حاجة فوق بعضها؟؟خليتك حسيت انك ضحية

    بجد الكلمة دى صعبة اوى اخى..

    وبالذات انك قولتها جنب مدرستى
    حرام عليك
    مدرستنا
    كانت جميلة ..بس عارف احنامش ضحايا يها ولا حاجة
    هيا مالهاش ذنب
    الذنب ذنب المجتمع اللى بره
    هو غلط ..هيا صح
    اخى تخيل لو ماكنت فيها؟؟
    بجد انا مش متخيلة نفسى من غيرها

    اخى انت مش ضحية ولا حاحة
    انت بس مضايق من جواك

    مضايق شوية..شوية كتير

    لو جربت تعمل حاجة جديدة
    فى حياتك
    جرب تضيف حاجة لجدولك النهاردة
    حاجة تخرجك من المود
    جرب تكلم واحد صاحبك مش شفته من زمان
    واحشك جدا
    اطلبه ..واخرج معاه النهاردة
    وانت خارج
    فكر كل شوية ازاى تفرحه
    ازاى تعرف مضايق من ايه وتساعده انه ينساه او يحل مشاكله

    انا بعمل كتير بلاقى نفسى بقيت كويسة
    على الاقل بنسى همومى

    البنات مش هعرف اقولك فيهم ايه
    تمسحهم ولا تسيبهم
    دى حاجة راجعالك
    استفتى قلبك فى النقطة دى

    عايز تاخد دبلوم اعلام كويس جدا
    انا كمان كان نفسى اخد دبلومة ديزين وانا لسة فى الكلية
    لغاية لاسنة دى..وده كان حلمى
    بس طبعا لا كليتنا تنفع
    ولا قسم مدنى كان مساعدنى

    اسال نفسك..تقدر على كده؟؟
    تقدر تحضر وتذاكر وتمتحن وتجيب تقدير علشان تنفع امتك واهلك ونفسك
    وجنب كل ده تذاكر دبلومة؟؟
    بجد لو حسبتها ولاقيتها تمشى
    يبقى خلاص
    جو اهيد

    احفظ قران مافيش مشكلة
    حط خطة لحفظه
    بس اهم حاجة..الجروب اللى هتكون فيه
    لازم جروب تحفظ فيه
    ده بيخلى حماسك لحفظ القران مفعوله اطول..ان شاء الله

    ليه تقلل من تعاملك مع الاخوان
    هم محتاجين تعاملك
    ليه تحرمهم منك؟؟ليه؟؟
    افتكر كويس جدا انك ممكن تكون لاى واحد هتقلل تعاملك معاه..ممكن تكون انت كل اصحابه
    انت انتيمه اللى بيستريحلك
    حتى لو ماكنتش حاسس بده
    ..ما تقللش تعاملك
    بالعكس زيد مودتك ليهم
    واحتسب وقتك معاهم عند الله.اخوة وترابط..وحب فى الله ولله....ان شاء الله

    بتحب الرياضة وبتكره تمتحنها
    عادى جدا..كنت بحب مواد كتير
    بحب قسمى جدا..وبكره امتحن اى مادة
    وبروح الامتحان بالعافية
    وبدخل اللجنة متاخرة نص ساعة
    والمفروض تلت ساعة بس
    وكل ده علشان بكره الامتحانات
    ..

    خلصت انا على فكرة
    خد بقة حبيبتين صداع
    هينفعوك بعد اللى انا كتبته ده
    وادخل نام بقة
    .............
    اخى روق وان شاء الله هتلاقيها بقيت زى الفل

    ادعى ربنا يديم عليك الهنا والسرور
    ...................................

     
  • At 22 July 2007 at 18:39:00 GMT, Blogger AbdElRaHmaN Ayyash said…

    بجد يا اخواننا انا مش عارف ارد عليكم اقول ايه
    انا هرد على كل واحد باسمه
    بس بجد و الله
    في منكم اللي خللاني احس اني وحش اوي اوي
    و في منكم اللي حسسني ان لسه في حد جنبي
    بجد ربنا يبارك فيكم كلكم

     
  • At 22 July 2007 at 18:41:00 GMT, Blogger AbdElRaHmaN Ayyash said…

    أخ معاذ
    و الله كلامك مظبوط
    و كلمة ضحية دي خرجت مني غصب عني و الله
    يعني مقصدتش المعنى المهول ده
    بالنسبة للقران
    انت عارف اني في القاهره مقيم هناك اقامة شبه كاملة
    ربنا يكرمك ياارب
    و ان شاء الله لو قدرت احفظ هنا هحاول
    جزاكم الله خيرا على تعليقك الجميل ده
    سلام يا دكتور

     
  • At 22 July 2007 at 18:43:00 GMT, Blogger AbdElRaHmaN Ayyash said…

    عم يحيي عياش حبي
    ربنا يخلليك يا سيدي على تعليقك ده
    :D و هي دي الخلاصة
    وربنا يستر علينا

     
  • At 22 July 2007 at 18:45:00 GMT, Blogger AbdElRaHmaN Ayyash said…

    :D:D عم اشرف
    ربنا يخلليك
    اهه اللي هامك في الموضوع العروسة
    :D انا مش بفكر اوي يعني
    بس لو عملت الفرح
    صدقني الكارت هيكون معاك يا فندم :D
    و على اليو تيوب كمان عشان خاطرك

     
  • At 22 July 2007 at 18:52:00 GMT, Blogger AbdElRaHmaN Ayyash said…

    اليعقوبي الحبيب
    ردك أروع من الرائع بكثير
    فعلا أخجبتني من نفسي
    أفحمتني
    بجد جزاكم الله خيرا
    يا عم أحمد ماهر انا مش بحبه
    بس لما يكتب مقال بالشكل ده
    احترمه فعلا
    و بالنسبة لمروان خوري و تامر حسني .. انا خانني التعبير فعلا
    و انا مش مستعد يتكتب تاني ان واحد من الاخوان بيحب و مش بيحب
    بس في نقطة
    انا فعلا اعجب ببعض اغاني تامر حسني و شوية من اغاني مروان خوري
    مش لازم اقول اسماء
    بس عموما تعليقك رائع
    و زيارتك الاولى اروع و اروع
    جزاكم الله خيرا
    سلااام

     
  • At 22 July 2007 at 19:11:00 GMT, Blogger AbdElRaHmaN Ayyash said…

    :D و الله بحبك يا عم محمد
    كلامك مظبوط
    بس مفيش طريقة احافظ بيها على اللي معايا
    و في نفس الوقت اعرف ناس جداد
    مش عارف

     
  • At 22 July 2007 at 19:14:00 GMT, Blogger AbdElRaHmaN Ayyash said…

    جزاكم الله خيرا يا أبا البراء
    بجد جزاكم الله خيرا
    ان شاء الله نعمل بنصيحتك
    و كلنا ندعي لبعض الله يكرمك
    دعواتك بس
    وسلاام
    ----------
    ان شاءالله اكمل ردود بكره يا اخوانا
    انا مطبق فعلا
    سلاام

     
  • At 23 July 2007 at 02:58:00 GMT, Blogger محمد النجار said…

    انا عمرى ما توهت فى بوست زى البوست بتاعك ده
    بس بصراحة من اجمل ما قرأت
    كل اللى اقدر اقولهولك

    اولا ربنا يوفقك وتعمل كل اللى انت عايزه خاصة حكاية الزواج دى

    ثانيا حاول تتلمس الاعذار للى انت زعلان منهم عشان لو ركزت كدة على طول هتتعب

    ربنا يكرمك ويعطيك ما تريد واكثر

    سلام

     
  • At 23 July 2007 at 15:40:00 GMT, Blogger اسلام رفاعى said…

    ازيك ياعبد الرحمن من زمان نفسى اقرأ لك حاجة وحشنى ياراجل

     
  • At 23 July 2007 at 17:01:00 GMT, Blogger الحلم العربي said…

    فيه نس كتبتلك كلام كتير تعليق على كل نقطة ...انا كل اللى هقولهولك : ربنا يوفقك

    جواك انسان كويس جدا ...بتفكر بشكل كويس ...عايز تكون موضوعي ...ده شئ جميل
    بردو فيك شوية من توهان الجيل الجديد دي سمة عامة فينا كلنا ...لكن انا متأكدة ان ربنا هيوفقك إن شاء الله لأنك نفسك تعمل حاجة

    ربنا معاك
    ما تمسحش البوست حتى لو حسيت انه فيه كلام ما كنتش عايزه يتقال لأننا عارفين ان دي لحظة فضفضة ..صدقنى كمان شوية هتقرأه و تعرف تقيم نفسك من خلاله و انت وصلت لايه بعده
    تحياتي

     
  • At 23 July 2007 at 19:17:00 GMT, Blogger abdelrhman said…

    عبود حبيبي
    اولا جزاك الله خير على صراحتك الشديده
    ثانيا اني احبك في الله مع انك عزيتني في جدتي وهي لسه حية ترزق اكيد انت فااااااكر
    ثالثا
    طلع كل اللي جواك وفضفض انت نفسك تنطلق للحياه بحلوها ووحشها بس ربنا يوفقك وتكمل على الصواب
    رابعا
    انا ماعرفش المدرسة اللي انت كتبت عنها ولكن من كلام الاخوه في التعليقات شكلها مدرسة اخوانيه ويابختك يا عم غيرك اتعلم في السلام ومدارس حكوميه تفتقر الى ابسط الحاجات الحلوة
    خامسا انت بس انجح السنه دي وانا هجوزك اخت من الصعيد ههههه
    سادسا انا نسيت باقي البوست فيه ايه
    سابعا انا بدعوك انت وكل الاخوه تزور مدونتي www.hemsawy.blogspot.com
    ثامنا مستني ردك

     
  • At 23 July 2007 at 21:25:00 GMT, Blogger اسماء العـــــــريان said…

    ابشرك اخى عبد الرحمن بان ما انت فيه نقطه تحول ونضج عقلى واستيعاب لما يحدث حولك

    اخ عبد الرحمن .. الانسان لما بيتغير بيتغير تدريجيا .. متتغيرش جامد عشان مترجعش بسرعه
    اولا انك تحس انك ضحيه هى بدايه الغلط .. لان لو كل واحد فينا حط نفسه مكان الضحيه يبقى مفيش حد فينا هيتحمل مسؤليه وهيرمى الحمل على الى ظلمه .. فبلاش هذا الشعور


    بالنسبه لنقطه البنات الى على الميل .. شوف انت كل واحدة بتتكلم معاها فى ايه .. وان وجدت ان هو كلام فاضى ولا هو كلام عيب ولا حرام بس هو مجرد كلام مع بنت .. انا افضل انك تمسحهم .. واذا كنت واثق فى نفسك ومتاكد انك مش بتعمل حاجه غلط.. وانك واخد بالك من كلامك مع البنات .. فسيبهم ولكت خليك رقيب على نفسك

    حكايه الربطه ولقاء المدونين والكلام ده اتركه جانبا دلوقتى وركز كويس اوى فى المذاكرة وفى تفوقك فى الكليه

    انصحك بانك تاخذ خطوة حفظ القران بسرعه لانها هتقربك من ربنا وان شاء الله ربنا هيريك طريق الحق

    الاخوان كما قلنا هما بشر فيهم السىء وفيهم الحلو .. ما نحكمش على الشخص بانه اخوان او لا احنا نحكم بالاخلاق والتعاملات

    اسفه ان كنت طولت ولكن اعتبر ما قلته نصيحه فى بدايه التغيير الى الافضل ان شاء الله من اختك الكبيرة

     
  • At 24 July 2007 at 01:39:00 GMT, Blogger AbdElRaHmaN Ayyash said…

    يا بلال و الله مش تل أبيب
    و الله ده الواقع
    اللي المفروض كتير مننا يعترفوا بيه
    جزاكم الله خيرا على تعليقك يا فتى
    وسلام

     
  • At 24 July 2007 at 01:41:00 GMT, Blogger AbdElRaHmaN Ayyash said…

    محمد باشا العاقل
    و الله انا افتقدتك أكثر يا سيدي
    و منتظر اضافتك صعبة المنال دي
    بالنسبة للإخوان
    أنا مش عاوز اقلل تعاملي
    لكن مش عاوز اقصره عليهم
    لأن ده فعلا بيأثر على مدى انفتاح الانسان مع المجتمع ككل
    عموما جزاكم الله خيرا على تعليقك الجميل اوي
    وسلام

     
  • At 24 July 2007 at 01:48:00 GMT, Blogger AbdElRaHmaN Ayyash said…

    أخت أسماء
    و الله سعدت بتعليقك فوق ما تتخيلي
    جزاكم الله خيرا على التعليق الرائع
    بالنسبة للهدى و النور
    أنا لو ضحية الاخوان هكون ضحية الهدى و النور
    انها فعلا مفهمتنيش اد ايه الناس بره وحشين
    انا خرجت من الهدى و النور في اخر اعدادي على فكره
    بس اللي حصل اني شفت مجتمع تاني
    مكنتش بروح المدرسة
    و مكنتش بقابل حد غير صحابي بتوع الهدى و النور
    بالتالي كونت فكره حلوة عن الكون
    فكرة غلط جدا
    لكن الهدى والنور فيها أجمل أيام حياتي
    أجمل اصحابي عرفتهم هناك
    و فعلا اتربيت هناك
    أما بالنسبة للإيميلات .. ففعلا الموضوع بدأ الحمد لله
    وربنا يتمم بخير :):)
    ---
    بالنسبة للي بحبهم
    انا مش بحب اشخاصهم
    لكن بحب حاجات معينة قدموها
    فيلم
    معنى
    اي حاجه
    ------
    موضوع الجواز انا هصرف نظر و البنات يعنسوا بقى :D:D
    -----
    القرآن و الله انا هبدأ لوحدي
    لأني مش مستقر في الاقامة لظروف الشغل
    و ربنا يوفق
    جزااااااكم الله خيرا مرة تانية
    وسلام

     
  • At 24 July 2007 at 01:52:00 GMT, Blogger AbdElRaHmaN Ayyash said…

    :D سارة الغريبة اوي
    حرام عليكي يابنتي
    بالراحة بس
    بصي يا مس
    اللي بيحصل في موضوع الاغاني ده بالذات كتير اوي
    انا مش بحب شخصية تامر
    و مش عارف شكل مروان ده
    بس انا لما سمعت حاجات معينة ليهم
    فعلا حاجات تستاهل
    بس
    :D وانا مس هفتحه مسرح يعني عشان اجيب كل الجيل القديم و الجديد
    بالنسبة للاخت المتعوسة
    لما تعرفيها هتذهلي :|
    :P
    بس و الله انا شكلي هصرف نظر (A)(A)
    -----
    البنات والايميلات
    تمام يا فندم
    جار التنفيذ

     
  • At 24 July 2007 at 01:56:00 GMT, Blogger AbdElRaHmaN Ayyash said…

    ههههههههههههههه
    :D ماشي يا عم امام
    ربنا يكرمك يارب
    و الله ما ضايقتني ابدا
    بالعكس انا فرحت بتعليقك
    ربنا يخلليك للبشرية يا سيدي
    :d
    موضوع تامر حسني طبعا غلط
    كشخص
    اما كفن في اوقات بيكون محترم
    فانا شايف انه عادي
    و ربنا يستر
    اما موضوع الميل .. فالموضوع و الله كبير فعلا و عاوزين فيه حاجه شرعية كبيرة كفتوى مثلا تحدد اصول العلاقة على النت
    لأن مستحيل تمنع و حرام تفتح بالشكل البايظ
    أخيرا انغلاق الاخوان
    اه منغلقين
    اه مش عاوزين ننفتح
    و دي كارثة
    بجد كارثه
    سلام

     
  • At 24 July 2007 at 01:57:00 GMT, Blogger AbdElRaHmaN Ayyash said…

    سارة بنت خالي
    يا عاقلة
    ربنا يشفيكي :D:D
    اعملي مدونة و اكتبي فيها
    و بطلي تلفي في المدونة
    من غير لا شغله ولا مشغلة
    لما اشوفك ان شاء الله نشوف موضوع اللفة ده
    و اهه ممكن نشوفلك حته تلعبي فيها شوية
    اقصد تكتبي فيها شوية
    يللا سلام

     
  • At 24 July 2007 at 02:07:00 GMT, Blogger AbdElRaHmaN Ayyash said…

    الأخت طموح
    ---
    كلامك جميل جدا
    أنا معاكي في موضوع الافلام
    انا مش بحب الشخصيات اللي انا كاتبها
    لكن بحب اعمالها
    ممكن في اتنين او تلاته اعشقهم كأشخاص و كأعمال
    :D
    -------
    موضوع رابطة المدونين ليه هيفشل
    لأن التدوين , وبعد عناء أدركت ذلك , ان التدوين حركة شخصية و صعب فيها التجمع بالشكل اللي احنا عاوزينه
    لازم هيكون فيه سمع و طاعة و تحرير و غيره
    و لما قستها على نفسي
    و جدت ان الموضوع فاشل فعلا
    يارب ينجح صادقي النية انهم يبدأوه
    ووقتها ممكن نشتغل هناك معاهم
    -----
    كلمة ضحية انا بعتذر عنها
    و الهدى و النور فعلا انا بعشقها و بعشق اللي فيها و الله
    على فكره الاخت سارة الطفلة اللي بتعلق دي في الهدى و النور
    سيبوها تفرح شوية
    فعلا المدرسة أثرت فيا جدا جدا جدا
    لأكثر مما تتخيلوا يعني
    و الحمد لله ما زلت مقتنع ان حياتي كان لازم يكون فيها الهدى و النور
    و الهدى و النور مشكلتها زي ما انا قلت انها مفهمتناش الفرق بين بره و جوه
    معرفناش ان بره وحش اوي
    الا لما انا خرجت في اعدادية
    بس فعلا كنت منقطع عن العالم
    و مكنتش بتعامل الا مع نخبة معينة اخترتها بمقاييس الهدى و النور
    -----
    الملل .. لا أعتقد أنه يشكل مشكلة اطلاقا
    يعني الحمد لله الواحد يومه كل يوم فيه جديد
    خصوصا في الشغل الجميل اللي انا نقلت فيه
    الحمد لله يعني
    -----
    الاخوان انا مش زعلان منهم و الله
    بس مش هقدر اعيش حياتي كلها في وسطهم
    لازم ابعد شوية
    اشوف الناس بره بتفكر ازاي
    و ده اللي بعمله دلوقتي
    -------
    بجد جزاكم الله خيرا أخت طموح على ردك
    جزاكم الله خيرا بجد يعني
    و اليعقوبي و الاخت اسماء و الحاج معاذ و الاخ المؤرخ اللي كلمني
    بجد جزاكم الله خيرا على كلامكم ده

     
  • At 24 July 2007 at 02:09:00 GMT, Blogger AbdElRaHmaN Ayyash said…

    دكتور محمد
    جزااكم الله خيرا على تعليقك
    شرف ليا سعادتك :)
    :D و احنا يهمنا ايه غير ان انتو تتوهو عندنا
    بالنسبة للي زعلان منهم
    و الله انا مش بركز
    بس فعلا الانسان لازم ينسى زيما سعادتك بتقول
    و الجواز شكلي هغير رايي :D
    سلاام

     
  • At 24 July 2007 at 02:09:00 GMT, Blogger AbdElRaHmaN Ayyash said…

    أخ اسلام
    جزاكم الله خيرا يا سيدي
    وحشتنا و الله
    يارب تكون بخير
    دعواتك
    سلام

     
  • At 24 July 2007 at 02:11:00 GMT, Blogger AbdElRaHmaN Ayyash said…

    أختنا الحلم العربي
    متعرفيش و الله تعليقك ده فادني أد ايه
    لأني فعلا كنت بفكر جديا أمسح البوست
    خصوصا انه عمل جلبة لا أرى لها داعيا في هذا الوقت
    لكن موضوع التوهان و محاولة التجديد
    فعلا مظبوط
    كلنا كده
    و يارب نقدر نعمل حاجه
    جزاااكم الله خيرا على تعليقك هنا
    وسلام

     
  • At 24 July 2007 at 02:13:00 GMT, Blogger AbdElRaHmaN Ayyash said…

    عمي عبدو الحمساوي
    انا بعتذر لك و الله على الملأ هنا على الغلطة الشنيعة اللي انا عملتها
    ربنا يدي جدتك طول العمر في طاعته و يخلليهالكم ويخلليكم لها
    اما موضوع المدونة والفضفضة
    :d امال احنا عاملينها ليه ؟
    :D يا عم الصعيد احسن ناس
    بس المهم احنا نعملها و خلاص
    ربنا يكرمك ياارب يا عمي الحمساوي
    و الزيارة واجبه :)
    سلاام

     
  • At 24 July 2007 at 02:19:00 GMT, Blogger AbdElRaHmaN Ayyash said…

    أخت أسماء
    و الله انا مش عارف اقوللك ايه
    جزاكم الله خيرا بجد
    موضوع اني اكون ضحية , انا لم أقصد نقطة الضحية , و حتى لما انا اكون ضحية , ألوم نفسي اني جعلت نفسي في هذا المكان
    لا ألوم الظالم او الموقف او الظروف
    انا الملام دوما من قبل نفسي
    أما الاخوات اللي على الميل
    ان شاء الله الموضوع هيتحل ببساطة جدا
    حفظ القرآن ان شاء الله هبدأ فيه من تاني
    وربنا ييسر و نستمر بس
    الإخوان بشر
    طبعا بشر
    و انا مش هسيب الاخوان عشان شفت منهم غلط عممته على الجماعه كلها
    و الله ابدا
    انا عاوز ابعد مؤقتا عن المباشرة مع الاخوان
    اشوف غيرهم بس و الله دي فكرتي
    عموما فعلا تعليق حضرتك جميل جدا و اضاف كتير
    جزاكم الله خيرا مرة تانية
    وسلاامو

     
  • At 24 July 2007 at 12:37:00 GMT, Blogger ** white rose ** said…

    رد على تعليقاتك : هقف على الواحده بأه
    أول حاجه انا مكنتش بتكلم على شكل مروان خوري كنت بتكلم على أغانية و اللي عجبوني كانوا 3 كل القصايد و قصر الشوق و يا رب _هو و كارول سماحه مع بعض في الأخيرة _ والعروسه و اللي انت بتقول ان انا هستغرب لما اعرفها اظن انها نبيهه حبتين صح ولا لأ و يا رب تكون فهمت إزاي هي نبيهه .. رد على الحكايه دي و قول لي شكي صح ولا لأ عشان أعرف أنا دبوس ولا لأ ؟
    ممممممممم
    حكايه الحته اللي الف فيها او اكتب فيها دي اظن هتتأخر أوي كان النظام إننا بنتقابل كلنا كل جمعه و ساعات خميس كمان الوقتي انت مسافر و بابا بيسافر و عمو قاعد في الزقازيق و مش عارف ييجي و عمو التاني لو عرفت يعني رجله تعبت و احنا في اسكندريه و من المفترض إنه ميركبش العربيه كتير عشان كده _ شفت إزاي جبت لك تقرير عن أحوال العيله _ و بالتقرير ده أنا أنفع صحفية ولا أشيلها من دماغي ؟


    المهم
    كده انت خدت كتير من وقتي و الزيارة انتهت
    سوري اظن المفروض اللي انا امشي من مدونتك مش العكس
    اه كنت هنسى شكرا جدا على و صفي بتفله _طفله _ يعني دي حاجه انا افخر بيها

    و سلااااااااااااااااااااااااااموز

     
  • At 7 October 2012 at 14:15:00 GMT, Anonymous Räumung said…

    موفقيييييييييين .... اختيار موفق :)

    Räumung
    Räumung Wien
    entsorgung wien

     
  • At 1 September 2015 at 10:16:00 GMT, Blogger 文章 said…

Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats