AbdulRahman Ayyash
 

AbdelRahman Ayyash's Facebook profile

Monday, 2 July 2007
اذا .. سأعمل من جديد
شبكات بقى


سلام عليكم



كيفكم يا اخواننا



يارب تكونوا بخير



في الفتره اللي فاتت دي كنت متنقل بين شوية حاجات



نبدأ من يوم الثلاثاء الساعة 1.30 ظهرا



كنت اتأخرت في النوم بالتالي اتأخرت في مرواح الشغل بالتالي اتهزأت شوية



لقيت تليفوني بيرن



المهندس المسؤول شخصيا ..



أيوة يا باشمهندس .. ايوة يابني انت بتتمايص ليه كده .. قلتله خير بس .. قاللي انت رايح الشغل الساعة اتنين :@



قلتله لا و الله ياباشمهندس( احم احم ) انا بس تعبان اوي و نايم متأخر



قاللي طيب ياخويا لم عزالك و تعالى لي حالا على الزقازيق



قلت له نعاام ؟؟



قاللي زي ما بقوللك بسرعه



قلتله حاضر



و أجرثيت اتصالاتي



خالي اللي في الزقازيق قلتله يجهز لي الطريق :D



بابا كلمته و قلتله انا مسافر الزقازيق



المشكلة هنا في نقطة



ان احنا اتفاقنا ان الشغل هينتهي بانتهاء مشروع سان ستيفانو



لكن قبل افتتاح الفندق بأربع ايام الاقي الأمر بالذهاب سرييعا للزقازيق



عموما



رحت لميت عزالي



رحت اتغديت في كوك دور بسرعة



ركبت عربية الزقازيق من اسكندرية



و ياريتني ما ركبت



السفر طبيعته انه ياخد من ساعتين لتلاته



لكن انا سافرتها في خمس ساعات



ليه ؟



الطريق مغلق جدا



ليه مغلق جدا ؟



أصلهم بيسفلتو الكوبري !!!



آه يا بلد



في وقت ذروة زي ده يتسفلت الكوبري و يتعطل الناس كل ده



و الله كنا بنموت من الحر



الحمد لله وصلت الزقازيق مع اذان العشاء



صلليت العشا و طبعا كان الشغل انتهى



شغل الزقازيق كان في جامعة الزقازيق



كان المفترض اننا نوصل شبكة في كليات جامعة الزقازيق بمعدل ما يقرب من 8 نقاط في كل كلية



كلها داتا طبعا



غير المبنى الاداري اللي المفروض نوصل فيه حوالي 28 نقطة داتا



عموما انا طبعا ارتحت اليوم ده في بيت خالي



و تاني يوم رحت الشغل الساعة 11 متأخر يعني اوي



و ركبت تاكسي



قلت له بوابة آداب لو سمحت



وصلني هناك



قلتله منين المبنى الرئيسي



قاللي بص .. انت تمشي على طول هتلاقي قدامك معهد كفاية



انا بصراحة كنت هغلط فيه



قلتله كفاية مين حضرتك



قاللي اه و الله هتلاقي قدامك معهد كفاية



على شمالك هتلاقي المبنى الاداري



قلتله طيب و انا مستغرب جدا من نجاح طلاب كفاية انهم يعملولهم مقر و يسموه معهد كمان



عموما اكتشفت الحقيقة المره لما رحت و اكتشفت ان معهد الكفاية الانتاجية جوه حرم الجامعة



طبعا الشغل هناك كان كويس



بغض النظر عن الشباب اللي انا شغال معاهم



اللي كلهم اكبر مني بسنين طويلة



كلامهم كله عن البنات و الحاجات التانية



عموما انا تاني يوم كان يوم الخميس



الريست بتاعي



و بيني و بينكم كان عندي مشوار تلات ايام فكنت عارف اني هتأخر



انا رجعت البيت ( بيت خالي ) لقيت ابن خاالي الاوسط عمر ذراعه مكسور



صعب عليا اوي و الله



بس كان لازم امشي عشان المشوار



اعتذرت لخالو و عرفت انه زعل مني جدا للمالا نهاية عشان مشيت في الظروف دي



طبعا انا غلطان



سافرت الساعة اتناشر باليل



روحت البيت بعد الفجر لأني برضه رحت كوك دور و قابلت الناس اللي هجهز معاهم مشوار التلات ايام اياه



صحيت الساعة 1 و رحت مشواري و انقطع الزمن او التدوين او اي حاجه في التلات ايام دول



لكن الواحد فعلا بيتربى و الله



انا اتربيت :D



المهم رجعت من المشوار منهك القوى و نفسي اعد على جهاز كمبيوتر



شاشة جهازي محروقة زي ما سعادتكم عارفين



فبالتالي لازم انزل سيبر



انا قلت هريح شوية .. صحيت الساعة 1 الظهر



طبعا كان ده يوم الحد ..



فأنا كده مرحتش الشغل من اربع ايام



كلمت المسؤول في الشغل و اول لما بدأ



قاللي انت بتستهبل



ولو فضلت بالشكل ده اما متجيش تاني و سوري يعني تعد في بيتكم



او تتظبط و نبدأ صفحة جديدة و تشتغل من جديد



انا سكت لأني بصراحة مش عاوز ارجع الشغل



فهر شافني كده فقاللي انا هستنى ردك

سلام


انا بعد الكلمتين دول قلت انا مش هعرف اخد قرار


و والدي رجع من القاهره و انا نزلت سيبر


رجعت البيت الساعة 2


:D اتبهدلت جدا


و قاللي الشغل اللي انت عاوزه مش هتعمله


و هتروح غصب عنك الشغل ده


وشوية كلام كتير و كبير ملخصه اني لازم استرجل و لازم اغير من شخصيتي و ان مفيش حاجه لها لازمه لا اخوان ولا معسكرات ولا اي حاجه ما دام مفيش رغبة جوايا في التغيير


عموما كان القرار اتخذ من سلطات عليا اني ارجع لشغل الشبكات و اكمل فيه شهر على الاقل و بعدها نتكلم في شغل انا عاوزه او لا

انا مكنتش طايق نفسي و لا طايق الشغل اللي انا فيه


بس اعمل ايه ؟؟


لا صوتي يعلو ولا اي حاجه .. و الا هكون ضعت بجد


المهم


الساعة 9 ونص ركبت للقاهره عشان ابدأ صفحة جديدة في الشغل بتاعي

مش عارف ايه الخطة


و مش عارف طبيعة الشغل هيكون هو هو وللا مختلف


بس ربنا يسهل و يمر الشهر ده على خير


خصوصا ان بابا كان بيتكلم انه مش هيديني فلوس وان فلوسي هاخدها من المهندس المسؤول كمصروف يومي


واني لازم اعتمد على نفسي


و الله محتمل كمان اني ما اروحش البيت لمدة اسبوعين


ربنا يستر


و لو قدرت اعد على النت الفتره دي هيكون كويس جدا بصراحة


يعني شغل و نت و اقامة


انا لحد دلوقتي مش عارف اقامتي هتكون فين


عموما انا بكلمكم دلوقتي من مقر الشركة الرئيسي في المهندسين


لو حد عاوز يزورني موبايلي معاكم


و ممكن الشغل يكون متحدد بوقت اعتقد انه هينتهي كل يوم على الساعة 6 او ما يقاربها

و ممكن يكون مفتوح زي شغل اسكندرية ويكون من 9 صباحا ل 1 بالليل

سلااام

صحيح ..


ممعاكوش ربع جنيه ؟ (سلف لبلال الله يخلليكم ) أو نص بطيخة


----------------

كلمة أخيرة

جزاها الله خيرا أختنا خديجة ::)

عملت تصميم بعنوان أنا مدون اسلامي

ربنا يكرمك أخت خديجة ونشوفك ان شاء الله راجعه بمدونتك اقوى من الاول

التصميم اهه

http://www.algam3a.com/bb/up//uploads/a64d00c731.jpg

Labels: ,

posted by AbdElRaHmaN Ayyash @ 12:23  
47 Comments:
  • At 2 July 2007 at 15:02:00 GMT, Blogger mo'men mohamed said…

    انا قلت حتشتغل يعنى حتشتغل
    ههههههههههههههههههههههه
    تستاهل يا حلو
    احنا أمبارح خلصنا كان احسن انك تقوم على طول وتجرى على البيت مش تقعد مع عمك علاء واسامه
    يلا أدى جزات اللى بيتأخروا بره
    على العموم
    مشكلتك دى انا كمان بأعانى منها كتير
    بس الفرق بأه تقدر تتعامل مع المواقف دى ازاى

    السلام عليكم

     
  • At 2 July 2007 at 18:39:00 GMT, Anonymous الفجرية said…

    أعانكم الله

    بس التميز فى مجال بالذات زى الاتصالات

    لا ياتى بسهولة ابدا

     
  • At 2 July 2007 at 19:44:00 GMT, Blogger حراس الحقيقة said…

    ربنا يوفقك فى الشغل
    وحلو جدا التصميم ده

     
  • At 2 July 2007 at 20:12:00 GMT, Blogger belal said…

    ألف مبروك يا بني ..يعني هتقضي بقيت اليوم ...:D
    >>>
    بخصوص الهيصة اللي انتا سمعتها وانتا بتكلمني ..بص يا عم
    لما أنا قولتلك أويه يا باشمهندس كنت باضحك أو بابتسم..فالإخوة الأفاضل اللي حواليا
    باشمهندس برضك يا بلال...عيب عليك ...
    دا احنا نفهمها وهيا طايرة ..فأنا برضك ضحكت ...فهما ماسابونيش
    باشمهندس..أيوه يا عم ..باشمهندس ..
    عشان تعرف إنك شبهه يا حبي :) :D:D:D:D
    >>>>

    انتا هاتشحت عليا يا له
    طب ايه رأيك لو ربع جنيه من التبرعات ضاع ..هاعلقك على القمر ..وعشان تشوف النجوم في عز _مين بيقول عز_الضهر
    >>>
    فرصة رائعة ل...ل ..ولا بلاش
    ...
    سلامو عليكم

     
  • At 3 July 2007 at 00:27:00 GMT, Anonymous طيف بدر said…

    بسم الله الرحمن الرحيم
    دعوة إلى الانضمام إلى مجموعة المدونين الإسلاميين على الياهو
    {قُلْ هَـذِهِ سَبِيلِي أَدْعُو إِلَى اللّهِ عَلَى بَصِيرَةٍ أَنَاْ وَمَنِ اتَّبَعَنِي وَسُبْحَانَ اللّهِ وَمَا أَنَاْ مِنَ الْمُشْرِكِينَ }يوسف108
    تهدف هذه المجموعة البريدية إلى :
    1- الترابط بين المدونين الإسلاميين و زيادة الثراء الفكري.
    {وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطاً }الكهف28
    2- أن تكون هذه المجموعة هي نواة إعلام إسلامي قوي يعرف الناس بعراقة أصولهم و ذخره و زرع ذلك في نقوسهم.
    {وَمَنْ أَحْسَنُ قَوْلاً مِّمَّن دَعَا إِلَى اللَّهِ وَعَمِلَ صَالِحاً وَقَالَ إِنَّنِي مِنَ الْمُسْلِمِينَ }فصلت33
    3- مكافحة الإعلام العلماني السلولي و التخريبي من قبل الطابور الخامس الممسوخ.
    {يَا أَيُّهَا النَّبِيُّ جَاهِدِ الْكُفَّارَ وَالْمُنَافِقِينَ وَاغْلُظْ عَلَيْهِمْ وَمَأْوَاهُمْ جَهَنَّمُ وَبِئْسَ الْمَصِيرُ }التوبة73

     
  • At 3 July 2007 at 14:07:00 GMT, Blogger طالب اخوانى said…

    يا عم عبدالرحمن عايزين نشوفك بقه يا جدع .. حاول تاخد اجازة كده وتجيلنا المنصورة .. محتاجينك جدا الاسبوعين الجايين دول بالذات ... انا عرفت انك كنت قريب بتصيف .. ماشى يا سيدى . ابقى عدى علينا بس ..( محتاجينك ضرورى ) .. فى رعاية الله وربنا يعينك

     
  • At 3 July 2007 at 20:27:00 GMT, Blogger AbdElRaHmaN Ayyash said…

    :D يا عم مؤمن انت مشفتش اللي بيحصل هنا عشان تقوللي تتعامل مع الموقف
    يا سيدي و الله انا ديبلوماسي لدرجة البرود بس هنا مكانش ينفع حاجه
    ربنا ييسر
    و الله الشغل شكله حتى الان مش وحش في الفيرجشن الجديد
    ربنا ييسر ياارب
    عموما جزاكم الله خيرا
    منور المدونة والله
    سلامات

     
  • At 3 July 2007 at 20:27:00 GMT, Blogger AbdElRaHmaN Ayyash said…

    أختنا أسماء
    جزاكم الله خيرا على التعليق
    بالنسبة للتميز في مجال الاتصالات هو فعلا صعب جدا
    مش بس الاتصالات
    مجاالات كتير منها الاتصالات
    خصوصا اللي نظرياتها بتتسارع
    عموما ربنا يكرمك
    وسلاام

     
  • At 3 July 2007 at 20:29:00 GMT, Blogger AbdElRaHmaN Ayyash said…

    أخونا حراس الحقيقة
    جزاكم الله خيرا على تعليقك و دعاءك
    و ادعي لأختنا خديجة ربنا يوفقها و يجزيها الخير على تصميمها
    سلام

     
  • At 3 July 2007 at 20:30:00 GMT, Blogger AbdElRaHmaN Ayyash said…

    عمو بلبل شخصيا هنا
    يا مرحبا يا مرحبا
    :D شبه مين ياض؟
    عموما لو حد اتبرع وعد مني اوصلهالك لباب البيت (A)
    او باب المكتب
    مش هتفرق يعني
    :D:D فرصة رائعة لإيه يا بايظ؟
    سلام ياخويا

     
  • At 3 July 2007 at 20:31:00 GMT, Blogger AbdElRaHmaN Ayyash said…

    أختنا طيف بدر
    جزاكم الله خيرا على الدعوة
    ان شاء الله هشترك على طول
    سلام

     
  • At 3 July 2007 at 20:37:00 GMT, Blogger AbdElRaHmaN Ayyash said…

    عمي الحاج الطالب
    ايميلي موجود على الهوت ميل
    اؤمرني
    ضيفني و ابعتلي رساله انك انت
    و انا مش هتأخر و الله
    بس بالنسبة للمنصورة
    فانا و الله مش هقدر أرجع الا كل اسبوع يوم و أسافر تاني خلال الشهر ده
    ربنا يكرمك ويعزك ويبارك فيك ياارب
    سلام

     
  • At 3 July 2007 at 21:17:00 GMT, Blogger د/ أحمد عامر said…

    ربنا معاك وعلى فكرة أنا عندي كمان أوامر و سلطات عليا لكن انا بألجأ للإستئناف و نقض الحكم
    أصل أنا معارض درجة أولى
    لكن في النهاية انت عارف طبعا ان الداخلية في ايد السلطات العليا وكمان المالية و عشان كده من السياسة انك تمشي الحال
    وبالنسبة للربع جنيه فلو معاك ياريت تعمل حفلة أصل انت معاك عملة نادرة انك تلاقيها دلوقتي واحتمال يقبضوا عليك و يفتكروا انك بتهرب آثار
    أنا متشكر على كلماتك الجميلة في مدونتي وان شاء الله ابدأ أعلن عنها
    شد حيلك
    سلام
    أخوك احمد

     
  • At 4 July 2007 at 19:00:00 GMT, Blogger saad alshater said…

    مدونتك جميله جدا
    ناقص بس تدخل عندي
    www.ibn-elshater.blogspot.com
    وتنورني

     
  • At 4 July 2007 at 19:34:00 GMT, Anonymous عبدالرحمن عياش said…

    دكتور أحمد
    حزاكم الله خيرا على التعليق وربنا يجعله في ميزان حسناتك
    و الله كلامك عن الربع جنيه لسه عليه شوية
    بس قريب مش هيكون الربع جنيه
    هيبقى الجنيه يابني
    ربنا يستر علينا و على البلد دي واللي فيا
    سلااام

     
  • At 4 July 2007 at 20:25:00 GMT, Anonymous عبدالرحمن عياش said…

    سعد الشاطر
    نورت المدونة و الله
    و مدونتك بدايتها رائعة
    أحييك سيدي
    لك سلام
    وتحية

     
  • At 5 July 2007 at 04:17:00 GMT, Blogger واحـــد مـــــن الـنـــاس said…

    ياااااااااااااه
    انتا بتاكل في كوك دووور

    يااا بختككككككككك

    :d :D :D :D :D

     
  • At 5 July 2007 at 14:10:00 GMT, Anonymous عبدالرحمن عياش said…

    ايه ده يا علي :@
    هي حصلت ؟ :@
    شكلك اتعودت عليا اوي
    :D عينك يابني عينك
    يللا جو تو بتاع
    سلاام

     
  • At 5 July 2007 at 15:43:00 GMT, Blogger khadiga said…

    ياااااه أنا ماكنش قصدي إن حضرتك تحط التصميم ع الملأ كدة

    أنا كنت بسد دين بس والله

    التصميم مش حلوووو خالص

    اممممممم

    ممكن حضرتك تشيله وأنا هبقى أعمل واحد ينفع يتحط

    :)

    أنا عارفة والله إني رخمة وعاملة قلق ومضايقة كل المدونين

    بس خلاص إن شاء الله دي آخر مرة

     
  • At 6 July 2007 at 12:03:00 GMT, Blogger MoHaMmAd said…

    يا رب يكونوا التلت ايام ربوك كويس يا عبد الرحمن ;)...ربنا معاك وادعيلى..وبحبك فى الله

     
  • At 7 July 2007 at 00:02:00 GMT, Blogger ** white rose ** said…

    هعهعهعهعهع ما تسمي المدونة يوميات فتي تائه في دهاليز الحياة أحسن ؟؟

    مش كده ولالالالا
    اه المهم
    نسيت أسألك مين بلال اللي انت بتشحت عليه ده أنا عارفه انك انت اللي هتطمع في النص بطيخة و أي فلوس حتى لو كانت ربع جنيه مخروم

    و أظن إني نورت المدونة ولا ؟؟

    سلام ناو

     
  • At 7 July 2007 at 09:07:00 GMT, Blogger belal said…

    عبدو بتاع انت يا بني فين..أتصل في البيت ألاقيك مش في البيت..زأتصل بالموبايل ألاقيك سايبه في البيت ...
    أتصل بيك عند جدتك ..ماحدش يرد
    ......
    انت حقى كلت في كوك دور
    طب لما أشوفك أنا وعلي

     
  • At 7 July 2007 at 13:35:00 GMT, Blogger ** white rose ** said…

    اه نسيت أقولك حاجه بالله عليك يا عبدالرحمن لانت شايل الصورة بتاعت الواد اللي بيخبط براسه في الكمبيوتر دي أصلها مقرفة أوي يع ..

    و المفروض إنك تتابع المدونة أكتر أنا كتبت الرد الأول قبل ما أنام و لما صحيت مالقيتش رد ده كسل اوففففف
    سلاموووز ناو عشان مش فاضيه

     
  • At 7 July 2007 at 14:46:00 GMT, Blogger اسلام رفاعى said…

    ربنا يكون فى العون انت اشحططت

     
  • At 7 July 2007 at 21:19:00 GMT, Blogger ** white rose ** said…

    Yaaaaaaaaaaaaa!!

    e7na b2ena bellel w lesa ma radetsh ana keda msh h3teb el modwana de tany
    salaaam

     
  • At 8 July 2007 at 11:18:00 GMT, Blogger امام الجيل said…

    ما شاء الله مجال الاتصالات جميل وشغال كويس معلش اتسلقت بس ربنا يوفقك
    مقلتش صحيح كلت ايه فى كوك دور
    اهلا بيك

     
  • At 9 July 2007 at 09:29:00 GMT, Blogger محمد السيد said…

    ولتعمل .. ولتعمل ... ولتعمل ...

    حتي تتورم قدماك ... وتجحظ عيناك ... وتنفتخ يداك ...

    ولن يكون أمامك ساعتها إلا .... إلا البكاء .. والبكاء .. والبكاء ...

    وساعتها ....

    حنقعد نضحك ضحكككككككككككك

    نياهاهاهاهاهااهاهااهاه

    نحياتي يا باشمهندس ....

    حبيبي أنت يا عبده

     
  • At 9 July 2007 at 09:31:00 GMT, Blogger محمد السيد said…

    صحيح ...

    اتنصل بيا .... عشان حكاية الشغل دي ...

    عشان علي الأقل ...
    آخد خبرة سعادتك .... لأني عايز اشتغل شبكات فعلا ... وفي انتظار الشهادة أو أقله لغاية الجيش محتاج فترة تدريب ...

    لغاية ما أشوف الحكومة المصرية حتطلبني ولا لأ؟

     
  • At 9 July 2007 at 10:56:00 GMT, Blogger دكتور حر said…

    السلام عليكم يا باشمهندس

    أول مازور مدونتك ألاقيك كده

    بيحصل فيك وبتعمل في نفسك كل ده

    عالعموم الحياه رحلة كفاح ولازم تتعب عشان تستريح

    ربنا معاك

     
  • At 9 July 2007 at 14:54:00 GMT, Anonymous عبدالرحمن عياش said…

    ما شاء الله
    كل دي تعليقات
    أما نرد
    :D واضح ان وايت روز دي حد أعرفه
    بس يللا
    أما نشوف
    نبدأ نرد
    -----
    في البداية نحمد ربنا اني خلصت من الشغل اللي كنت فيه
    أنا فعلا خلصت من الشغل ده
    و رحت شغل أحسن كتيييييييييييييير الحمد لله
    ياارب بس ينفع الشغل الجديد ده
    المهم
    نبدأ رد من التعليق الجاي
    و سلام

     
  • At 9 July 2007 at 14:56:00 GMT, Anonymous عبدالرحمن عياش said…

    يا أخت خديجة عادي و الله
    ربنا يكرمك و يجعله في ميزان حسناتك
    ان شاء الله تعملي واحد حسن و يتنشر هو كمان
    سلااام

     
  • At 9 July 2007 at 14:57:00 GMT, Anonymous عبدالرحمن عياش said…

    :D عم محمد
    و الله اتربيت أوي ياخويا
    عقبالك كدهل ما تروح هناك و نشوف الرمل السخن و انت بتمشي عليه و بتقول ححححح
    :D
    ربنا يعينك ياارب
    سلام

     
  • At 9 July 2007 at 15:00:00 GMT, Anonymous عبدالرحمن عياش said…

    أعمل ايه يابلالللل
    سعادتك أدرى باللي أنا فيه
    أما نشوف بجد ايه اللي بيحصل ده
    عموما دعواتك ياحجي
    وسلام

     
  • At 9 July 2007 at 15:03:00 GMT, Anonymous عبدالرحمن عياش said…

    :D وايت روز
    في ايه يابنتي
    انتي مستعجلة ليه على الموضوع
    هيتكتب و الله النهارده ان شاء الله
    :D اما بلال ده فده سري للغايه
    هحط صورته في البوست اللي بعد الجايه ان شاء الله
    اه طبعا نورتي المدونة ياختي
    نورتيها جدا :D
    ربنا يستر و ما تفضحيناش
    سلامو عليكم

     
  • At 9 July 2007 at 15:06:00 GMT, Anonymous عبدالرحمن عياش said…

    :D
    يا عمو بلال الناس المشغولين اللي زيي مبيكونوش في مكان واحد
    بس العادي دلوقتي اني اصرف كل يومين خمسين جنيه في كوك دور
    بعيد عنك بسافر بقى
    :D و بقيت أخ عامل في الشبكات
    عموما ربنا يكرمك يابا
    و ابقى عدي علينا
    سلامو

     
  • At 9 July 2007 at 15:10:00 GMT, Anonymous عبدالرحمن عياش said…

    يا مس وايت روز
    الله يكرمك و يخلليكي بلاش الافترا ده
    مش في البيت و هنا
    حرام يعني
    عموما الصورة مش هتظهر الا لما تشوفي البوست دي و تركزي في الصورة
    بس الصورة معبره عن حالتي ؟
    صح ؟
    :D عموما ما تقطعيش الزيارات
    و تأخري في التعليق و الله مش بايدي
    سفر بعيد عنك
    سلام

     
  • At 9 July 2007 at 15:11:00 GMT, Anonymous عبدالرحمن عياش said…

    مستر اسلام
    و الله اتشحططت ياسيدي
    و بعد فتره ان شاء الله هكتب عن المسيرة كلها
    :d و الدهاليز اللي وايت روز بتقول عليها
    بس و الله دي بهدله فعلا
    عموما نورتنا سعادتك
    وسلامو

     
  • At 9 July 2007 at 15:13:00 GMT, Anonymous عبدالرحمن عياش said…

    يا مس وايت
    و الله انا فعلا كنت مشغول اوي
    ما تهدديش انك ما تعتبيش المدونة تاني
    الواحد ما صدق حد من العيله دخلها
    نورتينا
    سلامو

     
  • At 9 July 2007 at 15:19:00 GMT, Anonymous عبدالرحمن عياش said…

    :D إمام الجيل
    نورت المدونة سعادتك
    أما الاتصالات فمجالها من أوسع المجالات و شغلها من الافضل على الاطلاق في مصر و بره مصر
    لكن المشكلة هنا ان طبيعة شغلي كانت عباره عن شغل فنيين من الدرجة الاولى
    أكيد هيفيدني بعد كده من ناحية البهدله و التعرف على ناس تانيين
    لكن مش هيفيدني اطلاقا في مجال الهندسة
    و دي أجازه يا عمي
    D: أما كوك دور
    فأنا باكل فيه اما سوبر كرانشي
    أو كوردن بلو
    بس
    بجيبهم كومبو و مفيش بديل
    و بطاطس فريسكس
    و كمان كول سلو ميديم
    :D هيوصل امتى الاوردر ده ؟
    :D سلاام يا حبي

     
  • At 9 July 2007 at 15:21:00 GMT, Anonymous عبدالرحمن عياش said…

    :D و الله حبيبي انت يا عم محمد
    انت عامل ايه ؟
    انا كويس الحمد لله و سبت الشغل :P
    أما موضوع الشبكات فانت لو درست فيه CCNA هيكون مفيد جدا لك
    لكن لو انت عاوز تتدرب
    ممكن أكلمك و أبعتلك العنوان بتاعهم و انت تروح تتدرب
    بس اوعى تقوللهم انك من طرفي
    و الله لو قلتلهم ما هيقبلووووك :D
    صدقني
    عموما انت تؤمر يا سيدي
    وسلااام

     
  • At 9 July 2007 at 15:22:00 GMT, Anonymous عبدلرحمن عياش said…

    دكتور حر
    و الله يا عمي هي الدنيا كده
    بس ان شاء الله هكافح في مجال أفضل
    لأني سبت الشغل ده خلاص
    دعواتك بس يا سيدي
    أخوك
    سلاام
    ----
    وايت روز
    متقططعيش الزيارات فعلا
    سلام

     
  • At 9 July 2007 at 16:50:00 GMT, Blogger ** white rose ** said…

    ما تخافش يا عبدالرحمن مش هبعد عن المدونة أبدا أصلي رخمة بعيد عنك و مستعدة أقعد 24 ساعه وأنا فاتحاها و مش هفضحك في العيلة بس ماتبدأش انت الكلام و تقول لي إيه رأيك في المدونة دي ماشي ؟ و معلش هصبر عليك في الرد مكنتش أعرف إنك سافرت تاني و عايزه أشوف الموضوع اللي انت قلت هتنزله قريب اوك ؟.. سلام
    و في رعاية الله يا ابني
    ايه رأيك في الحتة بتاعت الامهات دي ؟

     
  • At 9 July 2007 at 16:53:00 GMT, Blogger AbdElRaHmaN Ayyash said…

    :D
    اه اه امهات اوي
    ماشي
    شوفي الموضوع اللي اتكتب بقى
    و انا عارف اني هتبهدل هنا و هناك
    بس منورة يا مس
    سلام

     
  • At 9 July 2007 at 18:00:00 GMT, Blogger ** white rose ** said…

    انا قرأت الموضوع و رديت عليه خلاص و بكلم بجد و الله مهفضحك يا ابن العمه


    سلام

     
  • At 9 July 2007 at 18:18:00 GMT, Blogger AbdElRaHmaN Ayyash said…

    ههههههههههههه
    و الله مش ممكن
    :D مش هتفضح لأني اتفضحت منذ زمن
    أكيد تقصدي عمر مش أنا (A)
    :D و للا ايه ؟
    يللا سلامو عليكم

     
  • At 9 July 2007 at 18:36:00 GMT, Blogger ** white rose ** said…

    انا قرأت الموضوع اللي عبدالرحمن بيتكلم فيه عن عمر يا كابتن مش بفضحك ولا حاجه يابني
    اوك
    سلام

     
  • At 1 September 2015 at 10:10:00 GMT, Blogger 文章 said…

Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats