AbdulRahman Ayyash
 

AbdelRahman Ayyash's Facebook profile

Monday, 11 June 2007
تاج .. أحمدك ياارب

سلامو عليكمم

ازيكم يا اخواننا يا فاضلين :)
ازيكم يا اخواتنا يا فاضلات :)
يارب تكونوا بخير وكويسين

دلوقتي انا وصلني تاج مشترك

من الأخ إمام الجيل أولا

وبعده وصلني من الدكتور أحمد ثانيا

عموما التاج أسئلته لطيفة وعاجباني

وان شاء الله هرد هنا

وما تنسوش بعد اما تقروا ده تشوفوا الموضوع اللي تحت بتاع حنظلة

نبدأ رد

بسم الله
السؤول الأول بيقول .. علل :D
--------
أنت مين؟
اه .. هنشتغل في الأزرق
عموما .. أنا عبدالرحمن عياش .. شاب .. او اصغر من شاب .. مصري .. بحب بلدي اوي .. عاوزها تبقى أحسن بلد في الدنيا .. مش عاجبني حاجه فيها الا نيلها .. حتى ناسها معادوش زي زمان .. بدرس هندسة .. كان حلمي أكون مهندس من وانا في اعدادي .. و الحمد لله قربت أحقق الحلم ده .. ساكن في الدور العاشر .. اتعلمت ان كل حاجه صغيره وما تستاهلش .. ونظريتي .. لا تغضب .
مين اكتر ست شخصيات بتحبهم؟
لو هنتكلم عن الشخصيات الاسلامية او كده . طبعا هنقول الرسول عليه الصلاة والسلام ..و المهندس يحيي عياش و العز بن عبدالسلام , سيف الدين قطز , الإمام البنا , الدكتور الرنتيسي .
وطبعا مش هنتكلم عن والدي او والدتي او اخواتي او الاهل
أما لو هنتكلم عن الحياة العامة و الناس اللي معانا دلوقتي
تقدر تقول الشهيد المهندس يحيي عياش
الاستاذ اسماعيل هنية
دكتور يوسف القرضاوي
دكتور عثمان :) .. متسألوش مين ده
مهندس نجم الدين أربكان
و ... واحده نفسي أعرف هي مين .
أنت سعيد؟
لا
مش اوي
نص نص
مش عارف
لو أجتمعت أنت وحسنى مبارك فى غرفة واحدة هتقوله ايه؟
هقول له الاخوان يا ريس هياخدو البلد منك .. لو قتلتهم واحد واحد .. هييجي من ولادهم اللي يمسك البلد دي ويصلحها بجد مش الاصلاح بتاع هاني سرور واحمد عز و السيد جمال .. هيمسكوها غصب عن هعين التخين في شياطين البلد دي .
لو معاك مليون ونص هتعمل بيهم ايه؟
و الله كنت لسه بتكلم في الموضوع ده دلوقتي مع الحاجًه اللي عالشبكة :D
كنت بقول يعني ان الفلوس بتأثر أوي في حاجات كتير
لكن انا لو معايا مليون ونص
هسافر أتعلم في MIT أو هارفارد بتلات تربع مليون .. وربع مليون أصلح به حياتي هنا , وربع مليون لاخواننا ان شاء الله
وربع مليون في مشروع نهضوي .. في الغالب هيكون شركة تنموية ( وهبني مسجد فيها ان شاء الله ) .
بتحب مصر؟
للأسف بحبها
بس عاوز أمشي منها
ولو همشي منها عارف اني هرجع لها
بس أمشي اروح في أي حته بتحترم البني آدم .. أخلف عيالي عارفين حقوقهم وواجباتهم .. دارسين صح وفاهمين الدنيا
ولما نرجع .. نصلح .. او نصلح من بره .. ويقولوا بنستقوي بالخارج زي ما يقولوا
مصر انا بحبها اوي . بس مش هي اللي انا اعيش فيها
عارف اني مكن اعيش واموت فيها
بس مش هكون راضي عنها ولا عن نفسي
و الشيخ كشك زي ما قال ان الهروب من مصر في الوقت ده زي التولي في يوم الزحف :) .. فالخروج من مصر برضه هجرة إلى الله .. نعبد ربنا في مكان نقدر نعيش فيه براحتنا .. ( قالوا ألم تكن أرض الله واسعة فتهاجروا فيها ) .
بتحب البنات؟
زي ما بحب مصر بالظبط :D
أقول ايه يعني ؟؟!
الموضوع باختصار انه ربنا خلق قوارير ! .. ربنا خلق جنس ما زال رسول الله يوصي به حتى مات ! ..
الطبيعي ان يكون في انجذاب .. لكن مش رايح راجع في انجذاب يعني :D
المشكلة ان احنا بنعمم ..
زي ما كان أخ مدون بيقوللي ( ربنا يمسيه بالخير ) انت لو واقف مع المرشد وجت لك الأخت ( فلانة ) تقوللك لو سمحت يا أخ عبدالرحمن .. هتسيب المرشد وهتبص تكلمها .. لأنها بنت .
ده الطبيعي يا اخواننا ..
بس امتى نفكر في الحب .. الكلمة الكبيرة اوي دي .. معتقدش ان وقتها هنا خالص
أنت مسلم؟
هو أنا اسمي عبدالرحمن .. اه الحمد لله مسلم
ما أدتش زكاة لحد دلوقتي لأن ممعاييش فلوس ( بغض النظر عن المليون ونص اللي فوق دول )
بس ان شاء الله مسلم وبسأل ربنا عز وجل انه يجمعني في الجنة مع المسلمين .
ليه ؟
نأجل السؤال ده للتدوينة الجايه او اللي بعدها ان شاء الله .. بجهز لها من اسبوع .. بعنوان مراجعة فكرية
ان شاء الله أقدر أفصل فيها ليه انا اخترت الاسلام .
أيه اكتر موقف محرج أتعرضت ليه؟
من شخصيتي أنا أي موقف بتعرض له ببص له من موقف ما .. بس بتحصل مواقف اصلا مينفعش تتقال .. عادي .. مش عارف بالظبط أقول ايه .. بس انا بتجاوز أي مواقف محرجة بسرعة الحمد لله .
اتصرفت ازاى؟
أي موقف محرج .. اما بعدي للموضوع اللي بعده . او بضحك :):)
أيه الامنية اللى بتدعى ربنا انه يحققها ليك؟
في أمنيات كتيرة اوي .. وأهداف متعددة ..
اولها ان ربنا يجعلني مهندس نافع لدينه زي ما كان المهندس يحيي
تانيها ان ربنا يجمعني في الفردوس الأعلى مع الرسول عليه الصلاة والسلام ومع الشيخ أحمد ياسين والامام العز بن عبدالسلام
تالتها اني اقدر اتعلم بره واعلم عيالي بره
رابعها ان ربنا يعفني في الدنيا ويعفو عني ويسترني في الاخره
خامس حاجه ان ربنا يختار لي .. ويرضيني بالاختيار
بس
خلصت الاسئلة الحمد لله
ودلوقتي مرحلة نقل الاسئلة
باشمهندس علاء .. مش أنا
كوماندوز البنا .. الدكتور
أخويا فن الحياة
بلال الكبير ربنا يحميه .. لافتات
عمو بلال الصغير ربنا يهديه :D:D .. البلد بلدنا
آية علاء .. همساية
خديجة .. مين في الحياة مرتاح
وعمر الجارحي .. أيام حياته

Labels:

posted by AbdElRaHmaN Ayyash @ 00:09  
19 Comments:
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats