AbdulRahman Ayyash
 

AbdelRahman Ayyash's Facebook profile

Saturday, 19 May 2007
النية معقودة
سلام عليكم
ازيكم يا اخواننا
يارب تكونوا بخير وكويسين وكله تمام
أنا مصغر الخط لأن المره دي الكلام شخصي شوية
فعادي يعني :)
خللو البوست كلها شخصية بقى
حتى الخط و اللون
عشان انا افتكر بس
وطبعا عاوزكم تفكروا معايا :D
-------

الحمد لله انا امتحنت من شوية الفيزياء .. و الحمد لله كانت نسبيا كويسة
يعني ان شاء الله نعدي منها
:@ محدش يتنرفز لأني طهقان
المهم
انا بس كنت عاوز اتكلم عن أجندتي ان شاء الله اللي انا متصورها للأجازه من أولها
-----------
الأجازة ان شاء الله هتبدأ يوم 9/6
يعني هيكون قدامي حوالي 3 شهور وشوية لحد الدراسة
الأجازة هتكون على محاور معينة
اولها الاستفادة في مجال الشغل ... اللي هو هندسة الاتصالات ان شاء الله لو عديت السنة دي وكان لنا عمر
تانيها الاستفادة في المجال الاعلامي الصحفي التدويني
تالتها الاستفادة على مستوى العلاقات العامة والاجتماعية مع الناس
رابع حاجة واخرها الترفيه طبعا
نبدأ بالعلاقات العامة
-------
ان شاء الله البداية هتكون سفر .. محتمل أسافر دمنهور يوم 11 / 6 او أي بلد فيها انتخابات مجلس شورى
ممكن تكون دايرة منية النصر اللي جنبنا
لكن حاليا الخطة على دمنهور لأن وحشوني ناسها فعلا
وان شاء الله ننزل لهم
تاني حاجه هتكون الزقازيق ان شاء الله
ودي هنزل فيها مكانين او مكان واحد
أحدهما هيكون الجديدة ودي قرية بعد الزقازيق فيها حبايبي اللي نسوني :) وانا منسيتهمش
وحبيب قلبي اللي مش بنساه المهندس عمرو جمال
وان شاء الله هنزل لهم
التانية احتمال اكون عند أحمد الطويل في أبو كبير لزيارة سريعة :)
غير طبعا اقامتي ليومين تلاته في الزقازيق نفسها
فوق كنتاكي اللي هناك لو عاوزين تفصيل .. باينه جنب باراديز لكن خالي نقل شقته وبالتالي طبعا مش هسكن في الشارع انا
--------
تالت حاجه ان شاء الله هتكون القاهره
ودي هتكون معظم الاجازه هناك
نكمل موضوع الاستفادة الاجتماعية
وهحاول ان شاء الله اتواصل مع البراء و أزوره
وكذا أخ هناك
وكده يعني
الاقامة في القاهره ان شاء الله هتكون في المهندسين او في الجيزة
-------------
اقامة القاهره زي ما قلت هتطول شوية
يعني ان شاء الله طول الاجازه
الشغل هيكون في المهندسين
وانا هتدرب على شغل الشبكات والاتصالات في شركة شبكات محترمه جدا جدا
كانت المسؤولة عن تركيب شبكات فنادق في القاهره اسماءها مرعبه يعني :D
وكانت المسؤولة عن تركيب شبكات جامعات زي المنصورة وسمعت انها ركبت في عين شمس
المهم
انا ان شاء الله هتدرب في الشركة دي طول الاجازه بالتزامن مع الcertefied microsoft
ودي شهادة
ان شاء الله ناوي اخدها في الvb.net
لو ربنا يسر وكان لنا عمر يعني
ربنا يوفق
المهم
دي كانت النقطة التانية
نقطة التعليم في مجال شغلي
-------------
النقطة التالتة هي نقطة المجال الاعلامي او الصحفي او التدوين
ودي لها خطة معينة
طبعا انا بقولها عشان منساهاش
ربنا ييسر يااارب وتنفع
الخطة كالاتي
نرتب لقاء للمدونين في القاهره
انا في راسي مكان زي دار الحكمة او نقابة الاطباء او اي نادي من اللي اهل المحروسة يرشحوه لنا
ثانيا اني احاول بايدي وسناني أدخل في الجزيرة توك
:D عمرو مجدي هاين عليه يموتني
عبدالله الشامي زمانه بيدعي عليا
ومش عاوز اقول ان عبدالرحمن منصور لو كنت معا كان زمانه اغتالني من برزخ من الزمن
المهم
يعني الفكرة التانية اني اشترك في الجزيرة توك
بغض النظر عن امكاناتي الاعلامية او الصحفية حاليا
لكن انا هحاول
تالت حاجه هي مجموعة من اللقاءات
ودي آمل انها تمشي زي ما انا مخطط لها
دي هتكون ان شاء الله مجموعة مسلسلة من اللقاءات مع قيادات الاخوان
خطتي حاليا مع الدكتور عصام والدكتور عبدالمنعم والدكتور الغزالي
وان شاء الله نختمها بالدكتور حبيب والاستاذ المرشد
رابع حاجه هو لقاء انا فعلا اتمنى اني اقابل فيه الاستاذ عمرو خالد
وده على مسؤولية عبدالرحمن منصور حتى الان
وان شاء الله هيقدر
ووقتها طبعا مش هيكون لقاء شخصي
ممكن يكون لقاء تدويني
لكذا شخص مدون
تمام كده ؟
تمام
بعدها عاوز اشترك في الاعمال العامة
مش عامة اوي
لكن هي هتكون مهمه بالنسبة لي كمبتدئ صحفي يعني
وهي لقاءات ساقية الصاوي
وندوات مركز القاهره
وأي دورات كويسة في الوقت ده مما لا يتعارض مع وقتي
------------
ده طبعا مش هيتعمل الا بتوفيق ربنا
وانا كتبت حاجات اكتر من اللي انا عاوزها
عشان :) .. لو مجاتش كلها يكون جت حاجه ترضيني .. اخرج من الاجازه دي وانا بقول انجزت
بفكر برضه انزل المنوفية
ممكن انزل الاسكندرية كمان
كل الزيارات دي المفترض انها تاخد يوم واحد لكل زيارة
عاوز اشوف عبدالله و أنس الشامي ومحمد شاكر وعمرو مجدي (A) بس لأشخاصهم مش لأنهم تبع الجزيرة توك
ان شاء الله اشارك في جلسات المحاكمات لاخواننا المحالين للمحاكمة العسكرية
أشارك في فعاليات وندوات نقابة الصحفيين
:) ده اللي انا عاوزه فعلا من الاجازه دي
غير كلام معين يخص اخواني هنا وهناك وفي كل مكان
وده له وقته ان شاء الله
دعواتكمم يا اخواننا
انا بس بفكر في اللي جاي
ومش عاوز اشغل نفسي بالامتحانات دي
الامتحانات هتخلص بسرعه
والاجازه هتيجي بسرعه برضه
ووقتها .. ربنا ييسر
سلام
أخوكم

Labels:

posted by AbdElRaHmaN Ayyash @ 13:36  
31 Comments:
  • At 19 May 2007 at 14:35:00 GMT, Anonymous العميد ميت said…

    بص يابني
    عايز تنحرف ، أهلا وسهلا
    عايز تمشي في الطرق الرسميه ، ما أعرفكشي فيها
    وبعدين vb.net و عايز تاخد شهاده certefied microsoft
    أه يامفتري ، إنته مش مكسوف وإنته بتقول عايز أخد شهاده من ميكروسوفت ، عيب عليك والله ، أنا إتعرضت عليه ومجانا ورفضتها وهرفضها ، ومستحيل أخد حاجه من ميكروسوفت

    وبعدين بلاش موضوع المدونين ده علني كده ، أحسن فيه بعض من إخوانا هيعملوا لينا قلق ويقولوا إننا أسسنا لجنه جديده ، أو الأمن هيجي يغلس علينا ، مش ناقصه

    هبقي أعزمك إن شاء الله علي البورصه والتكعيبه وسوق الحامديه والندوه الثقافيه ، إلخ إلخ إلخ .
    وممكن أتنازل وأجيبك وأفرجك علي المقر السري بتاعي :D

     
  • At 19 May 2007 at 15:21:00 GMT, Blogger اسلام رفاعى said…

    ربنا يوفقك وتحقق اللى نفسك فيه

     
  • At 19 May 2007 at 17:27:00 GMT, Blogger علاء said…

    أنا لي رد طويل ع الموضوع ده
    بس مش هارده هنا
    هاردوا يوم الاتنين بعد الغدا :)

     
  • At 19 May 2007 at 18:00:00 GMT, Blogger shab masry said…

    اهلاً باشا.. تشرف ان شاء الله...

    شكلك كده ناوي تقضيها... ابقى هات اكلك معاك وانت جاي يا اخويا:D:D:D

    لا ربنا يكرمك يارب وتشرف باذن الله.. واكل القاهرة كله تحت امرك ياباشا.. بس متظتش اوي يعني:D:D:D

    ربنا بس يسهل وتخلص الامتحانات دي على خير

     
  • At 19 May 2007 at 20:00:00 GMT, Blogger أروى الطويل said…

    تعرف انا بجد متنرفزة موووت
    انت بوظت كل حاجه كل حاجه باظت بسببك
    الله يسامحك
    انا بجد هاطق مش عارفه اقلك ايه ...انتحر واخلص
    بجد يا عبد الرحمن انت ماتعرفش انت عملت ايه ولا ايه اللي حصل
    الله يسامحك الله يسامحك
    كلمني علي الاميل في البروفايل بتاعي ابعتلي عليه
    علشان في ناس هتتقتل النهارده ....وشكلي هاخد تأبيده

     
  • At 19 May 2007 at 20:03:00 GMT, Blogger أروى الطويل said…

    كنت هقلك هتنور أبوكبير بس بعد اللي عملته ماأظنش وهاوصي أحمد عليك أوي يتوصي يعني يتوصي ...ابن عمي علي فكرة
    يارب صبرني بقالي شهر باشتغل وسيادتك تبوظلي كل حاجه
    الله يسامحك الله يسامحك

     
  • At 19 May 2007 at 20:40:00 GMT, Anonymous الفجرية said…

    جميلة الخطة بس..

    1- ربنا يعينك على تنفيذها لانها دسمة بس ينفع تتعمل..يعنى بشوية تركيز فى الوقت ممكن تيجى..ولو جت. ان شاء الله

    يبقى بجد رااائع وتبقى انجزت انجاز تمام

    2- هوه انا بالنسبة لى استفدت منها ..وفى حاجات فعلا فكرتنى بنقط مهمة ..لكن اوقات يبقى الأصلح شوية كتمان..شوية معقولين يعنى..

    3- واضح انك بوظت ترتيبات كبيرة لأروى فاستعد لتحمل العواقب

     
  • At 19 May 2007 at 22:00:00 GMT, Blogger AbdElRaHmaN Ayyash said…

    حبيب الملايين ميت :D
    و الله منتظر على احر من الجمر
    فعلا منتظر اليومين دول :D
    سلام
    ----------
    جزاااااكم الله خيرا اخ اسلام
    وربنا ينولك اللي في بالك ياارب

     
  • At 19 May 2007 at 22:01:00 GMT, Blogger AbdElRaHmaN Ayyash said…

    باشمهندس
    هتنورنا و الله يا سيدي
    منتظرك :)
    منتظر الرد طبعا
    --------------
    عمي البراء :D
    يا سيدي و الله انا مشتاق للزياره دي اوي اوي اوي
    ويارب الامتحانات تخلص على خير عشان يكون للأجازه طعم بس
    ربنا يخلليك
    :D و الأكل عليك صدقني
    وانا مش باكل كتير بس (A)
    سلام

     
  • At 19 May 2007 at 22:05:00 GMT, Blogger AbdElRaHmaN Ayyash said…

    أروى
    و الله انا ما فاهم انا عملت ايه
    فعلا انتي رعبتيني
    انا لبخت ؟
    امسح البوست ده مثلا ؟؟؟؟؟؟
    فعلا مش متصور ايه الغلط اللي انا عملته
    انا بعمل حاجات غلط بس انا شايف اني متكلمتش ولا فتحت بقي المره دي في اي حاجه من اي نوع بأي شكل
    ربنا يستر
    وأبو كبير منوره بيكم حتى لو مش عاوزه تقوليها :P
    بس فعلا انا خايف !!!
    في ايه !!!!!!!!!!!!!!!!!
    سلام
    -----------
    أستاذة أسماء
    أهلا أهلا
    نورتي المدونة
    أكيد الكتمان مفضل في حاجات معينة بس انا مثلا كتبت الموضوع ده عشان ارتب افكاري
    واعدله وقت ما الاقي الفرصة موجوده
    جزاكم الله خيرا على التعليق
    :S ومش فاهم فعلا انا عملت ايه لأروى
    ربنا يستر
    سلام

     
  • At 20 May 2007 at 11:15:00 GMT, Blogger وضـّاح said…

    الناس كلها شكلها بتحبك

    أحسن واحد فيهم قال هات أكلك معاك

    شكلك متباع فعلا

    بالمناسبة أنا أخذت كوس في
    vb.net
    قبل كده .. وهو مفيد فعلا

    عموا إذا جيت القاهرة وصحابك باعوك ممكن أنا أشتريك

    تنورني والله
    :)

     
  • At 20 May 2007 at 11:52:00 GMT, Blogger محمود سعيد said…

    أيوه أسكندرية

    بس انت تعالى اسكندرية :-)

    والقاهرة برضه هتلاقينى هناك :-)
    خلينا نبقى نشوفك بقى

     
  • At 20 May 2007 at 12:22:00 GMT, Anonymous رئيس اركان حرب _حرب النجوم _ بلال said…

    ازيك ياض .هاو أر يو يا له
    ....
    بص تروح القاهرة ..تروح أبوكبير

    ...
    تروح مطرح مطروح
    ...
    المهم تريحنا منك
    ...
    دا انتا خنقة يا له ايه ده
    ....

    وكمان الأخ القائد بن عمي
    بيقولك إنه هيصيعك أهوا

    كفاية إنك تمشي مع أحد أفراد العائلة

    ...
    ثم أنا ممكن أتكرم عليك
    وأخليك تعمل لقاء مع سعادتي

    ....
    salam ya shakhs

     
  • At 20 May 2007 at 13:10:00 GMT, Blogger belbesy said…

    مش عارف
    انت عاوزنى اقول ايه

    انا جيت زياره ليك قلت نشوف مدونته
    بعد ما الصدفه لعبت دورها طبعا
    بس تصدق صدفه جميله اوى

    المهم

    برضه مش ...و

     
  • At 20 May 2007 at 13:11:00 GMT, Blogger belbesy said…

    بس اوعى متكونش عبد الرحمن اللى انا كلمته ؟
    سلام عليكم مؤقت

     
  • At 20 May 2007 at 14:35:00 GMT, Blogger AbdElRaHmaN Ayyash said…

    ههههههههههههه
    شايف يا عم وضاح
    :d ربنا يكرمك ويعزك يا سيدي
    و الله البلد منوره بيك
    بالنسبة للفيجوال
    هو فعلا مفيد جدا
    ربنا ييسر
    لأنه هيفيدني جدا في كل حاجه
    :D بغض النظر عن هرتلات العم ميت صاحب اللينكس والاوبن سورس
    ----------
    :D حوده
    و الله هنزل لك ان شاء الله يا سيدي
    (A) اما نشوف هتغديني ايه :P
    سلاااام

     
  • At 20 May 2007 at 14:53:00 GMT, Blogger AbdElRaHmaN Ayyash said…

    :D
    رئيس أركان الولايات المتحدة المريخية
    هههههههههههههه
    انا لي كل الشرف اني امشي مع احد افراد عائلتكم الموقرة
    لكن بالراحة عليا الله يخليك
    ----------
    بلبيسي
    يا سيدي هو انا و الله
    :D اللي بصمم فوتوشوب واللي ضفته صدفة
    (F)
    سلام ياسيدي

     
  • At 21 May 2007 at 01:11:00 GMT, Blogger omar مشروع بطل said…

    الله الموفق
    بجد ربنا يعينك وتقدر تعمل اكتر من كده كمان

    مش عايز أحبطك وأقولك انى انا كل اجازة بخطط انى اعمل 1000 حاجة وبعدين مش بعمل الا عشرهم والحمد لله على كل حال

    بس انت خلى عندك حماس و الله المستعان

     
  • At 21 May 2007 at 11:09:00 GMT, Blogger islam eladl said…

    عبد الرحمن باشا

    ماشاء الله خظة قوية للصيف اعانك الله هلي تنفيذها
    ويارب يبقي ليا فيها وقت لمقابلتك

    برده انا عامل خطة قريبة منها بس في المحاور مش في كمية الاحداث

    يعني في نزول لانتخابات الشوري
    وفي سفر القاهرة واقامة هناك لفترة طويلة
    في كورس في هندسة القاهرة من باب التعليم
    وطبعا الجانب العائلي الاهم في القاهرة
    زيارة اهلي في طرة كام زيارة
    والذهاب لمحكمة سواء عادية او عسكرية

    للاسف راح عليا تدريب فودافون علشان مارحتش امتحانه

    وفي النهاية الجانب الترفيهي هيبقي عالي جدا لان المفروض دي اخر اجازة ليا في
    التعليم ان شاء الله


    وعامة ربنا يوفقك في امتحاناتك وشد
    حيلك

    اسلام العدل

     
  • At 22 May 2007 at 00:46:00 GMT, Blogger وضـّاح said…

    يا فندم حضرتك تيجي

    تنورني

    :)

     
  • At 22 May 2007 at 01:07:00 GMT, Blogger نمنماية said…

    ربنا يوفقك يا عبد الرحمن ان شاء الله و الاجندة كلها تتنفذ

     
  • At 22 May 2007 at 10:52:00 GMT, Blogger AbdElRaHmaN Ayyash said…

    عمر
    جزاكم الله خيرا
    ان شاء الله انا هعملهم كلهم
    ولو مقدرتش عليهم كلهم هعمل نصهم :D
    وربنا ييسر
    لأني فعلا عاوز احقق حاجه السنة دي
    سلام
    ---------
    عم اسلام
    و الله التخطيط محتاج تنفيذ
    وان شاء الله موضوع فودا فون هييجي احسن منه
    وبالنسبة للجانب الترفيهي
    انا متكلمتش عنه
    :D بس انا نفسي اقدر اعمل فيه حاجات كتير اوي
    ربنا ييسر
    سلام

     
  • At 22 May 2007 at 10:54:00 GMT, Blogger AbdElRaHmaN Ayyash said…

    عم وضاح
    ربنا يخلليك ياارب
    (F)
    شرف ليا و الله
    -------
    نمنماية
    يااارب :)
    وان شاء الله انتي كمان
    سلام

     
  • At 23 May 2007 at 12:16:00 GMT, Blogger وضـّاح said…

    فينك ؟؟

    عامل إيه في المذاكرة ؟؟

    ربنا يعينك

     
  • At 23 May 2007 at 13:53:00 GMT, Blogger قائد said…

    فضحتنا الله يخرب بيت اليهود
    هو يعني علشان جاي لنا يبقى تخلينا نتمسك كده والبيت يتراقب 48ساعه في ال24 ساعه
    على العموم تشرف وتنور يا هندزة
    وما تخفش الواجب جاهز
    اتنين مخبرين على مدخل البلد وهيعملوا اجدعها تشريفة انت بس داري قفاك
    مستنيينك يا عسل

     
  • At 23 May 2007 at 17:26:00 GMT, Blogger AbdElRaHmaN Ayyash said…

    دعواتك يا عم وضاح
    ربنا يخلليك (F)
    أحبك في الله
    --------
    عمي القائد
    :D امال لو كنت قلت الاسماء والصفات
    هتعمل ايه بقى
    دعواتك يا مسيو
    سلام

     
  • At 24 May 2007 at 13:22:00 GMT, Blogger شيماء الجيزى said…

    والله يا عبد الرحمن انت راجل مكافح
    كل ده هتعمله فى الاجازة؟
    يا شيخ

    بس والله اسعدتنى انك بتحاول تعمل اى شئ
    هو ده الصح
    ربنا معاك بإذن الله

    بقولك
    مالمدونين بيعملوا لقاءات؟
    انتم مش معانا ولا ايه يا بشر

    بحس ان المدونين دول منقسمين
    شويه شمال وشويه جنوب

    تعاووووووووونوووووا

    خلينا كلنا مع بعض بإذن الله

    مدونتك حلوة يا عبده
    تحياتى

     
  • At 25 May 2007 at 00:36:00 GMT, Blogger دعاء عادل said…

    ربنا يعينك يارب وتقدر تعمل كل ده
    بجد فكرتك كويسه جدا انك تكتب اللى انت عايز تنجزه فى الاجازه اصل اول ما الاجازه بتيجى الواحد كان بيأنتخ وينسى هو كان عايز يعمل ايه
    بس بجد انت عامل جدول هايل ربنا يعينك
    وينجحك فى الامتحانات

     
  • At 25 May 2007 at 02:54:00 GMT, Blogger AbdElRaHmaN Ayyash said…

    شيماء
    و الله انا متفق معاكي اننا لازم نتعاون
    والخطة الجاية فعلا اننا نفتح على الدونيا كلها
    انا مستني فعلا اي فعالية للمدونين من اي اتجاه
    وان شاء الله هشارك فيها بصفة شخصية وهعلن عنها كمان
    ربنا يوفقك وجزاكم الله خيرا على تعليقك اللطيف
    سلام
    --------
    دعاء
    :D ما هو المشكلة ان ده اللي بيحصل
    انا كتبت ده عشان اكون ملزم اعمل اي حاجه
    مش عارف هعمل وللا لا زي كل سنة
    بس ربنا يستر
    (F)
    سلام

     
  • At 27 May 2007 at 20:23:00 GMT, Blogger Mohamed Almohandes said…

    الأخ الحبيب/ عبد الرحمن
    فكرتنى فعلاً بما يسمى بالأجازات، لقد فقدت هذا المعنى فعلاً، وأتمنى ان أستعيده، وأشعر به؛ لكن ما باليد حيلة.. ما أنام عليه، أستيقظ عليه؛ ولولا وجودى مع الحبايب بانشغالات كثيرة لأصبحت فى ضيق فعلاً.

    حتى زيارات الحبايب أصبحت أقل لأنى مشغول، وبقى عندى عيال؛ ولو أنا غير مشغول ألاقى حبايبى مشغولين.
    بالإضافة إلى أن كل حبايبى تقريباً سافروا خارج مصر، واحد فى السعودية، والثانى فى قطر، والثالث فى الكويت.
    هذه هى سنة الحياة.

    أتمنى لما تيجى القاهرة نتقابل فعلاً، وفرصة نشوف بعض عن قرب رغم إنى أكبر منكم سناً، ومن المكن أن أكون بالنسبة لكم "شخص رزل"، لكن أكيد ستتحملونى.

    كنت أتمنى إنك تنور منية النصر، لكن تأكد عدم نزول مرشحين فى دائرة منية النصر، وسوف ترجع الدائرة إلى انتخابات ابن البلد مرة أخرى.. خسارة فعلاً.

    والسلام

     
  • At 27 May 2007 at 23:37:00 GMT, Blogger شــــمـس الديـن said…

    السلام عليكم و رحمة الله و بركاتة

    رغم انها تدوينة قديمةالا انني احبب ان اعلق عليها و اتمني ان تري تعليقي هذا

    بداية احب ان احييك جدا علي ادراكك ... لانه نادرا ما يخطط المرء لاجازتة ... اغلب تخطيتنا للدراسة

    ثانيا احب ان اقول لك من اخت كبيرة ( مقاما مش سننا علشان تكون واخد بالك بس :) ان فترة الدراسة دي من امتع الفترات و لازم تستغلها كويس اوي في اقال مواهبك سواء في مجال العمل ام في المجالات الحياتية الاخري

    و افضل شئ حضرتك عملته انك لك لم تقصر اهتمامك في مجال واحد فقط انما نوعك مجالاتك ...و قيل انه لو حصرت نفسك في بوتقة واحدة و حدث لها خلل لانهارت حياتك كلها ... مثل الانسان الذي يجلش علي كرسي برجل واحدة و من يجلس علي كرسي ب خمسة ارجل ... ان كسرت رجل (الاهتمام ) و جدنا ارجل اخري لندعمك

    هنيئا لك لالاجازة و ربنا يوفقك حقا !!!

    خالص تحياتي لك

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats