AbdulRahman Ayyash
 

AbdelRahman Ayyash's Facebook profile

Wednesday, 9 May 2007
هوامش

سلام عليكم
ازيكم يا اخواننا
أولا أنا بعتذر لأخويا أنس الشامي اني آخد منه اسم مدونته كعنوان للبوست ده
لكن أنا فعلا هكتب كل الكلام المره دي على الهامش
كله كلام مش نهائي
وكله عاوز أتكلم عنه أكتر وأكتر
لكن الصفة المشتركه بينه انه على الهامش .. بس
الهامش الأول ... أنا
أمر هذه الفترة بعدة ظروف .. نعم ليس لها أدنى قدر من الأهمية .. لكن على رأي دعاء عادل .. أنا مركز الكون .. فبالتالي أنا يهمني جدا ان الظروف دي تتحل على خير
أول الظروف دي هي ظروف الدراسة اللي مش عارف اخرتها ايه .. الواحد مخنوق لأكتر ما يمكن
الواحد خايف يمشي من الكلية اللي عاش حياته كلها عشان يدخلها بسبب اهمال شهرين
بفكر كتير أوي ايه اللي ممكن يحصل لي لو لا قدر الله جبت مجموع وحش .. :(
أخاف أوي بصراحة .. على أهلي قبل ما يكون على نفسي
واللي بيدفعني للإحساس ده مش هو قلة مذاكرتي في الفترة اللي فاتت رغم انها سبب أساسي
لكن أكتر حاجه بتحسسني إني مش هقدر أحقق اللي انا عاوزه هو عدم الثقة التامة فيا من كل اللي حواليا
حتى اللي كنت بقول ممكن يكونوا فاهمين عن أي حد تاني .. أقصد اصحابي .. طلعوا معتبرينني فاشل جديد
الكلمة دي بتجيبلي أرتيكاريا أصلا ..
وفي النهاية أنا مش فاشل .. حتى وان كنت مش متفوق في دراستي
لكن أكيد .. مش فاشل
تاني حاجه بعد الدراسة لكن ممكن نعتبرها أهم حاجه .. هي علاقتي مع ربنا
أنا فعلا الفترة دي حاسس بالضياع في علاقتي مع ربنا
ضياع بمعنى كلمة ضياع
بجد يا اخواننا ادعولي
يعني في فترة امتحانات زي دي .. الفترة اللي بيكون فيها راسبوتين زي الحسن البصري وبتكون فيها ماري الدموية زي رابعة العدوية .. أنا ... هنا ضايع
بجد ادعولي مره تانية
الله يخلليكم ادعولي
مش عارفين اد ايه انا محتاج الدعاء ده
وربنا يستر
وييسر
تالت حاجه ..
كلمة أنا بكررها كتير أوي الايام دي
"أبحث عمن أحب "
قلتها لعم بهاء
قلتها على الماسنجر لناس كتير
قلتها لنفسي
انتو مش عارفين معنى ان الواحد يكون غريب
بجد أنا حاسس بكده
لأول مرة أكون غريب فعلا
بين أهلي غريب
بين صحابي غريب
بين اخواني غريب
بل على العكس .. بيني أنا ونفسي .. أنا غريب !
لكن سؤالي .. ممكن أخرج بره الحالة دي ازاي ؟
نعم أكيد بالاستعانة بربنا .. اللي أنا دلوقتي في أمس الحاجه له زي أي وقت تاني وأكتر من أي وقت تاني .. لكن أنا بعيد :(
الحب في الوقت ده ضرورة حياة مش رفاهية و الله ..
مش عارف حد هيفهمني وللا لا
لكن أنا بحاول ألاقي أي حاجه أقدر أعبر بيها عن اللي جوايا
مش عارف
عموما .. في كلمة عاوز أقولها ..
" أشتاق لصوتك .. لا .. بل أحتاجك بجواري .. هنا "
اخر حاجه هتكلم فيها هي رد على التيجان المتأخرة ..
وها هي الردود :)

((في البوست الجايه ان شاء الله لوحدها أفضل ))

الهامش الثاني .. العالم
بصوا يا شباب .. بصوا يا بنات .. لما نقول ان مصر أم الدنيا .. يبقى مصر حلوه اوي وعلى راسنا من فوق
لكن لما نقول إن فرنسا أعظم دولة في الدنيا .. يبقى فرنسا أحسن من مصر مليون مرة .. شعبها أحسن من شعب مصر بكل مقاييس الروعة والحسن والجمال .. ونسيبنا من النعرات الكذابة اللي بتقول احنا واحنا .. لا .. احنا بالنسبة لهم ولا حاجه .. هم نجحوا في كل حاجه .. احنا مش بنحاول ننجح .. مشكلتنا اننا ثابتين على الغلط .. مش بنحاول نصلح .. الشعب في فرنسا كله إيجابي .. الشعب عندنا ولا حاجه .. في فرنسا .. المهزومة اللي عن نفسي كان أملي انها تنجح في الانتخابات اللي هي " روايال " نجحت في اختبار الثقة .. نجحت انها تقود حملة انتخابية .. نعم عاطفية بعض الشيء . تعتمد على اثارة الفرنسيين بالشعارات .. لكن شفتوا ازاي تقبلت هزيمتها ؟؟؟؟؟
وللا ساركوزي .. أنا بكره ساركوزي
لكن بعت له رسالة تهنئة على موقعه
الراجل ده يستحق فرنسا
والشعب اللي اختاره واثق فيه
الراجل ده رغم كرهه للعرب والمسلمين وعشقه لإسرائيل و كونه متيم بأمريكا .. إلا إنه محترم لأقصى الحدود
واثق من نجاحه ..
قدر يحقق هدفه .. بحملة انتخابية مهنية راقية
نيجي على الانتخابات !!
كنا بنتفرج على الجزيرة بعد أما النتيجة أعلنت .. فكان في خبر عاجل ان هناك اشتباكات بين أنصار روايال و الشرطة الفرنسية احتجاجا على انتصار ساركوزي ..
أمي سألتني .. هم بيتظاهروا ليه ؟ اتزور في الانتخابات ؟؟
يا حبيبتي يا ماما
طيبة و الله مااما
صحيح هم بيتظاهروا ليه ؟؟؟
لا اتزور في الانتخابات
ولا فلوس ولا رشاوي اتدفعت
ولا قضاة خدعوا نفسهم وضميرهم وضحكوا على الشعب
ولا حكام ظلمة استبدوا بالحكم بحساب القرون لا بحساب السنين
يا شعب فرنسا . هنيئا لك ساركوزي لخمس سنوات قادمة
ساركوزي .. حاول فقط أن تكون منصفا معنا ..
وهنيئا لك شعبك الذي اختارك ..
هنيئا لك روايال في معارضة قوية
هنيئا لك فرنسا .. كل فرنسا

الهامش الثالث .. الأكثر تأثيرا
دعونا جميعا نهنئ الأستاذ عمرو خالد بحصوله على الرقم 13 (أكيد 13 يا عبدالرحمن يا منصور :D ) بين المائة الأكثر تأثيرا في العالم خلال العام الماضي .
وبحسب تقرير جريدة التايم الأمريكية فإن عمرو خالد كان بزيارته للدانمارك و قيادته لحملة تعريفية بالاسلام من أكثر الناس تأثيرا في العالم
وتضم القائمة أيضا بعضا من الساسة مثل جورج بوش و آل جور ووزيرة خارجية الكيان الصهيوني المحترم اللي ماهوش دولة .. تسيبي ليفني
وأيضا تضم ممثلات وممثلين مثل براد بيت وجوليا روبرتس
وإعلاميين مثل أوبرا وينفري وريتشل راي
ورياضيين مثل ديفيد بيكهام
كلهم تحت عنوان .. من يشكلون عالمنا
الأستاذ عمرو في حواره مع عمرو أديب في أوربت قال انه مستعد انه يسلم على تسيبي ليفني لو جاءت إليه ..
أعتقد أن الاستاذ عمرو لو فعل ذلك فهو يحااول أن يظهر بصورة لا نريده أن يظهر بها
صورة المسالم .. ما يعني أننا كلنا إرهابيون
أستاذ عمرو . مجرد اعتبارك أن وزيرة خارجية الكيان هي وزيرة في دولة .. فهو خطأ تتحمل وزره أمام الله وأمام إخواننا المحاصرين في حكومة حماس الذين يرفضون الاعتراف مجرد الاعتراف بوجود دولة اسرائيل
أستاذ عمرو
لم أشاهد بعد لقاءاتك على السي ان ان والسي بي اس و الفوكس نيوز .. لكني أنتظر منك أن تظهر عظمة الإسلام الوسطي الراقي كما نراه نحن وكما تراه أنت
أستاذ عمرو .. لو كنت أنا من سيظهر .. فسأكتفي بالسي ان ان والسي بي اس والواشنطون بوست .. أما الفوكس نيوز ... :) أعتقد أنها لا تستحق وجها رائعا مثلك أستاذي
أحبك في الله يا عم عمرو (F)
وإلى لقاء قريب

الهامش الرابع .. المدونين
جاءت فكرة سريعة من أخي وحبيبي البراء ( شاب مصري ) أن نصمم بانرا بعنوان فخور بأني مدون إسلامي
الفكرة تعتبر اقتباسا من أخويا وحبيبي أنس الشامي ( اللي انا مقتبس العنوان من اسم مدونته ) الذي سبقنا بـ.. مفاجأته .
وصممت البانر
ويارب يعجبكم
ولو في أي تعديل مطلوب .. قولوا لنا وان شاء الله نصممه
جزاكم الله خيرا
اهه البانر
Image Hosted by ImageShack.us
أيضا بالنسبة للمدونين ..
أعتقد أن شباب الملتقى نت ورجاله قد بدأوا بالتوافد إلى التدوين بقوة لم أر لها سابقة
ولدينا هنا مدونتين جديدتين
إحداهما لمبدع الملتقى أخونا أبو العلاء
وهي مدونة مش أنا
والمدونة الثانية وهي لأخينا الفاضل جدا المنشد العام
ومدونته اللي جوايا
انتهت هوامشنا لهذا اليوم
و الله كنت عاوز اكتب كمان
لكن يللا
كفاية كده النهارده
ونكمل قريب ان شاء الله
أما نشوف هتبهدلونا في التعليقات المره دي ازاي
وسلام

Labels: , , , , , ,

posted by AbdElRaHmaN Ayyash @ 01:53  
31 Comments:
  • At 9 May 2007 at 02:55:00 GMT, Blogger shab masry said…

    عبده باشا....

    مشاعر مشتركة يابني.. بس على الاقل لازم نحاول نذاكر على قدر ما نستطيع خصوصاً اننا هندسة... يارب بس الخمس سنين دي تخلص على خير:S:S

    سيبك من اى حاجة دلوقتي وحاول تركز في المذاكرة وبس خصوصاً ان اخر شهر هو الي الى حد كبير بيظبط العملية شوية...

    الايمانيات.. والله كنت ناوى انزل بوست عن الحكاية دي مخصوص... لان الواحد فعلاً في الفترة الاخيرة دي حاسس ان مفيش همة زي زمان .. مفيش ايمانيات زي زمان... مفيش قلب زي زمان.. محتاج يظبط نفسه ومفيش وقت الى حد كبير... رغم ان لازم ناخد دفعة ايمانية عشان الاجازة داخلة ولازم نكون داخلين بهمة وايمانيات عالية

    انت بتكلم عن انهي حب :D:D:D:D
    الحب الي انت اكيد مش قصدك عليه:P:P
    ده تقريباً كلنا محتاجينه مش انت لوحدك.. محتاج يكون حد من الطرف الاخر يسمعلك وتسمعله وو.. لكن حتى ذلك الحين حاول تعمق صداقتك وحبك في الله مع اخوانك(اخوانك مش اخواتك هه) عشان لو انشغلت بهذا الموضوع مش هتخلص..
    ..وهيكدرلك حياتك
    وفي نفس الوقت حاول تعلي من ايمانياتك بالقيام والمناجاة...

    بالنسبة لفرنسا.. ساكوزي اخد 53% وشوية ورويال اخدت في حدود ال 47% ونسبة التصويت في حدودى ال 85% .. ناس اتعلمت كيف تحترم نفسها فاحترمها العالم

    بالنسبة لموضوع عمرو.. والله لما سمعته مكنتش عارف اتكلم عليه ولا لا.. لانى كنت حاسس لو اتكلمت هعمل فتنة.. وفي نفس الوقت غلط السكوت.. لكن قررت عدم الكتابة حالياً عن هذا الموضوع حتى اشعار اخر...
    ولكن همسة بسطية في اذن عمرو.. هؤلاء يا عمرو اعداء ولا ينفع معهم التعايش.. هؤلاء ليس بيننا وبينهم الا السيف..

    بخصوص البانر.. ربنا يكرمك يا فندم.. وتم النشر:D:D:D
    واعتقد ان مطلوب اوي من الناس الي ليها في الحاجات دي تنشط في الفترة القادمة وتبدع في عمل تصاميم مثل ما قام به عبدالرحمن

     
  • At 9 May 2007 at 08:00:00 GMT, Blogger الحلم العربي said…

    أولا : عايزة اقولك ان تقريبا البوست بتاعك عليه فيروس او حد من الهاكرز عمل فيه حاجة لأنى أول ما فتحته جاب موقع مش كويس و دي أول مرة تحصل معايا...حاول تصلح اللى فيه
    ثانيا :اسمحلى أعلق على هوامشك بالترتيب
    الهامش الأول : ربنا يكرمك و يهديك للصواب ..قرب من ربنا ...اطرق الباب و لو طردت ..ممكن تمر عليك فترة تكون مش عارف تقرب من ربنا و حاسس انك بعيد لكن بالمحاولة و الاستمرار ربنا أكيد هيكرمك ...و ربنا يوفقك في الامتحانات ..أهم حاجة التركيز
    الهامش الثانى:
    الفرنسيون....نعم هنيئا لهم بالديموقراطية و عقبالنا ..
    الهامش الثالث:
    عمرو خالد ....كم أحترم ذلك الرجل ....لم أسمع مقولته التى قلتها و لكن إن كان قد قالها فلك الحق بالطبع في رأيك ...أعتقد هو يقول ذلك لأنه يشعر ان تلك المرأة أقل عنفا ممن سبقوها ...و لكنى أراهم جميعا في جعبة واحدة ..العدو المغتصب ..نصرنا الله عليهم ...و لعل عمرو خالد يسمع النصيحة.
    الهامش الرابع:
    جميل البانر الذي صممته و لكنى أرى أن تضع العبارة باللغة العربية في الجزء العلوي فنحن نفخر بلغتنا العربية أولا ...
    جزاك الله خيرا ...و إلى الأمام

     
  • At 9 May 2007 at 10:06:00 GMT, Blogger اسماء العـــــــريان said…

    ربنا يعين حضرتك ويعينا معاك

    اظنها نفس المشاكل

    استعن بالقران

     
  • At 9 May 2007 at 11:03:00 GMT, Blogger khaled said…

    كلامك المؤثر وتفكيرك العقلانى النافذ للحائط المانع للرصاص
    احييك على ترجيع ما بداخلك
    وبالنسبه للهامش الاول اهم حاجه الفروض
    حتى لو معندكش ايمانيات
    والاهداف برضه
    والاصدقاء كذلك
    الهامش التانى انا معاك فيه بكل جوارحى
    الهامش الثالث يو نو ماى اوبينين
    الهامش الرابع فكره ممتاذه وهيتضاف عندى انشاء الله

     
  • At 9 May 2007 at 11:33:00 GMT, Blogger صوت عصفورة said…

    اجدني اؤجل الشروع في الكتابة من مدة لاسباب مختلفة .. اما دلوقتي برده مش هكتب ... لأني كنت هكتب عن شوية معاني و مشاعر بالفعل تضمنتها انت في هوامشك .. و اخشى اني لو عبرت انا اكمان بالمنظر ده يفتكروه الناس حالة ماشية في المدونين...:)

    مش هعلق على الهوامش ..ده اولا

    احمل نفسي و احملك و كل اللي عندهم الحالة دي المسئولية كاملة ...ده ثانيا

    احنا نعرف حلول كتير لمشاكلنا مش بنحب نفكر فيها و لا نعملها لاننا زي ما بقول دائما .... نختار الاسهل .. الاستسلام .. ده ثالثا

    يبقى الدعاء سلاح مشترك بيننا جميعا ..ده رابعا

    و جزاك الله خيرا.. اخيرا

     
  • At 9 May 2007 at 13:25:00 GMT, Blogger وضـّاح said…

    أعانك الله ووفقك

     
  • At 9 May 2007 at 14:17:00 GMT, Blogger ياســــــــــر مدنـــــــــــــي said…

    ربنا يوفقك يا سيدي والله الحال من بعضه بس أنا عايز أقولك علي حاجه لازال فينا الخير بشد الياء وكسرها ..شعبا وارضا والشباب الطاهر وعلي العموم كلامك ده إداني فكره لنشر أحلام الشبا وهي ملحمه للشاعر وليد الرفشي أربع أجزاء وربنا يوفق الجميع


    وياؤيييييييييييييت ترد علي التاج اللي بعتهولك ولا خايف ولا مكسوغ...فاهمني طبعا؟؟؟

     
  • At 9 May 2007 at 14:53:00 GMT, Blogger khadiga said…

    This comment has been removed by the author.

     
  • At 9 May 2007 at 14:58:00 GMT, Blogger khadiga said…

    سبحان الله
    الظاهر إن الحالة دي ماشية ع الكل
    عموماُ أنا كدة اطمنت الحمد لله
    المهم بقى دلوقتي نبدأ خطوات العلاج
    أول حاجة طبعاً مع ربنا
    بجد لازم نفوق
    إزاي بقى ؟؟
    كل واحد أدرى بنفسه وباللي يصلح حاله
    ربنا يصلح حالنا جميعاً

    المذاكرة بقى
    مش أنا اللي هقولكم على حاجة تنفعكم
    ربنا يستر عليا
    بس أنا بقى عكس حضرتك تماماً
    مستعدة للفشل الترم ده جداً
    وهبقى أول مرة بدوقه
    بس برضو إن شاء الله هعمل اللي عليا
    والباقي على ربنا

    تاني حاجة
    ألف مبروك لساركوزي
    وربنا يعوض علينا احنا بقى
    :)

    تالت حاجة
    عمرو خالد
    بجد مثال لمسلم يشرف
    فعلاً يستحق كل خيـــر
    المرة دي بقى يبقى الله يبارك لينا
    !!

    رابع حاجة
    أنا فعلاً ليا في التصميم قوي
    بس في أثناء المرور بالحالة السالفة الذكر
    *
    أول هامش
    *
    مستحيـــــل أعمل حاجة دلوقتي
    لأن ضميري ساعتها هيؤنبني قوي ويفضل يقولي أولويات ومش عارف إيه
    علشان كدة أنا بريح نفسي
    لا مذاكرة ولا أي حاجة تانية
    العدل مطلوب
    بس إن شاء الله وعد مني
    أول ما أخلص امتحانات هعمل بنر يعجبكم
    إن شاء الله

     
  • At 9 May 2007 at 15:21:00 GMT, Anonymous أنس الشامي said…

    أولاً يا عم عبده

    مسامحين في لطش الإسم " هههههه "

    عشان مقدرين ظروفك النفساوية ...

    ثانياً : بالنسبة للبانر

    فأنا بحذرك تحذيراً شديداً

    إوعك تسرب كلمة من اللي قلت عليها

    خلي كل حاجة في وقتها

    عشان حقوق الملكية و الطبيخ محفوظة

    و على فكرة يا جماعة

    عبدالرحمن بيضحك عليكم ما تصدقهوش

    مش دي فكرتي ...

    لأن فكرتي مختلفة ...

    بالنسبة بقى للهامش إياه يا عم عبده

    أنت عارف أنا ناوي على إيه في الصيف

    و صباح التشريد ......

    بالنسبة بقى للمذاكرة ...

    التعليقات وفت و كفت

    بالنسبة لساركوزي ...

    فـ Bonjour يا عم الحج و خلينا حلوين

    مع بعض من أولها عشان ما نقلبهاش

    دمار شامل على رأي عمنا القرموطي ...

    بالنسبة لعمرو خالد ...

    لما نشوف الدنيا هيحصل فيها إيه ...

    إنتهى

    صاحب الهوامش

     
  • At 9 May 2007 at 15:22:00 GMT, Blogger علاء said…

    قبل ما أبدا كلام
    أنا شايفك بتقول مش لاقي حد أحبه !!
    ...
    معنى كده تنك مش بتحبني يا واد يا عبده ؟؟
    أنا كده أعل أوي
    لأن إنتا حبيبي و أشهد الله أني أحبك فيه
    ...
    خليني اتكلم في كام نقطة
    ...
    أولا:
    سبحان الله ... انت اتكلمت عن موضوع البانر في نفس الوقت اللي انا كنت عملت فيه دعوة لوضع بانر صممته لمدوني الإخوان و الدعوة باسم
    أعلن عن نفسك
    و اتمنى ان ربنا يوفق
    ...
    ثانيا:
    أنا مش معاك في حكاية ان شعب فرنسا أحسن منا ألف مرة و كده
    بص يا عبد
    لازم يكون عندك ثقة إن اسلامك يرفعك فوق العالم كله
    بكل المقاييس لكن للاسف الطغاة مضيقين علينا بس ده مش معناه اننا مش كويسين
    و الدليل انتا و غيرك من اللي لسه صوتهم طالع برغم كل اللي بيحصل في البلد
    يعني تخيل كده لو شعب فرنسا بقاله عشرين سنة عنده قانون طوارئ كان حاله هيبقى عامل ازاي ؟؟
    ...
    ثالثا:
    بالنسبة لموضوع حبيبي الأستاذ عمرو خالد
    خلاصة الأمر إننا منعطيش الدنيّة في ديننا عشان نقول للعالم و الله دحنا حلوين و مش ارهابيين
    أو نبوس ايديهم عشان يقولوا اننا مش ارهابيين
    أو نسلم و نبارك للصهاينة انهم قتلوا و دبحوا و شردوا اخواننا و اخواتنا عشان يقولوا اننا حلوين
    اصل الناس دي مش شاعريين زينا يعني طريقة استاذي عمرو الرقيقة الروحانية مش هتنفع معاهم و مهما كان اسلوبه هيعاملوه كويس يمكن
    انما مش هيوقفوا اللمخططات بتاعتهم
    يبقى ما استفدناش حاجة

    ....
    الحاجة الأخيرة
    شد حيلك شوية في المذاكرة لأن المسلم متفوق
    و محدش قال انك فاشل طبعا
    انما لو كسلت يبقى معندكش عزيمة و دي أقوى من فاشل مية مرة
    و زي ما قلتلك يا عبد
    متدخلش اتصالات :)
    عليك و على عمارة و أنا هديتك عندي
    نصيحة من أخ كبير و مجرب
    ....
    و جزاكم الله خيرا

     
  • At 9 May 2007 at 20:19:00 GMT, Anonymous وضاح said…

    بالمناسبة أنا أخذت الصورة التي في البوست

    ولكن سؤال

    لماذا لم تكتب فخور لأني مدون مسلم بدلا من إسلامي

     
  • At 10 May 2007 at 10:29:00 GMT, Blogger FadFadA said…

    عبدالرحمن
    نفسي أكلمك كلام كتير جدا , و التعليق مش هيكفي , على العموم هاحاول اختصر و ان شاء الله لما نتكلم مع بعض - زي ماانت ما وعدتني - بعد الامتحانات نتكلم بالتفصيل
    أولا :بالنسبة لموضوع الفشل , أنا ملاحظ ان ديه تاني مرة تتكلم فيها عليه , من الواضح انك انت اللي مش واثق من نفسك مش اللي حواليك هما اللي مش واثقين فيك , على العموم براحتك يا صاحبي
    بس اسمع الكلمتين دول , الحاجةالأولى: نحن من يصنع الفشل كما نصنع النجاح , يعني الفشل بييجي من جوانا مش من كلام اللي حوالينا , فليقولوا ما شاءوا
    الحاجة التانية :لا أظن ان واحد دماغه زي دماغك يبقى فاشل, صدقني مش ممكن ,ووالله ديه مش مجاملة
    ثانيا : الامتحانات من أجمل الفترات والفرص للتقرب من الله عز وجل , جدد انت بس نيتك و ان شاء الله كل ثانية في مذاكرتك تكون طاعة و قرب من الله , استعذ بالله من الشيطان الرجيم و توكل الله و استعن به وأكثر من الدعاء ,وشد حيلك و لو تعرف تذاكر مع واحدصاحبك من بتوع المذاكرة (الدحيحة ) يبقى كويس جدا
    ثالثا : متهيألي انك بتبحث عن عاطفة و لا تبحث عمن تحب, و هذ يختلف كثيرا( لمانتكلم هأبقى أوضحلك قصدي
    رابعا : بالنسبة للمواضيع التانية لما نتكلم مع بعض - ان شاء الله
    خامسا : ادعيللي كتير
    سادسا : سلام يا حبيبي
    سابعا:كفاية كده لحسن طولت عليك و خايف اكون شغلتك عن المذاكرة
    ثامنا :مفيش ثامنا
    ربنا يوفقك
    محمد

     
  • At 10 May 2007 at 14:36:00 GMT, Blogger AbdElRaHmaN Ayyash said…

    سلام عليكم
    جزاكم الله خيرا يااخواننا على تعليقاتكم
    والله ربنا يعلم اللي فيا
    --------
    أخويا البراء
    زي ما انت قلتلي
    شكلي واقع فعلا :d
    الايمانيات فعلا عاوزه تعلى 10000 درجة .. عشان تعدي خط الصفر :(
    ربنا يستر علينا
    والحب هو العاطفة
    هو الشعور انك مقدر من الطرف الاخر
    الشعور انك لك أهمية :(
    بس
    جزاكم الله خيرا على فكرة البانر
    وان شاء الله ينتشر على ايد اخواننا
    سلاام يا سيدي
    ------------
    أختي الحلم العربي
    البوست فعلا أكيد معليهوش فيرس
    ممكن الموقع يكون من ثغرة في جهاز حضرتك
    ودي ممكن نشوفلها حل لو حضرتك اتأكدتي من المشكلة
    ويااارب ربنا يوفقني اني ارجع
    الرجوع مش سهل و الله
    والاكتر صعوبة هو الثبات
    فربنا ييسر لنا الخير ويستر
    أما فرنسا .. فدول ضربوا أروع مثال للديمقراطية اللي الناس بتتطالب بها
    أما بالنسبة للأستاذ عمرو
    الكلمة موجوده حتى الان في الصفحة الرئيسية للموقع
    في حوار الاستاذ مع عمرو أديب على اوربت
    في الدقيقة 16 من الحوار
    بالنسبة للبانر
    هيكون في اربع بانرات ان شاء الله على اخر تعديل
    لكن نصبر شوية ربنا يخلليكم :)
    ادعولنا

     
  • At 10 May 2007 at 14:39:00 GMT, Blogger AbdElRaHmaN Ayyash said…

    أخت اسماء
    :( ربنا ييسر لنا كلنا
    وجزاكم الله خيرا على النصيحة
    فعلا محتاجها
    سلام
    --------
    خالد باشا
    يا سيدي ربنا يكرمك على اسلوبك الحميل ده
    كلامك رائع بالنسبة للفروض والاهداف والاصدقاء
    وياارب نقدر نعمل حاجه
    بالنسبة لرأيك في موضوع استاذ عمرو .. فانا كلمتك ;)
    ياريت ننشر البانر كلنا
    سلام

     
  • At 10 May 2007 at 14:41:00 GMT, Blogger AbdElRaHmaN Ayyash said…

    أستاذة آية
    و الله الموضوع مش حالة ماشية
    بس فعلا ده احساس حقيقي
    ربنا يزيله بأسرع ما يمكن
    وربنا ييسر لك ياارب
    كتير من مشاكلنا مش بايدينا حلها
    لأنها متعلقة بالعالم كله الا احنا
    كل العالم ممكن يأثر فيها الا احنا
    الدعاء بجد هو الاساس
    وجزاكم مثله
    سلام
    -----------
    عم وضاح
    جزاكم الله خيرا
    ---------
    أخ ياسر
    و الله هرد على التاج ان شاء الله
    والخير موجود فينا ليوم الدين والخيرين كذلك
    وان شاء الله هرد على التاج في أقرب فرصة
    جزاكم الله خيرا يا سيدي
    سلام

     
  • At 10 May 2007 at 14:45:00 GMT, Blogger AbdElRaHmaN Ayyash said…

    أخت خديجة
    جزاكم الله خيرا على التعليق
    انا مش فاهم حضرتك اتطمنتي ليه :$
    بس انا متفق معاكي اننا لازم نفوق
    ازاي بقى ؟
    طيب انصحيني الله يكرمك
    بالنسبة للمذاكرة
    مفيش حد ستعد يتقبل الفشل
    لكن كلنا مستعدين لاننا نلاقي نتيجة اللي بنقدمه
    طبعا فرنسا كذك
    واستاذ عمرو كده :)
    بالنسبة للبانر
    أنتظره على أحر من الجمر
    جزاكم الله خيرا
    سلام
    ------------
    :d أنس باشا
    يا سيدي الحمد لله انك سامحت
    البانر مش هتكلم على اي حاجه ولو على رقبتي :D
    انت اللي هتتكلم ان شاء الله :D
    وأنتظر معاك الدنيا هيحصل فيها ايه
    سلام

     
  • At 10 May 2007 at 14:54:00 GMT, Blogger AbdElRaHmaN Ayyash said…

    باشمهندس علاء الكبير
    و الله العظيم بحبكم في الله
    بس :D هنا مفيش كده

    بانرك لمدوني الاخوان رائع جدا
    وان شاء الله هكلمك عليه
    بالنسبة لموضوع فرنسا
    أنا شايف انهم طبقوا الاسلام في كل حياتهم
    ممكن انهم بيتعاملوا بامتهان مع بعض الروحانيات
    طبعا لأن ده دينهم
    وهم مش مسلمين
    لكن طبقوا اسلامنا في حياتهم
    احنا سبنا الاسلام فنزلنا تحت اوي
    وهم اتمسكوا بقيمه فطلعوا اكتر مننا كتير
    احنا احسن منهم كتير باسلامنا وبقدوتنا وبقرآنا
    لكن أحوالنا ... لا تسر رسول الله ولا الاسلام
    بالنسبة لكلامك عن استاذ عمرو
    كلامك منطقي جدا جدا جدا جدا
    اعجبتني فكرتك أن الروحانيات لن تنفع مع امثالهم
    فعلا
    هذا شيء بديهي
    رائع
    :D بالنسبة للاتصالات
    بحبها يا باشمهندس
    بحبها :D
    مش عارف و الله هعمل ايه
    بس شغلها حلو اوي
    عمارة مين اللي انا مش عارف اخلص نص اللوح
    ربنا يستر :D
    سلام يا سيدي
    ------------
    أخ وضاح . بالنسبة للبانر
    أعتقد انه هيكون صعب اننا نحدد مسلم او لا
    لكن نقدر بسهوله نعلن عن هويتنا الاسلامية
    انا اسلامي مش بالبطاقة
    اسلامي شايف ان ده طريق الاصلاح في الدنيا قبل الاخرة
    جزاكم الله خيرا على تعليقك
    سلام

     
  • At 10 May 2007 at 14:59:00 GMT, Blogger AbdElRaHmaN Ayyash said…

    حبيبي محمد الذي لا أعرفه بعد
    و الله انا بتكلم على الفشل من حرقتي
    المرة اللي فاتت كانت عشان ناس علاقتي بهم شبكية وعائلية
    أما المرة دي فالموضوع كان من الناس القريبين ليا اوي
    اخواني
    واصدقائي
    انا مش عارف ليه حاسس بانعدام الثقة في نفسي :$
    بس ربنا يستر
    الامتحانات فعلا بتخللي الواحد يعرف انه مش في ايده اي حاجه وان ربنا بايده كل شيء
    ربنا يسهل وييسر
    وجزاكم الله خيرا كتير اوي على ثقتك فيا وفي دماغي :)
    و الله هي العاطفة دي اللي بدور عليها
    في اوقات كتير بنكون مفتقدينها لأننا حاسين انها مش موجودة
    واوقات تانية تكون قدامنا ومش شايفينها
    انا مش عارف
    ربنا يكرمك وييسر لك الخير في الدنيا والاخرة ياارب
    ان شاء الله تدعيلي انت كمان
    سلام يا سيدي

     
  • At 10 May 2007 at 15:33:00 GMT, Blogger belal said…

    ازيك يا بني
    ...
    إنت بتردحلنا يا له في المدونة ..احنا قلنا إنتا ...فاشل
    ده اللي يقول كده..يبقى واد بيفهم..أقصد نضربه بالبتاع...يا بني ..إنت مسطول ..إحنا كنا بنتناقش في وجود الفشل من عدمه ..إنتا رأيك المتخلف بيقول إن مافيش فشل وإنك وإني وحسن مش فشلة ..وهنا قام الصراع بين الحق والباطل
    ....
    يا بني ..مين قال إنك وإننا مش واثقين ..أبدا ..خالص جدا جدا جدا جدا
    واحنا هننجح يعني هننجح إن شاء الله
    أمال مين اللي هينجح لو احنا مانجحناش
    ..
    كمان الكلام ده كان قبل امتحان الرسم اللي المفروض فيه عشر لوح كلهم ماتسلموش ..يعني الواحد كان يائس ..بس الحمد لله الواحد دخل الامتحان وماحلش .. :D
    .....

    ثم مش أنا النهارده قعدت أقولك يا ناجح ..يعني واحدة بواحدة
    .....
    ثم انتا راجل واصل وجايب ايه موجب في الميكانيكا ..يعني ماحدش قدك ...ودكتور الفيزياء هيديك أعمال السنة كاملة :D
    وانت عبقري حاسب وحليت كمان في البرمجة ..
    الحاسب أنا كتبت إسمي وقعدت أفتكر رقم السكشن وعلى كده ..بس
    ....
    شكلك كده ناوي تضرب
    .....
    يا بني صدقني احنا _إن شاء الله _ ناجحين ناجحين بإذن الله
    ..
    دا احنا فلتات يا بني
    ..
    نحن اتينا لنعلم الناس معنى النجاح
    ....
    وداعا ..يا اسمك ايه
    ...
    سلام

     
  • At 10 May 2007 at 19:49:00 GMT, Blogger Medo Magdy said…

    ربنا يعينك ياعبدالرحمن

     
  • At 10 May 2007 at 20:23:00 GMT, Blogger سفير الود said…

    طيب يا بني ما انت سألتني وجاوبتك
    وذكرتك بدرس الاحتمالات
    وكلمات الكآبة
    ومعالي الباشا وألحانه
    احم احم

    جميلة الكتابة
    حاول مرة تكتب بالفصحى
    خليها تبقى قوية عندك زي العامية

     
  • At 10 May 2007 at 21:25:00 GMT, Blogger مصراوي أوي said…

    بالنسبة للدراسة ان شاء الله هتتفوق....عقليتك تؤكد انك انسان متميز

    بالنسبة لمن تحب....انا مش فاهم حاجة:)

    كل دول مش مستوعبينك يعني؟؟؟واللا مش فاهمينك؟؟واللا تقصد ايه بش يا عبده.....خصوصا انك كتبت ف بوست قبل كده أذوب حنينا لشخص لا اعرفه....الجملة دي علقت معايا لان انا كمان كده فبصراحة علقت معايا....زربنا يوفقك يا عبدو يا عياش يااااااااارب

    تحياتي وسلام الله عليك

     
  • At 11 May 2007 at 07:42:00 GMT, Blogger رينـــــــــــا said…

    السلام عليكم
    بص بئا انا مش هاجى ارص ليك نصايح وبتاع لانى عارفه ان دا شىء يخنق

    كل الى هقولوهك ان حلك فى حاجة واحدة بس هتحل ليك كل المشاااااكل دى

    ربنا
    ربنا
    ربنا
    ربنا

    لو قربت من ربنا مذاكرتك ان شاء الله هتنجز
    لو قربت من ربنا ايمانياتك هترتفع
    لو قربت من ربنا هيمله حبه قلبك ومش هتحتاج اى مخلوق

    بالنسبه ربنا ياخده وانا حزنت انه كسب
    عمر خالد يستحق كل خييييييييير بجد ربنا يكرمه ويهديه ويجعل اعماله كلها فى ميزان حسناته
    بالنسبه للباتر الله معكم

    ابئا طمنا عليك بئا :D

    اوعى تتخنق منى ها
    سلام

     
  • At 11 May 2007 at 19:29:00 GMT, Blogger وضـّاح said…

    جميل

    تخيلت الرد قبل أن تقوله فأنا إسلامي المنهج والطريق

    فكم كثر المسلمين الذين يطبقون منهج غيرهم ويسرون في طرق ليست لهم

    فأحببت أن أعرف هل المكتوب على البانر مقصود أم من قبيل المصادفة

    على فكرة أنا وضعته في بداية مدونتي

    جزاك الله خيرا

     
  • At 12 May 2007 at 12:20:00 GMT, Blogger AbdElRaHmaN Ayyash said…

    بلال
    :D و الله انت مش متخيل انت ضحكتني اد ايه من التعليق بتاعك
    على فكره .. انا كنت بمتحن ورش دلوقتي وجبت A++
    أحسن من الميكانيكا ببلس بحالها
    :D في النهاية
    اه ناجحين ناجحين :P
    بكره الفيزيا العملي
    ربنا يستر
    -------
    جزاكم الله خيرا مبدعنا ميدو
    وياارب يعيننا كلنا

     
  • At 12 May 2007 at 12:47:00 GMT, Blogger AbdElRaHmaN Ayyash said…

    عم الحاج بهاء :d
    و الله بحبك ياسيدي
    ان شاء الله أبدأ اتكلم بالفصحى
    لكن مش على طول
    :d والبركة فيك
    لولاك ما كنت سمعت كلمات الباشا ولا ألحانه :D
    سلام يا سيدي
    ----------
    عمي المصراوي بالأوي
    و الله يا عمي الموضوع باختصار
    اني انا عاوز احب :D
    أحب اخواننا على الارض
    هم يحبوني
    مش اني احبهم يعني ارمي نفسي عليهم
    مشتاق أشوف شخص ما
    هكمل معاه حياتي
    بس
    الكلام بيكتر يا عم الحاج
    وبس

     
  • At 12 May 2007 at 12:52:00 GMT, Blogger AbdElRaHmaN Ayyash said…

    رينا
    و الله هو ربنا اللي يقدر يخرجنا من اللي احنا فيه
    المشكلة اننا بننسى
    او بنتناسى
    :D
    ومقدرش و الله اتخنق من أي حد منكم
    اتخنق ليه بس
    :D ايه الخنقة دي
    هتخنقونا بالعافيةى :D
    بهزر
    (A)
    سلام
    ---------
    عم وضاح
    :D الحمد لله انه عجبك
    ربنا يكرمك يااسيدي
    وان شاء الله ننشره
    بس نستنى شوية
    في اعمال تقييمها حاليا انا شايفه اهم
    جزاكم الله خيرا يا سيدي على الاهتمام
    سلاام

     
  • At 13 May 2007 at 12:09:00 GMT, Blogger اصرار أمل said…

    كويس انى لحقت الموضوع ؛
    النت عندنا اليومين دول شغاال لوحده ؛؛
    المهم ياعبد الرحمن ؛انت عارف انت محتاج ايه ؟ محتاج تنجح ؛ بس والله ؛
    محتاج تثبت لنفسك انك قادر على النجاح ؛ وبس ؛
    اعتقادك انك فشلت نوعا ما فى الثانوية ؛ ونتيجة الترم الأول مأثرة سلبيا عليك ؛
    الموضوع أبسط بكثير مما تتخيل ؛
    والوقت لا زال بيدك ؛ تخيل أن هذا الشهر يتوقف عليه رضاءك عن نفسك من عدمه ؛؛؛
    اذا المسألة ليست الا أن تثبت لنفسك ؛ ولنفسك فقط ؛ قدرتك على التفوق ...
    أعتقد ؛ وقتها أنك ستنظر لكل هذه الأمور التى ذكرتها فى هوامشك _ أعنى الخاصة _ بمنظاااااار آخــــر؛؛
    دعوااااااتى لك بالتوفيق ....
    ليس الخطأ فى الشعب ؛ بل الخطأ فى استمراء الذل ؛؛؛
    ربما يمكننا أن نحس بالعزة يوما ما ؛؛؛
    الأستاذ عمرو خالد ؛ لم أسمع هذا الحوار ؛
    لـــــــكن ؛ أدعوا الله أن لايخذل أمنياتنا فيه ...
    عياش :
    تقرب الى الله بمذاكرتك ؛ تذكر هدفك الكبير ؛وتذكر النية التى استحضرتها عند دخولك الكلية ؛
    تذكر ادخال السرور على قلب والديك ...
    دعوااااااااااااااااااااتى لك ؛؛؛

     
  • At 13 May 2007 at 12:27:00 GMT, Blogger اسلام رفاعى said…

    أهم حاجة فى الكلام ده كله علاقتك مع ربنا لو هىة تمام كل حاجة حتبقى معاك ماشية تمام
    ليت الذى بينى وبينك عامر
    وبينى وبين العالمين خراب

     
  • At 13 May 2007 at 16:22:00 GMT, Blogger AbdElRaHmaN Ayyash said…

    سلامو عليكم
    دكتورة أمل
    جزاكم الله خيرا على ردك ده
    وان شاء الله أنجح
    صدقيني هنجح ان شاء الله
    :( مش عارف ليه بقولها وانا متردد
    و الله مش عارف اقول ايه
    بس ان شاء الله ربنا هييسر
    ولو فعلا أثبت لنفسي اني اقدر اعدي السنة دي بعد كل اللي حصل وبيحصل
    فعلا حاجات كتير اوي هتختلف
    وان شاء الله هتختلف
    ربنا يكرمك يا دكتورة
    سلام
    ---------
    أخ اسلام
    و الله انا متفق معاك تماما
    وهو نفس كلام رينا
    ان مفيش حد يقدر يخرجني من اللي انا فيه غير ربنا
    وان شاء الله مش هبعد عنه
    ربنا يستر
    سلام

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats