AbdulRahman Ayyash
 

AbdelRahman Ayyash's Facebook profile

Wednesday, 14 March 2007
حاضر يا بابا
ازيك يا عبدالرحمن
أخبار رجلك ايه ؟
عملت ايه في الجيم ؟
أخبار المدونة ايه ؟؟
---
كده بدأ حوار بابا ليا
المهم الحوار استمر حوالي عشر دقايق او ربع ساعه
وتم الامر بما يلي
1
اني امسح اي شتيمة او تجريح على حسني مبارك او غيره في النظام الحاكم
لأن ده مش هيعمل حاجه في الدولة ولا هيأثر في حاجه
وهتحاسب على الكلام ده قدام ربنا
وهتأذى فيه
مش لوحدي .. لا وأهلي وبيتي وبابا شخصيا
2
اني هستمر على الخط المحترم في التدوين
بمعنى مش هشتم ولا هجرح ولا هتنرفز
في كلمة جت في نص الكلام
اني هعرض على بابا اي حاجه قبل ما اكتبها
مش عارف
بس ده لو حصل أكيد انا مش هكتب ولا كلمة تاني
عموما
المقابل ان انا لو معملتش ده
فالحل ان بابا هيمنعني من النت تماما
بابا ماشافش كل المدونة
هو شاف موضوع تكتب وتبكي انا نموذجا
وكان كلامه كله على الرسالة الموجهه لحسني
والكلمات اللي في رسالة عائشة مالك اللي قلت فيها ان هييجي يوم ويبقى الاستاذ حسن زي محمود الزهار
أي أن التمكين سيكون لهم ولكن بمعنى ضمني
عموما ..
ما حدث الان انني امام موقف لا أحسد عليه
بين أن أستمر في الكتابة في مدونتي
او ان استمر في مدونة اخرى
بعد ان ارسل لكل من اعرفهم رابطها
وان ارسل لكل من علق عندي او وضع رابطي عنده او او
ولكن يعز علي صراحة ان اترك مدونتي بهذه السهولة
والحل الآخر أن ألتزم بالخط المحايد في النقد
لعلي أكتب بشدة
ولكن ما يريده أهلي والاخوان أن أظل محتفظا بالهدوء النسبي في الحوار
وألا أخطئ في أحد
هذا هو الاصل نعم
ولكن ليس بمنع كل شيء
ماشي حاضر
عموما
ربنا يقدم اللي فيه الخير
وياريت يا اخواننا تشيروا عليا في الموضوع ده
اعمل ايه فعلا ؟؟
ربنا يخلليكم يارب
سلام عليكم
عبدالرحمن

Labels:

posted by AbdElRaHmaN Ayyash @ 22:38  
38 Comments:
  • At 14 March 2007 at 23:08:00 GMT, Anonymous ميت said…

    بص ياعبده
    بلغ أبوك والإخوان عندك إحتجاجي الرسمي علي كلامهم
    وقول له الجناح العسكري لمجموعه 8 إبريل هيعلن الحرب عليه وعلي إخوان المنصوره في حاله تطبيق كلامه
    وبلغ إن حركه مدونون من أجل الحريه أصدرت بيانا أعربت فيه عن اسفها في تلك التوجيهات التي أصدرها السيد الوالد ، وإن الحركه تتمني أن يتنازل الوالد عن تلك التعليمات ، وإنها تدين وتشجب وتستنكر ما يحدث في ظل هذه الإجراءات "الغير قمعيه" ضد المدونين الإخوانين.
    ملحوظه : خلي بالك من بر الوالدين :D
    ولأنا للسفاره في قلب العماره

     
  • At 14 March 2007 at 23:15:00 GMT, Blogger AbdElRaHmaN said…

    ههههههههههههههههههههههه
    ده تحريض ده وللا ايه
    ايه يا عم الحاج
    ده انت بهدلتنا كلنا
    :D بس حاضر
    يوصل ان شاء الله
    على الله ابويا بعدها ما يصدرش تعليماته باعتقالي انا وانت ياخويا
    وربنا يستررررر

     
  • At 14 March 2007 at 23:19:00 GMT, Anonymous محمد العنانى said…

    بعد التحيه
    مطلوب منك ترضى والوالدين وانك تحافظ على مدونتك
    قول لباباك ان واحد مجاهد من الاخوان بايالك ان ده نظام فاشل ميت والضرب فى الميت حرام
    اسمع كلام ابوك لانو بيحبك ومش هتلاقى حد يحبك قدو
    بس قولو مزيد من الحريه يا با با
    وانا حا حافظ على الوعد
    وربنا يكرمك انت وابوك ويعز مدونتك واوع تسيبها خليك علطول موجود

     
  • At 14 March 2007 at 23:24:00 GMT, Blogger AbdElRaHmaN said…

    جزاكم الله خيرا أخي محمد
    و الله كلماتك رائعة
    ربنا يخلليك يا سيدي
    على الوعد ان شاء الله
    تحياتي لك سيدي الفاضل
    سلام

     
  • At 14 March 2007 at 23:51:00 GMT, Blogger اصرار أمل said…

    بعض الحوار مع الوالد - الله يحفظه _ ومع بعض التنازل منك سيحل هذا الأمر ...
    أقنع والدك ان التدوين شىء مهم عندك ؛ وانك تحتسبه فى ميزان حسناتك ... ولا تغلق المدونة
    وبعدين اسمع كلامه فى مسألة التجريح ؛ يعنى هو ليس بهذه الأهمية ؛ انتقد كيفما شئت دون تجريح لأحد ؛ فلا يستحقوا أن تعطيهم من حسناتك ..أنا أتفق نوعا ما مع والدك فى هذه القضية _ التجريح _
    * نصيحة من أخت كبيرة : طالما رأيت والدك منفعل بأمر ما ؛ ويصر عليه ؛ لا تخالفه وقتها ... فقط دع الأمور تسير بهدوء ؛ حتى لو كنت تغلى فى داخلك ..وبعدها بأيام يمكنكما أن تصلا الى اتفاق ...
    الواضح ان والدك شاغله موضوع تدوينك جدااا؛ وهو الصراحة عنده حق _ يعنى هو يخاف عليك ؛ ويتمنى لك مستقبل لازلت تخطو أولى خطواتك فيه ؛ وبعدين ياعم عياش ؛ مش هتبقى عياش _ لما تقعد تلات أربع سنين فى السجن _ ولا رأيك ايه ؟
    مؤقتا ؛ اقبل بهذه المحاذير التى وضعها والدك ؛ حتى يمكنك قريبا _ باذن الله- أن تقول : أستحق أن أكتب كل ماأريد ....
    الموضوع أبسط من أن تقيم عليه مشكلة ... استمر فى تدويناتك ؛ فأنت مدون جدير بهذا الحق ؛ واحتسب الأجر فيه ؛ وطالما احتسبت الأجر فمن المؤكد أنك لن تضيع هذا الأجر بتجريح شخص ما أيا كان هذا الشخص ...
    طولت عليك !!!
    بس أتمنى أن تفخر بنفسك ؛ وأن يفخر بك أهلك ؛ اعمل على ذلك ...
    ربنا يوفقك ؛ ويكتب لك الخير حيث كان ....

     
  • At 15 March 2007 at 00:38:00 GMT, Blogger دعاء عادل said…

    بص ياعبد الرحمن انت المفروض تسمع كلام باباك انا شيفه انه بتكلم صح جدا وفى مصلحتك
    انت ممكن تنقد نقد شديد جدا من غير ما تشتم ولا تجيب سيرة مبارك ولا بتاع
    بصراحه انا مش بحب اللى بينتقد على اساس الشتيمه بالعكس بالطرق التانيه بتبقى الكلمه اقوى وبتاثر اقوى
    وبالنسبه انك توريله اللى كتبته قبل ما تنشره
    اعتقد انه هايتنازل عن الحكايه دى لو انت وعدته انك هتعمل كل ده
    وانا متأكده انه هيسيبك بحريتك
    وربنا يوفقك
    ملحوظه( ماما وبابا هيفرحوا بيا اوى لو قرأو الكلام اللى انا كتبته ده
    :)
    شفت العقل اتعلموها بقى

     
  • At 15 March 2007 at 00:57:00 GMT, Anonymous ميت said…

    وأصبحت المحرض الوحيد الأبله في المكان
    فلاش سريع قوي جذاب
    ثم ظلااااااااااااااااااااااااام

     
  • At 15 March 2007 at 02:02:00 GMT, Blogger أنس عماد الدين said…

    ههههه

    بجد الكلام ده يا عبدو

    وبدأت الحرب بين الأهالي و بين الابناء لمنعهم من التدوين ....

    بصراحة يا عبد الرحمن .. انا كنت متوقع كده ...

    و انا برده امي متخانقه معايا خناقة جامده

    جامده قووي ...

    علشان بدون بالعامية ..

    بتقول واافضيحتاه
    ابن كاتبة وو أديبة وبدوّن بالعامية ...
    و ااكارثتاه .. ووااااه عربيتاه ...

    انا ضد العامية و ضد كل من يكتب بها ...

    يا ماما انا بكتب ببساطة ...و مستعجل قووي فبكتب اللي بيخطر ببالي بدون تدقيق املائي ونحوي ...

    يا ابني ما ينفعش ...

    اخرتي معاك

    هاعمل حملة ضدك وضد امثالك علي النت من مدونتي
    (رغم اني انا اللي بفتح لها مدونتها وبعمل لها كل حاجة من الالف للياء .. سكرتيرها يعني )

    ضد العامية ومن يكتب بها ...
    ضدكم كلكم يا من أفسدتم اللغة العربية الفصحي ..

    الخ الحوار المعتاد

    ( حالتك اهون يا عبدو ... امي بتفكر تعمل ضدي حملة علي النت قدام العالم كله .. شفت الحرب القادمة )

    كل حاجة كويسة لازم تموت في البلد ده ..

    علي العموم

    لنا كلام طويل مع بعض بعدين في الموضوع ده

    و لو في حد من الاخوة مزعلك او كلمك في حاجة .. قولي بس و انا اشفره و اظبطه اخر تظبيط ..

    قولي بس وانا اقول للمسئولين عندنا وممكن نصعد الموقف و الموضوع و الامر ...
    و نعمل مظاهرات انا وميت علشانك يا عبدو .. ومستعد اعملها يا عبدو
    ........

    كلام ميت شجعني اني اقول لك كده

    بس ... كلام الاخت الفاضلة اصرار امل

    باين لسه عندها امل كبير في زمن اليأس

    خلاني افكر من جديد

    يعني في أسوأ الظروف و الاحتمالات ليك ايه ؟

    يتقبض عليك .. صح

    ( علي الرغم انهم مش محتاجين حجة للقبض علي اي حد خصوصا انت في ظل قانون الطوارئ )

    طب الموضوع مستاهل انه يتقبض عليّ ..

    لو يستاهل وكانت فعلا اداة للتغيير


    يعني مثلا هل ممكن ان يضحي بحياتك وحريتك من اجل ان تقوم بعملك كمراسل لقناة معينة لنقل مجزرة في مكان معين في فلسطين ؟
    ايوه و نضحي بكل حاجة كمان ...

    بس ده مجرد مدونة

    ممكن تهدي اللعب شوية هنا ...
    و المدونة تفضل شغالة
    تيقي مدونتك الرسمية و الشخصية و التي تضع فيها مواضيع عائلية

    وعندك مدونة تانية خالص

    باسم مستعار ... اعمل فيها اللي انت عاوزه ...
    اكلم - انشر
    بس ما تقلش كده صراحة ممكن تحط لينكها في مدونتك ..

    ممكن تحط ليها بانر كتبادل اعلاني .. الخ

    بس ابوك يا عبدو يجي ويقتنع بالحوار الهادئ و المقنع ...

    ولو عاوزني اجي اقنعه انا مستعد ...

    ومستعد اخرج مخصوص من بياتي الشتوي ومن اكتئابي علشان خاطرك ...

    كن أذكي من الكل

     
  • At 15 March 2007 at 02:04:00 GMT, Blogger أنس عماد الدين said…

    خليك فاكر حلم حياتك ايه ؟

    عيـــــــــــــاش

    عياش كان دايما راعب العدو بدون أن يظهر في الصورة

    كان يكافح من وراء الكواليس ...

    كان يصلح كان يبني كان يعمر

    دون ان يراه احد او يسمع به أحد ...

    عيـــــــــــاش

    كان عبقري في مجاله

    متفوق فيه ... قمة التفوق ..

    تذكر قدوتك .. يا عبدالرحمن

    سر ونحن معك

     
  • At 15 March 2007 at 02:08:00 GMT, Blogger أنس عماد الدين said…

    اه نسيت اقولك ..

    سيبك من كلام ميت الثوري ..

    اللي هيخليك تبات بره البيت

    وتتحرم من المصروف ..

    المصروف يا عبدو .. وكمان بدون نت ولا جهاز ..

    ممكن يحصل لك ايه ؟؟

    سيبك من كلامه ده طول عمره ثوري
    اصله عايش في سكن طلبة و عايش حياته وابوه مش معاه ..

    طب انا هاقول لابن عمه يقول لابوه علي اللي هو بيكتبه علشان يعمل معاه زي ما ابوك عمل .. وهاوصل الكلام لامه و انا عارف ومتأكد ان رد فعلها اشد من رد فعل امي و اعنف ..

    * ملاحظة تم حذف شعار الاخوان من موقعي تحت الاجبار .. بعد اعتراض الجميع في المنزل عليه ... و منعت من الكلام عن رابطة مدوني الاخوان .. الخ
    ربنا يستر ....

     
  • At 15 March 2007 at 03:47:00 GMT, Blogger محمود سعيد said…

    إسال بلال أنا قلت له إيه

    وأنا بقولك كملة بلال :
    لا تخف إن قلت ..واسكت ولا تقل إن خفت

    بس اسمع الكلام برضه وإعمل اللى انت عاوزه

     
  • At 15 March 2007 at 10:18:00 GMT, Anonymous ميت said…

    إيه ده بقي يا أنس
    في الأول قلت الحمد لله لقيت محرض معايه
    دلوقتي هرجع أقعد جنب الحيط تاني هستني محرض تاني معايه
    بس علي فكره يا أنس ، انا مش قاعد في سكن طلبه ، وهذه معلومه خاطئه ، لأني قاعد في بيتي في القاهره ، عندي شقتين في القاهره ، يعني مش هحتاج أقعد في سكن مع طلبة
    وبالنسبه لوالدي ، فهو أحد المحرضيين :D ولو عايز نمرته عشان تبلغ عني هديها لك
    علي فكره ياعبده ، انا عملت زي ما أنس عمل ، عملت مدونه تانيه ، وخاصه بعد الضغوط الشديده إلي تعرضت لها بسبب تدوينه أنا أهين رئيس الجمهوريه .
    وبعدين إنته مشكلتك إهون بكتير من بلال ، إنته عارف إني بلال كان بيدون وهوه متربس الباب وبيدون بعد منتصف الليل أكنه بيتفرج علي فيلم من إياهم
    ده كان خايف إن أبوه يعرف إنه بيدون ويزعق له عشان إلي هوه بيكتبه عن الإخوان

    وعلي العموم ياعبده .
    ياحريه فينك فينك أهالينا بينا وبينك

     
  • At 15 March 2007 at 11:18:00 GMT, Blogger أروى الطويل said…

    يعنى هو كلام الاب لازم يتسمع الحمد لله فى البيت عندنا كل يوم الصبح بابا بيفتح المدونة يشوفها والحمد لله الى الان ما قليش حاجه ربنا يستر

    يعنى حاول توفق


    ممكن تعمل مدونة تانيه باسم تانى وتكتب اللى انت عاوزه دى نصيحه اخوية يعنى

     
  • At 15 March 2007 at 11:50:00 GMT, Blogger AbdElRaHmaN said…

    بداية سلام عليكم
    انا هرد عن كل مدون في رد لوحده
    عشان ما اخلطش الورق
    --------
    بداية
    الاستاذه أمل
    كلامك منطقي جدا جدا جدا
    فعلا كلام رائع
    و الله انا معاكي تماما في موضوع التعامل بهدوء مع الاب وكده
    بس ده ميمنعش اني اتضايقت فعلا
    طبعا مقدرش اقول كده
    ومتضايقتش من بابا لا سمح الله
    بس من الفكرة اللي تخلليه يقول كده .. أكيد مقصدش فكرة عدم التجريح .. أقصد فكرة ان التدوين ملوش لازمه اصلا
    دي ي حد ذاتها فكرة مرعبه بالنسبة لي
    في الاخر جزاكم الله خيرا على التعليق

     
  • At 15 March 2007 at 11:56:00 GMT, Blogger AbdElRaHmaN said…

    :D دعاء عادل
    و الله كويس ..
    جميل ان حد يكون ماشي مع ابراهيم عيسى ويقول كده
    ان شا الله كان بيكتب في الرياضة
    بس صعب اوي
    عموما كلامك صح أكيد
    انا متفق معاكي ..
    بصراحة انا مكنتش مقتنع الاول
    لكن لما لقيت الاجماع ده فعلا
    حبيت اأكد اني لازم اكتب زي ما بتقولوا .. بنية كويسة
    على الاقل
    عشان لما صوتي يوصل .. يكون لحد استفاد
    عموما
    شكرا على التعليق عندي جدا

     
  • At 15 March 2007 at 11:58:00 GMT, Blogger AbdElRaHmaN said…

    ههههههههههه يا عم محمد متقولش كده
    الميت ميت بكرامته يعني

    :D انا مقتنع شوية بكلام من اللي بتقوله
    بس ان الحرية بينها وبينا اهالينا
    دي وسعت شوية :D
    منور المدونة يا سيدي
    سلام

     
  • At 15 March 2007 at 12:03:00 GMT, Blogger صوت عصفورة said…

    تسائولاتك في البوست دي فكرتني بفكرة كانت تدور في ذهني اول ما بدأت التدوين خاصة عندما اخترت ان اعلن اني بنت من الأخوان...كانت المشكلة التي أمامي هي اني أخشى ان يأخذ بعض الناس الكلام الشخصي و يعمموه على جمهور الاخوان ...و لذلك فكرت ان اعمل مدونة أخرى باسم مستعار و اكتب فيها هرتلتي و غبائي و تخريفاتي ... بس بعدها افتكرت حاجة .. افتكرت النية ... و افتكرت الناس الي هتقرأ الكلام ده ... افتكرت اني مسئولة ... و اني هتحاسب على اللي بكتبه ... و ساعة الحساب هتحاسب كآية بس .. بصرف النظر عن مدونتي كأخت أو كواحدة مخرفة .. و فكرت انهي الي عايزاها في ميزان حسناتي ... و فكرت اني هتكسف اوي من المدونة التانية ... انا مش هقضي على تخاريفي...او على الافكار الشاطة جدا اللي بتجيلي عن كل حاجة في الحياة ... بس هخليها بتاعتي...
    رأيي ...انك تسمع كلام والدك ... لان رأيه هو سكة الاخوان .. و لان التجريح و الشتايم مش طبعنا و لا سلاحنا ...و لاننا المفروض نثبت امتلاكنا لوسائل اكثر تحضرا ممكنة لنا ..
    اثبت لوالدك قدراتك وتأكد أنه سيغير موقفه في حكاية قراية كل بوست قريبا ..
    و تذكر حاجة مهمة جدااااااا
    ((فأما الزبــد فيذهب جـفاء، و أما ما ينفع الناس فيمكث في الأرض))
    تمنياتي لك بالتوفيق ...

     
  • At 15 March 2007 at 12:03:00 GMT, Blogger AbdElRaHmaN said…

    عم أنس
    أهه ده اللي كان مضايقني امبارح يا سيدي
    بص بقى يا عمي
    موضوع طنط سلوى مختلف عننا شوية
    الا في نقطة الشعار اللي انت حذفته
    يعني انا فعلا مش مقتنع بكده
    الشعار هيفضل
    كانت مشكلة بابا التانية اللي نسيت اقولها
    هي صورتي اللي مسحتها
    هو بيقوللي يعني كاتب اسمك الاول
    وحاطط صورتك
    عنده حق برضه
    ----
    مثلي الاعلى المهندس يحيي
    كان كتوم
    لكن ما كانش جبان
    كانت بياناته مدوية
    لكن ما كانش بيجرح
    جزاكم الله خيرا على التذكير
    كفايه دي عليا و الله

     
  • At 15 March 2007 at 12:05:00 GMT, Blogger AbdElRaHmaN said…

    محمود باشا سعيد
    جزاكم الله خيرا على التعليق
    فعلا هي دي
    لا تخف إن قلت ..واسكت ولا تقل إن خفت
    ان شاء الله مش هسكت
    صدقني مش هسكت

     
  • At 15 March 2007 at 12:08:00 GMT, Blogger AbdElRaHmaN said…

    أروى الطويل
    :D انتم عندكم حرية في البيت يا بنتي
    انا بابا لما شاف مشافش غير موضوع واحد
    انا مقتنع لحد دلوقتي انه كان صعب اوي
    بس و الله انا كاتبه عن قناعه داخلية
    بتكلم بس بصوت عالي
    هي دي الفكرة
    اما بالنسبة للمدونة التانية
    فدي فكرة لا أستطيع انكار انها بتفرض نفسها عليا فرضا
    وربنا ييسر
    واهه كل حاجه ممكن تحصل
    بس بصراحة
    مش هتكون المدونة دي لها معنى لو انا مكتبتش فيها كل اللي انا عاوزه
    بس سلام

     
  • At 15 March 2007 at 12:15:00 GMT, Blogger AbdElRaHmaN said…

    صوت عصفورة
    كلامك صح جدا يا استاذه ايه
    انا معاكي
    بس انا ان شاء الله ناوي قبل ما اكتب
    وناوي انا بعمل ايه
    وعلى الاقل لما نتحاسب
    نكون معذرين قدام ربنا اننا حاولنا نوصل فكرتنا للمجتمع الجديد اللي اسمه المدونين
    و الله نية جميله
    ونوايا ممكن تكتر اوي
    ربنا يرزقنا الاخلاص
    اما بالنسبة لرأي بابا
    فده الرأي السائد فعلا في وسط الاخوان
    خصوصا جيل الوسط وجيل الكبار
    اما بالنسبة للشباب المتحمس
    فلا أنكر ان في توجه للتعامل بعنف مع الذين يظلموننا
    أكيد مش عنف سلاح
    لا عنف في الكلام
    وعنف في الرأي
    ده ممكن يقترب بشكل او باخر من الفكر الجهادي خصوصا التكفيري منه
    لكن الاتجاه ده الاخوان طبعا بيقاوموه بالرأي وبالعقل
    وفي النهايه ربنا ييسر الخير
    جزاكم الله خيرا على التعليق
    سلام

     
  • At 15 March 2007 at 16:01:00 GMT, Blogger belal said…

    من الأول ..أنا داخل ..أشرشح ,,عشان ماحدش يضايق ..أنا غير مسئول عاللي أنا هاكتبه ..ماشي :
    عبدوا باشا يا هفأ يا كبير...اعترض اعترض ....الاستقلال التام أو الموت الزؤام والزؤام خالص...وأنا ومحمد عادل الثورجي الكبير معاك...كلنا في الهوا سوا
    ...
    محمد باشا بن عمي (ميت ): بص يا حبي أنا كنت مش عايز أقولهلم مش عشان الإخوان ..ولا حاجة أنا مستعد أتحمل رد الفعل على كلامي السياسي ..وأدافع عنه ..ولو هايحصل ايه بالذي..المشكلة كانت في البوستات غير السياسية _العاطفية مثلا_واللي أنا شلتها خلاص من المدونة ...شلتها كلها ..ومش عشان أنا كنت خايف _لا سمح الله _ لكن عشان أنا مابحبش حد يدخل في شئوني الخاصة بالذات الأسرة ..وبعدين شطبت كل المواضيع دي ..وكنت ناوي أصلا أشطب المدونة زي ما انت وعبدو ومحمود سعيد عارفين ..وقلت أعمل مدونة تانية وبعدين كسلت ..ولكن أنا لا تعجبني _بصراحة مدونتي _ولا تعبر عني بالكامل
    لكن طبعا هيا مدونتي أولا وأخيرا ...أنا مابحبش لما ألاقي أبويا قاعد يتكلم عن المدونة ...وبحس كتير إن المفروض أشطبها ..لكن لا بأس بها ..الآن ..وحتى ممكن أي حد يلاحظ ده من التدوينات الأخيرة بتاعتي ...بص يا عبدوا ممكن نرجع تاني لفكرة المدونة المشتركة نكتب فيها كلنا ...مع بعض ..عن اللي احنا مش عارفين نكتبه عندنا ..والمشاركة للجميع..بتكلم بجد ...

     
  • At 15 March 2007 at 17:01:00 GMT, Blogger belal said…

    وكمان مع الاحترام والتقدير حكاية الاسم المستعار ..وتشيل صورتك دي غلط ...عيب عليك لما تكون الأخوات حاطين اسمهم ..وانت خايف.. .مش احنا يا عبدو اللي نشتم ونجري..ولا ننقد من وراء ستار....لما تشيل صورتك زاسمك ومش عايز تعلن عن نفسك ده يفقدك كثيييييييييييييييييييييييرا من المصداقية قدام أي حد ..حتى أنا
    مش تقول إحنا مابنخافش وتشيل صورتك ..
    غلط غلط غل ط...
    ..لأ يا عبدو
    هتخاف من ايه ومن مين ..
    .....
    بجد انت خايف يا عبدوا ..؟؟؟؟
    لأ عيب أوي كده يا عبدوا
    ...
    عيب خالص ,,لأأ يا عبدو

     
  • At 15 March 2007 at 17:01:00 GMT, Blogger أنس عماد الدين said…

    فكرة ممتازة يا بلال ..

    انا فلعا مش قادر اكتب اي موضوع رومانسي خالص في مدونتي ..

    مش قادر اكتب عن فتاة أحلامي .. احسن أمي تذبحني .. و أخت تقول مش معني .. وانا كمان .. و العين بالعين ...

    مش قادر اكلم عن اخر البنات المحترمين وهو بوست نفسي اكتبه من زمان ... بجد
    عن البنات المحترمين اللي في دفعتي .. واللي هم مش أخوات .. بس الاحترام مصبوغ علي كل تصرفاتهم ...
    ..
    مش قادر ..

    مستني رد باقي الزوار و الكرام

     
  • At 15 March 2007 at 17:46:00 GMT, Blogger mesh2dra said…

    السلام عليكم

    اولا
    كلام بابا ده من منطلق الخوف عليا
    متفقين

    ثانيا
    يبقي لازم اسمع كلامه

    ثالثا
    طب ماهو انا لو سمعت كلامه حتخنق

    رابعا
    اتبع يا سيدي المثل اللي بيقولك
    خلي ضربتك توجع وما تعلمش

    سلاماتي

     
  • At 15 March 2007 at 18:56:00 GMT, Anonymous elfagreya said…

    سلام عليكم,,

    أخى الكريم عبد الرحمن..

    مش عارفة فعلا ايه الصح بس انا شايفة ان فى كذا حل اتقال..واحد انك تعمل واحدة تانية وتقول فيها كل اللى عاوزه بس ده يتوقف على هل هتقدر تسيب غريب كده بسهولة..معرفش؟؟

    ثانيا انكم تكتبوا فى مدونة جماعية وده حل جميل بس بتكون مختلفة عن انك تكون لوحدك فى الحرية وفى التركيز..

    ثالثا انك تعمل تفاهم مع والدك وتحطوا حل وسط وده بالنسبة لى أفضل حاجة مع اعلان انك لن تتنازل عن أراءك أبدا ولكن مع الحفاظ على عدم التجريح وده فعلا تمام وأجمل حتى لو مكنش طلب
    المهم توصلوا لحل وسط دون التنازل عن أراءك لانها ببساطة هى معنى المدونة الحقيقى

    وعشان الوصول لحل وسط فيه حاجتين ممكن لو مكنش بيشوف مدونات تانية..ممكن تروحوها وتوريله ان فى ناس تانية بتقول رأيها بردو..اما الحاجة التانية انك تذكره بأنه هو كان له دور كبير فى ان تتعلم أن تقول رأيك ويكون ليك موقف ويجب أن يشاركك فى ده بكل صوره

    ربنا ييسر الأمور وعمو يقتنع ان شاء الله..

     
  • At 15 March 2007 at 22:23:00 GMT, Blogger shams said…

    ده انا لغاية دلوقت محدش عندنا في البيت يعرف اني عندي مدونة علشان نفس السبب ده .. مش هكتب بحريتي وهحس ان مقص الرقيب موجود

    بس بصراحة بباك خايف عليك وانت كمان هدي اللعب شوية

     
  • At 16 March 2007 at 12:48:00 GMT, Blogger Mohamed Almohandes said…

    الأخ الحبيب/ عبد الرحمن
    لا نستطيع أن تتوقف عن تدوينك، أبلغ والدك العزيز باعتراضنا الشديد على ذلك؛ رغم تفهمنا لحرصه عليك كأب.
    وأبلغ اعتراضاً أشد لإخوان المنصورة على ذلك، وأبلغهم على لسانى: "ما هكذا تورد الإبل".
    وعلى العموم، أنا أرى أن الحل الوسط هو أنسب الحلول على الإطلاق، فلتلتزم بعدم الإساءة إلى أشخاص، أو هيئات، أو جهات، ولتنتقد حينها كما تشاء..

    اتفقنا..
    ولا تحرمنا من تدوينك أبداً..
    والسلام

     
  • At 16 March 2007 at 12:59:00 GMT, Blogger المـ(همس)ـشاعر said…

    عجيبة ..

    ليه أنا مش شايفه انك بتتدى بالكلام أصلا ... فى حين إن باباك شايف كده؟

    و لا أعرف

    المهم يا عبد الرحمن ...
    قول لعمو ... و أظن هو عارف كده

    إننا بلد ديموقراطية جدا .. و بتكفل لنا جميع حقوق التنفيس و الزعيق

    و فى الأخر بتتبع سياسة .. "الى فى نفسة صوت ... يزعقة"

    و فى الأخر بالعربي الفصيح " لقد أسمعت لو ناديت حيا .. و لكن لا حياة لمن تنادى"

    الحكومة+ النظام+ مبارك نفسة ... مش هيهمة تتكلم من هنا للصبح

    بس أنا مع عمو فى حته ... التجريح بلاشه ... حتى لو كان فى مين ...

    و طبعا فى فرق بين إبداء الرأى و التجريح ..

    الأول ماشى .. التانى لا

    بس من الأخر بجد بجد بجد ....أوووووووووعى تسيب غريب

    سمعت عمرك عن حد ساب بيته لان جارة مش بيحب الأناشيد الى بيشغلها؟؟

    أهى هى كده بالظبط :)

    و أخيرا .... فكره ... و أستخير .. وفكر فى الناس الى عايشة معاك .. و حاول توازن بين الأمور

    و ربنا يكرمك يا رب

     
  • At 16 March 2007 at 16:37:00 GMT, Blogger AbdElRaHmaN said…

    سلام عليكم
    ------
    عم الحاج بلال المفتري
    القوي عليا انا بس
    بص يا سيدي
    المشاركة الاولى مفيهاش كلام كتير يترد عليه
    بس للأسف .. انا فعلا خايف
    و الله مش خايف على نفسي
    بالعكس تماما
    انا مقتنع ان هييجي يوم وكلنا نروح في حديد
    وان شاء الله في سبيل الله
    لكن انا ازعل اوي لو والدي اتاخد بسببي
    بابا بيقوللي فعلا
    انه مستعد انهم ييجو ياخدو البيت باللي فيه
    بس لسبب مقنع
    مش عشان كلمتين انا كتبتهم
    ثانيا
    بالنسبة للصورة
    يا عم بلال الصورة دي فعلا مش مشكلة بالنسبة لي
    ولو كانت مشكلة للي في البيت
    فقليل من التنازل من طرفي لن يوقف الدنيا
    ثم الاسم زي ما هو
    عبدالرحمن شـ..
    أقصد عبدالرحمن عياش
    :d شفت بقى اني مش خايف
    يللا يا سيدي
    ربنا يفرج عننا كلنا
    سلامو

     
  • At 16 March 2007 at 16:39:00 GMT, Blogger AbdElRaHmaN said…

    أنس .
    أنا معاك ان فكرة بلال جميلة
    وان شاء الله ننفذها بيننا
    ويكون كمان علي معانا
    ولما نتمسك نتمسك عصبه كده
    وعلينا واحد
    ييلا يا سيدي
    ان شاء الله نتفق على الموضوع ده بعدين
    سلام

     
  • At 16 March 2007 at 16:41:00 GMT, Blogger AbdElRaHmaN said…

    الاخت مش قادرة :D
    جميل جدا الكلام
    متفقين طبعا ان ابا خايف عليا
    ان شاء الله احاول اخد بنصيحتك
    أخللي ضربتي توجع
    ومتعلمش
    على فكره
    ده اسلوب امن الدولة
    ياخدونا يعدمونا العافية
    ونتعرض على دكتور
    يقول يا عم ده كله تمام والواد ده بيستهبل
    :d منهم نستفيد
    سلام

     
  • At 16 March 2007 at 16:44:00 GMT, Blogger AbdElRaHmaN said…

    الاستاذه اسماء .. الفجرية
    فعلا كلامك رائع
    بس انا اتكلمت مع بابا في النقطة دي
    نقطة المدونات التانية
    وان في اربع الاف مدون غيري بيكتبوا بالطريقة دي واكتر
    وقلتله وائل عباس مثلا
    هو بصراحة قفلني لما قاللي افتح اخوان لاين دلوقتي وطلعلي من الموقع كلام زي اللي انت ككتبته
    قلتله اخوان اونلاين رسمي
    قاللي طيب مدوني الاخوان الرسميين
    بيكتبوا كده

    بصراحة حسبتها لقيتكم كلكم مش بتكتبوا كده
    يعني بأدب اوي
    ونقد شديد فعلا
    ان شاء الله بقلدكم
    واقلد عبدالمنعم محمود
    كلكم صح ان شاء الله

     
  • At 16 March 2007 at 16:45:00 GMT, Blogger AbdElRaHmaN said…

    شمس
    و الله العظيم هم ما كانو يعرفوا
    بس الله يجازي اللي كان السبب
    راح يقوللهم شوفوا ابنكم كاتب ايه
    يا حلاوه
    ربنا يستر بقى
    وان شاء الله نهدي اللعب
    واما نشوف اخرتها

     
  • At 16 March 2007 at 16:49:00 GMT, Blogger AbdElRaHmaN said…

    الأخ الحبيب محمد المهندس
    تمام كلامك جدا
    بالنسبة لوالدي
    نوصل له الاعتراض ان شاء الله
    بس انت شايف اللي اعترض قبلك
    :D اهه محمد عادل في الدراسه دلوقتي مش عارف يروح فين
    واهه شكله هيتحول للنيابه وعليك خير
    :)
    اما بالنسبة للاخوان
    فهم فكرتهم زي ما انت بتقول
    عدم النقد بالتجريح
    لكن نوصل لهم فكرتك ان شاء الله
    سلام يا سيدي

     
  • At 16 March 2007 at 16:49:00 GMT, Blogger AbdElRaHmaN said…

    الأخ الحبيب محمد المهندس
    تمام كلامك جدا
    بالنسبة لوالدي
    نوصل له الاعتراض ان شاء الله
    بس انت شايف اللي اعترض قبلك
    :D اهه محمد عادل في الدراسه دلوقتي مش عارف يروح فين
    واهه شكله هيتحول للنيابه وعليك خير
    :)
    اما بالنسبة للاخوان
    فهم فكرتهم زي ما انت بتقول
    عدم النقد بالتجريح
    لكن نوصل لهم فكرتك ان شاء الله
    سلام يا سيدي

     
  • At 16 March 2007 at 16:54:00 GMT, Blogger AbdElRaHmaN said…

    آيه .. همس المشاعر
    ربنا يخلليكي
    اخيرا شرفتينا
    ان شاء الله نحاول نلتزم بالكلام بتاعكم ..
    بمعنى اني مبعدش عن خط النقد
    لكن ابعد عن التجريح
    بالنسبة لاني اسيب غريب
    فانا مش قادر فعلا
    والكلام في الموضوع ده كان تهديد لنفسي قبل ما يكون تهديد لغيري
    فعلا مقدرش
    عموما
    جزاكم الله خيرا على التعليق
    سلام

     
  • At 15 April 2017 at 11:09:00 GMT, Blogger نظافة مثالية said…

    تتشرف شركة المثالي جروب للنظافة الشاملة بالمنطقة الشرقية بتقدم شركة تنظيف منازل بالخبر والتي تقدم افضل خدمات تنظيف المنازل والشقق والفلل والمجالس والكنب والسجاد والموكيت بالاعتماد عليافضل الامكانيات الحديثة والعمالة الماهرة وخبرة عشرات السنوات بمجالات التنظيف لجميع اركان المنزل وكل مع يحيط به فمع شركة تنظيف بالخبر تستطيعون الحصول علي افضل جودة ممكنة لتنظيف المنازل بارخص الاسعار المثالية

    شركة تنظيف منازل بالخبر
    شركة تنظيف بالخبر
    شركة تنظيف مجالس بالخبر

     
Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats