AbdulRahman Ayyash
 

AbdelRahman Ayyash's Facebook profile

Saturday, 17 February 2007
خطوبة بنت عمتي .. والله ما ينفع



هي : ايه يا باشمهندس .. ايه اللي جابك بدري ؟
أنا : والل لقيت نفسي مخنوق في الفرح مقدرتش أكمله
هي : ربنا يسعدك يا استاذ وعقبالك



---
كان هذا الحوار هو ما استقبلتني به أم محمد بوابة العمارة بعد عودتي في حوالي الساعة التاسعة والنصف
بعدما كان متوقعا أن أعود في الثانية عشرة أو الواحدة بعد منتصف الليل
ولأن السبب الظاهري كان أنني " اتخنقت " من جو الفرح ..
باختصار شديد .. أشرح لكم انا كان تصوري عن فرح بنت عمتي
اللي انا متربي معها
اللي هي أختي أو أكتر من أختي
كان تصوري انه هيكون جلسة عائلية بموسيقى هادئة ( طبعا أنا أفضل الاناشيد الاسلامية على اختلاف أنواعها ) لكن معرفتي بعائلتي فقد توقعت ألا يكون الفرح اسلاميا .. ولكن بتلك المعرفة أيضا توقعت ألا يكون المستوى منحدرا بمستواه الفني إلى هذه الدرجة
وتوقعت أيضا أن يكون العريس والعروس جالسين في وسط الحفل كالقمرين
كما تصورت لأول وهلة أن حفل الخطوبة لا يلزمه التصوير في الاستوديو
ولا يلزمه الزفة بالعربيات
فكل تلك الشكليات تكون في الزفاف أو ليلة البناء
عموما .. فقد هالني ما رأيت في ذلك الفرح
لدرجة أنني قد خرجت في فرح أختي قبل أن يتم نصف ساعة
للتعارف أولا
فالعريس .. أحمد
اليوم .. الجمعة 16 فبراير
بصفتي شخص مثقف ( مغرور من يومي ) فقد كان لابد أن أشاهد حلقة يسري فودة .. سري للغاية .. المعروض على الجزيرة قبل أن أذهب للفرح
وبالتالي فقد اعتبرت نفسي متأخرا عندما وصلت هناك في الثامنة والنصف
ولكني علمت أنهم لن يأتوا إلا بعد التاسعة
ووصل العريس والعروس في الساعة التاسعة الا ربع
بمجرد أن وقعت عيني على العروس حتى أحسست أن قدمي لا تستطع حملي
لا أدري كيف أقولها .. لكن هذه ليست أختي ..
مينفعش
مش صح اللي بيحصل
المكياج !!!
الفستان !!!
مش ينفع كده والله
عموما .. ده اللي انا شفته في العروسة
العريس زي اي عريس
عادي . أحمد كان كويس
طبعا كانت الموسيقى المصاحبة صاخبة لدرجة انني قطعت منديلا كان في يدي لأضع منه في اذني كما أفعل دوما في الأماكن الصاخبة
وبالتالي فقد كانت البداية بالنسبة لي غريبة جدا
ليست البداية التي تصورتها
انا جلست ..
وبدأت ككل الافراح العادية والكثير من الاسلامية اسماء الله الحسنى بتاعة هشام عباس
وبعدها كان النشيد الذي اخترته .. اغنية الدعاء ..
supplications
لسامي يوسف
ثم بدأت ال ... مش عارف بصراحة اسميها ايه
موسيقى سلو هادئة
انا مفهمتش في الاول
لكن لما لقيت العريس بياخد العروسة وبينزلوا يرقصوا سلو في نص القاعة
قلت ان دي بداية غير مبشرة على الاطلاق
وبالتالي رأيت أنه من واجبي أن أخرج خارج القاعة قليلا حالما تنتهي تلك ال... فعلا
وخرجت أنتظر نهاية الرقص
وما ان انتهى الرقص حتى جلسا مرة أخرى
وعادت الأغاني العادية تصدح في القاعة بذلك النعيق الذي لا يعني الا شيئا واحدا .. جهل مطبق في كيفية الاحتفال
ثم وجدت شيئا اخر لم أكن أتصوره
فالأخ شقيق العروس .. الأخ الملتحي صاحب الشيخ حسان ورفيق الدكتور حازم شومان وووو
لا أعرف كيف تقبل ذلك
لكنه حدث
ثم كان شيء آخر غريب قليلا
فقد نزلت قريباتي .. ومن أعرفهن من البنات .. لكي يرقصوا مع العروس
وخالي ازاي يقبل على بنته كده ..
هي آه ما عملتش زيهم .. بس مجرد انها تقف معاهم دي في حد ذاتها مشكلة
وتصفق وتمشي حوالين العروسة وهي بترقص !!!!
خالي اللي كل العيله بتقول انه وانه بيغير على بناته وبيخاف عليهم وووو والمواقف كتيرة
لم أتخيل أن أجد ذلك في فرح لأحد من أقاربي
وعندما وجدت شباب المنطقة التي نقطن فيها بدأوا يرقصون على أنغام " النهاردة فرحي يا جدعان " قررت ألا أبقى ثانية واحدة
وذهبت لآخذ المفتاح من أمي .. فقد نسيت نسختي في المنزل
رفضت في البداية ولم تجد أمام إلحاحي إلا الموافقة
ولكن والدي أخبرني أنه من الأفضل أن أفعل مثله وأظل خارج القاعة حتى ينتهي ذلك الهلس
وخرجت اتلمس أحدا من معارفي
فوجدت ابن عمتي اسلام يتناقش مع أحد أقارب العروس ..
وعندما بدأ ذلك القريب الذي لا أعرف اسمه يسب في الاخوان ..
وجدت أنه من الأسلم لي وله أن أرحل بسرعة كي لا أخطئ في حقه أولا يخطئ في حقي
وذهبت منزلي
وفتحت الماسنجر مسرعا كعادتي
وكلمت أول ما كلمت .. فداء الوطن .. فأخبرني أنني قد فعلت الصواب
وكلمت أمي على الشبكة :) .. فأخبرتني أنه برافو عليا

وكلمت الثالثة .. قالت لي هداهم الله .. وأكدت على صوابي
وفي حوالي الثانية عشرة والنصف
وجدتهم يطرقون باب المنزل عائدين
وبعدها علمت أنهم عملوا لأختي الصغيرة يمنى عيد ميلاد .. احتفلوا فيه جميعا
ورقص الشباب ايضا
يمنى أختي تتم السادسة بالأمس
كل سنة وانتي طيبة يا يمنى وعقبال ميت سنة
وألف مبروك يا عروسة.... وربنا يتمم بخير
وليا كلام تاني معاكم كلكم ياللي في بالي
عموما .. انا منتظر التعليقات يا اخواننا
بس بدون تجريح الله يكرمكم
كفاية اللي لقيته من العائلة
جزاكم الله خيرا
والسلام
عبدالرحمن

Labels: ,

posted by AbdElRaHmaN Ayyash @ 12:24  
33 Comments:
  • At 17 February 2007 at 15:28:00 GMT, Blogger nar said…

    أولا ماكنش المفروض تقول أسامي
    ثاني حاجة فعلا حاجة تجنن ان الناس يعتبروا يوم الفرح يوم خارج التاريخ فلا حرج إذن ان يعملوا كل اللي هما عايزينه براحتهم خالص وهذا لا يحدث معك فقط حدث معى في فرح بنت خالي بالكربون زي مانتا بتقول ...وخالي بيقول سيبهم يفرحوا يوم ...هوا ايه احنا بنحاسب ربنا بالحتة النهارده اه وبكره لأ سبحان الله

     
  • At 17 February 2007 at 15:30:00 GMT, Blogger AbdElRaHmaN said…

    ههههههههههههههه
    والله انا داخل اقول همسح الرد
    بس الحمد لله طلعت رافع راسي يا عمي
    انا معاك ميه ميه ف اللي بتقوله
    لكن يا بلال الاسماء مش هتفرق خالص
    مش كل الناس عارفه اللي انت عارفه :D
    سلام يا سيدي
    ومتنساش بكره

     
  • At 17 February 2007 at 16:40:00 GMT, Blogger أروى الطويل said…

    ههه الف مبرووك والظاهر البوست ده هيعمل مشاكل جامده فى العيله بس خليك راجل ولا يهمك مع انك خبطت شويه كده
    يللا سلام
    على فكره انا اختى اسمها يمنى برضه بس عسل

     
  • At 17 February 2007 at 16:44:00 GMT, Blogger AbdElRaHmaN said…

    هههههههههههههه
    لا مؤاخذه يعني
    "على فكره انا اختى اسمها يمنى برضه بس عسل "
    يعني هل هذا ينفي ان يمنى اختي عسل وللا حاجه
    هههههههههههههههه
    انا خبطت فعلا
    وهخلليهم يقرأوها والله
    واللي يحصل يحصل
    يعني انا هخللي ماما وبابا يقرأوها النهارده
    وألاء وخطيبها بكره او بعده
    وبعدها ..
    سأذهب غير مأسوفا علي (A)
    عموما
    ربنا يسترررر

     
  • At 17 February 2007 at 17:26:00 GMT, Blogger AbdElRaHmaN said…

    واضح انك لماحة يا أروى
    اللي حصل ان بعد اما ماما شافت البوست
    انا اخدت تهزيءتين حلوين
    وبعدها اضطريت أمسح جزء معين عن قرايبيي
    وأعدل كلمة لأسلوب اخر
    عموما ..
    ربنا يستر في الباقي
    سلام

     
  • At 17 February 2007 at 18:03:00 GMT, Blogger Dr_Oss said…

    بص يا عبد الرحمن .. أنت معاك حق في كل اللي عملته .. بس برضه أنا شايف انه غلط انك تحكي الموضوع كده عالبحري

     
  • At 17 February 2007 at 21:04:00 GMT, Blogger AbdElRaHmaN said…

    اقوللك ايه بس يا دكتور
    واضح اني لازم امسح الاسماء كلها
    وربنا يستر تاني
    واهلا بيك معانا

     
  • At 17 February 2007 at 21:45:00 GMT, Blogger د/ دسوقي said…

    السلام عليكم

    زين ماعملت

    لكن من غير اسماء كانت التدوينة افضل

    تحياتي

     
  • At 18 February 2007 at 00:07:00 GMT, Blogger AbdElRaHmaN said…

    حياك الله يا دكتور
    جزاكم الله خيرا على تعليقك
    :) وبناء على الرغبات فقد تم تعديل الاسماء التي يتوقع ان يأتي من ورائها ضرر
    أما الباقي فقد تركته
    والسلام

     
  • At 18 February 2007 at 00:55:00 GMT, Anonymous Anonymous said…

    بسم الله الرحمن الرحيم :)
    اول حاجه عرف بلدنا دلوقتي هي دي طريقة الافراح :) .. والسبب ان الافراح الاسلامية مش منتشرة بين الناس العادية .. ياعني بس بين الاخوان ممكن تلاقي فرح اسلامي .. بين السلفين هاتلاقي فرح اسلامي .. ولكن الناس العادية .. صحيح مسلمة .. بس مفيش ناس بتعنها على الصح هاتعمل ئيه ؟؟؟ هاتعمل زي العرف ما بيقول .. زفة وفرح وموسيقي واغاني واذا حضرت افراح الشيرتون او الهيلتون هاتقول فرحكم كان حلو اوي :) ومودب جدااا :)

    مش هاقدر اقول رائي انك اتصرفت صح ولا غلط .. بس كان على الاقل تقولهم افكار تكون قريبه من تفكرهم كان ممكن يتحجز قاعتين مثلا واحده لببنات وواحده للاولاد :) ( زي فرح اختي ) وشغلوا آي اناشيد اسلامية تنفع معاها الرقص او متشغلوش خالص وخالي الناس تتكلم اوي يتقال نكت او يتعمل مسرحيات .. تضحك .. المهم تخالي فرح اسلامي عادي والناس تنبسط .. والناس لما تشوف التجربه دي ناجحه وكويسة ومش مكلفة .. هي لوحدها هاتقول انا عاوز اعمل زي فرح فلانه كان كويس كل الناس انبسطت :)
    هي المشكلة مشكلة الناس الملتزمة ئلي بتمشي ومش بتقول رائيها او افكار تشارك فيها في تحويل الفرح العادي لفرح اسلامي عادي

    عموما انا عارفك طول عمرك بتصرف غلط :P
    اخوك جندي الله

     
  • At 18 February 2007 at 12:49:00 GMT, Anonymous محمد غفاري said…

    والله يا عبد الرحمن بلدنا دي بقت حكايتها حكاية في موضوع الافراح دي اللي بتبدأ من اولها بما يغضب الله ده شئ وتاني شئ انها بتبقى اقول ايه بس...يعني بيشتغل فيها اغاني غريبة كده بقت شغاله في كل حتة في مصر والعنب والبلح،الا انه فيه اغنية ميه ميه اصبحت اذني تستبقلها بعض الشئ بتاعت دنيا خربانه دي كمان يمكن تكون معبره شويه..!:D

    وبعدين انا معاك في كل اللي عملته انته ده ومش معاك انك حذفت كلام ولا قبلت كلامهم في البيت..:)

    بس انا موقفي كان سيكون مغاير ليك لو كنت مكانك..مكنتش هروح اصلا خالص مش عشان اي شئ الا لأنه جو الفرح اصلا مبقاش بينفع معانا في ظروفنا دي..

    احنا ممكن نقعد نقضيها سري للغاية و حصاد اليوم احسن..

    وبعدين انته واروى اهدوا يعني مش كده هتتخنقوا مين اللي يمنى بتاعته هيه اللي عسل..يا عم انتوا الاربعة عسل..:D

    موعدنا البوست الجاي

     
  • At 18 February 2007 at 15:07:00 GMT, Anonymous mdam_dr_nasr said…

    الله يكرمك يا عبد الرحمن..فعلاً أضحكتنى برغم إنك مأزوم ..على فكرة أنا دخلت على مدونتك لإن موضوع الفالنتين المنشور ليك على أحد المجموعات شدنى ..الإسلوب و الأفكار هايلة
    نرجع بأه للفرح ..و اللى واضح إن شكله الإسلامى لم يصل بعد للعائلة..يعنى قصدى محدش لسه جربه فى العيلة..و بالتالى بيكون خايفين منه ..و على إعتبار إنها ليلة فى العمر (كما يدعون) فلا داعى للتجربة فيه.. عموماً تصرفك فى رأيى سليم جداً ..و إنوى من الآن إن فرحك يكون تجربة أولى للشكل الإسلامى فى العائلة..بعدها تأكد إن فرح يمنى بإذن الله لن تخرج منه

     
  • At 18 February 2007 at 16:41:00 GMT, Blogger AbdElRaHmaN said…

    بسم الله
    بداية .. أهلا بيك معانا عمي جندي الله
    فرحت كتيرا بمشاركتك
    ووضحت فكرتك تماما
    الفكرة اللي انا هقولهالهم في الزفاف هي هتكون الفصل بس كمرحلة مبدأية ..
    ولو وافقوا على كده
    بعدها كل شيء يتحل ان شاء الله
    عموما .. تعليق جميل
    شكرا كتير يا سيدي
    سلام

     
  • At 18 February 2007 at 16:43:00 GMT, Anonymous Anonymous said…

    هو انا هقول حاجة واحدة بس ..

    الموسيقى السلو دي كانت سلو ليه

    وحاجة كمان واحدة

    رأيي إنك كده كل ما تشوف موقف وتنسحب منه مش كويس ..

    ده رأيي يمكن رأيك انت لا




    ... رجل

     
  • At 18 February 2007 at 16:46:00 GMT, Blogger AbdElRaHmaN said…

    هههههههههههههههههههههههههههه
    ضحكت كتير من تعليقك يا محمد
    فعلا حلو اوي
    ربنا يخلليك يا سيدي
    بالنسبة لانك معايا في اني خرجت من الفرح .. فأعتقد ان ده كان هيحصل من كتير اوي
    أما بالنسبة للحذف
    والله يا سيدي فكرت كتير .. ولقيت ان فعلا مينفعش أسيب الاسماء ..
    على المستوى الشخصي كتير من الناس يعرفوني بالتالي كان هيكون صعب عليا اني اقول اسماءهم قدام الناس اللي اعرفهم بالذات
    ههههههههههه
    ويمنى أختي خلليتها تقرأ كلمة عسل :D
    بتقوللك شكرا يا عمو
    يللا يا سيدي
    سلام

     
  • At 18 February 2007 at 16:49:00 GMT, Blogger AbdElRaHmaN said…

    مدام دكتور نصر
    فرحت كثيرا بتعليقك
    على كل حال .. قد نويتها منذ زمن
    أن يكون فرحي هادئا .. وبالتأكيد اسلاميا
    ووالله الاسلوب والمواضيع دي نعمة .. ربنا يكرمك والله .. اديتيني دفعه كبيره
    عموما .. أنتظر مشاركاتك ومتابعتك معنا
    أهلا بك على طول
    وسلام

     
  • At 18 February 2007 at 16:52:00 GMT, Blogger AbdElRaHmaN said…

    الأخ رجل ....
    أهلا بك يا سيدي
    أنا أتفق معك أن الانسحاب في كثير من الاحيان ليس صوابا
    لكني متأكد تماما أن انسحابي وقتها كان انسب شيء
    فلم أكن استطيع وقتها ان اغير من الامر شيئا
    وبالتأكيد لم أكن أود أن أفسد عليهم فرحتهم
    -------
    هههههههههههههههه
    اما الموسيقى السلو
    slow
    فهي سلو عشان تنفع للرقص الهادي
    هههههههههههههههههه
    ربنا يكرمك يا سيدي
    شرفت بتعليقك
    وسلام

     
  • At 18 February 2007 at 18:21:00 GMT, Blogger أمل غنيم said…

    رائع ياعياش ........
    وصفك ؛؛؛ وتصرفك أيضااااا
    يمكن هذه أول تجربة لك فى حضور أفراح العائلة .....
    لكنى ومنذ زمن توفقت عن حضور الأفراح وأكثر الأسباب كانت الاختلاط الذى ليس له أى داعى ؛؛؛ واللبس بيكون حاجة فظيعة كأن ربنا رفع عنهم التكليف يوم الفرح ...
    يوم الخميس الماضى كان هناك فرح لبنت احدى زميلات أمى وهى منتقبة وزوجها ملتحى وكانت أمى تتوقع ان يكون الفرح على الأقل ليس فيه اختلاط فقلت لها اسألى هياقاعة واحدة ولا اتنين وطبعا طلعت قاعة واحدة .... فرفضت الذهاب ولما رجعت أمى بعد نصف ساعة من ذهابها أيقنت أنى كنت على حق ....
    أعتقد أننا نملك التغيير ولكن لنبدأ بأنفسنا ونحاول أن نظهر فرح اسلامى ...
    من المؤكد أنك حضرت الفرح الجماعى الذى أقامه الاخوان عندنا العام الفائت فى المنصورة ...
    كان غاية فى الروعة والتنظيم والجمااااااال ( كفاية أأشرف زهران )
    ملحوظة هاامة : اعتد على هذا الأمر ولكن فى المرة المقبلة حاول أن تظهر لهم ان هناك مساحة أخرى للاحتفال ....
    تحيااتى لك ....
    ومبروك للعروسين ....

     
  • At 18 February 2007 at 19:00:00 GMT, Blogger AbdElRaHmaN said…

    أستاذة أمل ..
    جزااااكم الله خيرا على التعليق
    والله انا خلليت والدتي تقرأ التعليق بتاعك ومن ثم تعليقات الاخوة اللي فوق
    أخطر كلمة في التعليق
    ---
    أعتقد أننا نملك التغيير ولكن لنبدأ بأنفسنا ونحاول أن نظهر فرح اسلامى
    ---
    نعم فعلا
    كلنا يملك التغيير الذي يمكنه من العمل على تعديل الواقع للأفضل
    ---
    وبالطبع كنت في الفرح السنة اللي فاتت وأفراح كثيرة أخرى
    فأنا ذكرت مثلا في التدوينة ابن عمتي اسلام
    هذا كان فرحه اسلامي
    وإحدى أخواته البنات كان فرحها اسلامي وكان هناك فيه اشرف ومحمد نجيب
    عموما ..
    تحياتي
    وجزاكم الله خيرا مرة أخرى على متابعتكم
    والسلام

     
  • At 19 February 2007 at 01:57:00 GMT, Anonymous محمد غفاري said…

    ايه يا عم عبده انت تتتبع ردودي في ارجاء البلوغ سبوت ولا ايه ...

    ماشي يا سيدي :)

    اما عن يمنى دي بقى فحكاية تانيه لأنه يومي كله النهارده من اوله اطفال وبراءة اطفال وصور اطفال قولها اني بيحبك اوي ولو كنت اعرف انها هتشوفها كنت قلتلها لوحدها هيه بس مش انتوا الاربعة ..:)

     
  • At 19 February 2007 at 06:23:00 GMT, Blogger AbdElRaHmaN said…

    طبعا يا عم محمد
    شرف لينا متابعتك
    سلامي

     
  • At 20 February 2007 at 13:04:00 GMT, Blogger المـ(همس)ـشاعر said…

    عملت الصح يا عبد الرحمن ..

    انا باتبع الاسلوب دا عادة

    بس بابدا قبل الفرح بكام يوم اركز اوى على انه لازم يكون فرح اسلامى و انه لو غير كده مش هاعرف اقعد و كده

    و أثناء الفرح يا دوب "اسماء الله الحسنى " و زفة الشموع بالموسيقى .. و أسلم على العروسة

    و اتكل على الله

    و بعد الفرح أبدى استيائى شزيه

    ماليش خنق بصراحة على الاعانى الهاطة الى نازله دى
    بالذات لو فيها العنب العنب

    لا حول و لا قوة الا بالله

    بس الحمد لله تخطيط مرحلة مهمة .. ان كتير من العيلة بقوا يقتنعوا انهم يعملوا الفرح اسلامى

    و بقى عند العيلة فناعة ان لو الفرح مش اسلامى .. احنا ما بنحضرش
    و همه عرافين كده:)

    اللهم ارنا الحق حقا و ارزقنا اتباعه و ارنا الباطل باطلا و ارزقنا اجتنابه

     
  • At 21 February 2007 at 11:39:00 GMT, Blogger Fadfada said…

    السلام عليكم و رحمة الله و بركاته
    هذه أول مرة أتشرف بزيارة مدونتك , و وجدت هذا الموضوع !!!0
    أسلوب قصصي (لذيذ ) جعلني أشعر بما شعرت به , خاصة أن هذا الأمر قد يمر به الكثير أو قد مر به الكثير من الشباب الملتزم , و يكون التصرف حسب الموقف و مدى تدهور الحالة
    و في موقفك أرى بالفعل أن الموقف قد تدهور كثيرا و كان يجب أن تفعل ما فعلت
    و قد لاحظت من خلال التعليقات أن المعظم قد اتفق على عدم ذكر الأسماء , و أنا اتفق معهم
    فقد رأينا نبينا صلى الله عليه و سلم عندما يوجه كلاما لأحد فيه حرج كان يقول " ما بال أقوام ... "0
    فكان من الممكن أن يتم تناول الموضوع بشكل عام دون تجريح لأشخاص بعينهم
    و في الختام
    أهنئك على أسلوبك السلس البسيط و كلامك الطيب و فطرتك النقية و التزامك بتعاليم دينك
    محمد عبدالله

     
  • At 21 February 2007 at 15:35:00 GMT, Blogger AbdElRaHmaN said…

    آيه .. صح والله كده
    ده الطبيعي واللي المفروض كله يبقى عارفه
    لكن زي ما سولدجر قال .. الموضوع كله عرف .. وبيحاولوا يتجاوزوا الدين ب" كل الناس بتعمل كده " عموما شرفتي المدونة كتييييير
    وسلام

     
  • At 21 February 2007 at 15:42:00 GMT, Blogger AbdElRaHmaN said…

    فضفضة .. شرفت المدونة يا سيدي
    وانا الحمد لله مسحت الاسماء
    وربنا يكرمك على مدحك للأسلوب :)
    سلام .. وأتمنى أن تشرفني كثيرا

     
  • At 23 February 2007 at 07:27:00 GMT, Anonymous Anonymous said…

    يكفيني قول المصطفى ...

    (اللهم اهد قومي فانهم لا يعلمون )


    تحية للعروسين ...

    عاشقة الجوزاء ..

     
  • At 23 February 2007 at 11:51:00 GMT, Blogger AbdElRaHmaN said…

    نعم أختنا عاشقة الجوزاء ..
    لعل هذه هي سلوانا الوحيدة والاخيرة
    الدعاء لهم
    ولنا
    وسلام

     
  • At 28 February 2007 at 09:38:00 GMT, Anonymous همسة قلم said…

    ممممممممم
    تصرفك صح ياعبد الرحمن واسلوبك في الكتابة جميل كذلك ربنا يبارك في قلمك
    بس تعليق صغير اذا كنا بنتكلم عن الافراح الاسلامية فأنا بيحزني اشد ما يحزني انه الافراح بتاعت الناس الملتزمين اللى المفروض انهم قدوة تطلع بالمنظر ده

    يعني انا كنت بحضر فرح ابن واحد صاحب والدي الله يرحمه اصر انه اسرتنا تحضر فرحت انا واخويا بالانابة عن باقي الاسرة والمفروض انه الوالد واحد من حبايبنا لكن ابنه العريس مش كده ولا العروسة بس قلت في بالي اقل حاجة انه مش هيكون فيه هلس ولا كلام فاضي قوم الاقي اربع بنات في فرقة تبع القاعة حوالي 18 سنة كل واحدة فيهم بترقص على الموسيقى اللى شغالة من الفرقة على واحدة ونص!!

    وهما بدأوا من هنا وانا اتنفضت من على الكرسي من هنا وعلى دماغ اخويا ياللا قوم نمشي ايه المسخرة دي
    ورحت لعمو والد العريس قلت له ياعمو الحديث بيقول من رأى منكم منكرا فليغيره نقوم احنا اللى نعمل المنكر بايدينا
    وسبته ومشيت ماتحملتش اقعد اكتر من كده

    والحمد لله على نعمة الالتزام والاخوان والا الواحد كان راح في شربة مية

    اختك
    اسماء

     
  • At 28 February 2007 at 15:28:00 GMT, Blogger AbdElRaHmaN said…

    الأخت الفاضلة أسماء
    لكم مني تحية على مروركم الكريم
    بداية .. بالفعل كثير من أفراحنا التي يقيمها من يدعون انتماءهم الحركي والفكري والتنظيمي للإسلام .. لا تمت بصلة للأفراح الاسلامية
    والحمد لله على تلك النعم
    لكم سلام

     
  • At 9 July 2007 at 20:05:00 GMT, Blogger ** white rose ** said…

    اهلا
    ازيك يا عبدالرحمن عامل إيه ؟؟ من الواضح إنك عامل كارثه لول


    انا استغربت لما لقيت انك لمحت عن تصرفي في الفرح او اللي هو اني اقف مع صحبتي و قريبتي في خطوبتها اكيد انا مكنتش موافقه على الرقص السلو ولا على الفستان ولا الطرحه اللي انا قعدت نص الفرح اظبطها عشان ما تقعش و كنت اتمنى ان الخطوبه تتعمل بنات في مكان و ولاد في مكان او تكون قعده عائليه في البيت بس مش اكتر لكن انا شايفه ان مينفعش مكنوش معاهافي يوم فرحها و كل اللي عملته اني كنت بلف مع البنات في دايره و اصقف هو ده كل غلطي ؟ و انا حتى معملتش كده في خطوبه ولا فرح حد من قرايبي مع ان هم المفروض انهم اقرب لي من الاء لكن صعب عليا و عليها اننا منكونش مع بعض في وقت فرحنا و ربنا يهديهم و يهدينا في الافراح الجايه وعلى فكره بابا مزعلش مني يومها لان هو اللي سمح لي اني اقف معاهم و كمان كل البنات اللي في العيله كانوا معانا يعني مش انا بس


    كنت عايزه اعرف الكلام اللي اتمسح لو ينفع بلييييييز


    ملحوظه
    انا مزعلتش بس بلاش فضايح عائليه على الملأ بعد كده و ربنا يستر في فرحي و خطوبتي بعد عمر طويل ان شاء الله


    سلام

     
  • At 9 July 2007 at 20:08:00 GMT, Anonymous عبدالرحمن عياش said…

    هههههههههههههههههههه
    يا مس سارة
    أنا كنت كاتب بالاسماء
    و كنت شاتم فيكي انتي وآية
    بس يللا
    :D و الله كنتو متبهدلين بس قالولي أمسح
    و مسحت
    الكلام اللي كان مكتوب
    اني متضايق من اسلوبك
    و من أسلوب آية
    و هبلكم و انتو هناك يوميها
    بس

     
  • At 11 July 2007 at 01:57:00 GMT, Blogger ** white rose ** said…

    يا سلام ده انا كنت متبهدله و انا مش عارفه والله انت اكتر واحد مستفز شوفته في حياتي يا ابن العمه هنت عليك انا و العيال الطيبيين دول عشان تشتمنا بس انا اجدع منك و هسامحك بس مش هقبل انك تقول اناحنا كنا بنتنيل نرقص عشان اخلاقنا متسمحش يا بني وانت مقعدتش كل الفرح ده كان زمانك موت مشلول هههههههه
    و بليز قول لي الكلام اللي اتمسح



    سلام

     
  • At 1 September 2015 at 10:09:00 GMT, Blogger 文章 said…

Post a Comment
<< Home
 
My Name Is : AbdElRaHmaN Ayyash
I'm From : cairo, Egypt
And : I am just a guy, that wanna see his home "Egypt" in a great position in the civilized world , wanna talk to the other views' believers to hear from them and to make them listen to me , I'll try to show good model of a young Egyptian Muslim guy , who is believing in Islam as the only solution to all problems we face...... أنا مجرد شاب ، عاوز اشوف بلدي مصر ، في أحسن مكان وسط العالم المتحضر ، عاوز اتكلم مع أصحاب الرؤى المختلفة ، و عاوز اسمع منهم ، و عاوز اعمل من نفسي مثال كويس لشاب مصري ، مؤمن ان الاسلام هو الحل لكل مشاكلنا .
للفضوليين فقط

Free counter and web stats